Roro ni Mitinare aika Nakoraoi
Ti wetei ngkami, tarira aika kairake n te Nakoanibong ae te Aaron, bwa kam na teirake, ni kakoroi bukin te mwioko, ao n tauraoi ni beku ibukin te Uea.
Teuana te karaki ae tamaroa ibukin te reirei man Ana Boki Moomon, bon rongorongoia ana aomata Amon ake a karaoa te berita ae tabu bwa a na aki manga tabeki bwaai ni buaka ibukin kawawanakoan te rara. Ma “ngke a noora te kangaanga, ao karawawata aika bati…ake a karaoi I-Nibwaite nakoia, a rootaki n te nanoanga ao a ingainga nanoia ni kan tabeki bwaai ni buaka n tei ibukin abaia” (Aramwa 53:13). Bon Ereman ma tarina ake a kauringiia bwa a na karinea aia berita ae tabu ma te Uea.
E aki kaotaki nakoira mani koroboki aika tabu bwa antai te moan aomata ae kauringiia bwa natiia mwaane a tuai ni karaoa te aeka ni berita ae tabu are a tia ni karaoi aia karo. I tangiria ni kani kakoaua bwa tao bon temanna maibuakoia ataeinimwaane akekei bwa ngaia ma ana tabonroro a na kariaiakaki bwa a na “tabeki bwaai ni buaka, ao a na araniia bwa I-Nibwaite.
“Ao a karaoa te berita ae tabu bwa a na buaka ibukin inaomataia I-Nibwaite, eng, ni kamanoa te aba n anga maiuia iai” (Aramwa 53:16–17).
Aei bon te mwakuri ae korakora aei irouia ataeinimwaane ake 2,000 mwaitia, ake a bon karako aia ririki. N are e taekinaki ni koroboki aika tabu: “A onrake n te ninikoria, ao te ribunnang ma te kakamwakuri, ma nooria, tiaki ti aei—bon mwaane aika a kokoaua n taainako ni bwaai ni kabane ake a karaoi ake a mwiokoaki iai.
“Eng, bon ataeinimwaane aika a kokoaua ma n ata te riai, bwa are a tia n reireiaki bwa a na kaawakin ana tua te Atua ao n nakonako ma te etieti imatana.” (Aramwa 53:20–21).
Nikiran te rongorongo e taekinaki bwa ataeinimwaane akekei a buaka ma te ninikoria ni kaitaraia te tanga n I-Remwanaite aika ikawai ma ni mwatai riki kaaina. N ana karaki aia tia kairiiri, are Ereman, “a buaka ma korakoran te Atua;…ao ma te mwaaka ae korakora a buakaniia I- Remwanaite ake a maakuia; ao ibukin aei a taenikai I-Remwanaite n riki bwa buure n te buaka” (Aramwa 56:56).
Iangoa anne! Ataeinimwaane aikai a bon tauraoi n te maiu n tamnei ao n rabwata, a boni korakora n te aro are a maakaki irouia aia kairiribai ake a riki bwa taenikai! E ngae ngke a ikoaki ni kabane kairake n ataeinimwaane ake 2,000 mwaitia n te buaka n te tai ae ti teuana ke teuana riki, akea ae mate (tara Aramwa 57:25). Ni manga taekina ana taeka Ereman ngke e taku, “Ao ti bon bukinna bwa e riki man mwaakan te Atua ae kamimi, ibukin korakoran aia onimaki n te bwai are a tia n reireinaki iai bwa a na kakoauaa—bwa iai te Atua ae momotiraoi, ao ngke akea aia nanokokoraki, a bon tautauaki mauria ni mwaakana ae kamiimi” (Aramwa 57:26).
Taariu, n te bong aei ti a bon mena naba ibuakon te buaka are n aanga tabeua e boni kakamaaku riki, e onrake riki ni kaangaanga, nakon te buaka are imarenaia I-Nibwaite ao I-Remwanaite. Ara kairiribai e rabakau ni kamwane ao a bati ana kunemwaan. Ti buaka ma Rutibero, taman keewe nako, ana kairiribai ni kabane bwaai aika raraoi, a etieti ao ni mimitong. E koaua ae ti maiu ngkai n te tai are e taku ngkoa iai Bwauro n ana taetae ni burabeti bwa “a na tauti, a na kanibwaibwai, a na kamoamoa ma ni kainikatonga, a na taetae buaka te Atua, a na rawa n ongo irouia aia karo, a na bangaaomata ao a na rawa ni karinerine, a na kabuakaka,
“N akea te tangira ae kororaoi irouia, taan urui booraraoi, taan uarao, a na kakamaaku, a na kabuakakai bwaai aika a raraoi,
“… taan tangira te kaibwbawaru nakon tangiran te Atua;
“A na baka n tangira te Atua, ma a na kaakea mwaakana: tannako mairouia naakai” (2 Timoteo 3:2–5).
Kaanga kam a tia ni kakaitara ma baikai, tariu? N au taratara titebo ma ake iaon te terewition.
Bon “taai ni kakamaaku aikai.” Ti buaka ibukin tamneia aomata. Te kairiribai e imanono ma n aki bwabwara nanona. E a karekeia ana konana n te tai ae akea tokina n te mwaiti ae kanako nano. Ao e aki kan katoka ana waaki.
Ngkai ti kakaitau ibukiia kaain te Ekaretia ake a tia ni karaoa ae bati ibukin te koaua ao te eti, I kan taekinna ma te koaua nakoimi bwa e aki tau naba aei. Ti kainnanoa riki te buoka. Ai ngaia, are n aroia ana aomata Amon ngke a tarataraia natiia mwaane bwa taan kakorakoraia kaain aia taanga ni buaka ni kaitaraia I-Remwanaite, ti a tarataraingkami, raraou aika kam kairake n te Nakoanibonga ae te Aaron. Ti kainnanoi ngkami. N aron ana tautia n ataeinimwaane Ereman ake 2,000, ngkami naba natin te Atua mwaane n tamnei ao kam kona ni kakorakoraaki man te mwaaka ma ieta bwa kam na kamanoa Abanueana. Ti kainnanoi ngkami bwa ti na karaoa te berita ae tabu, n aroia naba ngke a karaoia. Ti kainnanoi ngkami bwa kam na kakoroa raoi nanon te ongeaaba ao ni kakaonimaki, n ai aroia naba.
Are ti kainnanoia ngkai bon te roro ni mitinare ae korakora n rongorongo te Ekareria ni kawa. Ti kainnanoia ake a tau, iai rabakauia, mitinare aika kiangang n te anua n tamnei n aron, ana taanga n ataeinimwaane Ereman ake 2,000, a “onrake n te ninikoria, ao te ribunang ma te tamwaakai” ao ake a bwaina “te koaua n taainako ni bwaai ni kabane [ake] a mwiokoaki iai” (Aramwa 53:20).
Kakauongo nakon taeka akanne, tariu aika kairake: Ninikoria, karitoa, korakora, tamwaakai, kokoaua. Ti aki kainnanoia ataeinimwaane aika a ngoretaia n te anua n tamnei ao a nanououa. Ti aki kainnanoiko bwa ko na ti kanoa te tabo, ti kainnanoa tamneim ae bwanin. Ti kainnanoia mitinare aika, a ewenako, iango mwaaka, taua ma nanoia ake a rabakau ni kakauongo ao ni kaeka nakon ana wirikiriki te Tamnei ae Raoiroi. Tiaki aio te tai ibukiia naake a ngoretaia n te anua n tamnei. Ti aki kona ni kanakoko n te mitiion bwa ko na manga kamarurungaki, kaetaki, ke ni karekea am koaua. Bon akea ara tai ibukin anne. Ti kainanoiko bwa ka na onrake n te “kaantaninga, onimaki, tangira ae kororaoi, ma nanom ae taratara mimitongin te Atua” (tara D&C 4:5).
Ngkai ngai ana abotoro te Uea ae Iesu Kristo, I weteiko bwa ko na moanna ma ngkai—n te tairiki aei—bwa ko na bwanin, ao n tau n akea tangiran te kanuanga. Motinnanoia ao anga ngkoe nakon te Atua bwa man te tai aei ko na kakorakorako ni kawakina nanom, baim, ao am iango bwa a na itiaki ma n aki bareka man aekakin nako te kaibwabwaru. Motinnanoia bwa ko kararoai aaro ni bwaitingako n aron ae ko na kararoa te aoraki ae e kakamaaku, bwa bon anne arona. Motinanoia bwa ko na aki ringa te moko, manging, ao bwainaoraki ake a tabu roroko. Motinnanoia bwa ko na kokoaua. Motinnanoia bwa man te tairiki aei ao ko na aki kabareka rabwatam ke ni kamanenai taeka aika a kammaira ao aki riai ni otinako mairoun te tia uouota te nakoanibonga.
Ao tiaki ti anne ae ti kaantaningaia mairoum, tariu aika kairake. Ti kaantaningaiko bwa e na iai am atatai ao am koaua matoatoa, n ana euangkerio are kaokaki Iesu Kristo. Ti kantaningaiko bwa ko na mwakuri mwaaka. Ti kantaningaiko bwa te tia karaoi berita aika tabu ao ni kaawakin berita aika a tabu akanne. Ti kantaningaiko bwa te mitinare ae ko na kakoroa nanon ara rongorongo ae kakukurei.
Kaantaninga aikai a mwaiti aroia. Ti ata anne, ma ti aki karautaeka ibukiia. A kaota ana kainibaire te Uea ibukim ngke ko anganaki te Nakoanibonga ae te Merekitereka, ibukin rinim n te tembora, bwa ko na beku bwa te mitinare, ao n riki bwa te buu te mwaane ae raoiroi ao te karo. Akea te bwai ae boou ma ni baikai, akea ae ko tuai ma n ongoongo rimoa n taai aika a bati. Ma n te tairiki aei ti wetei ngkami, tarira aika kairake n te Nakoanibong ae te Aaron, bwa kam na teirake, ni kakoroi bukin te mwioko, ao n tauraoi ni beku ibukin te Uea.
A mwaiti ibuakomi aika a tia ni moana te waaki aei, ao ti kamoamoai ngkami ibukin taumi ma ami aki bwarannano. Ibukiia naake a tuai, ke a moana aia katauraoi man te tairiki aei. Ngkana ko ataia bwa iai kabwakam ni bwaai ake I tia n taekin, motinnano bwa ko na moana te bitaki ae riai—ni moanna ma ngkai. Ngkana ko taku bwa ko kainnanoa te taetaenikawai ma tamam ao am bitiobi ibukin buure ake ko a tia ni karaoi, tai tataninga; karaoia ngkai. A na buokiko rinanon te waaki ni bitaki are e na kairiko nakon am tabo ae kaain te roro ni mitinare ae korakora.
Taiaoka ata aei: te kainibaire are e bairea tauia taan beku ni mitinare e a tia ni karietaaki riki. Te tai are ko na nako ni mitinare ao ko a raira naba nanom n am tai ni moana am beku e a toki. Ko ata te bwai ae I taekinna, ke e kanga, tariu aika kairake? Tabeman ataeinimwaane a kairua n aia iango are aongkoa a kona ni irekereke ma bwaai aika aki riai ao ngkana e koro 18 1/2 ao te iterana aia ririki a kona ngkanne n rairi nanoia ao n nako ni mitinare n 19 aia ririki. Ngkai e koaua bwa a kona n rairi nanoia man aia bure, a kona naba n aki tau bwa a na beku. E tamaroa riki bwa kam na kaawakina itiakimi ao n ninikoria ni karaoan te bwai ae beebete n aron:
-
Karikirakea te itoman n tataro ma Tamaia are i Karawa.
-
Kaawakina tabun te bong ae te Tabati.
-
Mwakuri ao kaikoa mwakoron am bwakabwai inanon am boki ni kaiko mwane.
-
Kakabwaka am kabwiianibwai ae bwanin ma n eti.
-
Taubang n am tai ae ko kabanea n takakaro n te kombiuta ao ukoukori waaki ni kakakibotu aika a kamarurung. Iraua rabakaum ae ko kona ni karaoia n am tai n takakaro n te kombiuta a na akea manena nakon am kona n riki bwa te mitinare ae raoiroi
-
Angan te Uea am tai riki ae bati ni kamatebwai man koroboki aika tabu ao ni karekea ootam n taian rongorongo are ti na kaongoa te aonaaba.
-
Beeku ibukiia tabeman ma n tibwauaa am koaua ma ngaiia.
Ngkami kaaro, iai nakoami ae boongana ibukin waakinan te katauraoi aei. Ti ataia bwa te kabanea ni kakawaki n namakin are kam kona ni katauraoia mwaane nakon te Nakoanibonga ae te Merekitereka, te mare, te nakoa ni karo bon te utu. Ngkana a oota raoi natimi mwaane n te reirei are e kainnanoaki ibukin te karo ae kakaonimaki, a na tauraoi ni karaoa te mwakuri ni mitinare. Te kananokaawaki, a mwaiti kaaro ake a katibanakoa te mwioko ae akea tokina aei. Kam kona n taku bwa bitiobi ao taan reirei n te tieminari, reirei n Tabati, taan reirei irouia ataeinimwaane ao taani kairiiri a rabakau riki nakoia kaaro ni kaungaia natiia mwaane. Bon tiaki ngaia anne. Ngkai taan kairiiri n te ekaretia a boongana aia katauraoi nakoia natimi mwaane nakon te nakoanibonga ao te mitinare, e tei te Ekaretia bwa te bwai ni ibuobuoki nakoim. Tiaki te tia onomwi ibukin ami anga reirei aika a kairaki mairoun te Atua, am kairiiri, ao am kaetieti.
N tokina, ngkana ti “karieta naba te kainibaire” ibukiia natimi mwaane ngkana a riki bwa mitinare, are nanona bwa ti “karieta naba te kainibaire” nakoimi. Ngkana ti kantaningaia aika a mwaiti riki, nanon anne bwa ti kantaninga ae bati riki mairoum ao buum naba. Uringia, ana tautia aikai kairake Ereman ake 2,000 aika a kakaonimaki ibukina bwa “a tia n reireinaki bwa a na kaawakina Ana tua te Atua ao n nakonako n etieti imatana” (Aramwa 53:21)—ao reireinaia a roko ma ni mweengaia.
Tabeman kaaro a taku bwa akea kariaiakaia bwa a na titiraki taun natiia. A taku bwa bon anne taben te bitiobi n ti ngaia. Kaaro, tiaki ti iai kariaiakami n ata taun natim, bon mwiokoami naba. Bon tabemi n ataia natimi bwa tera ae a kakaraoia ni kaineti ma te maiu n tamnei ao rikirakeia. Ko kainnanoia n tirobaea aia kaangaanga ao tabeaiangaia ngkana a tibwauaia ma ngkoe. Titiraki aekan titiraki ni kaineti ma tauia natimi, ao tai kariaia baika a aki riai n aroaroia.
Angiin te tai ara bitiobi a tia n reireiniia aia roronrikirake bwa na marooro ma aia karo ibukin aia kaangaanga ake a kaitara ma ngaai. Te waaki anne e na riai n tabekaki man are te iterana. Kaaro ake a na atai bwaai ni kabane ake a riki ni maiuia natiia ao a na atai baikanne imwaiin ae e ataia te bitiobi. A na riai n reireiniia natiia ao n airi ma ngaia nakon te bitiobi ngkana e riai anne ibukin te kabanea n rairannano ae bwanin. Ngkai ngaia taan motikitaeka inanon Iteraera te bitiobi ma te titeiki beretitenti a baireia bwa antai ae tau man ana itera te Ekaretia, ma kaaro, bon tabemi ae akea tokina te maiu n tamnei ae raoiroi ibukiia natimi. Taiaoka taua nnemi ae te tia anga reirei, tia ibuobuoki, tia kairiiri n te nakoanibonga, ni katauraoia natimi ni uouota te Nakoanibonga ae te Merekitereka ao ni beku bwa te mitinare.
Ao ngkai, aio te taeka nakoimi bitiobi. I a ataia bwa a mwaiti ataeinimwaane ake akea tamaia ni mweengaia. N aio ngkanne, kamanena bwain te Ekaretia n nooria bwa kaain te Nakoanibonga ae te Aaaron aikai a reireinaki irouia kaain te Nakoanibonga ae te Merekitereka ake a kona ni buoka katauraoiaia nakon aia beku ae kakaawaki aei. Iaomi ngkami bitiobi ao ami titeiki beretitenti e tiku te mwioko ni katebenakoia ti ataeinimwaane ake a tau aia iango ni kaitarai kaangaangan te mwakuri ni mitinare. Tariu, motikitaeka raoi ma te wanawana ao uringnga bwa tiaki ni kabane ataeinimwaane a kainnanoa weteaia bwa a na beku n raroa ma mweengaia; tabeman a rokoraoi riki ngkana a beku iaan ana kairiiri te mitinare n te uoote.
Iai au taeka tabeua ake N na taekin nakoia naake a mwakuri ngkai ni mitinare. Ti karabwai ngkami ibukin kukurein nanomi ni beku. N te tairiki aei bon te tai ae tamaroa bwa kam na tirobaea ami mwakuri n nooria bwa kam roko n te kainibaire. E na buokiko am mition beretitenti ni karaoi bitaki aika riai bwa kam aonga n riki bwa ana toro te Uea ae Iesu Kristo aika raoiroi ma ni tauraoi n anga maiuia.
Ni kabaneana, nakoia naake a tia ni beku, taiaoka uringnga bwa kam a tia ni kainaomataki man ami mition ma tiaki man ami Ekaretia. Kam kabanea uoua te ririki bwa taan tia tei ibukin te Uea ae Iesu Kristo. Ti kaantaningaiko bwa ko na tara ni katotongia Ana reirei. Ko na taraaki bwa anne arom. Mwakuri n ai aron naba anne. Tai kakairi ni waakin te aonaaba ake a bwabwainaki n taai aikai. Kam tamaroa riki nakon anne. Ngkana ko a tia n tibanako, ngkanne karaoa ae riai ni karaoaki ni kaeta arom. Tuua ibukin te kukurei ao te tokanikai imwiin am mitin a kuri n titebo ma ake ko iri nanoia n am tai ni mitinare: tataro mwaaka, ao bwabwaina te ongeaba. Tai tabwara ni kakaea buum bwa ko na kukurei ni maiu ma ngaia. Uaia ni beku ibukin te Uea ao ni kaikawaia te roro ae e na roko.
Tariu, I a tia n taetae n aki karariki n te tairiki aei. Au kaantaninga bwa kam kona n namakina te tangira ao te tabeaianga man te Moani Beretitentii ao aia Koorum Abotoro ake Tengaun ma Uoman ao taani kairiiri riki ake tabeman n te Ekaretia ngkai ti tuangi ngkami bwa kam na katauraoi ngkai n raoniira ni karekean te kakabwaia man te euangkerio are e a tia ni kaokaki nakoia aomata ni kabane n te aonaaba. N tatabemani ngkami kam boni kakaawaki, ao ti tangiri ngkami bwa e na tokanikai ma ni kawakinaki n te bobuaka ibukin tamneia natin Tamara are i Karawa. E bia kakabwaiai ngkami te Atua ma te ninikoria bwa kam na “kokoaua n taainako” (Aramwa 53:20) ao ma n nooraba n ataia bwa antai ngkoe ao tera ae katauraoia te Uea ibukim bwa ko na karaoia, I tataro n aran te Uea ae Iesu Kristo, amen.