Jekjōn 95
Revelesōn letok kōn Josep Smith Rikanaan eo, ilo Kirtland, Ohio, Juun 1, 1833. Revelesōn in ej wōnm̧aanļo̧k in naan in tōl ko jān lan̄ n̄an kalōk juon em̧ n̄an kabun̄-jar im leļo̧k naan in tōl, m̧weo im̧ōn Irooj (lale jekjōn 88:119–136).
1–6, Ro Rekwōjarjar ej kauweiki er kōn likjab ko aer n̄an kalōk m̧weo im̧ōn Irooj; 7–10, Irooj ekōņaan kōjerbal m̧weo Im̧ōn n̄an kōjeraam̧m̧an armej ro An kōn kajoor jān ijo eutiej; 11–17, M̧weo rej itōn ajeļo̧ke āinwōt juon jikin kabun̄-jar im n̄an jikuuļ eo an Rijjilōk ro.
1 Em̧ool, āindein Irooj ej ba n̄an kom̧ ro Ij iakwe er, im kom̧ ro Ij iakwe er Ij barāinwōt kauweik er bwe jero̧wiwi ko aer ren maron̄ jeoriļo̧k, bwe kōn kauwe in In kōpooje juon iaļ n̄an lo̧mo̧o̧r eo aer ilo aolep men ko jān kapo, im Iaar iakwe kom̧—
2 Kōn menin, aikuj in kajim̧we kom̧ im aikuj kajutak kom̧ n̄an kauwe im̧aan Meja;
3 Bwe kom̧ ar jero̧wiwi ņae Eō juon jero̧wiwi eo ekanooj nana, ilo e kom̧ ar jab watōk kien eo eļap ilo aolep men ko otemjeļo̧k, ko Iaar liwōj n̄an kom̧ kōn ekkal eo an m̧weo Im̧ō;
4 Bwe pojak eo Iaar karōke n̄an kōpooje rijjilōk ro Aō n̄an jepi jikin kallib eo Aō n̄an iien in āliktata, bwe In maron̄ kakūrm̧ool jerbal in ekabwilōn̄lōn̄ Aō, bwe In maron̄ lutōkleplep Jetōb eo Aō ioon aolep kanniōk—
5 A lo, em̧ool Ij ba n̄an kom̧, bwe elōn̄ ro kar kapit er ilubwiljimi, ro Iaar kūr er a jet wōt iaer kar kāālete.
6 Er ro jab kāālet er rekar jero̧wiwi juon jero̧wiwi ekanooj nana, ilo e rej etetal ilo marok jilōn̄lōn̄ ilo lukwolpān raelep.
7 Im kōn un in Iaar lewōj n̄an kom̧ juon kien bwe kom̧in kūri kwelo̧k ekwōjarjar eo ami, bwe jitlo̧k ko ami im ami būrom̧ōj ren maron̄ wanlōn̄ļo̧k ilo lo̧jiln̄in Irooj in Sabaot, eo jān ukok eo an, ej rikōm̧anm̧an eo an raan eo m̧oktata, eo jinoin im jem̧ļo̧kin.
8 Aaet, em̧ool Ij ba n̄an kom̧, Iaar lewōj n̄an kom̧ juon kien bwe kom̧in kalōk juon em̧, m̧weo ie Iaar karōk e n̄an kōjeraam̧m̧an ro im Iaar kāālet kōn kajoor jān ijo eutiej;
9 Bwe en̄in ej kallim̧ur eo an Jemān n̄an kom̧; kōn menin Ij jiron̄ kom̧ n̄an pād, em̧ool āinwōt rijjilōk ro Aō ilo Jerusalem.
10 Mekarta, ro rikarejera raar jero̧wiwi juon jero̧wiwi ekanooj nana; im aitwerōk ko rekar jebartok ilo jikuuļ eo an rikanaan ro; eo ekar kanooj nana n̄an Eō, ami Irooj ej ba; kōn menin Iaar jilkinļo̧k er n̄an kauwe.
11 Em̧ool Ij ba n̄an kom̧, in ej ankilaō bwe kom̧in kalōk juon em̧. Eļan̄n̄e kom̧ij kōjparok kien ko Aō enaaj wōr ami kajoor n̄an kalōk e.
12 Eļan̄n̄e kom̧ij jab kōjparok kien ko Aō, iakwe eo an Jemān ejamin naaj wōnm̧aanļo̧k ippemi, kōn menin kom̧ naaj etetal ilo marok jilōn̄lōn̄.
13 Kiiō en̄in ej mālōtlōt, im ļōmņak eo an Irooj—m̧weo en ekkal, jab ilo̧kan jekjek eo an laļ, bwe Ij lewōj jaab bwe kom̧in mour ilo̧kan jekjek eo an laļ;
14 Kōn menin, en ekkal ilo̧kan jekjek eo me Inaaj kwaļo̧k n̄an kom̧ijel jilu, ro naaj jitōn̄ im kapit er n̄an kajoor in.
15 Im dettan enaaj lemn̄oul im ļalem ne ilo depakpakin, im en jiljinon̄oul ļalem ne ilo aetokan, ilo wōrwōr eo ijo ilowaan.
16 Im m̧ōttan eo ettā ilo wōrwōr eo ilowaan en jenolo̧k n̄an Eō n̄an ajiļo̧k kwōjkwōj eo ami, im n̄an ami kwaļo̧k naan, im jitlo̧k eo ami, im ami jar, im ajitok n̄an Eō ikdeelel ko ami rekwōjarjartata, ami Irooj ej ba.
17 Im m̧ōttan eo eutiej ilowaan wōrwōr eo ilowaan en jenolo̧k n̄an Eō n̄an jikuuļ eo an rijjilōk ro Aō, Nejin Aman ej ba; ak, ilo bar jet naan, Alphus; ak ilo bar jet naan, Omegus; em̧ool Jisōs Kraist ami Irooj. Amen.