Jekjōn 89
Revelesōn letok kōn Josep Smith Rikanaan eo, ilo Kirtland, Ohio, Pāpode 27, 1833. Āinwōt juon waļo̧kin an ritōl ro im̧aanļo̧k an kabun̄ in kōjerbale tobakko ilo kwelo̧k ko aer, kar tōl Rikanaan eo n̄an koļmānļo̧kijeņ kake men in; kōn menin, eaar kajjitōk ippān Irooj kake. Revelesōn in, jeļā kake āinwōt Naan in Mālōtlōt, kar waļo̧k eo.
1–9, Kōjerbale wain, dān ko rekajoor, tobakko, im dān ko rebwil ej kōmo̧iki; 10–17, Mar ko, leen wōjke ko, kanniōk, im grain rej kōmālim n̄an an armej im mennin mour kōjerbali; 18–21, Pokake kien gospel eo, ekobaik Naan in Mālōtlōt, ej bōktok kōjeraam̧m̧an ko an kanniōk im an jetōb.
1 Juon Naan in Mālōtlōt, n̄an em̧m̧anļo̧k eo an ko̧o̧njeļ eo an pris utiej ro, rej kuk ilo Kirtland, im ilo kabun̄ in, im barāinwōt ro rekwōjarjar ilo Zaion—
2 Jilkinļo̧k āinwōt naan in iakiakwe; jaab jān kien ak kipel, ak jān revelesōn im naan in mālōtlōt eo, im kwaļo̧k ļo̧k koņ eo im ankilaan Anij ilo lo̧mo̧o̧r an kanniōk an aolep ro rekwōjarjar ilo raan ko āliktata—
3 Eo letoke kōn juon pedped ippān kallim̧ur, kakkoņkoņ tok n̄an maron̄ an rim̧ōjņo̧ im rim̧ōjņo̧tata in aolep ro rekwōjarjar, ro rej ak maron̄ kūr er ro rekwōjarjar.
4 Lo, em̧ool, āindein Irooj ej ba n̄an kom̧: Ilo waļo̧kin nana ko im kōttōbalbal ko me kōm̧m̧ani im renaaj pād ilo būruōn armej ro renana ilo raan ko āliktata, Iaar kakkōl kom̧, im kakkōl kom̧ im̧aanļo̧k, jān lewōj n̄an kom̧ naan in mālōtlōt in jān revelesōn—
5 Bwe toun wōt an jabdewōt armej idaak wain ak dān kajoor ilubwiljimi, lo ej jab em̧m̧an, im jab jim̧we ilo im̧aan mejān Jemāmi, ilo wōt ami kuktok ippān doon n̄an ajeļo̧k kwōjkwōj ko ami Im̧aan.
6 Im, lo, men in en wain, aaet, lukkuun wain in raan grep eo, jān ami make kōm̧m̧an.
7 Im, bar juon alen, dān ko rekajoor rej jab n̄an lo̧je, ak n̄an kwaļe ānbwinnōmi.
8 Im bar juon alen, tobakko ej jab n̄an ānbwin, im barāinwōt jab n̄an lo̧je, im ej jab em̧m̧an n̄an armej, ak ej juon mar n̄an mao ko im aolep kattle enan̄inmej, n̄an kōjerbale kōn ekajet im kapeel.
9 Im bar juon alen, dān ko rebwil rej jab n̄an ānbwin ak lo̧je.
10 Im bar juon alen, em̧ool Ij ba n̄an kom̧, aolep mar ko rej n̄an ājmour Anij eaar kōmālim n̄an ejaak, eddekļo̧k, im kōjerbal an armej—
11 Aolep mar ilo tōre eo an, im aolep leen ilo tōre eo an; aolep men kein n̄an kōjerbali ilo koļmānļo̧kijeņ im kam̧m̧oolol.
12 Aaet, kanniōk barāinwōt in mennin mour ko im bao ko in mejatoto, N̄a, Irooj, Iaar kōmālim n̄an kōjerbal an armej kōn kam̧m̧oolol; mekarta reaikuj kōjerbali ejjab ļap;
13 Im ej em̧m̧an n̄an Eō bwe reaikuj jab kōjerbali, ilo iien wōt an̄ōnean̄ ko, ak iien m̧ōļo, ak n̄ūta.
14 Aolep grain ej kōmālim n̄an kōjerbal an armej im an mennin mour kan, n̄an rejetake an mour, jab wōt n̄an armej ak n̄an mennin mour in meļaaj, im bao ko in lan̄, im aolep mennin mour ko reawiia rej ettōr ak tōbalbal ioon laļ;
15 Im men kein Anij eaar kōm̧m̧ani n̄an kōjerbal an armej ilo iien ko wōt an n̄ūta im kanooj ļap in kwōle.
16 Aolep grain ej em̧m̧an n̄an kijen armej; āinwōt barāinwōt leen vine eo; eo ej kalle leen ko, men̄e ilo bwidej ak ilōn̄in bwidej—
17 Mekarta, wiit n̄an armej, im ko̧o̧n n̄an ox eo, im oat ko n̄an o̧o̧j eo, im rye n̄an bao ko imejatoto im n̄an piik, im n̄an aolep mennin mour ko imeļaaj, im barli n̄an aolep mennin mour ko kōjerbali, im n̄an dān in idaak ko rej jab bwil, āinwōt barāinwōt grain ko jet.
18 Im aolep ro rekwōjarjar rej keememej n̄an kōjparok im kōm̧m̧an ennaan kein, im etetal ilo pokake kien ko, naaj bōk ājmour ilo bwijjier im ņoņņoņmeej n̄an di ko dier;
19 Im naaj lo mālōtlōt im eļap mennin aorōk ko an jeļāļo̧kjeņ, em̧ool mennin aorōk ko ņooji;
20 Im renaaj ettōr im jab mōk, im naaj etetal im jab parōk.
21 Im N̄a, Irooj, ij leļo̧k n̄an er juon kallim̧ur, bwe enjeļ in ko̧kkure enaaj eļļāļo̧k jān er, āinwōt ro nejin Israel, im jab m̧ane er. Amen.