Jekjōn 4
Revelesōn letok kōn Josep Smith Rikanaan eo n̄an jemān, Josep Smith Sr., ilo Harmony, Pennsylvania, Pāpode 1829.
1–4, Jerbal peran ej lo̧mo̧o̧ren minister ro an Irooj; 5–6, Bōnjān ko an Anij ej kwaļo̧k ke rekkar n̄an jerbal in; 7, Men ko an Anij reaikuj pukoti.
1 Kiiō lo, juon jerbal ekabwilōn̄lōn̄ enan̄in waļo̧ktok ilubwiljin ro nejin armej.
2 Kōn menin, O kom̧ ro rej jino ilo jerbal in an Anij, lale bwe kom̧in jerbal n̄an E kōn aolepān būruōmi, ami maron̄, ļōmņak im kajoor, bwe kom̧in maron̄ jutak ejjeļo̧k ruōmi im̧aan Anij ilo raan eo āliktata.
3 Kōn menin, eļan̄n̄e ewōr ami ikdeelel n̄an jerbal n̄an Anij ej kūr kom̧ n̄an jerbal in;
4 Bwe lo meļaaj eo emouj epojak n̄an m̧adm̧ōd; im lo, eo ej bun̄raake sickle eo an kōn an maron̄, ejja in wōt ej likūt ilo im̧ōn kakkoņkoņ bwe en jab jorrāān, ak bōktok lo̧mo̧o̧r n̄an jetōb eo an;
5 Im tōmak, kōjatdikdik, iakwe-em̧ool im iakwe, ippān erreļo̧k eo wōt n̄an aiboojoj eo an Anij, ej kwaļo̧k ekkar eo an n̄an jerbal in.
6 Keememej tōmak, erreo, jeļāļo̧kjeņ, jatōr, lōjokmen, jeļā ņae, m̧wil em̧m̧an, iakwe-em̧ool, ettā, niknik.
7 Kajjitōk, im kwo naaj bōk; kaļļaļļaļ, im enaaj peļļo̧k n̄an eok. Amen.