Jekjōn 137
Juon visōn leļo̧k n̄an Josep Smith Rikanaan eo, ilo tampeļ eo ilo Kirtland, Ohio, Jānwōde 21, 1836. Tōre jab in ej ke rekar kōm̧m̧ani kain̄i ilo m̧aanjabpopo n̄an aje tampeļ eo.
1–6, Rikanaan eo ej lo ļeo jein Alvin ilo aelōn̄ selestial; 7–9, Katak eo kōn lo̧mo̧o̧ren n̄an ro remej ej kwaļo̧ki; 10, Aolep ajri rej mour ilo aelōn̄ selestial.
1 Lan ko rekar peļļo̧k ioom, im Iaar lo aelōn̄ selestial an Anij, im aiboojoj eo ijo, eļan̄n̄e ak jaab ilo ānbwin ak ilikin ijjab maron̄ ba.
2 Iaar lo tar-jān-jon̄an wōj eo an kōjām eo me ro rijolōte aelōn̄ in kiin̄ jab eo renaaj deļo̧n̄, eo me ekar āinwōt urur ko in kijeek rej jepooļe;
3 Barāinwōt tūroon eo ejjatōltōl an Anij, eo ioon ekar jijet Jemān im Nejin.
4 Iaar lo iaļ ko rewōj an aelōn̄ in kiin̄ in, ko jāllier kar āinwōt rekar kōm̧m̧ani kōn gold.
5 Iaar lo ro Jemād Adam im Ebream; im jema im jinō; ļeo jeiū Alvin, eo ekar kanooj aetok an kar kiki;
6 Im kar ilbōk kōn wāween an kar bōke juon jolōt ilo aelōn̄ in kiin̄ en, ilo jekjek in ke bwe eaar likūt mour in m̧okta jān an Irooj kar likūt Pein n̄an aintok Israel iien eo kein karuo, im kar jab peptaij n̄an jeorļo̧k in jero̧wiwi ko.
7 Āindein eaar itok ainikien Irooj n̄an eō, im ba: Aolep ro rekar mej kōn ejjeļo̧k jeļāļo̧kjeņ kōn gospel in, ro renaaj kar bōk e eļan̄n̄e naaj kar kōtļo̧k er n̄an pād wōt, renaaj rijolōte aelōn̄ selestial eo an Anij;
8 Barāinwōt aolep ro renaaj mej jān iien in m̧aanļo̧k kōn ejjeļo̧k jeļā kake e, ro renaaj kar bōk e kōn aolepān burueer, renaaj rijolōte aelōn̄ in kiin̄ en;
9 Bwe N̄a, Irooj, I naaj ekajet aolep armej raņ ekkar n̄an jerbal ko aer, ekkar n̄an ikdeelel ko an burueer.
10 Im iaar barāinwōt lo bwe aolep ajri ro rej mej m̧okta jān aer tōpar iiō ko in bōk eddo remour ilo aelōn̄ selestial in lan̄.