Jekjōn 119
Revelesōn letok kōn Josep Smith Rikanaan eo, ilo Far West, Missouri, Juļae 8, 1838, ilo uwaake owar eo an: “O Irooj! Kwaļo̧k n̄an ro karejeram̧ ewi jon̄an Am̧ aikuji jān m̧weiuk ko m̧weiien armej ro Am̧ n̄an juon-m̧ōttan-jon̄oul.” Kien juon-m̧ōttan-jon̄oul eo, āinwōt meļeļe kake rainin, kar jab letok n̄an Kabun̄ in m̧oktaļo̧k jān revelesōn in. Naan in juon-m̧ōttan-jon̄oul ilo jar eo bōki jān e im ilo revelesōn ko m̧oktaļo̧k (64:23; 85:3; 97:11) kar meļeļein ej jab juon-m̧ōttan-jon̄oul wōt, ak aolep joortak ko liļo̧k ilo m̧ōņōņō, ak mennin leļo̧k ko, n̄an jāān ko an Kabun̄ in. Revelesōn in ekar itok ālkin an ro Rikwojarjar kar jelm̧ae apan̄ ikkijien jāān ilo Missouri im Ohio jān wōt jerbal in ekkal eo an Kirtland Tampeļ; im kakkure ko ilo Jackson Kounty; im juon apan̄ in jāān eļap ilo aolepān laļ eņ. Armej ro Rekwojarjar raar barāinwōt wōnm̧aanļo̧k wōt im kalōk jukjukin pād ko ilo Missouri.
1–5, Ro Rekwōjarjar ren kōļļāik ļapļo̧k in men ko m̧weiier innām leļo̧k, āinwōt m̧ōttan-jon̄oul, juon-m̧ōttan-jon̄oul in ļapļo̧k eo aer kajjojo iiō; 6–7, Kooj in ba kake enaaj kokwōjarjar āneen Zaion.
1 Em̧ool, āindein Irooj ej ba, I aikuji aolep ļapļo̧k in men ko m̧weiier n̄an likūti ilo pein bisop eo an kabun̄ eo Aō ilo Zaion,
2 N̄an ekkal eo an m̧weo Im̧ō, im n̄an kōm̧m̧ane foundasōn eo an Zaion im n̄an priesthood eo, im n̄an m̧uri ko an Presidency eo an Kabun̄ eo Aō.
3 Im en̄in enaaj jinoin m̧ōttan-jon̄oul an armej ro Aō.
4 Im ālikin men in, ro āindein em̧ōj aer leļo̧k m̧ōttan-jon̄oul renaaj kōļļāik juon-m̧ōttan-jon̄oul jān aolep ļapļo̧k eo aer kajjojo iiō; im mennin enaaj kien jamin kōm̧akūti n̄an er indeeo, n̄an priesthood eo ekwōjarjar Aō, Irooj ej ba.
5 Em̧ool Ij ba n̄an kom̧, enaaj kūrm̧ool bwe aolep ro rej aintok doon n̄an āneen Zaion renaaj leļo̧k m̧ōttan-jon̄oul jān ļapļo̧k in men ko m̧weiier, im renaaj kōjparok kien in, ak naaj jab lo er tōllo̧ke n̄an pād ilubwiljimi.
6 Im Ij ba n̄an kom̧, eļan̄n̄e armej ro Aō rej jab kōjparok kien in, n̄an kokwōjarjar e, im jān kien in kokwōjarjar āneen Zaion n̄an Eō, bwe kakien ko Aō im ekajet ko Aō ren maron̄ kōjparoki, bwe en maron̄ ekwōjarjar tata, lo, em̧ool Ij ba n̄an kom̧, e ban naaj juon āneen Zaion n̄an kom̧.
7 Im en̄in enaaj juon jon̄ok n̄an aolep stake ko an Zaion. Em̧ool āindein. Amen.