Chitsauko 41
Pakumutswa vanhu vachapinda murufaro rusingaperi kana kuti mukusuwa kusingaperi—Kuipa hakuna kumbova kufara—Vanhu venyama havana Mwari panyika—Munhu wose anogamuchira zvakare pakudzorerwa twutsika nezvimwe zvose zvaakanga awana asati afa. Zvingangove makore 74 Kristu asati azvarwa.
1 Uye zvino, mwanakomana wangu, ndine zvimwe zvokutaura maererano nezvokudzorerwa pakare izvo zvakataurwa; nokuti tarisai, vamwe havana kunzwisisa magwaro, vakarasika zvikuru nokuda kwechinhu ichi. Uye ndinoona kuti pfungwa dzako dziri kutambudzika pamusoro pechinhu ichi. Asi tarisai, ndichakutsanangurira.
2 Ndinoti kwauri, mwanakomana wangu, zano rokudzorera rinopindirana nokutonga kwakarurama kwaMwari, nokuti zvakafanira kuti zvinhu zvose zvidzorerwe zvazvakange zvakaita. Tarisai, zvakafanira zve zvakarurama, maererano nesimba nokumuka kwaKristu, kuti mweya womunhu unofanira kudzorerwa mumuviri, uye kuti nhengo iri yose yomuviri inofanira kudzorerwa pakare.
3 Uyezve zvinopindirana nokuenzanisa kwaMwari kwakanaka kuti munhu anofanira kutongwa maererano namabasa ake; uye kana mabasa avo anga akanaka muupenyu huno, nezvido zvemwoyo yavo zvanga zvakanaka, kuti ivowo zvakare, pazuva rokupedzisira, vadzorerwe kune izvo zvakanaka.
4 Uye kana mabasa avo anga akaipa vachadzorerwawo kune zvakaipa. Naizvozvo, zvinhu zvose zvichadzorerwa panzvimbo yazvo chaiyo, chinhu chose pachakabva—kufa kuitwe kusafa, chinoora chisazoora—kumutswa muchipinda murufaro rwusingaperi kuti mugare nhaka youmambo hwaMwari, kana kuti musuwe kusingaperi nokugara nhaka youmambo hwadhiabhorosi, chimwe kune rumwe ruoko, nechimwewo kune rumwe—
5 Mumwe anenge amutswa mukufara maererano nezvido zvake zvorufaro, kana muzvakanaka maererano nezvido zvake zvezvakanaka; mumwe mune zvakaipa maererano nezvido zvake zvakaipa; sezvo akasarudza kuita zvakaipa muswere wose wezuva zvakadarowo achawana mubairo wake wezvakaipa kana usiku hwauya.
6 Uye zvakangodarowo kune rumwe rutivi. Kana achinge atendeuka pazvivi zvake, akada utsvene kusvikira kumagumo emazuva ake, kana naizvozvo achawana mubairo woutsvene.
7 Ava ndivo vakanunurwa naIshe; hongu, ava ndivo vakatorwa, vakabviswa muusiku nerima risingaperi; saka vachamira kana kuputsika; nokuti tarisai, vanozvitongera pachavo, kuita zvakanaka kana zvakaipa.
8 Zvino, kutonga kwaMwari hakushandurwi; naizvozvo, nzira yakagadzirwa kuti uyo wose anoda akafamba mairi achaponeswa.
9 Uye zvino tarisai, mwanakomana wangu, usava nokumwe kutadzira Mwari wako pamusoro pemirau yedzidziso yake, iyo yakataura kuti usaita chivi.
10 Usafunge kuti, zvakataurwa maererano nokudzorerwa, kuti iwe uchazodzorerwa kubva muchivi uchienda murufaro. Tarisai, ndinoti kwauri, kuipa hakuna kumbove kufara.
11 Uye zvino, mwanakomana wangu, vanhu vose vari muugaro hwenyika, kana kuti ndingati muugaro hwenyama, kana kuti ndingati, vari munduru inovava nemumangetani ekuipa; havana Mwari munyika, vanopikisana nezvaMwari, naizvozvo, vari muugaro hunoita kuti varwisane nezvinoita kuti vafare.
12 Uye zvino tarisai, kudzorerwa kunoreva here kutora chinhu pachiri uchichiisa pasiri pacho, kana kuchiisa pane chinhu chakasiyana nacho?
13 Mwanakomana wangu, izvi hazvisizvo kwete; asi zvinoreva izwi rinoti kudzorera zvinoreva kudzorera zvakare chakaipa nechakaipa, chenyama nechenyama, cheutsinye necheutsinye—chakanaka nechakanaka; chitsvene nechitsvene; chakarurama nechakarurama; chine tsitsi nechine tsitsi.
14 Naizvozvo, mwanakomana wangu, ona kuti une tsitsi kune hama dzako; ita zvakarurama, tonga zvakarurama, nokuita zvakanaka nguva dzose; kana uchinge waita zvinhu zvose izvi uchagamuchira mubairo wako; hongu, uchazova netsitsi dzichapiwa kwauri zvakare; uchave nokururama kuchadzorerwa kwauri zvakare; uchave unodzorerwa kutonga kwakarurama zvakare; uchazowana mibairo yakanaka zvakare.
15 Nokuti icho chose chaunotumira kunze chichadzoka zvakare kwauri, chodzorerwa; naizvozvo, izwi rokuti kudzorera zvechokwadi rinorasa mutadzi, harimbomururamisa kana.