1 Ug nahitabo nga samtang ang mga disipulo ni Jesus mipanaw ug misangyaw sa mga butang nga ilang nadungog ug nakita, ug nagbunyag sa ngalan ni Jesus, nahitabo nga ang mga disipulo nagkapundok ug nagkahiusa sa hugot nga pag-ampo ug pagpuasa.

2 Ug si Jesus mipakita pag-usab ngadto kanila, kay nag-ampo sila sa Amahan pinaagi sa iyang ngalan; ug si Jesus miabot ug mibarog taliwala kanila, ug miingon kanila: Unsa ang inyong gusto nga akong ihatag kaninyo?

3 Ug sila miingon kaniya: Ginoo, gusto namo nga ikaw mosulti unta kanamo sa ngalan nga among itawag niini nga simbahan; kay may mga panaglalis taliwala sa katawhan kabahin niini nga butang.

4 Ug ang Ginoo miingon kanila: Sa pagkatinuod, sa pagkatinuod, sultihan ko kamo, ngano nga ang katawhan magbagulbol ug maglalis man tungod niini nga butang?

5 Wala ba nila mabasa sa mga kasulatan, ang giingon nga kamo kinahanglang modala nganha kaninyo sa ngalan ni Kristo, nga mao ang akong ngalan? Kay pinaagi niini nga ngalan kamo pagatawgon sa kataposang adlaw;

6 Ug bisan kinsa nga modala nganha kaniya sa akong ngalan, ug molahutay hangtod sa kataposan, ang mao maluwas sa kataposang adlaw.

7 Busa, bisan unsa ang inyong buhaton, buhata ninyo kini pinaagi sa akong ngalan; busa tawaga ninyo ang simbahan sa akong ngalan; ug tawaga ninyo ang akong Amahan pinaagi sa akong ngalan aron siya mopanalangin sa simbahan alang kanako.

8 Ug unsaon sa pagkahimo niini nga akong simbahan kon dili kini pagatawgon sa akong ngalan? Kay kon ang usa ka simbahan pagatawgon sa ngalan ni Moises nan simbahan kana ni Moises; o kon kana pagatawgon sa ngalan sa usa ka tawo nan simbahan kana sa tawo; apan kon kana pagatawgon sa akong ngalan nan kana ang akong simbahan, kon kana natukod sa akong ebanghelyo.

9 Sa pagkatinuod sutihan ko kamo, nga natukod kamo sa akong ebanghelyo; busa tawaga ninyo ang bisan unsang mga butang nga inyong tawagon, pinaagi sa akong ngalan; busa kon motawag kamo sa Amahan, alang sa simbahan, kon kini pinaagi sa akong ngalan ang Amahan maminaw kaninyo;

10 Ug kon ang simbahan natukod sa akong ebanghelyo nan ang Amahan mopakita sa iyang kaugalingong mga buhat diha niini.

11 Apan kon wala kini matukod sa akong ebanghelyo, ug natukod sa mga buhat sa mga tawo, o sa mga buhat sa yawa, sa pagkatinuod sultihan ko kamo nga makabaton sila sa kalipay sa ilang mga buhat sa mubo nga panahon, ug sa hinay-hinay ang kataposan moabot, ug isalikway sila ug ilabay ngadto sa kalayo, diin wala nay pagbalik.

12 Kay sila ang manubag sa ilang mga buhat, kay tungod kini sa ilang mga buhat nga sila isalikway; busa hinumdomi ninyo kini nga mga butang nga akong gisulti kaninyo.

13 Tan-awa gihatag ko kaninyo ang akong ebanghelyo, ug mao kini ang ebanghelyo nga akong gihatag kaninyo—nga ako mianhi sa kalibotan aron sa pagbuhat sa kabubut-on sa akong Amahan, tungod kay ang akong Amahan mipadala kanako.

14 Ug ang akong Amahan mipadala kanako nga ako iisa sa krus; ug human nga ako maisa sa krus, aron akong madala ang tanang tawo ngari kanako, kay ako gituboy man sa mga tawo niana usab ang mga tawo ituboy sa Amahan, sa pagbarog sa akong atubangan, aron pagahukman sa ilang mga buhat, kon sila matarong man o kon sila daotan—

15 Ug tungod niini nga hinungdan nga ako gituboy; busa, sumala sa gahom sa Amahan ako modala sa tanang tawo ngari kanako, aron pagahukman sila sumala sa ilang mga buhat.

16 Ug mahitabo, nga kadtong maghinulsol ug mabunyagan pinaagi sa akong ngalan, mapuno sa Espiritu; ug kon molahutay siya hangtod sa kataposan, tan-awa, siya akong hukman nga walay sala sa atubangan sa akong Amahan nianang adlawa nga ako mobarog sa paghukom sa kalibotan.

17 Ug siya nga dili molahutay hangtod sa kataposan, siya putlon usab ug itambog sa kalayo, diin sila dili na makabalik, tungod sa kaangayan sa Amahan.

18 Ug mao kini ang pulong nga iyang gihatag ngadto sa mga anak sa katawhan. Ug tungod niini nga hinungdan iyang gituman ang mga pulong nga iyang gihatag, ug siya dili mamakak, apan motuman sa iyang tanan nga pulong.

19 Ug walay mahugaw nga butang nga makasulod sa iyang gingharian; busa walay makasulod sa iyang kapahulayan gawas niadtong nahugasan sa ilang mga sapot pinaagi sa akong dugo, tungod sa ilang pagtuo, ug paghinulsol sa ilang tanan nga sala, ug sa ilang pagkamatinud-anon hangtod sa kataposan.

20 Karon mao kini ang sugo: Paghinulsol, kamong tanan nga lumulupyo sa yuta, ug duol ngari kanako ug magpabunyag pinaagi sa akong ngalan, aron kamo pagabalaanon pinaagi sa pagdawat sa Espiritu Santo, aron kamo mobarog nga walay lama sa akong atubangan sa kataposang adlaw.

21 Sa pagkatinuod, sa pagkatinuod, sultihan ko kamo, mao kini ang akong ebanghelyo; ug nasayod kamo sa mga butang nga kinahanglan ninyong buhaton sa akong simbahan; kay ang mga buhat nga inyong nakita nga akong gibuhat mao usab kana ang inyong buhaton; kay kanang inyong nakita nga akong gibuhat mao kana ang inyong buhaton;

22 Busa, kon buhaton ninyo kining mga butanga, bulahan kamo, kay kamo pagabayawon sa kataposang adlaw.

23 Isulat ang mga butang nga inyong nakita ug nadungog, gawas niadtong gidili.

24 Isulat ang mga buhat niini nga katawhan, nga mahitabo, gani sama sa nahisulat na kaniadto, bahin nianang nahitabo kaniadto.

25 Kay tan-awa, gikan sa mga basahon nga nahisulat na, ug sa mga basahon nga isulat pa, kini nga katawhan pagahukman, kay pinaagi niini ang ilang mga buhat masayran sa mga tawo.

26 Ug tan-awa, ang tanan nga butang gisulat sa Amahan; busa gikan sa mga basahon nga isulat ang kalibotan pagahukman.

27 Ug nasayod kamo nga kamo mahimong mga maghuhukom niining katawhan, sumala sa paghukom nga akong ihatag kaninyo, nga makiangayon. Busa, unsa nga matang sa mga tawo kamo angay nga mahimo? Sa pagkatinuod sultihan ko kamo, gani sama kanako.

28 Ug karon moadto ko sa Amahan. Ug sa pagkatinuod sultihan ko kamo, bisan unsang mga butang nga inyong pangayoon sa Amahan pinaagi sa akong ngalan, ihatag nganha kaninyo.

29 Busa, pangayo, ug kamo makadawat; tuktok, ug kini pagaablihan nganha kaninyo; kay siya nga mangayo, makadawat; ug ngadto kaniya nga motuktok, kini pagaablihan.

30 Ug karon, tan-awa, hilabihan ang akong kamaya, gani ngadto sa kahingpitan, tungod kaninyo, ug niini usab nga kaliwatan; oo, bisan ang Amahan nalipay, ug usab ang tanan nga balaang mga anghel, tungod kaninyo ug niini nga kaliwatan; kay walay usa kanila nga nawala.

31 Tan-awa, manghinaot ko nga kamo makasabot; kay ako nagpasabot kanila kinsa karon buhi niini nga kaliwatan; ug walay usa kanila nga mawala; ug kanila ako adunay kahingpitan sa kamaya.

32 Apan tan-awa, nakapasubo kini kanako tungod sa ikaupat nga kaliwatan gikan niini nga kaliwatan, kay madala sila palayo nga binihag kaniya gani sama sa anak sa kapildihan; kay mobaligya sila kanako bugti sa pilak ug sa bulawan, diin ang anunogba mokutkot ug diin ang mga kawatan molungkab ug mokawat. Ug niana nga adlaw ako mopahamtang kanila, gani sa pagpahisumbalik sa ilang mga buhat diha sa ilang kaugalingong mga ulo.

33 Ug nahitabo nga sa dihang nahuman na si Jesus niini nga pagpamahayag gisultihan niya ang iyang mga disipulo: Sulod kamo sa higpit nga ganghaan; kay higpit ang ganghaan, ug pig-ot ang agianan paingon sa kinabuhi, ug pipila lamang ang makakaplag niini; apan halapad ang ganghaan, ug dako ang agianan paingon sa kamatayon, ug daghan ang magalakaw diha niana, hangtod moabot ang kagabhion, diin wala nay tawo nga makatrabaho.