“Rehab im Riiaron̄ron̄ Ro,” Bwebwenato ko jān Kallim̧ur M̧okta (2022)
“Rehab im Riiaron̄ron̄ Ro,” Bwebwenato ko jān Kallim̧ur M̧okta
Rehab im Riiaron̄ron̄ Ro
Juon jokālet eo enaaj lo̧mo̧o̧ren juon baam̧le.
Juon kōrā etan Rehab ekar jokwe ilo Jeriko m̧okta jān an kar Riisrael anjo̧ iook jikin eo. Ekar ron̄ bwe Irooj ekar kōjepelļo̧k Lomaļo Ekilmur n̄an Riisrael ro. Rehab ekar jeļā bwe Irooj enaaj jipan̄ Riisrael ro tariņae ņae ijo jikin. Armej ro ilo Jeriko rekar lukkun nana.
Rikanaan Joshua ekar tōl jarin tariņae eo an Riisrael ro. Ekar jilkinļo̧k ruo riiaron̄ron̄ n̄an Jeriko. Ak rekar lo riiaron̄ron̄ ro, im kiin̄ eo an Jeriko ekar jilkinļo̧k riwaj ro n̄an kalbuuj er.
Riiaron̄ron̄ ro rekar itok n̄an m̧weo im̧ōn Rehab. Rehab ekar errā n̄an jipan̄ riiaron̄ron̄ ro, im ekar maron̄ ņoje er ilo boro̧waj eo an.
Em̧m̧aan ro an kiin̄ eo rekar kappukot m̧weo im̧ōn Rehab ak rekar jab maron̄ lo riiaron̄ron̄ ro. Ālkin aer kar etal, Rehab ekar kajjitōk ippān riiaron̄ron̄ ro n̄an kōjparok baam̧le eo an n̄e jarin tariņae eo aer renaaj itok n̄an tariņae ņae Jeriko. Riiaron̄ron̄ ro rekar kallim̧uri Rehab bwe baam̧le eo an enaaj pād ilo jokne. Innem Rehab ekar joļo̧k juon to jān winto eo an n̄an riiaron̄ron̄ ro n̄an kōjerbale n̄an ko.
Riiaron̄ron̄ ro rekar jepļaak n̄an rikanaan Joshua im kar ba n̄an jarin tariņae eo an Riisrael ro bwe ren jab m̧an jabdewōt armej ro ilo m̧weo im̧ōn Rehab. Tokālik, ke Riisrael rekar tariņaeiki Jeriko, rekar kōjparok kallim̧ur ko aer n̄an Rehab. Peran eo an Rehab ekar lo̧mo̧o̧ren baam̧le eo an. Baam̧le eo an ekar kobaļo̧k ippān armej ro an Irooj.