“Jekob im Baam̧le eo An,” Bwebwenato ko jān Kallim̧ur M̧okta (2022)
“Jekob im Baam̧le eo An,” Bwebwenato ko jen Kalim̧m̧ur M̧okta
Jenesis 27–33
Jekob im Baam̧le eo An
Elmen an Irooj dāpij kallim̧ur ko An
Jekob eaar likūt kapijuknen im ko jān ļeo jein Iso illu eo ellu. Jemen Jekob eaar kōjeraam̧m̧an e n̄an kappok im m̧areik juon kōrā eo ej iakwe Irooj im kōjparok kien ko An.
Ke Jekob eaar ito-itak, Irooj eaar loļo̧k e ilo juon visōn. E eaar kallim̧ur ke enaaj pād ippān Jekob iien otemjej. Jekob eaar kallim̧ur n̄an leļo̧k n̄an Irooj juon m̧ōttan jon̄oul in aolep men ko ej būki.
Irooj eaar kallim̧uri Jekob bwe enaaj bwijin nejin ajri. Kōn ro nejin Jekob, baam̧le eo an ioon laļ in naaj jeraam̧m̧an n̄an jeļā kajjien Rilo̧mo̧o̧r. Baam̧le eo an Jekob ilo raan kein āliktata ej ņaetaer m̧weeo im̧ōn Israel.
Jenesis 28:3–4, 14; 1 Nipai 10:14
Jekob eaar ito-itak n̄an āne eo etan Haran. Ijeņ eaar jino an iakwe n̄an juon kōrā ewānōk etan Rejel.
Jekob eaar errā n̄an jerbal jiljilimjuon iiō n̄an jemen, Leban, n̄e Leban enaaj kōtļo̧k an m̧areiki Rejel. Leban eaar errā. Jekob eaar jerbal jiljilimjuon iiō ko.
Ak Leban eaar kōņaan Lia, leddik eo nejin erūttotata, bwe en m̧arik m̧okta. Ilo iien m̧are eo, Leban eaar m̧oņe Jekob im bwe en m̧areiki Lia. Ak Jekob eaar iakwe Rejel. Eaar kallim̧ur bwe en bar jerbal jiljilimjuon iiō bwe en bar m̧areik e. Leban eaar errā, im baam̧le eo an Jekob eaar jino lōn̄ļo̧k.
Jenesis 29:28–35; 30:3–13, 17–24; Jekab 2:27–30
Leban ekar jab em̧m̧an an kōļļāiki Jekob. Ak Irooj eaar kōjeraam̧m̧an Jekob kōn elōn̄ mennin mour ko im kar jiron̄ Jekob bwe en ro̧o̧l n̄an kapijuknen eo an.
Jenesis 30:31, 43; 31:1–7, 17–18
Ilo iaļ eo an ļo̧k, Jekob eaar jeļā bwe ļeo jein Iso im 400 em̧m̧aan ro raar itok n̄an lotok e.
Jekob eaar ļōmņak Iso ej illu wōt ippān. Jekob eaar mijak kōn jokne eo an baam̧le eo an, kōn menin eaar bōkļo̧k er n̄an juon jikin ejokne im kar jar.
Jekob eaar jar aolepān bon̄ōn eo n̄an jibbon̄. Irooj eaar lotok Jekob im kar kōjeraam̧m̧an e. Irooj eaar jiron̄ļo̧k Jekob bwe enaaj juon ritōl eļap n̄an elōn̄. Irooj eaar ukōt etan Jekob n̄an Israel.
Iso im em̧m̧aan ro an raar lo Jekob im baam̧le eo an. Iso eaar jab illu ippān Jekob. Eaar ettōrļo̧k im ioon Jekob im atbokwoj e. Ekar lukkuun m̧ōņōņō in lo e im ioon baam̧le eo an. Jekob ekar m̧ōņōņō in bar lo Iso.
Irooj eaar dāpij kallim̧ur ko An n̄an Jekob ilo aolepān mour eo an. Jekob eaar tōpar kapijuknen eo an ippān baam̧le eo an im kar jokwe ijo. Jān iien eo, Jekob kar ņaetan Israel, im baam̧le eo an kar ņaetāer RiIsrael ro. Eaar wōnm̧aanļo̧k wōt ilo an kōjparok kien ko im kabun̄jar n̄an Iroj.