1 Samuel 17

Devid im Golaiat

Jelm̧ae juon rineia

Golaiat

RiPilisitia ro raar jodiki RiIsrael ro. Aolep jibbon̄ rineia in Pilistia eo etan Golaiat eaar idajon̄jon̄e jabdewōt riIsrael ro n̄an ire ippān. Golaiat ekar kilepo̧k im aetokļo̧k jān jabdewōt armej, im ekar kamijak. Ekar kōņak nuknuk in tariņae ko reddo im juon jāje, m̧ade, im juon kein kōttōrak. Ejjeļo̧k juon eaar kōņaan ire ippān.

1 Samuel 17:1–11

An jarin tariņae eo an Israel m̧ōn̄ā

Devid ekar juon ļaddik em̧m̧an ded rilale sip eo ekar wōr an tōmak ilo Irooj. Ļōm̧aro jein raar pād ilo tariņae eo an Israel. Juon raan, Devid eaar bōkļo̧k kijen ļōm̧aro jein. Ke eaar tōkeakļo̧k ilo kāām eo, eaar ron̄ idajon̄jon̄ eo an Golaiat.

1 Samuel 17:20–23

Devid ej kōnono ippān ritariņae eo

Devid eaar kajjitōk ippān ritariņae ro etke ejjeļo̧k juon jurake Israel. Ļōm̧aro jein raar illu im ba bwe en etal im lale sip ko. Ak Devid eaar jeļā bwe enaaj jurake Israel.

1 Samuel 17:24–30

An Devid kōnono n̄an Kiin̄ Saul

Kiin̄ Saul eaar jeļā kōn tōmak eo an Devid, kōn menin eaar kōņaan lo Devid. Devid eaar ba n̄an Saul ejjab mijak in ire ippān Golaiat. Devid eaar kōmeļeļeiki ke eaar lale sip ko an, eaar m̧an juon ļaiōn im juon peer. Irooj eaar oņake, im Devid eaar jeļā bwe Irooj enaaj kōjparok e kiiō.

1 Samuel 17:31–37

An Devid ej kajjieon̄ kōņak nuknuk kein tariņae

Saul eaar leļo̧k nuknuk in tariņae ko an n̄an Devid. Ak ekar jab jon̄an wōt, kōn menin Devid ekar utiki. Eaar kālet bwe en ire kōn ejjeļo̧k jabdewōt nuknuk in tariņae.

1 Samuel 17:38–39

An Devid jibwe dōkā ko

Devid eaar aiin ļalem dōkā metaltōl im āti ilo nien. Eaar bōk buwat eo an im kein aļaļ in lale siip eo an im ilo̧k im jelm̧ae Golaiat.

1 Samuel 17:40

An Devid kōnono n̄an Golaiat

Ke Golaiat eaar lo Devid, eaar lam̧ōj im kōm̧m̧an kōjak kake e. Eaar ba bwe juon ļaddik rilale sip eban jum̧ae e. Devid eaar lam̧ōjļo̧k ke ej lōke Irooj bwe en kōjparok e! Devid eaar ba jenaaj m̧an Golaiat n̄an kwaļo̧k bwe Irooj ekajoor.

1 Samuel 17:42–47

Devid ej ire ippān Golaiat

Devid eaar ettōrļo̧k n̄an ippān Golaiat. Ej m̧ōkaj in joļo̧k dōkā eo kōn buwat eo an. Dōkā eo eaar jok dem̧an Golaiat, im rineia eo eaar okjak ioon laļ. Irooj eaar jipan̄ Devid anjo̧ ioon Golaiat kōn ejjeļo̧k jāje ak nuknuk in tariņae.

1 Samuel 17:48–50

Devid im ānbwinin Golaiat

Ke ri Pilistia ro raar lo bwe Golaiat ekar mej, raar mijak im ko. RiIsrael ro raar wiini tariņae eo. Devid eaar lōke Irooj, im Irooj eaar kōjparoke Israel.

1 Samuel 17:51–53