“Rikanaan Kōrā etan Debora,” Bwebwenato ko jān Kallim̧ur M̧okta (2022)
“Rikanaan Kōrā etan Debora,” Bwebwenato ko jān Kallim̧ur M̧okta
Rikanaan Kōrā etan Debora
Juon ritōl eo ekar jipan̄ Riisrael n̄an lōke Irooj
Debora ekar juon rikanaan kōrā, juon ritōl in Israel eo etiljek eo me kar im̧we jān Irooj. Armej ro an rekar bōjrak aer kōjparok kien ko an Irooj, im Rikenan ro rekar tōl er. Ālkin ron̄oul iiō, Riisrael ro rekar jino jar n̄an bōk jipan̄ an Irooj.
Irooj ekar ron̄ jar ko aer. Ekar ba n̄an Debora n̄an aiintok juon jarin tariņae n̄an tariņae ņae Rikenan ro.
Jarin tariņae eo an Rikenan ro ekar lōn̄ aer ritariņae im jariot ko waer. Ekar kōm̧m̧an bwe jarin tariņae eo an Riisrael ro ren mijak, ak ejjab Debora. Ekar jeļā bwe Irooj enaaj jipan̄ er.
Berak ekar juon ritōl an jarin tariņae eo an Riisrael. Ekar jab kōņaan tariņae. Ak ekar ļōmņak bwe eļan̄n̄e Debora enaaj kar etal ippān jarin tariņae eo, Irooj enaaj kōjparok er. Debora ekar errā bwe en etal. Ekar kanaan bwe juon kōrā enaaj anjo̧ ioon Sisera, ritōl eo an jarin tariņae eo an Rikenan ro.
Jarin tariņae an Riisrael ro rekar koba ippān doon ilo ioon juon toļ, im Rikenan ro rekar koba ilo juon meļļaaj. Debora ekar ba n̄an Berak bwe en wōnlaļļo̧k jān toļ eo. Ekar kallim̧ur bwe Irooj enaaj pād ippāer.
Irooj ekar kōm̧m̧an bwe en wōt, im jariot ko an Rikenan ro rekar peļo̧k ilo dān eo. Elōn̄ Rikenan ro rekar meļon̄ ilo reba eo, ak Sisera ekar ko.
Ri Ekajet Ro 4:15, 17; 5:4–5, 19–22
Juon kōrā etan Jeel ekar jokwe ilo juon em̧ nuknuk epaak. Ekar lo bwe Sisera ekar ko im ba n̄an e bwe en kitileek ilo em̧ nuknuk eo an. Jeel ekar jeļā bwe ekar juon ritōl an jarin tariņae an Rikenan ro im kar m̧an e bwe en jab maron̄ m̧an elōn̄ ļo̧k armej.
Kanaan eo an Debora ekar kūrm̧ool. Sisera ekar anjo̧ jān juon kōrā eperan. Debora ekar al juon al n̄an jipan̄ Riisrael ro keememej wāween an Irooj kar lo̧mo̧o̧ren er. Riisrael ro rekar kōjparok kien ko an im kar jokwe ilo aenōm̧m̧an ium̧win 40 iiō.