“Kiin̄ Josaia,” Bwebwenato ko jān Kallim̧ur M̧okta (2022)
“Kiin̄ Josaia,” Bwebwenato ko jān Kallim̧ur M̧okta
2 Kiin̄ Ro 22; 2 Kronikel 34–35
Kiin̄ Josaia
Juon kajjitōk n̄an pokake kien ko an Irooj
Josaia ekar rualitōk an iiō ke kar kile bwe en kiin̄ in Juda. Ekar juon kiin̄ eo em̧m̧an im ekar iakwe Irooj. Ekar kōņaan jipan̄ armej ro an, Riisrael ro, pokake Irooj im bōjrak jān kabun̄jar n̄an ekjab ko. Ke ekar ruttoļo̧k, e im armej ro an rekar jino kōkāāle tampeļ eo im kōm̧m̧an bwe en bar aiboojoj.
2 Kiin̄ Ro 22:1–2; 2 Kronikel 34:3–7
Ke armej ro rekar jerbal ilo tampeļ eo, Hilkaia pris eo eutiej ekar lo bok in kien eo, juon scroll me epād ie jeje ko rekwojarjar.
Juon rikarejar ej riiti bok in n̄an Josaia. Josaia ekar ron̄ naan ko im ekar būrom̧ōj kōnke armej ro an rekar jab pokake Irooj. Ekar peote nuknuk ko an n̄an kwaļo̧k ke ekar būrom̧ōj.
Ekar ba n̄an Hilkaia n̄an kajjitōk ippān Irooj ta eo rej aikuj kōm̧m̧ane. Hilkaia im rijerbal ro an kiin̄ eo rekar Hōlda. Ekar juon kōrā rikanaan, juon ritōl etiljek eo ekar im̧we jān Anij. Ekar ba bwe Irooj ekar lukkuun m̧ōņōņō ippān Josaia kōnke ekar jipan̄ armej ro bwe ren pokake. Irooj ekar kallim̧ur bwe Kiin̄ Josaia enaaj mour ilo aeņōm̧m̧an.
Kiin̄ Josaia ekar kōņaan bwe armej ro an ren kōjparok kallim̧ur eo aer n̄an Irooj. Ekar kajjitōk ippāer n̄an kakeememej iien Kwojkwoj in Kijone eo n̄an jipan̄ er keememej wāween an Irooj kar kanem̧kwoj Riisrael ro etto ilo Ijipt.