1 Sannlega, svo segir Drottinn: Svo ber við, að sérhver sál, sem hverfur frá syndum sínum og kemur til mín og ákallar nafn mitt og hlýðir rödd minni og heldur boðorð mín, mun sjá ásjónu mína og vita að ég er —

2 Og að ég er hið sanna ljós, sem lýsir hverjum manni, sem í heiminn kemur —

3 Og að ég er í föðurnum og faðirinn í mér, og faðirinn og ég erum eitt —

4 Faðirinn vegna þess að hann gaf mér af fyllingu sinni, og sonurinn vegna þess að ég var í heiminum og gjörði holdið að tjaldbúð minni og dvaldi meðal mannanna sona.

5 Ég var í heiminum og meðtók frá föður mínum, og verk hans opinberuðust greinilega.

6 Og Jóhannes sá og bar vitni um fyllingu dýrðar minnar og fylling heimildar Jóhannesar mun síðar opinberuð.

7 Og hann bar vitni og sagði: Ég sá dýrð hans, að hann var í upphafi, áður en heimurinn varð til —

8 Í upphafi var Orðið, því að hann var Orðið, já, boðberi hjálpræðisins —

9 Ljós og lausnari heimsins, andi sannleikans, sem kom í heiminn, vegna þess að heimurinn var gjörður af honum, og í honum bjó líf mannanna og ljós mannanna.

10 Heimarnir voru af honum gjörðir. Mennirnir voru af honum gjörðir. Allt var af honum gjört, með honum og fyrir hann.

11 Og ég, Jóhannes, ber vitni um, að ég sá dýrð hans, sem dýrð hins eingetna föðurins, fullan náðar og sannleika, já, anda sannleikans, sem kom og bjó í holdinu og dvaldi með oss.

12 Og ég, Jóhannes, sá, að hann hlaut ekki fyllinguna í fyrstu, heldur hlaut hann náð á náð ofan —

13 Og hann hlaut ekki fyllinguna í fyrstu, heldur hélt áfram frá náð til náðar, þar til hann hafði hlotið fyllingu —

14 Og þannig nefndist hann sonur Guðs, vegna þess að hann hlaut ekki fyllinguna í fyrstu.

15 Og ég, Jóhannes, ber vitni, og tak eftir, himnarnir lukust upp og heilagur andi kom yfir hann í dúfulíki og settist á hann, og rödd kom frá himni og sagði: Þetta er minn elskaði sonur.

16 Og ég, Jóhannes, ber vitni um, að hann hlaut fyllingu dýrðar föðurins —

17 Og hann fékk allt vald, bæði á himni og á jörðu, og dýrð föðurins var með honum, því að hann bjó í honum.

18 Og svo ber við, að séuð þér staðfastir, munuð þér taka á móti fyllingu vitnisburðar Jóhannesar.

19 Ég gef yður þessi orð, svo að þér megið skilja og vita hvernig tilbiðja skal, og vita hvað tilbiðja skal, svo þér getið komið til föðurins í mínu nafni og tekið á móti fyllingu hans á sínum tíma.

20 Því að ef þér haldið boðorð mín, munuð þér taka á móti fyllingu hans og verða dýrðlegir í mér eins og ég er í föðurnum. Fyrir því segi ég yður: Þér munuð hljóta náð á náð ofan.

21 Og sannlega segi ég yður: Í upphafi var ég hjá föðurnum og ég er frumburðurinn —

22 Og allir þeir, sem af mér eru getnir, eru hluttakendur í dýrð hins sama, og eru kirkja frumburðarins.

23 Þér voruð einnig í upphafi hjá föðurnum. Það sem er andi, já, andi sannleikans —

24 Og sannleikurinn er þekking á hlutum eins og þeir eru, eins og þeir voru og eins og þeir munu verða —

25 Og sérhvað það, sem er meira eða minna en þetta, er andi hins illa, sem var lygari frá upphafi.

26 Andi sannleikans er frá Guði. Ég er andi sannleikans, og Jóhannes bar vitni um mig og sagði: Hann tók á móti fyllingu sannleikans, já, jafnvel alls sannleika —

27 Og enginn maður tekur á móti fyllingu, nema hann haldi boðorð hans.

28 Sá, sem heldur boðorð hans, tekur á móti sannleika og ljósi, þar til hann er dýrðlegur gjörður í sannleika og veit alla hluti.

29 Maðurinn var einnig í upphafi hjá Guði. Vitsmunir, eða ljós sannleikans, voru ekki skapaðir eða gjörðir, né heldur er það hægt.

30 Allur sannleikur er sjálfstæður á því sviði, sem Guð hefur markað honum, og starfar óháður, eins og allir vitsmunir, ella væri engin tilvera.

31 Sjá, í því liggur sjálfræði mannsins og í því liggur fordæming mannsins. Vegna þess að það, sem var frá upphafi, er greinilega sýnt þeim, og þeir taka ekki á móti ljósinu.

32 Og sérhver maður er undir fordæmingu, taki andi hans ekki á móti ljósinu.

33 Því að maðurinn er andi. Frumefnin eru eilíf, og andi og frumefni, óaðskiljanlega samtengd, taka á móti fyllingu gleðinnar —

34 En þegar þau eru aðskilin, getur maðurinn ekki tekið á móti fyllingu gleðinnar.

35 Frumefnin eru tjaldbúð Guðs. Já, maðurinn er tjaldbúð Guðs, jafnvel musteri. Og hverju því musteri, sem vanhelgað er, því musteri mun Guð eyða.

36 Dýrð Guðs er vitsmunir, eða með öðrum orðum, ljós og sannleikur.

37 Ljós og sannleikur yfirgefa þann illa.

38 Sérhver andi mannsins var saklaus í upphafi, og þegar Guð endurleysti manninn frá fallinu, urðu mennirnir aftur saklausir sem ungbörn fyrir Guði.

39 Og hinn illi kemur og tekur burtu ljósið og sannleikann frá mannanna börnum fyrir óhlýðni þeirra og erfikenningar feðra þeirra.

40 En ég hef boðið yður að ala börn yðar upp í ljósi og sannleika.

41 En sannlega segi ég þér, þjónn minn Frederick G. Williams: Þú hefur haldist undir þessari fordæmingu —

42 Þú hefur ekki kennt börnum þínum ljós og sannleika, samkvæmt boðunum, og hinn illi hefur enn vald yfir þér, og þetta er orsök þrenginga þinna.

43 Og nú býð ég þér: Ef þú vilt varðveitast, skalt þú koma reglu á hús þitt, því að margt er í ólagi í húsi þínu.

44 Sannlega segi ég þjóni mínum Sidney Rigdon, að í sumu hefur hann ekki haldið boðin varðandi börn sín. Kom þess vegna fyrst reglu á hús þitt.

45 Sannlega segi ég þjóni mínum Joseph Smith yngri, eða með öðrum orðum vil ég kalla yður vini, því að þér eruð vinir mínir og þér skuluð hljóta arf með mér —

46 Ég kallaði yður þjóna sakir heimsins, og þér eruð þjónar hans sakir mín —

47 Og sannlega segi ég nú við Joseph Smith yngri: Þú hefur ekki haldið boðorðin og hlýtur því að vera átalinn frammi fyrir Drottni —

48 Fjölskylda þín verður að iðrast og afneita ýmsu og gefa einlægari gaum að orðum þínum, ella verður að víkja henni úr stöðu sinni.

49 Það, sem ég segi einum, segi ég öllum. Biðjið ávallt, svo að hinn illi fái eigi vald yfir yður og víki yður úr stöðu yðar.

50 Þjónn minn Newel K. Whitney, biskup kirkju minnar, þarf einnig ögunar við og verður að koma reglu á fjölskyldu sína og sjá um að hún sýni meiri kostgæfni og umhyggjusemi heima fyrir, og biðji ávallt, ella verður að víkja henni úr stöðu sinni.

51 Nú segi ég yður, vinir mínir: Lát þjón minn Sidney Rigdon leggja upp í ferð sína í skyndi og kunngjöra einnig náðarár Drottins og fagnaðarerindi sáluhjálpar, eins og ég gef honum að mæla. Og fyrir sameinaðar trúarbænir yðar mun ég styðja hann.

52 Og lát þjóna mína, Joseph Smith yngri og Frederick G. Williams, einnig fara í skyndi, og þeim mun gefið samkvæmt trúarbæn. Og sem þér farið að orðum mínum, svo munuð þér eigi verða yður til smánar, hvorki í þessum heimi né í komanda heimi.

53 Og sannlega segi ég yður, að það er vilji minn að þér flýtið þýðingu ritninga minna og aflið yður þekkingar á sögu, löndum og ríkjum, á lögmálum Guðs og manna, og allt þetta vegna sáluhjálpar Síonar. Amen.