Sehluko 9
Jakobe uyachaza kutsi emaJuda atawugcogcwa kuwo onkhe emave awo esetsembiso—INhlawulo ihlenga umuntfu eKuweni—Imitimba yalabafile itawuphuma emathuneni, nemimoya yabo iphume esihogweni nasepharadisi—Batawukwehlulelwa—INhlawulo isindzisa ekufeni, esihogweni, kudeveli, lokukuhlupheka lokungapheli—Labalungile bayosindziswa embusweni waNkulunkulu—Tijeziso tetono tibekwa ebaleni—LoNgcwele waka-Israyeli ngumgcini welisango. Cishe ngemnyaka wema-559–545 ngaphambi kwekutalwa kwaKhristu.
1 Manje, bomnaketfu labatsandzekako, nginifundzele leti tintfo kute nati ngalokuphatselene netivumelwano teNkhosi leyenta sivumelwano ngato nayo yonkhe indlu yaka-Israyeli—
2 Letikhulumile kumaJuda, ngemlomo webaphrofethi bayo labangcwele, kusukela ekucaleni kuya entansi, titukulwane ngetitukulwane, kute kufike sikhatsi lapho bayawubuyiselwa ebandleni leliciniso kanye nakuso sibaya saNkulunkulu; lapho bayawugcogcelwa ekhaya emaveni lalifa labo, futsi bayawuhlaliswa kuwo onkhe emave abo esetsembiso.
3 Bukani, bomnaketfu labatsandzekako, ngikhuluma kini leti tintfo kute nitfokote, futsi niphakamise tinhloko tenu ingunaphakadze, ngenca yetibusiso iNkhosi Nkulunkulu leyawutinika bantfwana benu.
4 Ngoba ngiyati kutsi nifune kakhulu, linyenti lenu, kwati ngetintfo letisatokwenteka; ngaloko-ke ngiyati kutsi niyati kutsi inyama yetfu kufanele iguge futsi ife; noko, emitimbeni yetfu siyawumbona Nkulunkulu.
5 Yebo, ngiyati kutsi niyati kutsi ngemtimba uyawutiveta kubo labo labaseJerusalema, lapho saphuma khona; ngoba kudzingekile kutsi kube semkhatsini wabo; ngoba kudzingekile kutsi uMdali lomkhulu avume kuba ngaphansi kwemuntfu losenyameni, futsi afele bonkhe bantfu, kute bonkhe bantfu babe ngaphansi kwakhe.
6 Njengobe kufa kufikile kubo bonkhe bantfu, kute kugcwaliseke lisu lelinesihawu leMdali lomkhulu, kufanele kube khona emandla ekuvuka, futsi kuvuka kufanele kutsi kufike kumuntfu ngesizatfu sekuwa; kuwa kwefika ngesizatfu sesiphambeko; futsi ngenca yekutsi umuntfu wawa babese sebahlukaniswa ebukhoneni beNkhosi.
7 Ngaloko-ke, kufanele kube khona inhlawulo lengapheli—ngaphandle kwekutsi kube khona inhlawulo lengapheli loku lokubolako angeke kwembatse kungaboli. Ngaloko-ke, kwehlulelwa kwekucala lokwefika kumuntfu kwakufanele kutsi kuhlale sikhatsi lesingapheli. Futsi uma kunjalo lomtimba kufanele ulale phansi kute ubole futsi uvutfukele kunina wemhlaba, ungasavuki nanini.
8 O kuhlakanipha kwaNkulunkulu, bubele kanye nemusa wakhe! Ngoba bukani, uma inyama ingeke isavuka nanini imimoya yetfu kufanele ibe ngaphansi kwaleyo ngilosi leyawa phambi kwaNkulunkulu waPhakadze, futsi yaba ngudeveli, kutsi ingasavuki nanini.
9 Futsi imimoya yetfu bekufanele ifane naye, futsi sibe bodeveli, tingilosi kudeveli, sivalelwe ngaphandle ebukhoneni baNkulunkulu wetfu, futsi sihlale neyise wemanga, elusizini, njengaye lucobo; yebo, kuye loyo muntfu lowakhohlisa batali betfu bekucala, lotigucula acishe afane nengilosi yekukhanya, futsi lophehlela bantfwana bebantfu emacenjini layimfihlo ekubulala kanye nato tonkhe tindlela letiyimfihlo temisebenti yebumnyama.
10 O bukhulu kangakanani buhle baNkulunkulu wetfu, losilungiselela indlela yetfu yekuphunyuka ekubanjweni ngulesi silwane lesikhulu lesesabekako; yebo, leso silwane lesikhulu, kufa nesihogo, lengisibita ngekufa kwemtimba, futsi ngalokunjalo nekufa kwamoya.
11 Futsi ngenca yendlela yekukhululwa nguNkulunkulu wetfu, loNgcwele waka-Israyeli, lokufa, loku lesengikhulume ngako, lokungekwesikhashana, kuyawukhulula labafile bako, loko kufa lokulithuna.
12 Futsi lokufa lesengikhulume ngako, lokukufa kwakamoya, kuyawukhulula labafile bako; loko kufa kwamoya lokusihogo; ngaloko-ke, kufa kanye nesihogo kufanele kukhulule labafile bako, sihogo kufanele sikhulule imimoya yaso lesekutfunjweni, lithuna kufanele likhulule imitimba yalo lesekutfunjweni, futsi imitimba kanye nemimoya yebantfu itawubuyiselwa lomunye kulomunye; futsi kungemandla ekuvuswa kwaloNgcwele waka-Israyeli.
13 O likhulu kangakanani lisu laNkulunkulu wetfu! Ngoba ngakulolunye luhlangotsi, ipharadisi yaNkulunkulu kufanele ikhulule imimoya yalabalungile, lithuna likhulule umtimba walolungile; umoya kanye nemtimba kubuyiselwe kuko lucobo lwako futsi, futsi bonkhe bantfu babe nekungaboli, baphindze bangabhubhi, futsi babe bantfu labaphilako, babe nelwati loluphelele njengatsi lesisenyameni, ngaphandle nje kwekutsi lwati lwetfu luyawupheleliswa.
14 Ngaloko-ke, siyawuba nelwati loluphelele ngako konkhe kuba nelicala kwetfu, nekungahlanteki kwetfu, kanye nebungcunu betfu; futsi labalungile bayawuba nelwati loluphelele lwentfokoto yabo, kanye nekulunga kwabo, futsi bembatsiswe ngebumsulwa, yebo, nangengubo yekulunga.
15 Futsi kuyawukwenteka kutsi ngesikhatsi bonkhe bantfu sebendlulile kuloku kufa kwekucala baya ekuphileni, kangangekutsi sebangasenawubhubha, kufanele bavele phambi kwesihlalo sekwehlulela saloNgcwele waka-Israyeli; emvakwaloko kuta kwehlulelwa, futsi emvakwaloko kufanele behlulelwe ngekwehlulelwa lokungcwele kwaNkulunkulu.
16 Futsi ngeliciniso njengobe iNkhosi iphila, ngoba iNkhosi Nkulunkulu ikukhulumile loku, futsi kulivi layo laphakadze, lelingayuze lendlula, kutsi labo labalungile bayawulunga njalo, futsi labo labangcolile bayawungcola njalo; ngaloko-ke, labo labangcolile bangudeveli kanye netingilosi takhe; futsi bayawukuya emlilweni waphakadze, lolungiselwe bona; nekuhlupheka kwabo kunjengelichibi lemlilo kanye nesibabule, lilangabi laso lelikhuphukela etulu phakadze naphakadze futsi lingenamkhawulo.
17 O bukhulu kanye nekulunga kwaNkulunkulu wetfu! Ngoba uyawafeza onkhe emavi akhe, futsi aphume emlonyeni wakhe, nemtsetfo wakhe kufanele ugcwaliseke.
18 Kodvwa, bukani, labalungile, labangcwele baloNgcwele waka-Israyeli, labo labakholwako kuye loNgcwele waka-Israyeli, labo labatibeketelele tinhlupheko temhlaba, futsi bangalinaki lihlazo lawo, bayawudla lifa lembuso waNkulunkulu, lelalungiselwa bona kusukela ekusekelweni kwemhlaba, futsi kujabula kwabo kuyawugcwala ingunaphakadze.
19 O bukhulu bebubele baNkulunkulu wetfu, loNgcwele waka-Israyeli! Ngoba ukhulula labangcwele bakhe kuso leso silwane lesesabekako lesingudeveli, nekufa, nesihogo, nakulelo chibi lemlilo kanye nesibabule, lokukuhlupheka lokungapheli.
20 O bukhulu kangakanani bungcwele baNkulunkulu wetfu! Ngoba yena wati tonkhe tintfo, futsi kute lutfo ngaphandle kwekutsi yena alwati.
21 Futsi uta emhlabeni kute asindzise bonkhe bantfu uma batawulilalela livi lakhe; ngoba bukani, uva buhlungu bebantfu bonkhe, yebo, buhlungu bato tonkhe tidalwa letiphilako, besilisa, besifazane, kanye nebantfwana, lababemndeni wa-Adamu.
22 Futsi uva loku kuhlupheka kute kuvuka kute kubo bonkhe bantfu, kute bonkhe beme phambi kwakhe elangeni lelikhulu nelekwehlulela.
23 Futsi uyaleta bonkhe bantfu kutsi kufanele baphendvuke, baphindze babhajatiswe egameni lakhe, babe nekukholwa lokuphelele kuye loNgcwele waka-Israyeli, noma ngeke basindziswe embusweni waNkulunkulu.
24 Futsi uma bangeke baphendvuke baphindze bakholwe egameni lakhe, babhajatiswe egameni lakhe, futsi babeketele kute kube sekugcineni, kufanele balahlwe; ngoba iNkhosi Nkulunkulu, loNgcwele waka-Israyeli, ukukhulumile loku.
25 Ngaloko-ke, unikete umtsetfo; futsi lapho kute khona umtsetfo loniketiwe kute sijeziso; futsi lapho kute khona sijeziso kute kulahlwa; futsi lapho kute khona kulahlwa umusa waloNgcwele waka-Israyeli ubabitela kuye, ngenca yenhlawulo; ngoba bakhululwa ngemandla akhe.
26 Ngoba inhlawulo yenelisa tidzingo tekulunga kwakhe kubo bonkhe labo labete umtsetfo loniketiwe kubo, kute bakhululwe kuleso silwane lesesabekako, kufa kanye nesihogo, nadeveli, nelichibi lemlilo nesibabule, lokukuhlupheka lokungapheli; futsi babuyiselwa kuloyo Nkulunkulu lowabanika umphefumulo, longuloNgcwele waka-Israyeli.
27 Kodvwa maye kuloyo lonikiwe umtsetfo, yebo, loyo lonayo yonkhe imiyaleto yaNkulunkulu, njengatsi, loyo loyephulako, futsi loyo lomosha emalanga ekuvivinywa kwakhe, ngoba simo sakhe siyesabeka!
28 O lelo lisu lebucili lobubi! O lite, butsakatsaka, nebulima bebantfu! Uma sebafundzile bacabanga kutsi bahlakaniphile, futsi abasilaleli seluleko saNkulunkulu, ngoba basibeka eceleni, bacabanga kutsi bayati, ngaloko-ke, kuhlakanipha kwabo kubulima futsi akunanzuzo kubo. Futsi bayawubhubha.
29 Kodvwa kufundza kuhle uma balalela teluleko taNkulunkulu.
30 Kodvwa maye kuto ticebi, leticebile ngekwetintfo temhlaba. Ngoba ngenca yekutsi ticebile tedzelela labamphofu, tihluphe labamnene, netinhlitiyo tato tikulengcebo yato; ngaloko-ke, ingcebo yato ingunkulunkulu wato. Futsi bukani, ingcebo yato iyawubhubha kanye nato futsi.
31 Futsi maye kubantfu labangeva labangafuni kuva; ngoba bayawubhubha.
32 Maye kubantfu labangaboni labangafuni kubona; ngoba nabo bayabhubha.
33 Maye kubantfu labangakasoki enhlitiyweni, ngoba lwati lwebubi babo luyawubashaya ngelilanga lekugcina.
34 Maye kuye umkhohlisi, ngoba uyawuphonswa phansi esihogweni.
35 Maye kuye umbulali lobulala ngenhloso, ngoba uyawufa.
36 Maye kubo labo labenta bugwadla, ngoba bayawuphonswa phansi esihogweni.
37 Yebo, maye kubo labo labakhonta tithico, ngoba develi wabo bonkhe bodeveli uyatfokota ngabo.
38 Kwephetsa, maye kubo bonkhe labo labafela etonweni tabo; ngoba bayawubuyela kuNkulunkulu, babone buso bakhe, baphindze bahlale etonweni tabo.
39 O, bomnaketfu labatsandzekako, khumbulani kwesabeka kwekona loyo Nkulunkulu loyiNgcwele, futsi ngalokunjalo nekwesabeka kwekuvumela kuyengwa nguloyo lolicili. Khumbulani, kunaka kwenyama kufa, futsi kunaka kwakamoya kuphila lokuphakadze.
40 O, bomnaketfu labatsandzekako, lalelani emavi ami. Khumbulani bukhulu baloNgcwele waka-Israyeli. Ningasho kutsi ngikhulume tintfo letilukhuni ngekumelana nani; ngoba uma nisho kanjalo, nitawulitfuka liciniso; ngoba ngikhulume emavi eMenti wenu. Ngiyati kutsi emavi laliciniso amatima kuko konkhe kungcola; kodvwa labalungile abawesabi, ngoba bayalitsandza liciniso futsi abanyakatiseki.
41 O uma kunjalo, bomnaketfu labatsandzekako, wotani eNkhosini, kuloNgcwele. Khumbulani kutsi tindlela takhe tilungile. Bukani, indlela yemuntfu yincane, kodvwa isendleleni lecondzile phambi kwakhe, futsi umgcinisango nguye loNgcwele waka-Israyeli, futsi akacashi sisebenti lapho; futsi kute lenye indlela ngaphandle kwaleyo lesesangweni; ngoba yena akanakukhohliswa, ngoba yiNkhosi Nkulunkulu libito lakhe.
42 Futsi loyo lonconcotsako, utawumvulela; futsi labahlakaniphile, kanye nalabafundzile, kanye nalabo labacebile, labo labakhukhumele ngenca yekufundza kwabo, kanye nekuhlakanipha kwabo, kanye nengcebo yabo—yebo, ngibo labo langabanaki; futsi ngaphandle kwekutsi balahle leti tintfo khashane, baphindze batibone njengetiwula phambi kwaNkulunkulu, behlele phansi ekujuleni kwekutfobeka, angeke abavulele.
43 Kodvwa tintfo talabahlakaniphile kanye nalabanekucondza tiyawufihlwa kubo ingunaphakadze—yebo, loko kutfokota lokulungiselelwe labangcwele.
44 O, bomnaketfu labatsandzekako, khumbulani emavi ami. Bukani, ngikhumula tembatfo tami, futsi ngiyatitsintsitsa phambi kwenu; ngithandaza Nkulunkulu wensindziso yami kutsi angibuke ngeliso lakhe lelibona konkhe; ngaloko-ke, niyawukwati ngelilanga lekugcina, lapho bonkhe bantfu bayawukwehlulelwa ngemisebenti yabo, kutsi Nkulunkulu wema-Israyeli wabona kutsi ngabutsintsitsa bubi benu emphefumulweni wami, futsi nekutsi ngima ngimsulwa phambi kwakhe, futsi ngiyisusile ingati yenu.
45 O, bomnaketfu labatsandzekako, shiyani tono tenu; tsintsitsani tinketane takhe loyo lofuna kunibopha anicinise; wotani kuloyo Nkulunkulu lolidvwala lensindziso yenu.
46 Lungiselelani imiphefumulo yenu lelo langa lenkhatimulo lapho kulunga kuyawunikwa labalungile, ngisho nelilanga lekwehlulela, kute ningashwaphaniswa luvalo lolwesabekako; kute ningakhumbuli kuba nelicala kwenu lokwesabekako ngalokuphelele, futsi niphoceleleke kutsi nimemete nitsi: Tingcwele, tingcwele tehlulelo takho, O Nkhosi Nkulunkulu Somandla—kodvwa ngiyakwati kona kwami; ngiwuphulile umtsetfo wakho, netiphambeko tami ngetami; futsi develi ungitfolile, kute ngibe yinyama elusizini lwakhe lolukhulu.
47 Kodvwa bukani, bomnaketfu, kudzingekile yini kutsi nginivuse ngalamaciniso lasabekako aleti tintfo na? Bengingayihlupha yini imiphefumulo yenu kube imicondvo yenu beyimsulwa na? Bengingaba yini sobala kini njengekuba sobala kweliciniso kube benikhululiwe esonweni na?
48 Bukani, kube beningcwele bengiyokhuluma kini ngebungcwele; kodvwa njengobe ningekho ngcwele, futsi ningibuka njengemfundzisi, kudzingekile kutsi nginifundzise imiphumela yesono.
49 Bukani, umphefumulo wami uyasenyanya sono, futsi inhlitiyo yami iyatfokota ngekulunga; futsi ngitawulidvumisa ligama lelingcwele laNkulunkulu wami.
50 Wotani, bomnaketfu, nonkhe nine lenomile, wotani emantini; loyo lote imali, akete atotsenga futsi adle; yebo, wota utsenge liwayini kanye nelubisi ngaphandle kwemali nangaphandle kwentsengo.
51 Ngaloko-ke, ningayisebentisi imali kuloko lokungenamsebenti, noma nisebentele loko lokungeke kunenelise. Ngilaleleni ngekukhutsala, futsi niwakhumbule emavi lengiwakhulumile; nite kuloNgcwele waka-Israyeli, nititike kuloko lokungayubhubha, noma lokungayukonakala, futsi nivumele imiphefumulo yenu itfokotele emanoni.
52 Bukani, bomnaketfu labatsandzekako, khumbulani emavi aNkulunkulu wenu; thandazani kuye njalonjalo emini, futsi nibonge libito lakhe lelingcwele ebusuku. Tinhlitiyo tenu atitfokote.
53 Bukani tinkhulu kanganani tivumelwano teNkhosi, futsi kukhulu kanganani kutehlisa kwayo kubantfwana bebantfu; ngenca yebukhulu bayo, nemusa kanye nebubele bayo, isetsembisile kutsi intalelwane yetfu ngeke ibhujiswe nya, ngekwasenyameni, kodvwa kutsi iyoyigcina; futsi etitukulwaneni letitako bayawuba ligala lelilungile endlini yaka-Israyeli.
54 Manje, bomnaketfu, ngifuna kukhuluma nani kabanti; kodvwa kusasa ngitawunatisa ngemavi ami lasele. Amen.