INcwadzi yesiBili yaNefi

1 Futsi manje kwenteka kutsi emvakwekutsi mine, Nefi, sengicedzile kufundzisa bomnaketfu, babe, Lehi, naye wakhuluma tintfo letinyenti kubo, wabalandzisa, kutsi tinkhulu kangakanani tintfo iNkhosi leyibentele tona ngekubakhipha eveni laseJerusalema.

2 Wakhuluma nabo mayelana nekumvukela kwabo emantini, kanye nangesihawu saNkulunkulu ekusindziseni timphilo tabo, kutsi bangagwinywa lwandle.

3 Futsi ngetulu kwaloko wakhuluma nabo mayelana nelive lesetsembiso, labebalitfolile—nekutsi iNkhosi beyinemusa kangakanani ekusicwayiseni kutsi sibaleke siphume eveni laseJerusalema.

4 Ngoba, watsi, bukani, ngibone umbono, ngawo ngiyati kutsi iJerusalema ibhujisiwe; futsi kube sahlala eJerusalema ngabe natsi ngalokunjalo sibhubhile.

5 Kodvwa, watsi, nanoma kungenca yetinhlupheko tetfu, silitfolile live lesetsembiso, live lelikhetsekile ngetulu kwawo onkhe lamanye emave; live iNkhosi Nkulunkulu leyente sivumelwano ngalo nami kutsi kuyawuba live lelilifa lentalelwane yami. Yebo, iNkhosi yente sivumelwano ngalelive kimi, kanye nakubantfwana bami ingunaphakadze, futsi ngalokunjalo nakubo bonkhe labo labayawuholwa baphume kulamanye emave ngesandla seNkhosi

6 Ngaloko-ke, mine, Lehi, ngiphrofetha ngekwemisebenti yaMoya lokimi, kutsi kute namunye loyawuta kulelive ngaphandle kwekutsi aletfwe ngesandla seNkhosi.

7 Ngaloko-ke, lelive lingcweliselwe loyo leyawumletsa. Futsi nangabe kwenteka kutsi bayawuyisebentela ngekwemiyaleto leyiniketile, kuyawuba live lenkhululeko kubo; ngaloko-ke, abayuke nanini babuyiselwe phansi ekutfunjweni; uma kunjalo, kuyawuba kungenca yebubi; ngoba uma bubi bandza liyawucalekiswa live ngenca yabo, kodvwa kulabalungile liyawubusiswa ingunaphakadze.

8 Futsi bukani, kukuhlakanipha kutsi lelive kumele lifihlwe kwanyalo kutsi latiwe nguletinye tive; ngoba bukani, letinyenti tive tiyoligcwalisa lelive, kangangoba angeke kusaba khona indzawo letoba lifa.

9 Ngaloko-ke, mine, Lehi, ngitfole setsembiso, sekutsi nangabe labo iNkhosi Nkulunkulu leyawubakhipha eveni laseJerusalema bayawuyigcina imiyaleto yayo; bayawuphumelela kulo lonkhe lelive futsi bayawugcinwa kuto tonkhe tive, kute batfole lelive libe ngelabo. Futsi nangabe bayawuyigcina imiyaleto yayo bayawubusiswa kulo lonkhe lelive, futsi kuyoba bete namunye loyawubahlupha, noma atsatse lelive labo lelilifa; bayawuhlala ngekuphepha ingunaphakadze.

10 Kodvwa bukani, uma sikhatsi sifika sekutsi bancishelwe lukholo, emvakwekutsi sebemukele tibusiso letinkhulu kangaka esandleni seNkhosi—sebanelwati lekudalwa kwemhlaba; nabo bonkhe bantfu, bati imisebenti lemikhulu nalemangalisako yeNkhosi kusukela ekudalweni kwemhlaba; banemandla labaniketwe wona kwenta tonkhe tintfo ngelukholo; banayo yonkhe imiyaleto kusukela ekucaleni, futsi baletfwe ngebuhle bakhe lobungapheli kulelive leliligugu lesetsembiso—bukani, ngitsi, uma lilanga liyawufika lekutsi bamlahle loNgcwele waka-Israyeli, Mesiya weliciniso, uMhlengi wabo kanye naNkulunkulu wabo, bukani, tehlulelo takhe loyo lolungile tiyawuba setikwabo.

11 Yebo, utawuletsa letinye tive kubo, futsi utawutinika emandla, atsatse tindzawo kubo letingetabo, futsi utawukwenta kutsi bahlakatwe baphindze bashaywe.

12 Yebo, ngesikhatsi situkulwane sinye sendlulela kulesinye kuyawuba nekucitseka kwengati, kanye nekujeziswa lokukhulu emkhatsini wabo; ngaloko-ke madvodzana ami, ngifuna kutsi nikhumbule; yebo, ngifuna kutsi niwalalele emavi ami.

13 O shangatsi beningavuka; nivuke ebutfongweni lobukhulu, nasebutfongweni besihogo, futsi nivutfute tinketane letimbi leniboshwe ngato, lokutinketane letibopha bantfwana bebantfu, kute bayiswe kudze ekutfunjweni entansi emhosheni waphakadze welusizi netinhlupheko.

14 Vukani! nisukume elutfulini, nive emavi emtali lochachatelako, lokufanele nibeke phansi titfo takhe temtimba masinyane kulelibandzako kanye nalelithulile lithuna, lapho sihambi singenokwati kubuya; sekungemalanga nje lambalwa bese ngihamba ngendlela yawo wonkhe umhlaba.

15 Kodvwa bukani, inkhosi iwuhlengile umphefumulo wami esihogweni; ngiyibonile inkhatimulo yayo, futsi ngitungeletwe ingunaphakadze yimikhono yelutsandvo lwayo.

16 Futsi ngifisa kutsi nikhumbule kugcina imitsetfo kanye netehlulelo teNkhosi; bukani, loku seloku kwaba kukhatsateka kwemphefumulo wami kusukela ekucaleni.

17 Inhlitiyo yami ishone phansi ngenca yekudzabuka tikhatsi netikhatsi, ngoba bengesaba, funa ngenca yebulukhuni betinhlitiyo tenu iNkhosi Nkulunkulu wenu ite ngelulaka lolukhulu etikwenu, kutsi nisuswe futsi nibhujiswe ingunaphakadze.

18 Noma, kutsi sicalekiso site etikwenu esikhatsini setitukulwane letinyenti, futsi nivakashelwe ngenkemba, kanye nangendlala, nitondvwe, niphindze niholwe ngekwesifiso kanye nekutfunjwa ngudeveli.

19 O madvodzana ami, kwangatsi leti tintfo betingete teta etikwenu, kodvwa nibe bantfu labakhetsiwe kanye nalabatsandziwe beNkhosi. Kodvwa bukani, intsandvo yayo ayentiwe; ngoba tindlela tayo tilungile ingunaphakadze.

20 Futsi itsite: Nangabe niyawuyigcina imiyaleto yami niyawuphumelela eveni; kodvwa nangabe ningeke niyigcine imiyaleto yami niyawuhlukaniswa phambi kwami.

21 Manje kute umphefumulo wami ube nenjabulo kini, nekutsi inhlitiyo yami iwushiye lomhlaba ngenjabulo ngenca yenu, nekutsi ningangibeki phansi ngelusizi kanye nekudzabuka ethuneni, sukumani elutfulini, madvodzana ami, nibe ngemadvodza, niphokophele kuba mcondvomunye kanye nekuba nhlitiyonye, nihlangane kuto tonkhe tintfo, kute ningehleli phansi ekutfunjweni;

22 Kute ningacalekiswa ngesicalekiso lesibuhlungu; ngetulu kwaloko, nekutsi ningatehliseli kungatfokoti kwaNkulunkulu lolungile etikwenu, niye ekubhujisweni, yebo, kubhujiswa kwangunaphakadze kwemphefumulo kanye nekwemtimba.

23 Vukani, madvodzana ami; gcokani sikhali sekulunga. Vutfutani tinketane leniboshwe ngato, niphume ekusitsekeni, nisukume elutfulini.

24 Ningabe nisamvukela umnakenu nanini, imibono yakhe lebeyimihle kakhulu, futsi loyigcinile imiyaleto yami ngesikhatsi sisasuka eJerusalema; futsi lobe sikhali etandleni taNkulunkulu, ekusiletseni eveni lesetsembiso; ngoba kube bekungasingaye, bekufanele sibhujiswe yindlala ehlane; noko, netama kutsatsa imphilo yakhe; yebo, futsi weva buhlungu lobukhulu ngenca yenu.

25 Futsi ngiyesaba ngiphindze ngiyatfutfumela kakhulu ngenca yenu, funa eve buhlungu futsi; ngoba bukani, nimbeke licala lekutsi ufuna emandla kanye neligunya ngetulu kwenu; kodvwa ngiyati kutsi akate afune emandla neligunya ngetulu kwenu, kodvwa ufune inkhatimulo yaNkulunkulu, kanye nenhlalakahle yenu lucobo yaphakadze.

26 Futsi nivungamile ngenca yekutsi ukhulume ngalokucacile kini. Nitsi usebentise emavi lacinile; nitsi unitfukutselele, kodvwa bukani, kucina kwemavi akhe kwakukucina kwemandla elivi laNkulunkulu, lelalikuye; futsi loko nine lenikubita ngentfukutselo kwakuliciniso, njengalelo lelikuNkulunkulu, lebekanganolivimba, abonakalisa ngesibindzi mayelana nekungalungi kwenu.

27 Futsi kufanele kutsi emandla aNkulunkulu abe naye, nasekuniyaleni kutsi nilalele. Kodvwa bukani, kwakungasiye, kodvwa kwakunguMoya weNkhosi lowawukuye, lowavula umlomo wakhe kutsi akhulume kangangoba akakhonanga nekuwuvala.

28 Manje ndvodzana yami, Lamani, futsi nawe Lemuweli kanye naSemu, futsi nani madvodzana ami leningemadvodzana a-Ishmayeli, bukani, uma nitawulilalela livi laNefi aniyukubhubha. Futsi uma nitawumlalela ngishiya kini sibusiso, yebo, sibusiso sami sekucala.

29 Kodvwa uma ningetumlalela ngiyasitsatsa sibusiso sami sekucala, yebo, nesibusiso sami, futsi siyawuba etikwakhe.

30 Futsi manje, Zoramu, sengikhuluma kuwe: Buka, uyinceku yaLabani; noko, ukhishwe eveni laseJerusalema, futsi ngiyati kutsi ungumngani weliciniso wendvodzana yami, Nefi, ingunaphakadze.

31 Ngaloko-ke, ngenca yekutsi bewetsembekile intalelwane yakho iyawubusiswa kanye nentalelwane yakhe, kutsi bahlale emphumelelweni sikhatsi lesidze kulo lonkhe lelive; futsi kube bete lutfo, ngaphandle kwekutsi kube bubi emkhatsini wabo, lobuyawulimata noma buphatamise kuphumelela kwabo kulo lonkhe lelive ingunaphakadze.

32 Ngaloko-ke, uma niyawuyigcina imiyaleto yeNkhosi, iNkhosi ilingcwelisile lelive kute kuvikeleke intalelwane yenu kanye nentalelwane yendvodzana yami.