1 Futsi kwenteka kutsi emalangeni a-Ahazi indvodzana yaJothamu, indvodzana ya-Uziya, inkhosi yakaJuda, Resini, inkhosi yaseSiriya, kanye naPhekha indvodzana yaRemaliya, inkhosi yaka-Israyeli, bahamba bakhuphukela ngaseJerusalema kuyawukulwa nayo, kodvwa abakhonanga kuyincoba.

2 Indlu yakaDavide yatjelwa, kutsi: ISiriya itihlanganise nelaka-Efrayimu. Ngako inhlitiyo yakhe yatfutfumela, kanye netinhlitiyo tebantfu bakhe, njengetihlahla telihlatsi tinyakatiswa ngumoya.

3 Emvakwaloko iNkhosi yatsi ku-Isaya: Hamba nyalo uhlangabete Ahazi, wena kanye naSherayi Jashubi indvodzana yakho, ekugcineni kwemsele wesitiba lesisenhla emgwagcweni lomkhulu loya ensimini yemgezi wetingubo;

4 Ubosho kuye utsi: Caphela, uthule; ungesabi, noma ungaphelelwa ngemandla ngenca yemisila lemibili yaleti tinkhuni letishuncako, ngenca yentfukutselo leyesabekako yaResini ngeSiriya, kanye neyendvodzana yaRemaliya.

5 Ngenca yekutsi iSiriya, na- Efrayimu, kanye nendvodzana yaRemaliya bakwakhela luzungu, batsi:

6 Asikhuphuke siyewuvimbetela lakaJuda futsi silidzabule ekhatsi, sitehlukanisele lona, bese sibeka inkhosi emkhatsini walo, yebo, indvodzana yaThabheyeli.

7 Naku lokushiwo yiNkhosi Nkulunkulu itsi: Akuyukwenteka, noma kuphumelele.

8 Ngoba inhloko yaseSiriya yiDamaseko, nenhloko yeDamaseko, nguResini; futsi ekhatsi kweminyaka lengemashumi lasitfupha nesihlanu i-Efrayimu iyawuhlakatwa kute ingabe isaba nebantfu.

9 Inhloko yaka-Efrayimu yiSamariya, nenhloko yeSamariya yindvodzana yaRemaliya. Uma ningeke nikholwe ngempela angeke nicinisekiswe.

10 Ngetulu kwaloko, iNkhosi yaphindze yakhuluma ku-Ahazi, yatsi:

11 Cela sibonakaliso eNkhosini Nkulunkulu wakho; sicele noma sisekujuleni, noma ekuphakameni kwasezulwini.

12 Kodvwa Ahazi watsi: Angeke ngisicele, futsi angeke ngiyivivinye iNkhosi.

13 Futsi watsi: Lalela nyalo, O wenandlu yaDavide; ngabe kuyintfo lencane yini kuwe kukhatsata bantfu, kodvwa ungamkhatsata yini naNkulunkulu wami na?

14 Ngako-ke, iNkhosi lucobo lwayo iyawukunika sibonakaliso—Bukani, intfombi iyawukhulelwa, iyawutala indvodzana, iyawumetsa libito layo kutsi ngu-Imanyuweli.

15 Iyawudla tikhihli temasi kanye neluju, kute ikwati kwala lokubi ikhetse lokuhle.

16 Ngoba ngaphambi kwekutsi lomntfwana akwati kwala lokubi futsi akhetse lokuhle, lelive lewulenyanyako liyawube selishiywe ngiwo omabili emakhosi alo.

17 INkhosi iyawuletsa etikwakho, nasetikwebantfu bakho, nasetikwendlu yeyihlo, emalanga langakefiki kusukela ngelilanga i-Efrayimu yesuka ngalo kaJuda, inkhosi yase-Asiriya.

18 Futsi kuyawukwenteka kutsi ngalelo langa iNkhosi iyawushayela timphungane inkwela letisencenyeni yekugcina yaseGibhithe, kanye netinyosi letiseveni lase-Asiriya.

19 Futsi tiyawubuya, tiphumule tonkhe etihosheni letehlelako, nasemifantfwini yemadvwala, nasetikwawo onkhe emanyeva, nasetikwato tonkhe tihlahla.

20 Ngalelo langa iNkhosi iyawuhhula ngensingo lecashiwe, ngubo labangesheya kwemfula, iNkhosi yase-Asiriya, inhloko, kanye netiboya letisemlenteni; iphindze isuse netilevu tenu.

21 Futsi kuyawukwenteka kutsi ngalelo langa, indvodza iyawufuya litfole kanye netimvu letimbili;

22 Futsi kuyawukwenteka, ngenca yebunyenti belubisi letiyawulukhipha uyawudla tikhihli temasi; ngoba tikhihli temasi kanye neluju wonkhe muntfu losele eveni uyawudla.

23 Futsi kuyawukwenteka ngalelo langa, tonkhe tindzawo letiyawuba khona, lapho kwakukhona imivini letinkhulungwane letilingana netinhlavu letitinkhulungwane tesiliva, kuyawuba netitfwetfwe nemanyeva.

24 Ngemicibisholo kanye nebutjoki bantfu bayawuta lapho, ngoba lonkhe live liyawuba netitfwetfwe nemanyeva.

25 Futsi onkhe emagcuma ayawulinywa ngemakhuba etandla, lapho kungeke kusaba khona kwesaba titfwetfwe kanye nemanyeva; kodvwa ayawuba ekuchuba tinkhabi, kanye nekugcotjwagcotjwa timvu kanye netimbuti letincane ngelinani.