Sehluko 12
Isaya ubona lithempeli lemalanga ekugcina, kugcogcwa kwa-Israyeli, kanye nekwehlulelwa nekuthula kwemileniyamu—Labatigcabhako kanye nalababi batawutfotjiswa ngeKubuya kwesiBili—Catsanisa na-Isaya 2. Cishe ngemnyaka wema-559–545 ngaphambi kwekutalwa kwaKhristu.
1 Livi Isaya, indvodzana ya-Amose, lalibona mayelana naJuda kanye neJerusalema:
2 Futsi kuyawukwenteka ngemalanga ekugcina, ngesikhatsi intsaba yendlu yeNkhosi iyawucinisekiswa esicongweni setintsaba, iyawuphakanyiswa ngetulu kwemagcuma, futsi tonkhe tive tiyawubekelela tiye kuyo.
3 Bantfu labanyenti bayawuhamba batsi: Wotani, sikhuphukele entsabeni yeNkhosi, kuyo indlu yaNkulunkulu waJakobe; itawusifundzisa ngetindlela tayo, futsi sitawuhamba emikhondvweni yayo; ngoba eSiyoni kuyawuphuma umtsetfo, nelivi leNkhosi liyawuphuma eJerusalema.
4 Futsi uyawukwehlulela emkhatsini wetive, iyawukhuta bantfu labanyenti: futsi bayawugandza tinkemba tabo tibe ngemakhuba, netikhali tabo tibe bocelemba—sive asiyuphakamisela lesinye sive inkemba, futsi angeke basaya kuyawufundzela imphi nanini.
5 O wenandlu yakaJakobe, wota futsi asihambe ekukhanyeni kweNkhosi; yebo, wotani, ngoba nonkhe nidukile, ngamunye etindleleni takhe tebubi,
6 Ngako-ke, O Nkhosi, ubalahlile bantfu bakho, indlu yakaJakobe, ngenca yekutsi bagcwaliswa basemphumalanga, futsi balalela baphenguli njengemaFilisti, futsi batitfokotisa ebantfwaneni betihambi
7 Live labo ligcwele isiliva kanye neligolide, futsi kute siphetfo kuyo ingcebo yabo; live labo ngetulu kwaloko ligcwele emahhashi, futsi kute siphetfo kuto tincola temphi.
8 Live labo futsi ligcwele tithico; bakhonta umsebenti wetandla tabo lucobo, loko labakwente ngeminwe yabo lucobo.
9 Futsi umuntfu nje akakhotsami, nemuntfu lomkhulu akatehlisi, ngako-ke, akangatsetselelwa.
10 O nine lababi, ngenani edvwaleni, nibhace elutfulini, ngenca yekwesaba iNkhosi kanye nenkhatimulo yebukhosi bayo lokuyawunishaya.
11 Futsi kuyawukwenteka kutsi kubuka kwemuntfu lotigcabhako kuyawutfotjiswa, kanye nekutikhukhumeta kwebantfu kwehliswe, futsi yiNkhosi yona yodvwa leyawuphakanyiswa ngalelo langa.
12 Ngoba lilanga leNkhosi yemaBandla liyeta masinyane etikwato tonkhe tive, yebo, kubobonkhe; yebo, kulabatigcabhako kanye nalabatichenyako, nasetikwabo bonkhe labo labatiphakamisako, futsi bayawukwehliswa.
13 Yebo, lilanga leNkhosi liyawufika etikwayo yonkhe imisedari yaseLebanoni, ngoba iphakeme futsi iyatigcabha; etikwawo onkhe ema-okhi aseBhashani;
14 Nasetikwato tonkhe tintsaba, nasetikwawo onkhe emagcuma, nasetikwato tonkhe tive letiphakeme, nasetikwabo bonkhe bantfu;
15 Futsi nasetikwayo yonkhe imibhoshongo lephakeme, kanye nasetikwato tonkhe tibondza letitincaba;
16 Nasetikwayo yonkhe imikhumbi yaselwandle, nasetikwayo yonkhe imikhumbi yaseThashishi, nasetikwato tonkhe titfombe letinhle.
17 Futsi kutiphakamisa kwemuntfu kuyawutfotjiswa, kanye nekutikhukhumeta kwebantfu kuyawukwehliswa; futsi yiNkhosi yona yodvwa leyawuphakanyiswa ngalelo langa.
18 Futsi netithico iyawutinyamalalisa tiphele nya.
19 Futsi bayawungena emihumeni yemadvwala, kanye nasemigedzeni yemhlaba, ngoba kwesaba iNkhosi kuyawufika etikwabo nenkhatimulo yebukhosi bayo iyawubashaya, ngesikhatsi ivukela kutamatamisa kamatima umhlaba.
20 Ngalelo langa umuntfu uyawulahla tithico takhe tesiliva, kanye netithico takhe teligolide, latentele tona kutikhonta, kuto timvukunyane kanye nemalulwane;
21 Kute bangene emifantfwini yemadvwala, kanye naseticongweni tetihhehle temadvwala, ngoba kwesaba iNkhosi kuyawufika etikwabo kanye nebukhosi benkhatimulo yayo buyawubashaya, ngesikhatsi ivukela kutamatamisa kamatima umhlaba.
22 Yekela kwetsembela kumuntfu, umphefumulo wakhe losemakhaleni akhe; ngoba bayini nje?