1 Manje mine, Nefi, ngenta siphetfo sekuphrofetha kwami kini, bomnaketfu labatsandzekako. Futsi angeke ngisabhala ngaphandle kwetintfo letimbalwa nje, lengatiko kutsi kufanele nakanjani tenteke; futsi ngeke ngisabhala ngaphandle kwemagama lambalwa emnaketfu Jakobe.

2 Ngaloko-ke, tintfo lengitibhalile tiyangenelisa, ngaphandle nje kwemavi lambalwa lekufanele ngiwakhulume mayelana nemfundziso yaKhristu; ngaloko-ke, ngitawukhuluma kini ngalokusobala, ngalokusobala kwekuphrofetha kwami.

3 Ngoba umphefumulo wami uyatfokota ngalokusobala; ngoba iNkhosi Nkulunkulu isebenta ngalendlela emkhatsini webantfwana bebantfu. Ngoba iNkhosi Nkulunkulu inika kukhanya kwalabanekucondza; ngoba ikhuluma kubantfu ngekwelulwimi lwabo, ngekucondza kwabo.

4 Ngaloko-ke, ngifuna kutsi nikhumbule kutsi ngikhulumile kini ngalokuphatselene naloyo mphrofethi loyo iNkhosi leyangikhombisa yena, loyawubhabhatisa liWundlu laNkulunkulu, leliyawususa tono temhlaba.

5 Manje, uma liWundlu laNkulunkulu, lona lingcwele, linesidzingo sekubhajatiswa ngemanti, kugcwalisa konkhe kulunga, O pho, sikhulu kangakanani sidzingo setfu, sibe singekho ngcwele, sekutsi sibhajatiswe, yebo, nangemanti!

6 Manje, ngitawunibuta, bomnaketfu labatsandzekako, kutsi kwenteka kanjani kutsi liWundlu laNkulunkulu ligcwalise konkhe kulunga ngekubhajatiswa ngemanti na?

7 Anati yini kutsi lalingcwele na? Kodvwa nanoma lingcwele, lakhombisa kubantfwana bebantfu kutsi, ngekwasenyameni liyatitfoba phambi kwaBabe, futsi liyafakaza kuBabe kutsi liyawumlalela ekugcineni imiyaleto yakhe.

8 Ngaloko-ke, emvakwekutsi selibhajatisiwe ngemanti Moya loNgcwele wehlela etikwalo unjengesimo selituba.

9 Futsi ngetulu kwaloko, kukhombisa kubantfwana bebantfu kuba kuncane kwendlela, kanye nekuba ngumntjuntju kwelisango, lokufanele bangene ngalo, lona selisentile sibonelo phambi kwabo.

10 Futsi latsi kubantfwana bebantfu: Ngilandzeleni. Ngaloko-ke, bomnaketfu labatsandzekako, singamlandzela yini Jesu ngaphandle kwekutsi sitimisele kutsi sigcine imiyaleto yaBabe na?

11 Futsi Babe watsi: Phendvukani, phendvukani, nibhajatiswe egameni leNdvodzana yami leTsandzekako.

12 Ngetulu kwaloko, livi lendvodzana lefika kimi, litsi: Loyo lobhajatiswe egameni lami, Babe utawumnika Moya loNgcwele, njengami; ngaloko-ke, ngilandzeleni, nente tintfo lenibone ngitenta.

13 Ngaloko-ke, bomnaketfu labatsandzekako, ngiyati kutsi uma niyawulandzela iNdvodzana, ngenhloso lephelele yenhlitiyo, ningabi nekutentisa kanye nenkhohliso phambi kwaNkulunkulu, kodvwa ngenhloso yangempela, niphendvuka etonweni tenu, nifakaza kuBabe kutsi nitimisele kubitwa ngelibito laKhristu, ngembhabhatiso—yebo, ngekulandzela iNkhosi yenu kanye neMsindzisi wenu nehlele phansi emantini, njengekwelivi lakhe, bukani, emvakwaloko niyawuphiwa Moya loNgcwele; yebo, emvakwaloko kuta umbhabhatiso wemlilo newaMoya loNgcwele; futsi ngaleso sikhatsi ningakhuluma ngelulwimi lwetingilosi, nimemete indvumiso kuloNgcwele waka-Israyeli.

14 Kodvwa, bukani, bomnaketfu labatsandzekako, kweta livi leNdvodzana kimi, litsi: Emvakwekube seniphendvukile etonweni tenu, nafakaza kuBabe kutsi nitimisele kugcina imiyaleto yami, ngembhabhatiso wemanti, futsi senemukele umbhabhatiso wemlilo newaMoya loNgcwele, futsi senikwati kukhuluma ngelulwimi lolusha, yebo, nangelulwimi lwetingilosi, futsi emvakwaloku ningiphike, bekuyoba ncono kini kutsi beningangati.

15 Futsi ngeva livi livela kuBabe, litsi: Yebo, emavi aloTsandzekako wami aliciniso futsi etsembekile. Loyo loyobeketela kute kube sekugcineni, nguloyo kanye loyawusindziswa.

16 Manje, bomnaketfu labatsandzekako, ngiyati ngaloku kutsi ngaphandle kwekutsi umuntfu abeketele kute kube sekugcineni, ngekulandzela sibonelo seNdvodzana yaNkulunkulu lophilako, angeke asindziswe.

17 Ngaloko-ke, yentani leto tintfo lenginitjele tona kutsi ngitibonile kutsi iNkhosi yenu kanye neMhlengi wenu uyotenta; ngoba, ngalesi sizatfu tibonisiwe kimi, kute nilati lisango lekufanele ningene ngalo. Ngoba lisango lekufanele ningene ngalo kuphendvuka kanye nembhabhatiso ngemanti; bese kuta kutsetselelwa kwetono tenu ngemlilo kanye nangaMoya loNgcwele.

18 Futsi ngaleso sikhatsi senikulendlela lencane nalengumntjuntju leholela ekuphileni lokuphakadze; yebo, seningene ngelisango; senente njengekwemiyaleto yaBabe kanye neNdvodzana; futsi senemukele Moya loNgcwele, lofakaza ngaBabe kanye neNdvodzana, ekugcwaliseni setsembiso lasentile, sekutsi uma ningena ngendlela niyositfola.

19 Manje, bomnaketfu labatsandzekako, emvakwekutsi seningenile kulendlela lencane nalengumntjuntju, ngitonibuta kutsi ingabe konkhe sekwentiwe na? Bukani, ngitsi kini, Cha; ngoba beningeke nifike khashane kangaka ngaphandle kwekutsi kube ngelivi laKhristu nekukholwa kuye lokungenakunyakatiswa, netsembela ngalokugcwele kuto tento takhe letinhle loyo lonemandla ekusindzisa.

20 Ngaloko-ke, kufanele niphikelele ngekucina kuKhristu, ninelitsemba lelimsulwa leliphelele, kanye nelutsandvo lwaNkulunkulu kanye nelwebantfu bonkhe. Ngaloko-ke, uma niyawuphikelela, nititike ngelivi laKhristu, futsi nibeketele kute kube sekugcineni, bukani, naku lokushiwo nguBabe: Niyawuba nekuphila lokuphakadze.

21 Manje, bukani, bomnaketfu labatsandzekako, ngiyo lena indlela; futsi kute lenye indlela noma libito lelinikwe ngaphansi kwelizulu umuntfu langasindziswa ngalo embusweni waNkulunkulu. Manje, bukani, loku yimfundziso yaKhristu, futsi nguyona mfundziso kuphela leliciniso laBabe, kanye neyeNdvodzana, kanye neyaMoya loNgcwele, lokunguNkulunkulu munye, longenasiphetfo. Amen.