1 Manje, bukani, bomnaketfu, sengikhulumile kini, njengobe Moya angiphocelele; ngaloko-ke, ngiyati kutsi loku kufanele nakanjani kwenteke.

2 Futsi tintfo letiyawubhalwa kuleyo ncwadzi tiyawuba nguletiligugu lelikhulu kubantfwana bebantfu, ikakhulukati kuyo intalelwane yendlu yaka-Israyeli.

3 Ngoba kuyawukwenteka ngalelo langa kutsi emabandla lakhiwe, kodvwa hhayi eNkhosini, lapho linye liyawutsi kulelinye: Buka, mine ngimi lengiweNkhosi; futsi lamanye ayawutsi: Mine, ngimi lengiweNkhosi; futsi wonkhe muntfu lowakhe emabandla uyawusho kanjalo, kodvwa hhayi eNkhosini—

4 Ayawubanga ngulelo nalelo; nebaphristi bawo bayawubanga lomunye nalomunye, futsi bayawufundzisa ngekwemfundvo yabo, baphike naMoya loNgcwele, lokunguye loniketa kukhuluma.

5 Futsi baphika emandla aNkulunkulu, loNgcwele waka-Israyeli; batsi kubantfu: Lalelani tsine, nive umyalo wetfu; ngoba bukani kute Nkulunkulu lamuhla, ngoba iNkhosi neMhlengi seyiwentile umsebenti wayo, futsi seyinikete emandla ayo kubantfu.

6 Bukani, lalelani umyalo wami; uma bayawutsi kukhona simangaliso lesentekile ngesandla seNkhosi, ningakukholwa loko, ngoba ngalelilanga akasuye Nkulunkulu wetimangaliso; uwentile umsebenti wakhe.

7 Yebo, futsi kuyawuba khona labanyenti labayawutsi: Dlani, natsa, ujabule, ngoba kusasa sitawufa; futsi kuyawuba kuhle kitsi.

8 Futsi ngetulu kwaloko kuyawuba khona labanyenti labayawutsi: Dlani, natsa, ujabule; noko, mesabe Nkulunkulu—angeke akubeke licala ekwenteni sono lesincane; yebo, cala emanga kancane, sitakala ngalomunye ngenca yemavi akhe, gubhela makhelwane wakho umgodzi; kute bungoti kuloku; yenta tonkhe leti tintfo, ngoba kusasa sitawufa; futsi nangabe sinelicala, Nkulunkulu utawusishaya ngemivimba lembalwa, ekugcineni siyawusindziswa embusweni waNkulunkulu.

9 Yebo, futsi kuyawuba khona labanyenti labayawufundzisa ngalendlela, emanga nangelite kanye netimfundziso letibulima, bayawukhukhumala etinhlitiyweni tabo, bafune ngekujula kufihla emasu abo eNkhosini; futsi imisebenti yabo iyawuba sebumnyameni.

10 Ingati yalabangcwele iyawukhala emhlabatsini ngekumelana nabo.

11 Yebo, bonkhe baphambukile endleleni, bangenwe yinkhohlakalo.

12 Ngenca yekutigcabha, nangenca yebafundzisi bemanga, nemfundziso yemanga, emabandla abo angenwe yinkhohlakalo, futsi emabandla abo aphakeme; ngenca yekutigcabha bakhukhumele.

13 Baphanga labamphofu ngenca yetindlu tabo letingcwele letinhle; baphanga labamphofu ngenca yetingubo tabo letinhle; futsi bahlupha labamnene nalabamphofu ngenhlitiyo, ngoba ekutichenyeni kwabo bakhukhumele.

14 Banenkhani kanye nekutigcabha; yebo, ngenca yekutigcabha, nebubi, netinengiso, nebugwadla, bonkhe badukile ngaphandle kwalabambalwa, lababalandzeli baKhristu labatfobekile; noko, bayaholwa, kute kutsi ngetikhatsi letinyenti baphambuke ngenca yekutsi bafundziswa ngemiyalo yebantfu.

15 O labahlakaniphile, nalabafundzile, kanye nalabacebile, labakhukhumele ekutichenyeni kwetinhlitiyo tabo, kanye nabo bonkhe labo labashumayela timfundziso temanga, nabo bonkhe labo labenta bugwadla, futsi baguculele indlela lelungile yeNkhosi, maye, maye, maye kubo, kusho iNkhosi Nkulunkulu Somandla, ngoba bayawuphonswa phansi esihogweni!

16 Maye kubo labo labakhweshisela eceleni labalungile njengentfo lengenalutfo futsi bahlambalate loko lokuhle, batsi kuyintfo lenganamsebenti! Ngoba lilanga liyeta lapho iNkhosi Nkulunkulu masinyane iyawubajezisa bantfu basemhlabeni; futsi ngalelo langa lapho sebavutfwe ngalokuphelele ebubini lobukhulu bayawubhubha.

17 Kodvwa buka, uma bantfu basemhlabeni bangaphendvuka ebubini babo nasetinengisweni angeke babhujiswe, kusho iNkhosi yemaBandla.

18 Kodvwa buka, lelo bandla lelikhulu nalelinengekile, ingwadla yemhlaba wonkhe, kufanele liwele emhlabeni, futsi kuyoba kukhulu kuwa kwalo.

19 Ngoba umbuso wadeveli kufanele utanyatanyiswe, futsi labo labangebawo kufanele baphehlelwe ekuphendvukeni, noma develi utawubabamba ngetinketane takhe taphakadze, baphehlelwe entfukutselweni bashabalale.

20 Ngoba buka, ngalelo langa uyawudlanga etinhlitiyweni tebantfwana bebantfu, abaphehle kute batfukutselele loko lokuhle.

21 Futsi labanye utawubatfobisa, anguloku abakhohlisa kutsi balondzeke ngekwasenyameni, kute batsi; Konkhe kulungile eSiyoni; yebo, iSiyoni iyaphumelela, konkhe kuhle—ngaleyo ndlela develi uyoyilutsa imiphefumulo yabo, abahole ngebucili abayise phansi esihogweni.

22 Buka, labanye uyobakhohlisa, abatjele kutsi asikho sihogo; atsi kubo: Mine angisuye develi, ngoba kute—ubahlebela kanje etindlebeni tabo, ate ababambe ngetinketane takhe letesabekako, abayise lapho sekute khona kukhululwa.

23 Yebo, babanjwa ngekufa, kanye nangesihogo; futsi kufa kanye nesihogo, kanye nadeveli, bonkhe labo lababanjwe ngato leti tintfo kumele beme phambi kwesihlalo sebukhosi saNkulunkulu, futsi behlulelwe ngekwemisebenti yabo, kusuka lapho kufanele baye endzaweni lelungiselwe bona, lichibi lemlilo kanye nesibabule, lokukuhlupheka lokungapheli.

24 Ngako-ke, maye kuloyo lokhululekile eSiyoni!

25 Maye kuloyo lomemeta atsi: Konkhe kulungile!

26 Yebo, maye kuloyo lolalela imiyalo yebantfu, aphike emandla aNkulunkulu, nesipho saMoya loNgcwele!

27 Yebo, maye kuloyo lotsi: Sesitfole lokwanele, futsi asisakudzingi lokunye!

28 Kwephetsa, maye kubo bonkhe labo labatfutfumelako, futsi labatfukutsele ngenca yeliciniso laNkulunkulu! Ngoba buka, loyo lowakhe etikwelidvwala ulemukela ngekutfokota; futsi loyo lowakhe etikwesisekelo lesisihlabatsi uyatfutfumela funa awe.

29 Maye kuloyo loyawutsi: Sesilitfolile livi laNkulunkulu, futsi asisalidzingi lelinye livi laNkulunkulu, ngoba sesanele!

30 Ngoba bukani, naku lokushiwo yiNkhosi Nkulunkulu: Ngitawubanika bantfwana bebantfu umugca ngemugca, umyalo ngemyalo, lokuncane lapha nalokuncane lapho; futsi babusisiwe labo labalalela imiyalo yami, futsi baboleke indlebe ekucondziseni kwami, ngoba bayawufundza kuhlakanipha; ngoba kuloyo lomukelako ngitawumnika lokunye; futsi kulabo labayawutsi, Sesanele, kubo kuyawutsatfwa naloko labanako.

31 Ucalekisiwe loyo lobeka litsemba lakhe kumuntfu, noma ente umuntfu emandla akhe, noma lolalela imiyalo yebantfu, ngaphandle uma imiyalo yabo inikwa ngemandla aMoya loNgcwele.

32 Maye kubo beTive, kusho iNkhosi Nkulunkulu yemaBandla! Ngoba nanoma umkhono wami ngiyawuwelulela kubo lilanga nelilanga, batawungiphika; noko, ngitawuba nesihawu kubo, kusho iNkhosi Nkulunkulu, uma batawuphendvuka futsi bete kimi; ngoba umkhono wami weluliwe lonkhe lilanga, kusho iNkhosi Nkulunkulu wemaBandla.