Sehluko 21
Lihlumela lakaJese (Khristu) litawehlulela ngekulunga—Lwati ngaNkulunkulu lutawusibekela umhlaba ngeMileniyamu—INkhosi itawuphakamisa siboniso futsi igcogce Israyeli—Catsanisa na-Isaya 11. Cishe ngemnyaka wema-559–545 ngaphambi kwekutalwa kwaKhristu.
1 Futsi kuyawuvela esiphuntini sakaJese, futsi ligala liyawukhula etimphandzeni taso.
2 Moya weNkhosi uyawuhlala etikwakhe, moya wekuhlakanipha kanye newekucondza, moya wekweluleka kanye nemandla, moya welwati kanye newekuyesaba iNkhosi.
3 Uyawumenta abe ngulonekucondza lokusheshako ekuyesabeni iNkhosi; futsi angeke ehlulele ngalakubona ngemehlo akhe, noma ente sincumo ngalakuva ngetindlebe takhe.
4 Kodvwa uyawukwehlulela labamphofu ngekulunga, futsi abekhute ngekungakhetsi labamnene bemhlaba; futsi uyawushaya umhlaba ngendvuku yemlomo wakhe, nangekuphefumula kwetindzebe takhe uyawubabulala lababi.
5 Futsi kulunga kuyawuba libhande lelukhalo lwakhe, nekwetsembeka kuyoba ngumbhenso welukhalo lwakhe.
6 Ngetulu kwaloko imphisi iyawuhlala nelizinyane leliwundlu, nengwe iyawuhlala phansi nelizinyane lembuti, linkhonyane kanye nelibhubesi lelincane kanye nalokukhuluphele ndzawonye; umntfwana lomncane uyawutihola.
7 Inkhomati kanye nelibhele kuyawudla ndzawonye; emankhonyane ako ayawucambalala ndzawonye; libhubesi liyawudla tjani njengenkhabi.
8 Umntfwana lomunyako uyawudlala emgodzini wemfeti, nemntfwana losandza kususwa ebeleni uyawufaka sandla sakhe emgodzini welibululu.
9 Angeke kulimate noma kubhubhise entsabeni yami yonkhe lengcwele, ngoba umhlaba uyawugcwala kwati iNkhosi, njengemanti ambonya lwandle.
10 Futsi ngalelo langa kuyawuba khona imphandze yaJese, leyawukuma njengesiboniso kubantfu, kuso beTive bayawubutsana; futsi kuphumula kwakhe kuyawuba kuhle kakhulu.
11 Futsi kuyawukwenteka ngalelo langa kutsi iNkhosi iyawuphindze yelula sandla sayo kwesibili kubuyisa insali yebantfu bayo labayawube basele, e-Asiriya, naseGibhithe, nasePhathirosi, naseKushe, nase-Elamu, naseShineyari, naseHamathi, kanye nasetichingini telwandle.
12 Futsi uyawuphakamisela tive siboniso, abutse batfunjwa baka-Israyeli, ahlanganise ndzawonye labasakatekele emagumbini lamane emhlaba bakaJuda.
13 Umona wa-Efrayimu ngetulu kwaloko uyawunyamalala, titsa takaJuda ticedvwe nya; Efrayimu angeke abe nemona ngaJuda, naJuda angeke amhluphe Efrayimu.
14 Kodvwa bayawukwehlela emahlombe emaFilisti kuya ngasenshonalanga; baphange nebasemphumalanga kanyekanye; bayawulula sandla sabo kuyo i-Edomu kanye neMowabi; nebantfwana bema-Amoni bayawubalalela.
15 Futsi iNkhosi iyawulibhubhisa nya lulwimi lwelwandle lwaseGibhithe; ngemoya wayo lonemandla iyawunyakatisa sandla sayo ngetulu kwemfula, futsi iyakuwushaya ube yimifudlana lesikhombisa, futsi yente bantfu bawele ngetincabule letomile.
16 Futsi kuyawuba khona umgwaco lomkhulu wensali yebanftu bakhe labayawusala, e-Asiriya, njengobe kwakunjalo ku-Israyeli ngalelo langa laphuma ngalo eveni laseGibhithe.