1 Kodvwa, buka, ngemalanga ekugcina, noma ngemalanga ebeTive—yebo, buka tonkhe tive tebeTive kanjalo nemaJuda, labo labayawufika kulelive kanye nalabo labayawube bakulamanye emave, yebo, nakuwo onkhe emave emhlaba, buka, batawube badzakwe bubi kanye nato tonkhe tinhlobo tetinengiso—

2 Futsi uma lelo langa lifika bayawuvakashelwa yiNkhosi yemaBandla, ngekudvuma nangekutamatama kwemhlaba, nangemsindvo lomkhulu, nangesiphepho, nangesivunguvungu, kanye nangelilangabi lemlilo locotfulako.

3 Futsi tonkhe tive letilwa neSiyoni, naleto letiyicindzetelako, tiyawuba njengeliphupho lembono wasebusuku; yebo, kuyawuba kubo, njengakumuntfu lolambile lophuphako, bukani uyadla kodvwa uma avuka umphefumulo wakhe awunalutfo; noma njengemuntfu lowomile lophuphako, bukani uyanatsa kodvwa uma avuka bukani ubutsakatsaka, nemphefumulo wakhe ulambile; yebo, siyawuba njalo-ke nesicuku sato tonkhe tive letilwa nentsaba iSiyoni.

4 Ngoba buka, nonkhe nine lenenta bubi, manini nimangale, ngoba niyawuklabalaza, futsi nikhale; yebo, niyawudzakwa kodvwa hhayi liwayini, niyawuyendzetela kodvwa hhayi ngenca yesinatfo lesinemandla.

5 Ngoba buka, iNkhosi itfululele etikwenu butfongo lobukhulu. Ngoba buka, nivale emehlo enu, nilahle baphrofethi; kwatsi babusi benu, kanye nebaboniswa ibasibekele ngenca yebubi benu lobukhulu.

6 Futsi kuyawukwenteka kutsi iNkhosi Nkulunkulu iyawuletsa kini emavi encwadzi, futsi kuyawuba ngemavi abo labo lasebafa.

7 Buka lencwadzi iyawuvalwa; futsi kulencwadzi kuyawuba khona sembulo lesivela kuNkulunkulu, kusukela ekucaleni kwemhlaba kuya ekupheleni kwawo.

8 Ngaloko-ke, ngenca yetintfo letivaliwe, leto tintfo letivaliwe atiyuletfwa ngelilanga lebubi netinengiso tebantfu. Ngaloko-ke lencwadzi iyawugodlwa kubo.

9 Kodvwa lencwadzi iyawunikwa indvodza, futsi yona iyawuwahambisa emavi alencwadzi, lekungemavi alabo lesebalala elutfulini, futsi iyawuwayisa kulomunye;

10 Kodvwa lawo mavi lavalelwe angeke awahambise, futsi angeke ayihambise naleyo ncwadzi. Ngoba leyo ncwadzi iyawube ivalwe ngemandla aNkulunkulu, futsi sembulo lesavalelwa siyawugcinwa encwadzini kute kufike sikhatsi seNkhosi lucobo lesifanele, kute avetwe; ngoba buka, embula tonkhe tintfo kusukela ekusekelweni kwemhlaba kute kube sekupheleni kwawo.

11 Lilanga liyeta lapho emavi alencwadzi lavalelwe ayawufundvwa etikweticongo tendlu; futsi ayawufundvwa ngemandla aKhristu; futsi tonkhe tintfo tiyawukwembulelwa bantfwana bebantfu letake taba khona emkhatsini webantfwana bebantfu, futsi naleto letitawuba khona kute kube sekupheleni kwemhlaba.

12 Ngaloko-ke, ngalelo langa ngesikhatsi lencwadzi yetfulwa kulendvodza lengikhulume ngayo, lencwadzi iyawufihlwa emehlweni emhlaba, kute kungabi khona emehlo anoma ngubani loyawuyibona ngaphandle kwalabafokati labatsatfu labayawuyibona, ngemandla aNkulunkulu, ngaphandle kwakhe loyo lencwadzi leyawetfulwa kuye; futsi labo bayawufakaza ngeliciniso lalencwadzi kanye netintfo letikuyo.

13 Futsi kute namunye loyawuyibona, ngaphandle kwalabo labambalwa ngekwentsandvo yaNkulunkulu, kute banikete bufakazi ngelivi lakhe kubantfwana bebantfu; ngoba iNkhosi Nkulunkulu ishito kutsi emavi alabatsembekile ayokhuluma kube shangatsi aphuma kulabafile.

14 Ngaloko-ke, iNkhosi Nkulunkulu itawuchubeka nekwembula emavi alencwadzi; futsi ngemlomo wabofakazi labanyenti njengobe kubonakala kukuhle kuyo itawulicinisekisa livi layo; futsi maye kuloyo lolahla livi laNkulunkulu!

15 Kodvwa buka, kuyawukwenteka kutsi iNkhosi Nkulunkulu iyawutsi kuloyo leyawumtfulela lencwadzi: Tsatsa lamavi langakavalwa uwayise kulomunye, kute awabonise lofundzile, atsi: Fundza lapha, ngiyakuncenga. Futsi lofundzile uyawutsi: Letsa lapha lencwadzi, ngitawuwafundza.

16 Manje, ngenca yeludvumo lwemhlaba kanye nekutfola inzuzo batawusho loku, hhayi ngekufuna ludvumo lwaNkulunkulu.

17 Futsi lendvodza iyawutsi: Angikwati kuyiletsa lencwadzi, ngoba ivaliwe.

18 Emvakwaloko lofundzile uyawutsi: Ngeke ngikwati kuyifundza

19 Ngaloko-ke kuyawukwenteka, kutsi iNkhosi Nkulunkulu itawuyetfula futsi lencwadzi kanye nemavi ayo kuloyo longakafundzi; lendvodza lengakafundzi iyawutsi: Angikafundzi.

20 Emvakwaloko iNkhosi Nkulunkulu iyawutsi kuye: Labafundzile angeke bawafundze, ngoba bawalahlile, futsi ngiyakwati kwenta umsebenti wami; ngaloko-ke uyawuwafundza lawo mavi lengiyawukunika wona.

21 Ungatitsintsi leto tintfo letivaliwe, ngoba ngitawutiveta ngesikhatsi sami lesifanele; ngoba ngitawubakhombisa bantfwana bebantfu kutsi ngiyakwati kwenta umsebenti wami.

22 Ngaloko-ke, uma sewuwafundzile emavi lengikuyalete ngawo, wabatfola bofakazi lengikutsembise bona, emvakwaloko uyoyivala lencwadzi futsi, bese uyifihla kimi, kute ngiwagcine lawo mavi longakawafundzi, kute ngibone kutsi kufanele ngekuhlakanipha kwami ngitembule tonkhe tintfo kubantfwana bebantfu.

23 Ngoba buka, nginguNkulunkulu; nginguNkulunkulu wetimangaliso; ngitawukhombisa umhlaba kutsi ngiyafana itolo, lamuhla, naphakadze; nekutsi angisebenti emkhatsini webantfwana bebantfu ngaphandle kwekutsi kube ngekwelukholo lwabo.

24 Futsi ngetulu kwaloko kuyawukwenteka kutsi iNkhosi iyawutsi kuloyo loyawufundza lawo mavi layawuletfwa kuye:

25 Ngekubona kutsi labantfu basondzela edvute nami ngemilomo yabo, nangetindzebe tabo bayangidvumisa, kodvwa batichelisele khashane tinhlitiyo tabo kimi, nekungesaba kwabo kufundziswa ngekwemyalo webantfu—

26 Ngako-ke, ngitawuchubeka nekwenta umsebenti lomangalisako emkhatsini walaba bantfu, yebo, umsebenti lomangalisako nesimangaliso, ngoba kuhlakanipha kwalabahlakaniphile nalabafundzile babo kuyawushabalala, nekwati kwalabanekucondza babo kuyawufihlwa.

27 Maye kulabo labafuna ngekujula kufihla emasu abo eNkhosini! Imisebenti yabo isebumnyameni; futsi batsi: Ngubani losibonako, futsi ngubani losatiko na? Ngetulu kwaloko batsi: Ngempela, kugucula kwakho tintfo tibheke phansi kuyawufaniswa njengelibumba lembumbi. Kodvwa buka, ngitawubakhombisa, kusho iNkhosi yemaBandla, kutsi ngiyayati yonkhe imisebenti yabo. Ngoba ngabe umsebenti uyawukusho yini kuloyo lowentile kutsi, akangentanga na? Noma loko lokubunjiwe kuyawusho yini kuloyo lokubumbile kutsi bekete kucondza na?

28 Kodvwa buka, kusho iNkhosi yemaBandla: ngitawubakhombisa labantfwana bebantfu kutsi kusesikhashana nje lesincane kakhulu futsi iLebanoni iyawuguculwa ibe yinsimi levundzile; futsi insimi levundzile iyawutsatfwa njengelihlatsi.

29 Futsi ngalelo langa labangeva etindlebeni bayawuweva emavi aleyo ncwadzi, nemehlo alabangaboni ayawubona ekufiphaleni nasebumnyameni.

30 Futsi labamnene nabo bayawukwandza, injabulo yabo iyawuba seNkhosini, labamphofu emkhatsini webantfu bayawujabula kuloNgcwele waka-Israyeli.

31 Ngoba ngempela njengobe iNkhosi iphila bayawubona kutsi loyo lomubi wentiwe waba lite, sedzeleli sishisiwe, nabo bonkhe labo lababuke bubi basusiwe;

32 Ngalokunjalo nalabo labenta umuntfu abe soni ngelivi, bambekele lugibe loyo lobakhutako esangweni, babuyisele labalungile eceleni njengentfo lengasilutfo.

33 Ngako-ke, naku lokushiwo yiNkhosi, leyahlenga Abrahama, mayelana nendlu yakaJakobe: Jakobe manje angeke asaba nemahloni, noma buso bakhe manje buphaphatseke.

34 Kodvwa uma abona bantfwana bakhe, umsebenti wetandla tami, emkhatsini wakhe, bayawulingcwelisa libito lami, futsi bamngcwelise loNgcwele waJakobe, futsi bayawumesaba Nkulunkulu wema-Israyeli.

35 Ngalokunjalo nalabo labaduka ngekwemoya bayawuba nekucondza, futsi labo labavungama bayawuyifundza imfundziso.