Sehluko 23
Kubhujiswa kweBhabhulona kuluphawu lwekubhujiswa ngeKubuya kwesiBili—Kutawuba lilanga lelulaka kanye nekuphindzisela—iBhabhulona (umhlaba) itawukuwa ingunaphakadze—Catsanisa na-Isaya 13. Cishe ngemnyaka wema-559–545 ngaphambi kwekutalwa kwaKhristu.
1 Sembulo ngeBhabhulona, Isaya indvodzana ya-Amose leyasibona.
2 Phakamisani siboniso entsabeni lephakeme, phakamiselani livi kubo, nibakhwebe ngesandla, kute bangene emasangweni alabaphakeme.
3 Ngibayaletile labangcwele bami, ngetulu kwaloko ngiwabitile emachawe ami lanemandla, ngoba intfukutselo yami ayikho kulabo labatfokotako ebukhulwini bami.
4 Umsindvo wesicuku etintsabeni njengewebantfu labanyenti, umsindvo wekuphitsitela kwemibuso yetive ihlangene ndzawonye, iNkhosi yemaBandla igcogca emabutfo emphi.
5 Baphuma eveni lelikhashane, bavela ekugcineni kwelizulu, yebo, iNkhosi, kanye netikhali tentfukutselo yayo, kubhubhisa umhlaba wonkhe.
6 Lilani, ngoba lilanga leNkhosi selisondzele; liyawufika njengembubhiso levela kuSomandla.
7 Ngako-ke, tandla tonkhe tiyawuphelelwa ngemandla, tinhlitiyo tebantfu bonkhe tiyawushona phansi;
8 Bayawukwesaba; tinhlungu kanye netinsizi kuyawubabamba; bayawushaceka lomunye kulomunye; buso babo buyawuba njengemalangabi.
9 Bukani, lilanga leNkhosi liyasondzela, linelunya lwelulaka kanye nentfukutselo leyesabekako kutsi lente live libe lihlane; libhubhise netoni letikulo.
10 Ngoba tinkhanyeti telizulu nemabutfo ato angeke kunikete kukhanya kwako; lilanga liyawufiphala ekuphumeni kwalo, nenyanga angeke ikhiphe kukhanya kwayo.
11 Futsi ngitawujezisa umhlaba ngebubi bawo, kanye nalababi ngebubi babo; ngitawulicedza ligcabho kulabatigcabhako, ngikutfobise kutikhukhumeta kwalabanelunya.
12 Ngitawukwenta umuntfu abe ligugu lelikhulu kuneligolide lelicengekile; umuntfu abe ligugu lelikhulu kuneligolide lase-Ofiri.
13 Ngako-ke, ngitakuwatfutfumelisa emazulu, umhlaba usuke uphele endzaweni yawo, ngelulaka lweNkhosi yemaBandla, nangelilanga lentfukutselo yakhe leyesabekako.
14 Futsi kuyawuba njengenyamatane letingelwako, nanjengetimvu letite umelusi; kuyawutsi loyo naloyo aphendvukele kubantfu bakubo, nguloyo naloyo muntfu abalekele eveni lakubo.
15 Bonkhe labo labatigcabhako bayawugwazwa; yebo, bonkhe labo labatihlanganisa nalababi bayawudliwa yinkemba.
16 Bantfwana babo ngetulu kwaloko bayawuphihlitwa babe ticucu phambi kwemehlo abo babuka; tindlu tabo tiyawuphangwa futsi bafati babo badlwengulwe.
17 Buka, ngitawubaphehlela emaMede kutsi abahlasele, wona angeke anake isiliva neligolide, noma atfokote ngalo.
18 Butjoki babo buyawudubula emajaha abe ticucu; futsi bona angeke babe nesihawu ebantfwaneni; emehlo abo angeke abe nemusa kubantfwana.
19 Futsi iBhabhulona, ligugu lemibuso, buhle lobukhulu bemaKhaledi, iyawuba njengesikhatsi Nkulunkulu aketula iSodoma kanye neGomora.
20 Angeke kuphidze kuhlalwe kuyo nanini, noma kuhlalwe kuyo titukulwane ngetitukulwane: noma um-Arabu amise lithende lapho; noma belusi balale nemihlambi yabo lapho.
21 Kodvwa tilwane tesiganga tasehlane tiyawulala khona lapho; netindlu tabo tiyawugcwala timphungushe; netikhova tiyawuhlala lapho, netimbuti tesiganga tiyawutjakadvula khona.
22 Futsi tilwane tesiganga tiyawushaya umkhulungwane etindlini tabo letingenalutfo, bonyokangwenya etigodlweni tabo letinhle, futsi sikhatsi sakhe sesisondzele, lilanga lakhe angeke lisachutjelwa embili. Ngoba ngitawumbhubhisa ngekushesha; yebo, ngoba ngitawuba nesihawu kubantfu bami, kodvwa lababi bayawushabalaliswa.