1 Emavi aJakobe, umnakaboNefi, lawakhuluma kubantfu baNefi:

2 Bukani, bomnaketfu labatsandzekako, mine, Jakobe, ngibitwe nguNkulunkulu, futsi ngibekwe ngendlela yeluhlelo lwakhe lolungcwele, ngibekwe ngumnaketfu Nefi, lenimbuka njengenkhosi noma umvikeli, lenincike kuye kutsi aniphephise, bukani niyati kutsi ngikhulume kini tintfo letinyenti kakhulu.

3 Noko, ngikhuluma kini futsi; ngoba nginesifiso senhlalakahle yemiphefumulo yenu. Yebo, inshisekelo yami yinkhulu ngani; futsi nani lucobo lwenu niyakwati kutsi seloku kwaba njalo. Ngoba nginikhutsatile ngako konkhe kukhutsala; nginifundzisile emavi ababe; futsi ngikhulumile kini mayelana nato tonkhe tintfo letibhaliwe, kusukela ekudalweni kwemhlaba.

4 Manje, bukani, ngitawukhuluma kini mayelana netintfo letikhona, naleto letitawukwenteka; ngaloko-ke ngitawunifundzela emavi a-Isaya. Futsi ngemavi umnaketfu lafisa kutsi ngiwakhulume kini. Ngiwakhuluma kini ngenca yenu, kute nifundze niphindze nidvumise libito laNkulunkulu wenu.

5 Manje, emavi lengitawuwafundza ngiwo lawo Isaya lawakhuluma mayelana nayo yonkhe indlu yaka-Israyeli; ngaloko-ke, ngiwabhekisa kini, ngoba nibendlu yaka-Israyeli. Futsi tinyenti tintfo letakhulunywa ngu-Isaya letibhekiswe kini, ngenca yekutsi nibendlu yaka-Israyeli.

6 Manje, ngulawa lamavi: Naku lokushiwo yiNkhosi Nkulunkulu: Bukani, ngitawuphakamisa sandla sami kubeTive, futsi ngimise sibonakaliso sami kubantfu; bayawuletsa emadvodzana akho etandleni tabo, kanye nemadvodzakati akho bayawuwatjatsa emahlombe abo.

7 Futsi emakhosi ayawuba bobabe bakho labakondlako, nemakhosikati abo bomake bakho labakondlako; bayawukhotsamela buso babo bubheke phansi, bakhotse nelutfuli lwetinyawo takho; futsi uyawukwati kutsi ngiyiNkhosi; ngoba abanawujabha labo labangilindzako.

8 Futsi manje mine, Jakobe, ngitokhuluma ngaloko lokuphatselene nalamavi. Ngoba bukani, iNkhosi ingikhombisile kutsi labo labebaseJerusalema, lapho saphuma khona, babulewe futsi batfwalwa batfunjwa.

9 Noko, iNkhosi ingikhombisile kutsi bayophindze babuye futsi. Ngetulu kwaloko ingikhombisile kutsi iNkhosi Nkulunkulu, loNgcwele waka-Israyeli, itawutibonakalisa kubo isenyameni; futsi emvakwekutsi itibonakalisile bayoyibhacabula baphindze bayibetsele, njengekwemavi engilosi leyawakhuluma kimi.

10 Futsi emvakwekutsi sebatente lukhuni tinhlitiyo tabo futsi baba nenkhani ngekumelana naloNgcwele waka-Israyeli, bukani, tehlulelo taloNgcwele waka-Israyeli tiyawuta etikwabo. Futsi lilanga liyeta lapho bayawushaywa baphindze bahlushwe.

11 Ngaloko-ke, emvakwekutsi sebabalekisiwe bayiswa emuva naphambili, ngoba naku lokushiwo yingilosi, labanyenti bayawuhlushwa enyameni, futsi abayukuyekelwa kutsi babhujiswe, ngenca yemithandazo yalabetsembekile; bayawuhlakatwa, bashaywe, futsi batondvwe; noko iNkhosi itawuba nesihawu kubo, kutsi uma batfola lwati ngeMhlengi wabo, bayawuphindze bagcogcwe ndzawonye emaveni lalifa labo.

12 Futsi babusisiwe beTive, labo umphrofethi labhale ngabo; ngoba bukani, nangabe bayawuphendvuka futsi bangalwi neSiyoni, baphindze bangatihlanganisi nalelo bandla lelikhulu nalelinengekile, bayawusindziswa; ngoba iNkhosi Nkulunkulu itawutigcwalisa tivumelwano leyatenta kubantfwana bayo; ngalesi sizatfu umphrofethi utibhalile leti tintfo.

13 Ngaloko-ke, labo labalwa neSiyoni kanye nebantfu besivumelwano beNkhosi bayawukhotsa lutfuli lwetinyawo tabo; futsi bantfu beNkhosi abayukuba nemahloni. Ngoba bantfu beNkhosi ngibo labo labayilindzako; ngoba basakulindzile kuta kwaMesiya.

14 Futsi bukani, ngekwemavi emphrofethi, Mesiya utawuphindze ativete ngekwakhe kwesibili kute ababuyise; ngaloko-ke, yena utawutibonakalisa ngekwakhe kubo ngemandla kanye nangenkhatimulo lenkhulu, nasekubhujisweni kwetitsa tabo, uma lelo langa lifika lapho bayawukholwa kuye; futsi kute namunye letawumbhubhisa lokholwa kuye.

15 Futsi labo labangakholwa kuye bayawubhujiswa, ngemlilo, kanye nesivunguvungu, nangekutamatama kwemhlaba, nangekucitseka kwengati, nangesifo lesingumashayabhuce, kanye nangendlala. Futsi bayawukwati kutsi iNkhosi inguNkulunkulu, loNgcwele waka-Israyeli.

16 Ngoba kuya ngani imphango isuswe kubo labanemandla, noma labatfunjiwe ngekwemtsetfo bakhululwe?

17 Kodvwa naku lokushiwo yiNkhosi: Nalabatfunjwa balabo labanemandla bayawususwa, nemphango yalabo labesabekako iyawukhululwa; ngoba Nkulunkulu loneMandla uyawukhulula bantfu bakhe besivumelwano. Ngoba naku lokushiwo yiNkhosi: Ngitawuphikisana nabo labo labaphikisana nawe—

18 Futsi mine ngitawubadlisa labo labakucindzetelako, inyama yabo lucobo; futsi bayawudzakwa yingati yabo lucobo njengeliwayini lelinongotelako; futsi yonkhe inyama iyawukwati kutsi mine iNkhosi nginguMsindzisi wakho kanye neMhlengi wakho, loneMandla waJakobe.