Sehluko 16
Isaya ubona iNkhosi—Tono ta-Isaya tiyatsetselelwa—Ubitelwa kutsi aphrofethe—Uphrofetha ngekulahlwa kwetimfundziso taKhristu ngemaJuda—Insali itawubuya—Catsanisa na-Isaya 6. Cishe ngemnyaka wema-559–545 ngaphambi kwekutalwa kwaKhristu.
1 Ngemnyaka inkhosi Uziya leyafa ngawo, ngayibona iNkhosi ihleti esihlalweni sayo sebukhosi, lesisetulu futsi lesiphakeme, umsila wesembatfo sayo wawugcwalise lonkhe lithempeli.
2 Ngetulu kwaso kwakume emaserafi; ngulelo nalelo lalinetimphiko letisitfupha; ngetimphiko letimbili atimbonye buso bawo, ngaletimbili atimbonye tinyawo tawo, kwatsi ngaleti letimbili abe andiza.
3 Linye lalimemeta kulelinye, litsi: Ingcwele, ingcwele, ingcwele iNkhosi yemaBandla; umhlaba wonkhe ugcwele bukhosi bayo.
4 Tinsika temnyango tatfutfumela ngenca yeliphimbo laloyo lobekamemeta, futsi indlu yagcwala intfutfu.
5 Emvakwaloko ngatsi: Maye kimi! Ngoba ngiphelile; Ngenca yekutsi ngingumuntfu lotindzebe temlomo wakhe tingcolile; futsi ngihleti emkhatsini kwebantfu labatindzebe tabo tingcolile; ngoba emehlo ami ayibonile iNkhosi, iNkhosi yemaBandla.
6 Emvakwaloko linye lemaserafi landiza leta kimi, liphetse lilahle lelivutsako esandleni salo, lelalilitsetse ngeludlawu elatini;
7 Lafike lalibeka emlonyeni wami, latsi: Buka, loku kutsintse tindzebe takho; bubi bakho bususiwe, netono takho tihlanjululiwe.
8 Ngetulu kwaloko ngeva livi leNkhosi, litsi: Ngubani lengiyawumtfuma, futsi ngubani lotawusiyela na? Emvakwaloko ngatsi: Nangu mine; tfuma mine.
9 Yatsi: Hamba utjele laba bantfu utsi—Lalelani njalo, kodvwa abatange bacondze; bukani njalo, kodvwa abatange babone.
10 Yenta inhlitiyo yalaba bantfu ibe ndzindzima, wente tindlebe tabo tibe butfuntfu ekuveni, uvale emehlo abo—funa babone ngemehlo abo, beve ngetindlebe tabo, baphindze bacondzisise ngetinhlitiyo tabo, baphendvuke bese bayaphiliswa.
11 Emvakwaloko ngatsi: Nkhosi, kutawute kube ngunini na? Yatsi: Kudzimate kubhujiswe emadolobha kubete bantfu labahlala khona, netindlu tingabe tisaba nebantfu, nelive lisale lingenalutfo.
12 Futsi iNkhosi ibasakatele khashane bantfu, ngoba live liyawusala linganalutfo emkhatsini walelive.
13 Kodvwa ngisho namanje kuyawuba khona incenye yelishumi, bayawubuya, futsi bayawudliwa, njengesihlahla semtherebinte, nanjenge-okhi lesiphunti sayo sikuwo lapho basusa emacembe ayo; kute intalelwane lengcwele ibe siphunti saso.