1 Manje bukani, bomnaketfu labatsandzekako, ngitawukhuluma kini; ngoba mine, Nefi, angeke ngivume kutsi nicabange kutsi nilunge kakhulu kunaloko beTive labayawuba ngiko. Ngoba bukani, ngaphandle kwekutsi nigcine imiyaleto yaNkulunkulu nonkhe ngalokufanako niyawubhubha; futsi ngenca yemavi lakhulunyiwe akudzingi nicabange kutsi beTive babhujisiwe baphela nya.

2 Ngoba bukani, ngitsi kini bonkhe beTive labatawuphendvuka batawuba bantfu besivumelwano beNkhosi; futsi bonkhe bemaJuda labangeke baphendvuke bayawulahlwa; ngoba iNkhosi kute leyenta sivumelwano naye ngaphandle kwalabo labaphendvukako futsi bakholwe kuyo iNdvodzana yayo lenguloNgcwele waka-Israyeli.

3 Manje, sengitophrofetha ikakhulukati mayelana nemaJuda kanye nebeTive. Ngoba emvakwekutsi lencwadzi lengikhulume ngayo ivele, ibhalelwe beTive, iphindze ivalelwe eNkhosini, kuyawuba khona labanyenti labayawukholwa lawo mavi labhaliwe; futsi bayawuwatsatsa bawayise kuyo insali yentalelwane yetfu.

4 Emvakwaloko insali yentalelwane yetfu iyokwati mayelana natsi, kutsi saphuma kanjani eJerusalema, nekutsi yona isitukulwane semaJuda.

5 Livangeli laJesu Khristu liyawumenyetelwa emkhatsini wabo; ngaloko-ke, bayawubuyiselwa ekubatini bokhokho babo, futsi ngalokunjalo nasekumatini Jesu Khristu, lobekakhona emkhatsini wabokhokho babo.

6 Emvakwaloko bayawutfokota; ngoba bayawukwati kutsi kusibusiso kubo lesivele esandleni saNkulunkulu; futsi tincwencwe tabo tebumnyama tiyawucala kuwa emehlweni abo; netitukulwane letinyenti angeke tendlule emkhatsini wabo, ngaphandle kwekutsi bayawuba bantfu labamsulwa nalabatsandzekako.

7 Futsi kuyawukwenteka kutsi emaJuda lahlakatekile nawo ayawucala kukholwa kuKhristu; ayawucala kubutsana etikwelive lonkhe; bonkhe labo labayawukholwa kuKhristu nabo bayawuba bantfu labatsandzekako.

8 Futsi kuyawukwenteka kutsi iNkhosi Nkulunkulu iyawucala umsebenti wayo emkhatsini wato tonkhe tive, tihlobo, tilimi, nakubantfu, kuletsa kubuyiselwa kwebantfu bayo emhlabeni.

9 Futsi ngekulunga iNkhosi Nkulunkulu iyawubehlulela labamphofu, yekhute ngekungakhetsi labamnene bemhlaba. Iyawushaya umhlaba ngendvuku yemlomo wayo; nangekuphefumula kwetindzebe tayo iyawubabulala lababi.

10 Ngoba sikhatsi siyeta masinyane lapho iNkhosi Nkulunkulu iyawukwenta kwehlukana lokukhulu emkhatsini webantfu, lababi itawubabhubhisa; isindzisa bantfu bayo, yebo, noma ngabe kufanele ibhubhise lababi ngemlilo.

11 Futsi kulunga kuyawuba libhande letinkhalo tayo, nekwetsembeka libhande letinkhalo tayo.

12 Futsi ngaleso sikhatsi imphisi iyawuhlala neliwundlu; nengwe iyawulala phansi nemntfwana, nelinkhonyane, nelibhubesi lelincane, kanye nalokukhuluphalisiwe, ndzawonye; futsi umntfwana lomncane uyawutihola.

13 Inkhomati kanye nelibhele kuyawudla ndzawonye; lokuncane kwato kuyawulala phansi ndzawonye; nelibhubesi liyawudla tjani njengenkhabi.

14 Umntfwana lomunyako uyawudlala emgodzini wemfeti, nemntfwana lolunyuliwe uyawufaka sandla sakhe emgodzini welibululu.

15 Angeke kulimate noma kubhubhise intsaba yami lengcwele; ngoba umhlaba uyawugcwala kwati iNkhosi njengemanti ambonya lwandle.

16 Ngaloko-ke, tintfo tetive tonkhe tiyawukwembulwa; yebo, tonkhe tintfo tiyawukwembulwa kubantfwana bebantfu.

17 Kute lokuyimfihlo ngaphandle kwekutsi kutawuvetwa; kute umsebenti webumnyama ngaphandle kwekwentiwa ubonakale ekukhanyeni; futsi kute lokuboshiwe emhlabeni ngaphandle kwekukhululwa.

18 Ngaloko-ke, tonkhe tintfo letivetelwe bantfwana bebantfu kuyawutsi ngalelo langa tembulwe; futsi Sathane angeke abe nemandla ngetulu kwetinhlitiyo tebantfwana bebantfu, sikhatsi lesidze. Manje, bomnaketfu labatsandzekako, sengenta siphetfo senkhulumo yami.