1 Futsi emvakwekutsi Khristu sekavukile ekufeni uyawutiveta kini, bantfwana bami, kanye nabomnaketfu labatsandzekako; futsi emavi layawuwakhuluma kini ayawuba ngumtsetfo leniyawuwenta.

2 Ngoba bukani, ngitsi kini ngibonile kutsi letinyenti titukulwane tiyawundlula, futsi kuyawuba khona timphi letinkhulu kanye netincabano emkhatsini webantfu bami.

3 Emvakwekutsi Mesiya sekafikile kuyawuba khona tibonakaliso letiyawuniketwa bantfu bami ngekutalwa kwakhe, nangekufa kwakhe kanye nekuvuka kwakhe; luyawuba lukhulu futsi lube lubi lelo langa kulababi, ngoba bayawubhubha; bayawubhubha ngoba babacosha baphrofethi, kanye nalabangcwele, babashaya ngematje, bababulala; ngaloko-ke kukhala kwengati yalabangcwele kuyawukhuphukela etulu kuNkulunkulu kuvela emhlabatsini ngekumelana nabo.

4 Ngaloko-ke, bonkhe labo labatigcabhako, nalabo labenta lokubi, lilanga lelitako liyawubashisa, kusho iNkhosi yemaBandla, ngoba bayawuba njengemabibi.

5 Futsi labo lababulala baphrofethi, nalabangcwele, kujula kwaphansi kuyawubagwinya, kusho iNkhosi yemaBandla; netintsaba tiyawubasibekela, kanye netivunguvungu tiyawubatfwala tibayise khashane, netakhiwo tiyawuwela etikwabo tibaphihlite babe ticucu futsi tibagaye babe yimphuphu.

6 Bayawuvakashelwa ngekudvuma, kanye nemibane, kanye nangekutamatama kwemhlaba, kanye nangalo lonkhe luhlobo lwekubhujiswa, ngoba umlilo wentfukutselo yeNkhosi uyawuvutsa ngekumelana nabo, bayawuba njengemabibi, nalelo langa lelitako liyawubashisa, kusho iNkhosi yemaBandla.

7 O buhlungu, kanye nekudzabuka kwemphefumulo wami ngekulahleka kwalabo lababulawa babantfu bami! Ngoba mine, Nefi, ngikubonile, futsi kucishe kwangishisa phambi kweNkhosi; kodvwa kufanele ngikhale kuNkulunkulu wami ngitsi: Tindlela takho tilungile.

8 Kodvwa buka, labalungile labalalela emavi ebaphrofethi, labangababulalanga, kodvwa babuka phambili kuKhristu ngekucina kuleto tibonakaliso letinikiwe, nanoma kungenca yako konkhe kuhlushwa—buka, ngubo labo labangayukubhubha.

9 Kodvwa iNdvodzana yeKulunga iyawuvela kubo; iyawubaphilisa, bayawuba nekuthula kanye nayo, kute kwendlule titukulwane letintsatfu, nalabanyenti besitukulwane sesine bayawube sebendlulile ngekulunga.

10 Futsi uma leti tintfo setendlulile, kubhujiswa lokusheshako kuta kubantfu bami, ngoba, nanoma kungenca yebuhlungu bemphefumulo wami, ngikubonile loku; ngaloko-ke, ngiyati kutsi kuyawukwenteka; futsi batitsengisela lite; ngalamanye emagama, ngenca yekutigcabha kwabo kanye nebulima babo bayawuvuna kubhujiswa; ngoba ngenca yekuvumela develi nekukhetsa imisebenti yebumnyama kunekukhanya, ngako-ke kufanele baye phansi esihogweni.

11 Ngoba Moya weNkhosi awutukusebenta kanjalo kumuntfu. Futsi uma Moya sewuyekela kusebenta kumuntfu uma sekunjalo kuta kubhujiswa ngekushesha, loku kuyawukhatsata umphefumulo wami.

12 Futsi njengobe ngikhulumile mayelana nekukholwisa emaJuda, kutsi Jesu nguye kanye Khristu, kufanele kutsi beTive nabo bakholwiswe kutsi Jesu nguKhristu, Nkulunkulu waPhakadze.

13 Futsi nekutsi utibonakalisa kubo bonkhe labo labakholwa kuye, ngemandla aMoya loNgcwele; yebo, kuto tonkhe tive, tihlobo, tilimi, kanye nebantfu, wenta timangaliso letinkhulu, tibonakaliso, kanye netimangaliso, emkhatsini webantfwana bebantfu ngekwelukholo lwabo.

14 Kodvwa buka, ngiyaphrofetha kini mayelana nemalanga ekugcina; mayelana nemalanga lapho iNkhosi Nkulunkulu iyawutiletsa leti tintfo kubantfwana bebantfu.

15 Emvakwekutsi intalelwane yami kanye nentalelwane yabomnaketfu seyincishelwe lukholo, futsi seyishaywe beTive; yebo, emvakwekutsi iNkhosi Nkulunkulu seyibatungelete ndzawo tonkhe, sebavinjetelwe ngentsaba, baphakanyiselwa tincaba ngekumelana nabo; futsi emvakwekutsi sebehliselwe phansi elutfulini, uma ngabe bangasekho, noko emavi alabalungile ayawubhalwa, imithandazo yalabatsembekile iyawuvakala, futsi bonkhe labo labayawube sebancishelwe lukholo abayukhohlwakala.

16 Ngoba labo labayawubhujiswa bayawukhuluma kubo basemhlabatsini, kukhuluma kwabo kuyawuba ngulokutfotjiselwe phansi elutfulini, futsi livi labo liyawuba njengelaloyo lonemoya lowejwayelekile; ngoba iNkhosi Nkulunkulu itawumnika emandla, kute ahlebe mayelana nabo, kube shangatsi liphuma emhlabatsini, futsi kukhuluma kwabo kuyawuhleba kuphuma elutfulini.

17 Ngoba naku lokushiwo yiNkhosi Nkulunkulu: Bayawutibhala tintfo letiyawukwentiwa emkhatsini wabo, futsi tiyawubhalwa tiphindze tivalelwe tibe yincwadzi, futsi labo labayawube sebancishelwe lukholo angeke babe nato, ngoba bafuna kutibhubhisa tintfo taNkulunkulu.

18 Ngaloko-ke njengobe labo lababhujiswa sebabhujiswe ngekushesha; nesicuku salabo labesabekako babo siyawuba njengemakhoba landlulako—yebo, naku lokushiwo yiNkhosi Nkulunkulu: Loku kuyawukwenteka ngekushesha, ngekuphatima kweliso—

19 Futsi kuyawukwenteka, kutsi labo lasebancishelwe lukholo bayawushaywa ngesandla sebeTive.

20 Futsi beTive baphakeme ngenca yekutibona kwabo, futsi bakhubekile, ngenca yebukhulu besikhubekiso sabo, kangangoba bakhe emabandla lamanyeti; noko, badzelela emabandla kanye netimangaliso taNkulunkulu, batidvumise ngekuhlakanipha kwabo kanye nemfundvo yabo, kute batfole inzuzo futsi bagaye buso balabamphofu.

21 Futsi manyenti emabandla lakhiwe laletsa umona, nemphikiswano, kanye nenzondo.

22 Futsi ngetulu kwaloko kukhona emacembu layimfihlo, lanjengasetikhatsini takadzeni, njengekwemacembu adeveli, ngoba yena ungumcambi wato tonkhe leti tintfo; yebo, umcambi wekubulala, kanye nemisebenti yebumnyama; yebo, futsi ubahola ngentsamo ngentsambo lencane, ate ababophe ngetintsambo takhe leticinile ingunaphakadze.

23 Ngoba bukani, bomnaketfu labatsandzekako, ngitsi kini iNkhosi Nkulunkulu ayisebenti ebumnyameni.

24 Ayenti lutfo lolunye ngaphandle kwekutsi kube yinzuzo emhlabeni, ngoba iyawutsandza umhlaba, kangangoba ibeka phansi imphilo yayo lucobo kute idvonsele wonkhe muntfu kuyo. Ngaloko-ke ayiyaleti namunye kutsi angahlanganyeli ensindzisweni yayo.

25 Bukani, ngabe iyamemeta yini kunoma ngubani itsi: Sukani kimi? Buka, ngitsi kini, Cha; kodvwa itsi: Wotani kimi nonkhe nine mikhawulo yemhlaba, tsengani lubisi neluju, ngaphandle kwemali nangaphandle kwentsengo.

26 Bukani, ngabe kukhona yini lebayaletile kutsi basuke baphume emasinagogeni, noma baphume etindlini tekukhontela na? Buka, ngitsi kini, Cha.

27 Ngabe kukhona yini lebayaletile kutsi bangahlanganyeli ensindzisweni yayo na? Bukani ngitsi kini, Cha; kodvwa iyinikete mahhala kuwo wonkhe umuntfu; futsi ibayaletile bantfu bayo kutsi bakhutsate bonkhe bantfu kutsi baphendvuke.

28 Bukani, ngabe kukhona yini iNkhosi lebayaletile kutsi bangahlanganyeli ebuhleni bayo na? Bukani ngitsi kini, Cha; kodvwa bonkhe bantfu banelilungelo lomunye lokufanako nalomunye, futsi kute namunye longakavumeleki.

29 Iyaleta kutsi bungabi khona buphristimbumbulu; ngoba, buka, buphristimbumbulu kutsi bantfu bafundzisa baphindze batibeke bona lucobo lwabo njengekukhanya emhlabeni, kute batfole inzuzo yakhe kanye nekudvunyiswa ngumhlaba; kodvwa abayifuni inhlalakahle yaseSiyoni.

30 Bukani, iNkhosi ayikayivumeli lentfo; ngaloko-ke, iNkhosi Nkulunkulu inike umyaleto wekutsi bonkhe bantfu babe nelutsandvo loluphelele, lutsandvo loluphelele lokulutsandvo. Futsi ngephandle kwekutsi babe nelutsandvo loluphelele abanalutfo. Ngaloko-ke, uma bangaba nelutsandvo loluphelele angeke bavumele losebenta eSiyoni abhubhe.

31 Kodvwa losebenta eSiyoni uyawusebentela iSiyoni; ngoba uma asebentela imali uyawubhujiswa.

32 Futsi ngetulu kwaloko, iNkhosi Nkulunkulu iyalete kutsi bantfu bangabulali; bangacali emanga; bangebi; bangaliphatsi libito leNkhosi Nkulunkulu wabo ngelite; bangabi nemona, bangabi nenzondo, bangabangi lomunye nalomunye; bangabenti bugwadla; nekutsi bangenti nakunye kwaleti tintfo, ngoba loyo lowenta loku uyawubhujiswa.

33 Ngoba kute nakunye kwalobu bubi lobuvela eNkhosini; ngoba yona yenta loko lokuhle emkhatsini webantfwana bebantfu; futsi ayenti lutfo ngaphandle kwekutsi kube sobala kubo bantfwana bebantfu; futsi imema bonkhe kutsi bete kuyo futsi bahlanganyele ebuhleni bayo; ayaleli namunye lota kuyo, lomnyama nalomhlophe, loboshiwe nalokhululekile, wesilisa newesifazane; futsi iyawakhumbula emahedeni; bonkhe bayafana kuNkulunkulu, liJuda kanye neweTive.