1 Manje sengikhuluma kuwe, Josefa, tfumbu wami. Wena lowatalelwa ehlane letinhlupheko tami; yebo, emalangeni elusizi lwami lolukhulu kakhulu make wakho wakutala.

2 Futsi shangatsi iNkhosi ingakungcwelisela lona nawe lelive, lokulive leliligugu kakhulu, libe lifa lakho kanye nelifa lentalelwane yakho kanye nabomnakenu, kute nivikeleke ingunaphakadze, nangabe niyawuyigcina imiyaleto yaloNgcwele waka-Israyeli.

3 Futsi manje, Josefa, tfumbu wami, lengamkhipha ehlane letinhlupheko tami, shangatsi iNkhosi ingakubusisa ingunaphakadze, ngoba intalelwane yakho ayiyukubhujiswa iphele nya.

4 Ngoba buka, uyintalo yesisu sami; futsi mine ngisitukulwane saJosefa lowatfwalwa watfunjelwa eGibhithe. Futsi tatitinkhulu tivumelwano teNkhosi leyatenta naJosefa.

5 Ngaloko-ke, Josefa ngempela walibona lilanga letfu. Futsi watfola setsembiso eNkhosini, sekutsi entalweni yesisu sakhe iNkhosi Nkulunkulu iyawuvusa ligala lelilungile endlini yaka-Israyeli; hhayi Mesiya, kodvwa ligala lelalitohleshulwa, noko, kutsi likhunjulwe etivumelwaneni teNkhosi kangangoba Mesiya uyawubonakaliswa kubo emalangeni ekugcina, ngemandla, kute baphume ebumnyameni babe sekukhanyeni—yebo, baphume ebumnyameni lobubhacile futsi baphume ekutfunjweni baye enkhululekweni.

6 Ngoba Josefa ngempela wafakaza, watsi: Umboniswa iNkhosi Nkulunkulu wami iyawumvusa, loyawuba ngumboniswa lokhetsiwe kuyo intalo yesisu sami.

7 Yebo, Josefa ngempela watsi: Naku lokushiwo yiNkhosi kimi: Umboniswa lokhetsiwe ngitawumvusa uyawuphuma kuyo intalo yesisu sakho; uyawuhlonishwa kakhulu emkhatsini wentalo yesisu sakho. Futsi ngitawumnika umyaleto wekutsi uyawukwentela umsebenti intalo yesisu sakho, bomnakabo, loyawuba ngulobalulekile kakhulu kubo, nekubenta bati ngetivumelwano lengatenta kubokhokho bakho.

8 Futsi ngitawumnika umyaleto wekutsi akayukwenta noma ngumuphi lomunye umsebenti, ngaphandle kwemsebenti lengiyawumyaleta wona. Futsi nitawumenta abe mkhulu emehlweni ami; ngoba uyawukwenta umsebenti wami.

9 Futsi uyawuba mkhulu njengaMosi, lengatsi ngiyawunivusela yena, kute akhulule bantfu bami, O ninendlu yaka-Israyeli.

10 Futsi Mosi ngitawumvusa, kute akhulule bantfu bakho baphume eveni laseGibhithe.

11 Kodvwa umboniswa ngitawumvusa kuyo intalo yesisu sakho; futsi ngitawumnika emandla ekutsi aletse livi lami kuyo intalelwane yesisu sakho—futsi hhayi kuletsa livi lami kuphela, kusho iNkhosi, kodvwa kubakholwisa ngelivi lami, leliyawube selivele latisiwe emkhatsini wabo.

12 Ngaloko-ke, intalo yesisu sakho iyawubhala; kanjalo nentalo yesisu saJuda iyawubhala; futsi loko lokuyawubhalwa yintalo yesisu sakho, naloko lokuyawubhalwa yintalo yesisu saJuda, kuyawukhula ndzawonye, kute kuphikise timfundziso temanga futsi kucedze tincabano, kucinisekise kuthula emkhatsini wentalo yesisu sakho, kanye nekubenta bati bokhokho babo etinsukwini tekugcina, futsi ngalokunjalo nasekwatini tivumelwano tami, kusho iNkhosi.

13 Futsi ebutsakatsakeni uyawukwentiwa abe nemandla, ngalelo langa ngesikhatsi umsebenti wami sewucala emkhatsini wabo bonkhe bantfu bami, kute nibuyiselwe, O ninendlu yaka-Israyeli, kusho iNkhosi.

14 Futsi waphrofetha kanje Josefa, watsi: Buka, loyo mboniswa iNkhosi itawumbusisa; futsi labo labayofuna kumbulala bayawubhujiswa; ngoba lesi setsembiso, lengisitfole eNkhosini, ngentalo yesisu sami, siyawugcwaliseka. Buka, nginesiciniseko ngekugcwaliseka kwalesi setsembiso

15 Libito lakhe liyawubitwa ngami; futsi liyawuba libito leyise. Uyawuba njengami; ngoba leyontfo, iNkhosi leyawuyiletsa ngesandla sakhe, ngemandla eNkhosi iyawuletsa bantfu bami ensindzisweni.

16 Yebo, waphrofetha kanjalo-ke Josefa watsi: Nginesiciniseko ngalentfo, njengobe nginesiciniseko ngesetsembiso saMosi; ngoba iNkhosi itsite kimi, ngitawuyigcina intalelwane yakho ingunaphakadze.

17 Futsi iNkhosi itsite: Ngitawuvusa Mosi; futsi ngitawumniketa emandla endvukwini; futsi ngitawumniketa kwehlulela ngembhalo. Kodvwa angeke ngilukhulule lulwimi lwakhe, kutsi akhulume kakhulu, ngoba angitukumenta abe liciko ekukhulumeni. Kodvwa ngitawumbhalela umtsetfo wami, ngemunwe wesandla sami lucobo; futsi ngitawumentela umkhulumeli wakhe.

18 Futsi iNkhosi yaphindze yatsi kimi: Ngitawuvusa entalelwaneni yesisu sakho; futsi ngitawumentela umkhulumeli. Buka, ngitawumniketa kutsi abhale umbhalo wentalo yesisu sakho, abhalele intalo yesisu sakho, futsi umkhulumeli wesisu sakho uyawukumemetela loko.

19 Futsi emavi layawuwabhala ayawuba ngemavi ladzingekile ngekuhlakanipha kwami kutsi andluliselwe kuyo entalelwaneni yesisu sakho. Futsi kuyawuba shangatsi intalo yesisu sakho ikhale kubo iselutfulini; ngoba ngiyalwati lukholo lwabo.

20 Futsi iyawukhala iselutfulini; yebo, nangekuphendvuka kubomnakabo, nangemvakwetitukulwane letinyenti lesetendlula ngabo, Futsi kuyawukwenteka kutsi kukhala kwabo kuyawukuya entalelwaneni yesisu sakho, njengekuba sobala kwemavi abo.

21 Ngenca yelukholo lwabo emavi abo ayawuchubekela phambili aphuma emlonyeni wami aye kubomnakabo labayintalo yesisu sakho; futsi butsakatsaka bemavi abo ngitawubenta bucine elukholweni lwabo, kute ngikhumbule sivumelwano lengasenta kubokhokho bakho.

22 Manje, buka, ndvodzana yami Josefa, babe wasendvulo waphrofetha ngalendlela.

23 Ngaloko-ke, ngenca yalesi sivumelwano wena ubusisiwe; ngoba intalelwane yakho angeke ibhujiswe, ngoba iyawulalela emavi alencwadzi.

24 Futsi kuyawuvuka lomunye lonemandla emkhatsini wabo, loyawukwenta lokunyenti lokuhle, ekukhulumeni nasekwenteni, uyawuba sikhali etandleni taNkulunkulu, abe nelukholo lolukhulu, lwekwenta timangaliso letinkhulu, futsi ente leyontfo lenkhulu emehlweni aNkulunkulu, ekugcwalisekeni kwekubuyiselwa lokunyenti kuyo indlu yaka-Israyeli, nasentalelwaneni yabomnakenu.

25 Manje, ubusisiwe, Josefa. Buka, umncane; ngaloko-ke lalela emavi emnakenu, Nefi, futsi kuyawukwentiwa kuwe ngekwemavi lesengiwakhulumile. Khumbula emavi eyihlo lobhubhako. Amen.