1 Manje, Jakobe, sengikhuluma nawe: Wena ulitubulo lami emalangeni ekuhlupheka kwami ehlane. Futsi buka, ebuntfwaneni bakho utivile tinhlupheko kanye nelusizi lolukhulu, ngenca yeludlame lwabomnakenu.

2 Noko, Jakobe, tubulo lami lasehlane, wena uyabati bukhulu baNkulunkulu; futsi uyawunikela tinhlupheko takho kute kube yinzuzo kuwe.

3 Ngaloko-ke, umphefumulo wakho uyawubusiswa, futsi uyawuhlala ngekuphepha nemnakenu, Nefi; futsi emalanga akho uyawuwacitsa ngekwenta umsebenti waNkulunkulu wakho. Ngaloko-ke, ngiyati kutsi uhlengiwe, ngenca yekulunga kweMhlengi wakho; ngoba ubonile kutsi ngekuphelela kwesikhatsi uyawufika aletse insindziso kubantfu.

4 Futsi uyibonile ebusheni bakho inkhatimulo yakhe; ngaloko-ke, ubusisiwe njengabo labo layawubafundzisa asesenyameni; ngoba Moya uyafana, itolo, lamuhla, naphakadze. Futsi indlela ilungisiwe kusukela ekuweni kwemuntfu, futsi insindziso imahhala.

5 Futsi bantfu bayafundziswa ngalokwanele kute bati lokuhle nalokubi. Nemtsetfo uniketiwe kubantfu. Futsi ngemtsetfo kute umuntfu longenacala; noma, ngemtsetfo bantfu bayasuswa. Yebo, ngemtsetfo wesikhashana besuswa; futsi ngetulu kwaloko, ngemtsetfo wamoya bayalahleka kuloko lokuhle, futsi bahlupheke ingunaphakadze.

6 Ngaloko-ke, kuhlengwa kuta ngaMesiya loNgcwele; ngoba ugcwele umusa neliciniso.

7 Buka, utinikele kute abe ngumhlatjelo wesono, kugcwalisa tinhloso temtsetfo, kubo bonkhe labo labanenhlitiyo lephukile kanye nemoya lodzabukile; futsi kute namunye lomunye lokungatsi ngaye tinhloso temtsetfo teneliseke.

8 Ngaloko-ke, kubaluleke kangakanani kwatisa ngaleti tintfo kubantfu basemhlabeni, kute bati kutsi kute umuntfu longahlala ebukhoneni baNkulunkulu, ngaphandle kwetento letinhle, nebubele, kanye nemusa waMesiya loNgcwele, lobeka phansi imphilo yakhe ngekwasenyameni, aphindze ayitsatse ngemandla aMoya, kute afeze kuvuswa kwalabafile, abe wekucala loyawuvuka.

9 Ngaloko-ke, ulitubulo kuNkulunkulu, nangabe uyawuncusela bonkhe bantfwana bebantfu; futsi labo labakholwa kuye bayawusindziswa.

10 Ngenca yekubancusela bonkhe, bonkhe bantfu beta kuNkulunkulu; ngaloko-ke, bema embikwakhe, kute bahlulelwe nguye ngekweliciniso kanye nangebungcwele lobukuye. Ngaloko-ke, tinhloso temtsetfo letiniketwe nguloNgcwele, tigcwalisa sijeziso lesibekiwe, sijeziso lesibekiwe lesiphikisana nenjabulo lebekiwe, kute kugcwaliseke tinhloso tenhlawulo—

11 Ngoba kufanele, kutsi kube khona kuphikisana etintfweni tonkhe. Uma kungenjalo, tubulo lami ehlane, kulunga akunawugcwaliseka, nebubi, nebungcwele noma lusizi, ngalokunjalo nalokuhle noma lokubi. Ngaloko-ke, tonkhe tintfo kufanele tibe yinhlanganisela leyodvwa; ngaloko-ke, uma tingaba ngumtimba lowodvwa kuyodzingeka tihlale njengaletifile, tingenamphilo nekufa, noma kubola noma kungaboli, kujabula noma lusizi, ngalokunjalo nekubona noma nekungaboni.

12 Ngaloko-ke, kwakutoba kutsi tidalwe ngentfo lelite; ngaloko-ke kwakutoba bete injongo kuyo inhloso yekudalwa kwato. Ngaloko-ke, lentfo beyiyoshabalalisa kuhlakanipha kwaNkulunkulu kanye netinhloso takhe taphakadze, futsi ngalokunjalo nemandla, nebubele, kanye nekulunga kwaNkulunkulu.

13 Futsi uma niyawutsi kute umtsetfo, ngalokunjalo niyawutsi kute sono. Uma niyawutsi kute sono, ngalokunjalo niyawutsi kute kulunga. Futsi uma kute kulunga angeke ibe khona injabulo. Uma kute kulunga noma injabulo angeke kube khona kujeziswa noma lusizi. Uma leti tintfo tingekho akekho naNkulunkulu. Futsi uma angekho Nkulunkulu natsi asikho, ngalokunjalo nemhlaba; ngoba bekungeke kube khona kudalwa kwetintfo, noma tintfo lokufanele tente netintfo lokufanele tentiwe; ngaloko-ke, tonkhe tintfo betiyoshabalala tiphele.

14 Manje, madvodzana ami, ngikhuluma kini leti tintfo kute kube yinzuzo kini kanye nesifundvo; ngoba ukhona Nkulunkulu, futsi wadala tonkhe tintfo, emazulu kanye nemhlaba, kanye nato tonkhe tintfo letikuwo, tintfo lekufanele tente netintfo lekufanele tentiwe.

15 Futsi kute kufezeke tinhloso takhe taphakadze ngenjongo yemuntfu, emvakwekutsi sekadale batali betfu bekucala, netilwane tisiganga kanye netinyoni telizulu, kwephetsa, tonkhe tintfo letidaliwe, kwakufanele kutsi kube khona kuphikisana; nesitselo lesingakavunyelwa sasiphikisana nesihlahla sekuphila; sinye sinongotela lesinye sibaba.

16 Ngaloko-ke, iNkhosi Nkulunkulu yanika umuntfu kutsi atentele ngekwakhe. Ngaloko-ke, umuntfu akanawukwati kutentela ngekwakhe ngaphandle kwekutsi ayengwe ngalokukodvwa noma ngalokunye.

17 Futsi mine, Lehi, ngekwetintfo lengitifundzile, tingenta ngicabange kutsi ingilosi yaNkulunkulu, ngekwaloko lokubhaliwe, yayiwile ezulwini; ngaloko-ke, yaba ngudeveli, ngoba yafuna loko lokwakukubi phambi kwaNkulunkulu.

18 Futsi ngenca yekutsi yayiwile ezulwini, futsi yaba lusizi ingunaphakadze, ifuna futsi wonkhe umuntfu abe lusizi. Ngaloko-ke, yatsi ku-Eva, yebo, leyo nyoka lendzala, lengudeveli, lenguyise wawo onkhe emanga, ngaloko-ke yatsi: Dlani lesi sitselo lesingakavunyelwa, futsi angeke ufe, kodvwa uyawuba njengaNkulunkulu, wati lokuhle nalokubi.

19 Futsi emvakwekutsi Adamu kanye na-Eva sebasidlile sitselo lesingakavunyelwa bakhishwa ensimini yase-Edeni, kute bayolima umhlabatsi.

20 Batala bantfwana; yebo, nemndeni wemhlaba wonkhe.

21 Futsi emalanga ebantfwana bebantfu elulwa, ngekwentsandvo yaNkulunkulu, kute baphendvuke ngesikhatsi basesenyameni; ngaloko-ke, simo sabo saba simo sekuvivinywa, futsi sikhatsi sabo selulwa, ngekwemiyaleto iNkhosi Nkulunkulu layinika bantfwana bebantfu. Ngoba wanika umyaleto wekutsi bonkhe bantfu kufanele baphendvuke; ngoba wabakhombisa bonkhe bantfu kutsi bebalahlekile, ngenca yesiphambeko sebatali babo.

22 Manje, buka, kube Adamu akatange aphambuke ngabe akatange awe, kodvwa bekayawuhlala ensimini yase-Edeni. Futsi tonkhe tintfo letatidaliwe kwakuyawufanele tihlale kuleso simo lesifanako letatikuso emvakwekutsi setidaliwe; futsi kwakuyawufanele tihlale ingunaphakadze, tingabi nesiphetfo.

23 Futsi bebangeke babe nebantfwana; ngaloko-ke bebayawuhlala basesimeni sekuba msulwa, babete injabulo, ngoba bangalwati lusizi; bangenti lokuhle, ngoba bangasati sono.

24 Kodvwa bukani, tonkhe tintfo tentiwa ngekuhlakanipha kwakhe loyo lowati tonkhe tintfo.

25 Adamu wawa kute bantfu babekhona; futsi bantfu bakhona, kute babe nenjabulo.

26 Futsi Mesiya uyawufika esikhatsini lesiphelele, kute ahlenge bantfwana bebantfu ekuweni. Futsi ngenca yekutsi bahlengiwe ekuweni sebanenkhululeko yaphakadze, sebati lokuhle nalokubi; sebatentela bona ngekwabo futsi hhayi kutsi kwentiwe kubo, ngaphandle kwekutsi kube nekujeziswa ngumtsetfo ngelilanga lelikhulu kanye nelekugcina, njengekwemiyaleto Nkulunkulu layiniketile.

27 Ngaloko-ke, bantfu bakhululekile ngekwasenyameni; futsi tonkhe tintfo tiniketiwe kubo letitidzingo temuntfu. Futsi bakhululekile kukhetsa inkhululeko kanye nekuphila lokuphakadze, ngeMlamuli lomkhulu wabo bonkhe bantfu, noma kukhetsa kutfunjwa kanye nekufa, ngekwekutfunjwa kanye nemandla adeveli; ngoba yena ufuna kutsi bonkhe bantfu babe lusizi njengaye.

28 Manje, madvodzana ami, ngifuna kutsi nibuke kuMlamuli lomkhulu, futsi nilalele imiyaleto yakhe lemikhulu; netsembele emavini akhe, nikhetse kuphila lokuphakadze, ngekwentsandvo yaMoya wakhe loNgcwele.

29 Futsi ningakhetsi kufa lokuphakadze, ngekwentsandvo yenyama kanye nebubi lobukuyo, lokunika umoya wadeveli emandla ekutfumba, kute anidvonsele phansi esihogweni, kute abuse ngetulu kwenu embusweni wakhe lucobo.

30 Ngikhulume lamavi lambalwa kini nonkhe, madvodzana ami, emalangeni ekugcina ekuvivinywa kwami; futsi ngikhetse indlela lelungile, ngekwemavi emphrofethi. Futsi anginayo lenye inhloso ngaphandle kwekutsi ngizuze imiphefumulo yenu ingunaphakadze. Amen.