Sehluko 18
Khristu utawuba njengelitje lelisikhubekiso kanye nelidvwala lesinengiso—Funani iNkhosi, hhayi batsakatsi labalungutako—Phendvukelani emtsetfweni kanye nasebufakazini kute nitfole kucondziswa—Catsanisa na-Isaya 8. Cishe ngemnyaka wema-559–545 ngaphambi kwekutalwa kwaKhristu.
1 Ngetulu kwaloko, livi leNkhosi latsi kimi: Tsatsa incwadzi lenkhulu legocotwako, ubhale kuyo ngelutsi lolwetayelekile, mayelana naMaheri Shalali Hashi Bazi.
2 Ngatsatsa bofakazi labatsembekile kutsi babhale, Uriya umphristi, kanye naZakhariya indvodzana yaJeberekhiya.
3 Ngaya kumphrofethikati; wase uyakhulelwa watala indvodzana. Emvakwaloko yatsi iNkhosi kimi: Metse libito layo utsi, nguMaheri Shalali Hashi Bazi.
4 Ngoba bukani, lomntfwana akanawukwati kutsi, babe, noma make, ngaphambi kwekutsi umcebo waseDamaseko nemphango yaseSamariya kutsatfwe yiNkhosi yase-Asiriya.
5 INkhosi yaphindze yakhuluma kimi, yatsi:
6 Nangabe labantfu bawalile emanti aseShilowa lehla kamnandzi, bajabulela Resini kanye nendvodzana yaRemaliya;
7 Ngako-ke manje, bukani, iNkhosi yehlisela etikwabo emanti emfula, lanemandla futsi lamanyenti, ngisho inkhosi yase-Asiriya nebukhosi bayo bonkhe; futsi uyawuta ugcwale uphuphume kuyo yonkhe imifula yayo, futsi yendlule lonkhe lusentse lwayo.
8 Futsi uyawundlula kaJuda; uyawugcwala uphuphume futsi ukhukhule, uyawukhawula nasentsanyeni; futsi kuvuleka kwemaphiko awo kuyawugcwalisa bubanti belive lakho, O Imanyuweli.
9 Tihlanganiseni, O nine bantfu, niyawuhleshulwa nibe ticucu; futsi lalelani nonkhe nine mave lakhashane; tilungiseleleni, futsi niyawuhleshulwa nibe ticucu; tilungiseleleni, niyawuhleshulwa nibe ticucu.
10 Bonisanani, kodvwa kuyawuba lite; yentani emachinga, kodvwa angeke aphumelele; ngoba Nkulunkulu unatsi.
11 Ngoba iNkhosi yakhuluma naku kimi ngesandla lesinemandla, futsi yangecwayisa kutsi ngingalandzeli tindlela talaba bantfu, yatsi:
12 Ningasho kutsi, Luzungu, kubo bonkhe labo bantfu labayawutsi, Luzungu; futsi ningakwesabi labakwesabako, noma nibe neluvalo.
13 Yingcweliseni iNkhosi yemaBandla lucobo lwayo, futsi yenteni ibe kwesaba kwenu, futsi yenteni ibe kutfutfumela kwenu.
14 Iyawuba siphephelo senu; kodvwa iyoba litje lelisikhubekiso, futsi ibe lidvwala lelisinengiso kuto totimbili tindlu taka-Israyeli, ngoba iyoba lugibe kanye nasochaka kulabahlala eJerusalema.
15 Futsi labanyenti emkhatsini wabo bayawukhubatela bawe, bephuke, batsiywe, futsi babanjwe.
16 Bophisisa lobufakazi, uvalele umtsetfo emkhatsini webafundzi bami.
17 Ngitawuyilindzela iNkhosi, lefihla buso bayo kuyo indlu yakaJakobe, futsi ngitawuyilindzela.
18 Bukani, mine kanye nebantfwana iNkhosi lenginike bona sibe tibonakaliso kanye netimangaliso ka-Israyeli letivela eNkhosini yemaBandla, lehlala eNtsabeni iSiyoni.
19 Futsi lapho bayawutsi kini: Funani kulababhulako, kanye nakubatsakatsi labanhhinklilako bahlebe batsi—akukafaneli yini bantfu babute Nkulunkulu wabo kunekutsi labaphilako beve ngalabafile na?
20 Kuwo umtsetfo kanye nakubo bufakazi; uma bangakhulumi ngekwelivi, kungenca yekutsi kute kukhanya kubo.
21 Futsi bayawendlula kuko kuhlupheka bahacwe bulukhuni futsi balambe; futsi kuyawukwenteka kutsi uma sebalambile, bayawucansuka, bayicalekise iNkhosi yabo kanye naNkulunkulu wabo, babuke etulu.
22 Bayawubuka emhlabeni babone kukhatsateka, nebumnyama, nekufiphala ngenca yebuhlungu, futsi bayawufucelwa ebumnyameni.