1 Manje mine, Nefi, sengikhuluma ngaloko lokuphatselene nemavi lengiwabhalile, lakhulunywa ngemlomo wa-Isaya. Ngoba buka, Isaya wakhuluma tintfo letinyenti lebetilukhuni kulabanyenti bantfu bami kutsi baticondze; ngoba bebangati mayelana nendlela yekuphrofetha emkhatsini wemaJuda.

2 Ngoba mine, Nefi, angibafundzisanga tintfo letinyenti mayelana nalenchubo yemaJuda; ngoba imisebenti yawo kwakuyimisebenti yebumnyama, netento tawo kwakutento tetinengiso.

3 Ngaloko-ke, ngibhalela bantfu bami, nabo bonkhe labo labayawutemukela emvakwaloku leti tintfo lengitibhalako, kute batati tehlulelo taNkulunkulu, kutsi tita kuto tonkhe tive, ngekwelivi lalikhulumile.

4 Ngaloko-ke, lalelani, O bantfu bami, lenibendlu yaka-Israyeli, futsi lalelani emavi ami; ngoba ngenca yekutsi emavi a-Isaya akekho sobala kini, noko asobala kubo bonkhe labo labagcwaliswe ngemoya wekuphrofetha. Kodvwa ngininika siphrofetho, ngekwemoya lokimi; ngaloko-ke ngitawuphrofetha ngalokusobala lobekusolo kunami kusukela ngesikhatsi ngiphuma eJerusalema nababe; ngoba buka, umphefumulo wami utfokota ngaloko lokusobala kubantfu bami, kute bafundze.

5 Yebo, futsi umphefumulo wami uyatfokota ngemavi a-Isaya, ngoba ngaphuma eJerusalema, nemehlo ami atibonile tintfo temaJuda, futsi ngiyati kutsi emaJuda ayaticondza tintfo tebaphrofethi, kute labanye bantfu labacondza letintfo letakhulunywa kuwo emaJuda njengawo, ngaphandle kwekutsi bafundziswa ngalendlela yetintfo tawo emaJuda.

6 Kodvwa bukani, mine, Nefi, angibafundzisanga bantfwana bami ngalendlela yemaJuda, kodvwa, bukani, ngekwami, ngihlalile eJerusalema, ngaloko-ke ngiyati mayelana netifundza letitungeletile; ngikhulumile kubo bantfwana bami mayelana netehlulelo taNkulunkulu, lesetentekile emkhatsini wemaJuda, kubo bantfwana bami, njengako konkhe loko Isaya lakukhulumile, futsi angikubhali loko.

7 Kodvwa bukani ngichubeka nesami siphrofetho, njengaloko lokusobala kimi; kuso lengatiko kutsi kute umuntfu longaduka; noko, ngemalanga tiphrofetho ta-Isaya letiyawugcwaliseka ngawo bantfu bayawukwati ngekweliciniso, ngetikhatsi leto letiyawukwenteka ngato.

8 Ngaloko-ke, tiligugu kubantfwana bebantfu, futsi loyo locabanga kutsi atisilo, ngitawukhuluma kubo kabanti, futsi emavi ngiwacondzise kubantfu bami lucobo; ngoba ngiyati kutsi tiyawuba nguletiligugu lelikhulu kubo ngemalanga ekugcina; ngoba ngalelo langa bayawuticondza; ngaloko-ke, ngenca yebuhle bato ngitibhalile.

9 Futsi njengobe sinye situkulwane sibhujisiwe emkhatsini wemaJuda ngenca yebubi, kanjalo nabo babhujisiwe titukulwane ngetitukulwane ngebubi babo; futsi kute namunye wabo lowabhujiswa ngaphandle kwekutsi bebatjeliwe phambilini baphrofethi beNkhosi.

10 Ngaloko-ke, bekushiwo kubo mayelana naloko kubhujiswa lokwakumele kwenteke emkhatsini wabo, masinyane nje emvakwekutsi babe sekahambile eJerusalema; noko, batenta lukhuni tinhlitiyo tabo; futsi ngekwesiphrofetho sami babhujiswa, ngaphandle kwalabo labatsatsiwe batfunjelwa eBhabhulona.

11 Manje loku ngikukhuluma ngenca yamoya lokimi. Futsi nanoma batsetfwe bayawuphindze babuye, bazuze live laseJerusalema; ngaloko-ke, bayawubuyiselwa futsi eveni lelilifa labo.

12 Kodvwa, bukani, bayawuba netimphi, kanye nemahemuhemu etimphi, futsi uma lilanga lifika lekutsi loTelwe Yedvwa kuBabe, yebo, naBabe welizulu kanye nemhlaba, uyawutibonakalisa kubo asenyameni, bukani, batawumlahla, ngenca yebubi babo, kanye nebulukhuni betinhlitiyo tabo, kanye nekuba nenkhani kwabo.

13 Bukani, batawumbetsela; emvakwekutsi asabekwe ethuneni sikhatsi lesingemalanga lamatsatfu uyawuvuka kulabafile, anekuphilisa etimphikweni takhe; bonkhe labo labayawukholwa egameni lakhe bayawusindziswa embusweni waNkulunkulu. Ngaloko-ke, umphefumulo wami uyatfokota ekuphrofetheni mayelana naye, ngoba ngilibonile lilanga lakhe, nenhlitiyo yami iyalidvumisa libito lakhe lelingcwele.

14 Futsi buka kuyawukwenteka kutsi emvakwekutsi Mesiya sekavukile kulabafile, sekatibonakalisile ebantfwini bakhe, bonkhe labo labatawukholwa egameni lakhe, bukani, iJerusalema iyawuphindze ibhujiswe; ngoba maye kulabo labalwa naNkulunkulu kanye nebantfu belibandla lakhe.

15 Ngaloko-ke, emaJuda ayawuhlakatwa emkhatsini wato tonkhe tive, yebo, kanjalo neBhabhulona iyawubhujiswa; ngaloko-ke, emaJuda ayawuhlakatwa nguletinye tive.

16 Emvakwekutsi sebahlakatiwe, futsi iNkhosi Nkulunkulu seyibashayile ngaletinye tive ngesikhatsi lesingangesetitukulwane letinyenti, yebo, kwehle titukulwane ngetitukulwane kute kube ngulapho sebakhutsatwa kutsi bakholwe kuKhristu, iNdvodzana yaNkulunkulu, kanye nenhlawulo, leyo lengapheli yebantfu bonkhe—uma lelo langa liyawufika lekutsi bakholwe kuKhristu, futsi bakhonte Babe egameni lakhe, ngetinhlitiyo letimsulwa kanye netandla letihlantekile, futsi bangabe basalindzela lomunye Mesiya, bese, ngaleso sikhatsi, lilanga litawufika lapho kudzingekile kutsi bakholelwe kuto leti tintfo.

17 INkhosi itawuphindze ibeke sandla sayo kwesibili kubuyisa bantfu bayo ekulahlekeni kwabo kanye nasesimeni sekuwa. Ngaloko-ke, itawuchubeka nekwenta umsebenti lomuhle nalomangalisako emkhatsini webantfwana bebantfu.

18 Ngaloko-ke, iyawukwembula emavi ayo kubo, layawubehlulela ngelilanga lekugcina, ngoba bayawunikwa wona ngenhloso yekubakholwisa ngaMesiya weliciniso, lobekalahlwe ngibo; kanye nekubakholwisa kutsi akusafaneli kutsi balindzele lomunye Mesiya losetawubuya, ngoba angeke kusabakhona lomunye losayobuya, ngaphandle kwekutsi loyo kube nguMesiya wemanga loyokhohlisa bantfu; ngoba munye kuphela Mesiya labakhuluma ngaye baphrofethi, futsi loyo Mesiya nguye loyawulahlwa ngemaJuda.

19 Ngoba ngekwemavi ebaphrofethi, Mesiya uta eminyakeni lengemakhulu lasitfupha kusukela ngesikhatsi babe ahamba eJerusalema; ngekwemavi ebaphrofethi, nangelivi lengilosi yaNkulunkulu, libito lakhe kuyawuba nguJesu Khristu, iNdvodzana yaNkulunkulu.

20 Manje, bomnaketfu, ngikhulume ngalokusobala kute ningaphambuki. Futsi njengobe iNkhosi Nkulunkulu iphila leyakhipha Israyeli eveni laseGibhithe, futsi yaniketa Mosi emandla ekutsi aphilise tive emvakwekutsi setilunywe tinyoka letinebutsi, uma bangabhekisa emehlo abo kuleyo nyoka layiphakamisa phambi kwabo, ngetulu kwaloko wamnika emandla ekutsi ashaye lidvwala emanti agobhote; yebo, bukani ngitsi kini, njengobe leti tintfo tiliciniso, futsi njengobe iNkhosi Nkulunkulu iphila, kute lelinye libito lelinikwe ngaphansi kwelizulu ngaphandle kwalo leli laJesu Khristu, lengikhulume ngalo, umuntfu langasindziswa ngalo.

21 Ngaloko-ke, ngalesi sizatfu iNkhosi Nkulunkulu yetsembisile kimi kutsi leti tintfo lengitibhalako tiyawugcinwa futsi tilondvolotwe, tehliselwe entansi kuyo intalelwane yami, titukulwane ngetitukulwane, kute setsembiso sigcwaliseke kuJosefa, sekutsi intalelwane yakhe angeke ishabalale nanini yingci nje uma umhlaba usemile.

22 Ngaloko-ke, leti tintfo tiyawuhamba titukulwane ngetitukulwane yingci nje uma umhlaba usemile; futsi tiyawuhamba ngekwentsandvo nangekwesifiso saNkulunkulu; futsi tive letiyawuba nato tiyowehlulelwa ngato njengekwalawo mavi labhaliwe.

23 Ngoba sisebenta ngekukhutsala kubhala, kukhutsata bantfwana betfu, kanjalo nabomnaketfu, kutsi bakholwe kuKhristu, nekutsi babuyisane naNkulunkulu; ngoba siyati kutsi kungemusa kutsi sisindziswe, emvakwako konkhe lesingakwenta.

24 Futsi, nanoma sikholwa kuKhristu, siyawugcina umtsetfo waMosi, futsi sibuke phambili ngekucina kuKhristu, ute umtsetfo ugcwaliseke.

25 Ngoba, ngalesi sizatfu umtsetfo wanikwa; ngaloko-ke umtsetfo sewufile kitsi, futsi sentiwe saphila kuKhristu ngenca yelukholo lwetfu; noko sigcina umtsetfo ngenca yemiyaleto.

26 Futsi sikhuluma ngaKhristu, sitfokota kuKhristu, sishumayela ngaKhristu, siphrofetha ngaKhristu, futsi sibhala ngekwetiphrofetho tetfu, kute bantfwana betfu bati kutsi ngukuphi lapho bangabuka khona kute batfole kutsetselelwa kwetono tabo.

27 Ngaloko-ke, sikhuluma mayelana nemtsetfo kute bantfwana betfu bati ngekufa kwemtsetfo; futsi, ngekwati ngekufa kwemtsetfo, bangalindzela loko kuphila lokukuKhristu, futsi bati kutsi umtsetfo wawuniketwe ngasizatfu sini. Futsi emvakwekutsi umtsetfo sewugcwalisekile kuKhristu, ngekutsi akusafaneli batente lukhuni tinhlitiyo tabo ngalokumelene naye uma umtsetfo sekufanele uphele.

28 Manje bukani, bantfu bami, nibantfu labanenkhani; ngaloko-ke, ngikhulume ngalokusobala kini, kute ningabi nekungacondzi. Futsi emavi lengiwakhulumile ayawukuma njengebufakazi ngekumelana nani; ngoba enele kufundzisa noma ngumuphi umuntfu indlela lecondzile; ngoba indlela lecondzile ikukholwa kuKhristu kanye nekungamphiki; ngoba ngekumphika niphika nebaphrofethi kanye nemtsetfo.

29 Manje bukani, ngitsi kini indlela lecondzile ikukholwa kuKhristu, futsi ningamphiki; Khristu unguloNgcwele waka-Israyeli; ngaloko-ke kufanele nikhotsame phambi kwakhe, futsi nimkhonte ngawo onkhe emandla enu, ngengcondvo, nangekucina, kanye nangemphefumulo wenu wonkhe; futsi uma nikwenta loku angeke nilahlwe.

30 Futsi, nangabe kuyawudzingeka, kufanele nigcine tento kanye netimiso taNkulunkulu ute umtsetfo ugcwaliseke lowawunikwe Mosi.