1 Maye kulabo labashaya imitsetfo lengakalungi, kanye nalabo lababhala bubi lababumisile;

2 Labasusa labeswele ekwehlulelweni, kanye nalabamuka labamphofu lilungelo lababantfu bami, kute bafelokati babe yimphango yabo, nekutsi bebele labangenaboyise.

3 Nitawukwenta njani ngelilanga lekujeziswa, kanye nasencitsakalweni leyawuvela khashane? nitawubalekela kubani kutsi nisitwe na? futsi nitawuyishiya kuphi inkhatimulo yenu na?

4 Ngaphandle kwami bayawukhotsama ngaphansi kwetiboshwa, futsi bayawukuwa ngaphansi kwalababulewe. Ngoba kuko konkhe loku intfukutselo yakhe ayikapheli, kodvwa sandla sakhe siseluliwe nanyalo.

5 O m-Asiriya, indvuku yentfukutselo yami, kanye nesagila esandleni sabo kuyintfukutselo yabo.

6 Ngitawumtfumela kutsi ahlasele sive lesitentisako, nakubantfu belulaka lwami ngitawumnika ligunya lekutsi atsatse imphango, aphindze atsatse lokuphangiwe, abagcobagcobe phansi njengeludzaka lwasemigwacweni.

7 Noko ayikahlosi loko, futsi inhlitiyo yayo ayicabangi kanjalo; kodvwa enhlitiyweni yakhe kubhubhisa kanye nekuhlukanisa tive hhayi lidlanzana.

8 Ngoba itsi: Tikhulu tami letihlangene atisisiwo yini emakhosi na?

9 IKhalno ayifanani yini neKhakhemishi na? IHamathi ayifanani yini ne-Aphadi na? ISamariya ayifanani yini neDamaseko na?

10 Njengobe sandla sami sisungule imibuso yetithico, futsi imifanekiso yayo lecoshiwe yendlula leyo yaseJerusalema kanye neyaseSamariya;

11 Ngingeke yini, njengobe ngentile kuyo iSamariya kanye netithico tayo, ngente kanjalo nakuyo iJerusalema kanye nakuto tithico tayo na?

12 Ngaloko-ke kuyawukwenteka kutsi ngesikhatsi iNkhosi seyiwentile wonkhe umsebenti wayo eNtsabeni iSiyoni kanye naseJerusalema, ngitawusijezisa sitselo senhlitiyo lekhukhumele yeNkhosi yase-Asiriya, kanye nenkhatimulo yekutiphakamisa kwayo.

13 Ngoba itsi: Ngemandla esandla sami kanye nangekuhlakanipha kwami ngitentile leti tintfo; ngoba mine nginekucondza; futsi ngiyisusile imincele yebantfu, ngaphanga imicebo yabo, futsi ngibancobile labahlala khona njengemuntfu lolichawe;

14 Futsi sandla sami sitfole njengesidleke umcebo webantfu; nanjengemuntfu agcogca emacandza lasele ngiwugcogcile wonkhe umhlaba; kute namunye lowashaya luphiko, noma lovula umlomo, noma lontjilotako.

15 Ngabe lizembe lingatikhukhumeta yini ngetulu kwaloyo logawula ngalo na? Ngabe lisaha lingatidvumisa yini ngetulu kwaloyo lolinyakatisako na? Kube shangatsi indvuku ingatinyakatisa yona cobo ngetulu kwalabo labayiphakamisako, noma sagila singatiphakamisa shangatsi besingasilo lugodvo!

16 Ngako-ke iNkhosi, iNkhosi yemaBandla, iyawutfumela emkhatsini waletikhuluphele tayo, kondza; futsi ngaphansi kwenkhatimulo yayo iyawulumeka kushisa njengekuvutsa kwemlilo.

17 Kukhanya kwa-Israyeli kuyawuba njengemlilo, futsi naloNgcwele wakhe abe njengelilangabi, futsi liyawushisa lishwabudzele emanyeva akhe kanye netinchachabutane takhe ngelilanga linye;

18 Uyawubucedza buhle belihlatsi lakhe, kanye nebensimi yakhe levundzile, umphefumulo kanye nemtimba; futsi bayawuba njengesikhatsi umphatsi wesibonakaliso aculeka.

19 Tihlahla telihlatsi lakhe letiyosala tiyawuba mbalwa, kangangekutsi umntfwana angatibhala phansi.

20 Futsi kuyawukwenteka kutsi ngalelo langa, insali yaka-Israyeli, kanye nalabo labaphunyula bendlu yakaJakobe, bangeke baphindze bahlale nanini kuloyo lowabashaya, kodvwa bayawuhlala kuyo iNkhosi, kuloNgcwele waka-Israyeli, ngekweliciniso.

21 Insali iyawubuyela, yebo, nensali yakaJakobe, kuye Nkulunkulu lonemandla.

22 Ngoba noma bantfu bakho Israyeli banjengesihlabatsi selwandle, kodvwa insali yabo iyawubuyela; kubhujiswa lokumenyetelwe kuyawucicima ngekulunga.

23 Ngoba iNkhosi Nkulunkulu wemaBandla iyawuletsa imbubhiso, lemisiwe kulo lonkhe live.

24 Ngako-ke, naku lokushiwo yiNkhosi Nkulunkulu wemaBandla: O bantfu bami lenihlala eSiyoni, ningamesabi um-Asiriya; uyawunishaya ngendvuku, futsi uyawuphakamisela etulu sagila sakhe kini, ngendlela yaseGibhithe.

25 Ngoba ngesikhashana lesincane kakhulu, intfukutselo iyawuphela, kanye nelulaka lwami ekubhujisweni kwabo.

26 Futsi iNkhosi yemaBandla iyawuphehla sijeziso sakhe njengekubulawa kwemaMidiyani edvwaleni lase-Orebi; futsi njengobe indvuku yakhe yayiselwandle kanjalo naye uyawuyiphakamisa njengendlela yaseGibhithe.

27 Futsi kuyawukwenteka kulelo langa kutsi umtfwalo wakhe uyawususwa emahlombe akho, kanye nelijoko lakhe entsanyeni yakho, futsi lijoko liyawukwephulwa ngenca yelugcobo.

28 Ufikile e-Aya, wendlulela eMigroni; eMikmashi wetfule imphahla yakhe.

29 Bendlulile emsahweni; bemisa eGeba; iRama iyatfutfumela; iGibeya yakaSawula iyabaleka.

30 Phakamisa livi lakho, O ndvodzakati yaseGalimu; yenta kutsi livakale kuyo iLayisha, O Anathothi lomphofu.

31 IMadmena isusiwe; labakhile baseGebimu babutsene kutsi babaleke.

32 Kwanyalo uyawusala eNobi ngalelo langa; uyawujikitisa sandla sakhe entsabeni yendvodzakati yaseSiyoni, ligcuma laseJerusalema.

33 Bukani, iNkhosi, iNkhosi yemaBandla iyawujuba ligala ngalokwesabekako, kanye nalabo labaphakeme ngekwelizinga bayawugawulwa bawe phansi; kanye nalabatikhukhumetako bayawutfotjiswa.

34 Futsi iyawugawula tihlahla telihlatsi ngensimbi, neLebanoni iyawuwiswa ngulonemandla.