1 Ngilaleleni, nine lenilandzela kulunga. Bukani kulo lidvwala lapho nicetulwe khona, kanye nakuyo imbobo yemgodzi lenikhishwe kuyo.

2 Bukani ku-Abrahama, uyihlo, kanye nakuye Sara, lonitalako; ngoba nguye yedvwa lengambita, ngaphindze ngambusisa.

3 Ngoba iNkhosi iyawuyidvudvuta iSiyoni, itawutidvudvuta tonkhe tindzawo letitindzala tayo; futsi itawukwenta lihlane layo libe njenge-Edeni, kanye nelugadvule lwayo lube njengensimi yeNkhosi. Injabulo kanye nentfokoto kuyawutfolakala kuyo, kubonga kanye nelivi lekuhlabelela.

4 Ngilaleleni, bantfu bami; futsi ningive, O sive sami; ngoba umtsetfo uyawuvela kimi, futsi ngitawukwenta kwehlulela kwami kube kukhanya kubantfu.

5 Kulunga kwami kusondzele; insindziso yami seyihambe phambili, futsi umkhono wami uyawukwehlulela bantfu. Tichingi titongilindza, futsi tiyawutsembela emkhonweni wami.

6 Phakamiselani emehlo enu ezulwini, nibuke emhlabeni ngaphansi, ngoba emazulu ayawunyamalala njengentfutfu, nemhlaba uyawuguga njengengubo; futsi labo labahlala kuwo bayawufa njengendlela lefanako. Kodvwa insindziso yami iyawuma ingunaphakadze, nekulunga kwami angeke kuphele.

7 Ngilaleleni, nine lenati kulunga, nine bantfu tinhlitiyo tabo lengibhale umtsetfo wami kuto, ningakwesabi kusolwa bantfu, noma netfuswe tinhlamba tabo.

8 Ngoba umvunya uyawubadla njengengubo, nemphetfu iyawubadla njengensontfo. Kodvwa kulunga kwami kuyawuma ingunaphakadze, futsi nensindziso yami titukulwane ngetitukulwane.

9 Vuka, vuka! Tembatsise ngemandla, O mkhono weNkhosi; vuka njengasemalangeni asemandvulo. Ngabe akusiwe yini lona lowancuma Rahabi, futsi wagwaza nyokangwenya na?

10 Ngabe kwakungesiye yini wena lona lowomisa lwandle, emanti elwandle lolukhulu; lowenta indlela ekujuleni kwelwandle kute labahlengiwe bewele na?

11 Ngako-ke, labahlengiwe beNkhosi bayawubuya, futsi bete ngekuhlabelela eSiyoni; injabulo lengunaphakadze nebungcwele kuyawuba setinhloko tabo; futsi bayawutfola intfokoto nenjabulo; lusizi nekukhala kuyawubaleka.

12 Nginguye; yebo, nginguye loyo lonidvudvutako. Bukani, ungubani wena, kutsi ungesaba umuntfu, loyawufa, futsi loyindvodzana yemuntfu, loyawukwentiwa abe njengetjani na?

13 Futsi ukhohliwe yini yiNkhosi umenti wakho, loweneka emazulu, futsi wabeka sisekelo semhlaba, futsi wesabile njalonjalo malanga onkhe, ngenca yentfukutselo yemcindzeteli, shangatsi sewulindzele kubhubhisa na? Futsi iphi intfukutselo yemcindzeteli na?

14 Lotfunjiwe losiboshwa uyashesha, kute akhululwe, futsi kute angafeli emgodzini, noma kute kudla kwakhe angakwesweli.

15 Kodvwa ngiyiNkhosi Nkulunkulu wakho, lomagagasi akhe ayabhodla; iNkhosi yemaBandla libito lami.

16 Futsi ngiwabekile emavi ami emlonyeni wakho, ngakusibekela emtfuntini wesandla sami, kute ngibeke emazulu endzaweni yawo futsi ngibeke tisekelo temhlaba, ngikhulume neSiyoni ngitsi: Bukani, nine nibantfu bami.

17 Vuka, vuka, sukuma, O Jerusalema, wena lonatse esandleni seNkhosi sitja sentfukutselo yakhe—wena lominyele tidzidzi letisesitjeni letenta bantfu badzayitele—

18 Kute namunye longamcondzisa emkhatsini wawo onkhe emadvodzana lawatele; noma kube khona longamtsatsa ngesandla, kuwo onkhe emadvodzana lawakhulisile.

19 Lamadvodzana lamabili etile kuwe, ngubani loyawukukhalela—incitsakalo kanye nekubhujiswa kwakho, indlala kanye nenkemba—futsi ngubani lengingakudvudvuta ngaye na?

20 Emadvodzana akho acalekile, ngaphandle kwalawa lamabili; wona adzindzibele ekugcineni kwetitaladi tonkhe; njengenkunzi yesiganga iselugibeni, bagcwele intfukutselo yeNkhosi, kwekhuta nguNkulunkulu wakho.

21 Ngako-ke vani loku manje, wena lohluphekile, futsi lodzakiwe, kodvwa hhayi ngewayini:

22 Naku lokushiwo yiNkhosi yakho, iNkhosi lenguNkulunkulu wakho icelela bantfu bayo indlela; bukani, ngitsetse esandleni sakho sitja sekutfutfumela, tidzidzi tesitja sentfukutselo yami; awuseyukunatsa futsi nanini.

23 Kodvwa ngitawusibeka esandleni sabo labo labakuhluphako; labatsite emphefumulweni wakho: Khotsama, kute sendlule—futsi uwendlalile umtimba wakho njengemhlabatsi nanjengemgwaco kubo labendlulako.

24 Vuka, vuka wembatse emandla akho, O Siyoni; yembatsa tembatfo takho letinhle, O Jerusalema, dolobha lelingcwele; kusukela nyalo kuya phambili akuseyukungena kuwe nanini longakasoki kanye nalongcolile.

25 Titsintsitse elutfulini; sukuma, hlala phansi, O Jerusalema; tikhulule etinketaneni letisentsanyeni yakho, O ndvodzakati letfunjiwe yaseSiyoni.