1 Bukani, kwenteka kutsi mine, Nefi, ngakhala kakhulu eNkhosini Nkulunkulu, ngenca yentfukutselo yabomnaketfu.

2 Kodvwa bukani, intfukutselo yabo yakhula ngekumelana nami, kangangekutsi bafuna kuyitsatsa imphilo yami.

3 Yebo, bangivungamela, batsi: Umnaketfu lomncane ucabanga kubusa ngetulu kwetfu; futsi sesibe netilingo letinyenti ngenca yakhe; ngaloko-ke manje asimbulale, kute singabe sisaphindze sihlushwe ngenca yemavi akhe. Ngoba bukani, angeke simvumele kutsi abe ngumbusi wetfu, ngoba kungekwetfu, tsine lesibomnakabo labadzala, kutsi sibuse ngetulu kwalaba bantfu.

4 Manje mine angibhali kulabongcwengcwe onkhe lamavi labavungama ngawo ngekumelana nami. Kodvwa kuyangenelisa kusho, kutsi bafuna kuyitsatsa imphilo yami.

5 Futsi kwenteka kutsi iNkhosi yangicwayisa, kutsi mine, Nefi, ngisuke kubo ngibalekele ehlane, nabo bonkhe labo bebafuna kuhamba nami.

6 Ngaloko-ke, kwenteka kutsi mine, Nefi, ngatsatsa umndeni wami, kanjalo naZoramu nemndeni wakhe, naSemu, umnaketfu lomdzala kanye nemndeni wakhe, naJakobe, naJosefa bomnaketfu labancane, kanjalo nabodzadzewetfu, kanye nabo bonkhe labo labebafuna kuhamba nami. Bonkhe labo labebafuna kuhamba nami kwakungulabo labebakholelwa etecwayisweni kanye nasetembulweni taNkulunkulu; ngaloko-ke, bawalalela emavi ami.

7 Satsatsa emathende etfu kanye nato tonkhe tinfto lebesingakhona kutitsatsa, sahamba ehlane sikhatsi lebesingaba ngemalanga lamanyenti. Emvakwekutsi sesihambe sikhatsi lesingaba malanga lamanyenti samisa emathende etfu.

8 Bantfu bami bafuna silibite ligama lendzawo ngaNefi; ngaloko-ke sayibita ngaNefi.

9 Futsi bonkhe labo labebanami bancuma kutsi batibite ngebantfu baNefi.

10 Setama kutsi sigcine tehlulelo, nemitsetfo, kanye nemiyaleto yeNkhosi kuto tonkhe tintfo, njengemtsetfo waMosi.

11 INkhosi yayinatsi, futsi saphumelela kakhulu; ngoba sayihlanyela inhlanyelo, saphindze savuna kwaba yinala. Sacala kukhulisa imihlambi yetimvu, nemihlambi yetinkhomo, kanye netilwane talo lonkhe luhlobo.

12 Futsi mine, Nefi, ngetulu kwaloko bengiyiphetse nemibhalo leyo lebeyicoshwe kubongcwengcwe belitfusi; kanjalo nebhola, noma inkhombandlela, leyo lebeyilungiselwe babe ngesandla seNkhosi, njengaloko lokubhaliwe.

13 Futsi kwenteka kutsi sacala kuphumelela kakhulu, kanye nekwandza eveni.

14 Mine, Nefi, ngayitsatsa inkemba yaLabani, ngakha letinyenti tinkemba letifana nayo, ngekwesaba kutsi funa noma ngayiphi indlela bantfu labo manje labesebabitwa ngemaLamani bete batosihlasela futsi basibhubhise; ngoba bengiyati inzondo yabo kitsi kanye nakubantfwana bami kanye nalabo labebabitwa ngebantfu bami.

15 Futsi ngabafundzisa bantfu bami kwakha takhiwo, kanye nekusebenta ngalo lonkhe luhlobo lwelugodvo, nelwensimbi, nelwekhopha, nelwelitfusi, nelwensimbi lecinile, nelweligolide, nelwesiliva, nematje laligugu, lokwakukunyenti kakhulu.

16 Mine, Nefi, ngalakha lithempeli; ngalakha ngendlela yelithempeli laSolomoni ngaphandle nje kwekutsi lalingakakhiwa ngetintfo letinengi kakhulu letiligugu; ngoba tatingeke titfolakale eveni, ngaloko-ke, lalingeke lakhiwe njengelithempeli laSolomoni. Kodvwa indlela yekwakhiwa yayinjengelithempeli laSolomoni; futsi kwakhiwa kwalo kwakukuhle kakhulu.

17 Futsi kwenteka kutsi mine, Nefi, ngenta nebantfu bami kutsi bakhutsale, nekutsi basebente ngetandla tabo.

18 Futsi kwenteka kutsi bafuna kutsi ngibe yinkhosi yabo. Kodvwa mine, Nefi, ngangifisa kutsi bangabi nayo inkhosi; noko, ngabentela ngalokwakusemandleni ami.

19 Bukani, emavi eNkhosi abesagcwalisekile kubomnaketfu, lawo leyawakhuluma mayelana nabo, ekutsi ngiyawuba ngumbusi wabo kanye nemfundzisi wabo. Ngaloko-ke, ngaba nguye umbusi wabo kanye nemfundzisi wabo, ngekwemiyaleto yeNkhosi, kwate kwaba sikhatsi lapho bafuna kutsatsa imphilo yami khona.

20 Ngaloko-ke livi leNkhosi lagcwaliseka lelo leyalikhuluma kimi, isho kutsi: Nangabe bangeke bawalalele emavi akho bayawuhlukaniswa phambi kweNkhosi. Futsi bukani, bahlukaniswa ebukhoneni bayo.

21 Yenta kutsi sicalekiso sehlele etikwabo, yebo, sicalekiso lesibuhlungu, ngenca yebubi babo. Ngoba bukani, bebatente taba lukhuni tinhlitiyo tabo ngekumelana nayo, kangangekutsi bese banjengelitje lelicine kakhulu; ngaloko-ke, njengobe bebamhlophe, futsi babukeka kahle kakhulu baphindze batsandzeka, kute bangabe basakwati kuyenga bantfu bami iNkhosi Nkulunkulu yenta kutsi sikhumba sebumnyama sehlele kubo.

22 Futsi naku lokushiwo yiNkhosi Nkulunkulu: Ngitawukwenta kutsi benyanyeke kubantfu bakho, ngaphandle kwekutsi baphendvuke ebubini babo.

23 Futsi iyawucalekiswa intalelwane yakhe loyo lohlangana nentalelwane yabo; ngoba yona iyawucalekiswa nangesicalekiso lesifanako. INkhosi yakukhuluma loku, futsi kwenteka.

24 Ngenca yesicalekiso sabo lebesisetikwabo baba bantfu labangemavila, labagcwele kuganga kanye nebucili, futsi bafuna ehlane tilwane letidliwako.

25 Futsi iNkhosi Nkulunkulu yatsi kimi: bayawuba luhlupho kuyo intalelwane yakho, kuyiphehlela kutsi ingikhumbule; futsi nangabe yona ingeke ingikhumbule, ilalele emavi ami, bayawuyihlupha kute kube sekubhujisweni.

26 Futsi kwenteka kutsi mine, Nefi, ngababeka boJakobe kanye naJosefa, kutsi babe baphristi kanye nebafundzisi eveni lebantfu bami.

27 Futsi kwenteka kutsi saphila ngekujabula.

28 Futsi iminyaka lengemashumi lamatsatfu bese yendlulile kusukela ngesikhatsi sasuka eJerusalema.

29 Mine, Nefi, ngangiyigcinile imibhalo kubongcwengcwe bami, lebengibentile ngebantfu bami kute kube nyalo.

30 Futsi kwenteka kutsi iNkhosi Nkulunkulu yatsi kimi: Yenta labanye bongcwengcwe, futsi utawucopha letinyenti tintfo kubo letinhle emehlweni ami, kute bazuze bantfu bakho.

31 Ngaloko-ke, mine, Nefi, kulalela imiyaleto yeNkhosi, ngahamba ngabenta labo bongcwengcwe lengicophe kubo leti tintfo.

32 Ngacopha loko lokutsandzekako kuNkulunkulu. Futsi uma bantfu bami batitsandza tintfo taNkulunkulu bona batawuyitsandza imibhalo lecoshiwe lekulaba bongcwengcwe.

33 Uma bantfu bami banesifiso sekwati kabanti ngencenye letsite yemlandvo webantfu bami kufanele bacwaninge labanye bongcwengcwe bami.

34 Kuyangenelisa kusho kutsi iminyaka lengemashumi lamane yase yendlulile, futsi sase sike saba netimphi kanye netincabano nabomnaketfu.