1 Era ebintu bino byonna kitange yabiraba, era n’abiwulira, era n’abyogera, nga abeera mu weema, mu kiwonvu kya Lemweri, era nate n’ebintu ebirala bingi nnyo, ebitayinzika kuwandiikibwa ku mbaati zino.

2 Era kaakano, nga bwe njogedde ku bikwata ku mbaati zino, laba si ze mbaati kwentadde enyinnyonnyolwa enzijjuvu ey’ebyafaayo by’abantu bange; kubanga embaati kwe mpandiise enyinnyonnyolwa mu bujjuvu ku bikwata ku bantu bange nziwadde erinnya lya Neefi; n’olwekyo, ziyitibwa embaati za Neefi, okusinziira ku linnya lyange; era na zino embaati nazo ziyitibwa embaati za Neefi.

3 Wabula, nfunye ekiragiro kya Mukama nti nkole embaati zino, olw’ekigendererwa eky’enjawulo nti wabeewo enyinnyonnyolwa eyoleddwa ey’obuweereza bw’abantu bange.

4 Ku mbaati endala kulina okwoolwako enyinnyonnyolwa y’obufuzi bwa bakabaka, era n’entalo n’enkaayana z’abantu bange; n’olwekyo embaati zino za kitundu ekisinga ku buweereza; era embaati endala za kitundu ekisinga ku bufuzi bwa bakabaka era n’entalo era n’enkaayana z’abantu bange.

5 N’olwekyo, Mukama andagidde okukola embaati zino olw’ekigendererwa eky’amagezi mu ye, ekigendererwa kye simanyi.

6 Naye Mukama amanyi byonna okuva ku lubereberye; n’olwekyo, ategeka engeri y’okutuukirizaamu emirimu gye gyonna mu baana b’abantu; kubanga laba, alina obuyinza bwonna eri okutuukiriza kw’ebigambo bye byonna. Era bwe kityo bwe kiri. Amiina.