Lesona 35

O Le Misiona a Iesu Keriso

Faamoemoega

Ina ia fesoasoani i tamaiti ia malamalama lelei i le misiona a Iesu Keriso.

Faaaliga i le faiaoga: O lenei lesona o se aotelega lea o le soifuaga o Iesu i le muai olaga, i le faaletino, ma le olaga a sau. Ua faamoemoeina ina ia fesoasoani ai i tamaiti ia malamalama atoatoa i le misiona a Iesu. Talu ai ona o lenei lesona o se aotelega, o lea e lautele ai foi fesili. A’o outou talanoaina, e sili atu ona aoga pe a outou tulimatai i vaega sili ona taua o le misiona a le Faaola nai lo le taumafai e auiliili vaega uma.

Sauniuniga

Suesue ma le agaga tatalo le Mose 1:33, 39; 4:2; Luka 24:27; Ioane 3:16; 15:9–13; 1 Korinito 10:4; Mosaea 13:33; 3 Nifae 11:7–10; Eteru 3:14; ma le Mataupu Faavae ma Feagaiga 138:30; ma le Talafaasolopito o Iosefa Samita 2:17. Ona suesue lea o le lesona ma iloilo pe faapefea ona e manao e aoao atu i tamaiti le tala faatusi paia (Tagai i le “Saunia o Au Lesona,” itulau 0 [vi,] ma le “Aoao Atu Mai Tusitusiga Paia,”itulau 0 [vii].)
Tusi faitau faaopoopo: Mataupu o le Talalelei, mataupu 3, 11, ma le 43.
Filifili fesili e talanoaina ma gaoioiga e faamauoa mai ai na o le a sili ona aafia ai tamaiti ma sili ona fesoasoani ia i latou e maua ai le faamoemoega o le lesona.
Mea e manaomia:
1. Se Tusi Paia poo se Feagaiga Fou mo tamaiti taitasi
2. Upu tusi (tagai i le siata)
3. Ata 7-1, Iesu le Keriso (Taga Ata o le Talalelei 240; 62572).

Faaaliga: I le taimi o le lesona, e mafai ona e faatumuina atoa se siata e pei o lenei (poo lou tusia foi i luga o le laupapa). Faaali atu le “Misiona a Iesu Keriso” ona sosoo atu ai lea ma vaega autu e tolu i lalo ifo o lena ulutala. Fai atu i se tamaititi na te tuuina le upu tusi i lalo o le ulutala e talafeagai ai a’o outou talanoaina vaega o le misiona a Iesu.

O le Misiona Iesu Keriso

O le Muai Olaga o Keriso

Na ofo atu e avea
Na foafoaina le lalolagi
O Ieova i le Feagaiga Tuai
Tuuina atu faaaliga i perofeta

Soifuaga Faaletino o Keriso

Aoao atu le talalelei ma Faaola
Faamalolo mai
Faatulagaina lana ekalesia
Togiola mo a tatou agasala
Maliu mo i tatou

Soifuaga o Keriso ina ua mavae lona Maliu

Aisasi atu i le lalolagi o agaga
Na toetu
Asiasi atu i sa Nifae
Faatulagaina lana ekalesia mo i tatou e ala mai i le Perofeta o Iosefa Samita
Tuuina atu faaaliga i taitai o le Ekalesia i aso nei
E alofa ma fesoasoani ia i tatou
O le a toe afio mai

Faalautelega Fautuaina o le Lesona

Tofi se tamaititi e faia le tatalo amata.

Gaoioiga e Faatosina Mai Ai

Fai atu i tamaiti e tau mai ni upu se tele latou te mafai e faamatala mai ai poo ai i latou, e pei o se atalii, afafine, fanau a matua o matua, tamaititi aoga, tagata taalo soka, ma isi. Ia lisi nei mea i luga o le laupapa. I se isi koluma i luga o le laupapa (poo le faaaoga foi o upu tusi) ia lisi ai nisi o igoa e faatatau ia Iesu (tagai ia “Iesu Keriso” i le Taiala o Tusitusiga Paia), amata i upu e le masani ai tamaiti e pei o le Faataitai, Faamasino, Maa, Fautua, ma agai atu i upu latou te malamalama iai e pei o le Faaola, Togiola, Foafoa, ma isi. Fai atu i tamaiti e sii i luga o latou lima pe afai ua latou iloa o ai e faatatau iai nei upu.

Tala Faatusi Paia

Faaali atu le ata o Iesu le Keriso. Ia faamatala atu e tele mea ofoofogia na faia e Iesu mo i tatou, e le na o le taimi sa iai o ia i le lalolagi, ae o le taimi foi e le i fanau mai ai ma le taimi ina ua mavae lona maliu ma lona toetu. Fesoasoani i tamaiti ina ia latou malamalama na faia e Iesu nei mea ina ia faataunuu ai le ata o le faaolataga a le Tama Faalelagi mo i tatou. Tatou te taua o le ata o le faaolataga aua o le fuafuaga lea faatasi ai ma le fesoasoani a Iesu o le a toe mafai ai ona tatou toe foi atu e ola faatasi e faavavau ma le Tama Faalelagi ma Iesu (tagai i le Mose 1:39). Fai atu i tamaiti e faitau leotele le Ioane 3:16. (Mo ala fautuaina e aoao atu ai le tala faatusi paia, tagai i le “Aoao Atu Mai Tusitusiga Paia, i. vii.) Faaaoga ata i taimi e talafeagai ai.

Talanoaga ma Fesili e Faatatau I Ai

Suesue fesili ma mau o loo taua i lalo a o e saunia lau lesona. Faaaoga fesili e te lagona o le a sili ona fesoasoani ai i tamaiti ia malamalama i mau ma faaaoga ai mataupu faavae i o latou olaga. O le faitauina faatasi ma tamaiti o mau i le vasega o le a fesoasoani latou te mauaina ai malamalamaaga i tusitusiga paia.

Talanoaga ma Fesili e Faatatau I Ai

O a nisi o mea na faia e Iesu ao lei fanau mai o ia i le lalolagi?
O ai na ofo e avea ma o tatou Faaola? O anafea na ofo ai o ia? (Eteru 3:14; Mose 4:2.) O ai na filifilia Iesu e avea ma o tatou Faaola? (Ioane 3:16; Aperaamo 3:27.)
O ai na foafoaina le lalolagi? O anafea na foafoa ai e Iesu le lalolagi? (Kenese 1:1; Mose 1:33.)
O ai Ieova, poo le Alii i le Feagaiga Tuai? O ai na tuuina atu faaaliga i perofeta o le Feagaiga Tuai, e pei o Mose ma Aperaamo? (Iesu Keriso. Tagai ia “Ieova” i le Taiala o Tusitusiga Paia.) O ai na molimau atu ai Mose ma perofeta uma? (Luka 24:27; Mosaea 13:33.)
O le a le mea a Iesu na faia ao iai o ia i le lalolagi? Fai atu i tamaiti e lisi mai ni mea se tele e mafai ona latou manatua e uiga i le misiona a Iesu i le lalolagi. Aisea na faia ai e Iesu nei mea mo i tatou? (Ioane 15:9, 11.)
O le a le mea na faia e Iesu ina ua mavae lona maliu? (1 Peteru 3:18–20; MFF 138:30; na ia asiasi atu i le falepuipui o agaga.) O le a le mea na faia e Iesu ina ua mavae lona toetu? (3 Nifae 11:7–10, 27:8: asiasi atu i sa Nifae i Amerika ma faaali atu lona tino ia te i latou; Talafaasolopito o Iosefa Samita 2:17: na asiasi atu ia Iosefa Samita ina ia toefuatai le upu moni; MFF 115:4: faatuina lana ekalesia mo i tatou.)
O faapefea ona fesoasoani Iesu ia i tatou uma taitoatasi i aso nei? (Amosa 3:7; Mataio 28:20.) (Tagai i le gaoioiga e faamauoa mai ai lona 2.)
O le a le mea sili lenei tatou te faatalitali iai? O a valoaga ma folafolaga ua faaali mai e Iesu e uiga i lona toe afio faalua mai? (Mataio 24:30–31; MFF 29:11.)
E mafai faapefea ona tatou faaali atu ia Iesu lo tatou agaga faafetai mo mea ua ia faia mo i tatou? (Ioane 15:10, 12.) Fesoasoani i tamaiti e mafaufau i poloaiga e mafai ona latou tausia ina ia faaali atu ai lo latou agaga faafetai ia Iesu.

Gaoioiga e Faamauoa Ai

E mafai ona e faaaogaina se tasi poo le sili atu foi o nei gaoioiga i soo se taimi o le lesona poo le avea o se toe iloiloga, aotelega, poo se lu’i.

Sue le “Iesu Keriso” i le vaega o Taiala i Tusitusiga Paia e vaai ai le tele o tiute ma igoa o Iesu. Filifili ni nai igoa e talanoa iai.
Fesoasoani i tamaiti ina ia malamalama e alofa Iesu ia i tatou ma o loo ia taitaia le Ekalesia i aso nei. Faamatala atu le tala lenei ia Peresitene Lorenzo Snow, na ia vaai ia Iesu i le Malumalu o Sate Leki:

I se tasi afiafi sa asiasi atu ai Peresitene Snow ma se tasi o tama teine a lana fanau i le Malumalu o Sate Leki. Ina o le a toe foi atu lenei tamaitai, sa mulimuli atu ai Peresitene Snow i le auala agai i fafo. Sa faafuasei ona faapea atu o ia, “Faatali mai lava mo sina taimi Allie, e iai se mea ou te fia tauina atu ia te oe. O iinei tonu lava na faaali mai ai le Alii o Iesu Keriso ia te au i le taimi o le maliu o Peresitene Woodruff.” Sa toe laa mai o ia, ma faaloaloa mai lona lima agavale, ma faaauau, “Na tu o ia iinei, pe tusa ma le tolu futu mai le fola. E foliga mai o loo tu o ia i luga o se auro.” Ona faamatala lea e Peresitene Snow foliga o le Faaola ma ona ofu talaloa sinasina. (Tagai ia LeRoi C. Snow, “An Experience of My Father’s,” Improvement Era, Sept. 1933, p. 677.)
Fai atu i tamaiti e sue mau nei poo nisi mau e tali tutusa ina ia fesoasoani ia i latou e iloilo nisi o mea na faia e Iesu i le taimi o lana misiona i le lalolagi:
- Mataio 5:2 (aoao atu le talalelei)
- Mataio 14:14 (faamalolo mai)
- Mareko 3:14 (faatulagaina lana ekalesia)
- 2 Nifae 2:6–7 (togiola mo a tatou agasala ma maliu mo i tatou)
- Mataio 28:6–7 (na toetu)
Usu pe faitau upu o le “Le Alofa o Lo’u Faaola” (Tusipese a Tamaiti, i. 74).

Faaiuga

Molimau

Ia tuuina atu lau molimau i lou agaga faafetai mo Iesu ma le tele o mea na ia faia mo i tatou ma o loo faaauau pea ona ia faia mo i tatou. Tau atu i tamaiti lou agaga faafetai mo le avanoa ua e suesue atili ai e uiga ia Iesu i le taimi ao iai i le lalolagi.

Tusi Fautuaina e Faitau i le Fale

Ia fautuaina e suesue e tamaiti le Ioane 15:9–13 i le fale e fai ma toe faamanatu o lenei lesona.

Tofi se tamaititi e faia le tatalo faaiu.