Sa Ofo Mai Iesu Keriso e Avea ma O Tatou Faaola

Faamoemoega

Ina ia fesoasoani i tamaiti latou te lagonaina se alofa e sili atu mo Iesu Keriso i le aoaoina atu lea o i latou sa ofo mai Iesu i le muai olaga ina ia avea ma o latou Faaola.

Sauniuniga

Suesue ma le agaga tatalo le Ioane 15:13, Eperu 12:9, Faaaliga 12:7–9, Mataupu Faavae ma Feagaiga 93:21, ma le Mose 4:1–4. Tagai foi i le mataupu e 2 ma le 3 o le Mataupu o le Talalelei. Ona suesue lea o le lesona ma iloilo pe faapefea ona e manao e aoao atu i tamaiti le tala faatusi paia (tagai ”Saunia o Au Lesona,” i.0 [vi], ma le ”Aoao Atu Mai Tusitusiga Paia,” i. [vii]).
Filifili ia fesili e talanoaina ma gaoioiga e faamauoa ai lea o le a aafia ai tamaiti ma o le a sili ona fesoasoani ia i latou ia mauaina le faamoemoega o le lesona.
Vaai ni tamaiti o lau vasega e usuina le “Sa Ou Nofo i le Lagi” (Tusipese a Tamaiti, i.–) pe sauni foi e usu pe faitau faatasi ma tamaiti upu i le taimi le lesona.
Mea e manaomia:
1. Se Tusi Paia po o se Feagaiga Fou ma se Penina Tau Tele mo tamaiti taitasi.
2. Ata 7-1, Iesu le Keriso (Taga Ata o le Talalelei 240; 62572), ma se ata o se pepe faatoa fanau mai, e manaia pe a maua se ata o se tasi o le vasega po o oe foi.

Faalautelega Fautuaina o le Lesona

Tofi se tamaitiiti e faia le tatalo amata.

Gaoioiga e Faatosina Mai Ai

Faaali le ata o le pepe faatoa fanau mai, ae mate mai e le vasega po o ai.

Gaoioiga e Faatosina Mai Ai

Aisea na le avea ai lenei ma amataga o le olaga o lenei tagata?

Molimau atu i tamaiti ae tatou te le’i fananau mai i le lalolagi, sa tatou nonofo uma lava faatasi ma le Tama Faalelagi o ni fanau agaga. Faamatala o o tatou tino agaga, e foliga uma lava i o tatou tino faaletino, o lima, vae, mata ma isi mea, peitai e leai ni aano ma ni ivi. Faamatala foi o lenei olaga o agaga, e ta’ua o le muai olaga. I lea muai olaga sa aoaoina i tatou e ni matua faalelagi i le talalelei ma le fuafuaga o le olaga.

Atonu e te manao e faamatala atu le upusii lenei mai ia Polika Iaga: ”Tou te masani lelei lava ma le Atua lo tatou Tama Faalelagi…..E leai se tasi o outou e le’i nonofo faatasi ma ia i lona maota…. E leai se tagata o i ai nei iinei e le o se atalii po o se afafine o le Atua” (Discourses of Brigham Young, p. 50).

Tala FaatusiPaia

Fai fesili e pei o nei, ma tuu le avanoa i tamaiti e faamatala mai ai o latou lagona:

Tala FaatusiPaia

O ai e alofa ia te oe?
E faapefea ona e iloa e alofa se tasi ia te oe?
O ai e te alofa i ai?

Faamatala se tala e uiga i se tagata e alofa lava i se isi tagata ma o lea na ia faia ai se mea taua mo ia, e pei o se tina e ala i le po e tausi se tamaitiiti ma’i po o se uso po o se tuafafine matua sa fesoasoani i se uso po o se tuafafine laitiiti i le faiga o sana galuega mo le aoga.

Faamatala o lenei lesona e uiga i mea na faia e Iesu i le muai olaga e faailoa ai lona alofa tele mo i tatou taitoatasi.

Faapipii i luga le ata o Iesu Keriso ma faamatala le tala ia Iesu na ofo mai e avea ma o tatou Faaola. (Mo auala fautuaina e aoao atu ai le tala faatusi paia, tagai i le “Aoao Atu Mai Tusitusiga Paia,” i. vii.) Fesoasoani ia malamalama tamaiti i manatu nei:

Tala FaatusiPaia

I le muai olaga sa avea i tatou ma fanau agaga ma sa tatou nonofo ma o tatou matua faalelagi (Eperu 12:9).
O Iesu o le uluai atalii agaga na fanaua e le Tama Faalelagi (MFF 93:21) ma o ia o le uso matua o o tatou agaga.
O Lusifelo, o lē na avea ma Satani, o se atalii agaga foi o le Tama Faalelagi.
Na valaauina e le Tama Faalelagi se fonotaga ma ana fanau agaga uma lava. I lenei fonotaga na ia faamalamalamaina mai ai lana fuafuaga mo i tatou ina ia avea e faapei o ia. Na ia ta’u mai ia i tatou e finagalo o ia ina ia tatou o i le lalolagi e maua ai se tino faaletino. Na ia faamalamalama mai foi, i le lalolagi o le a tofotofoina i tatou ina ia iloa ai pe tatou te tausia ana poloaiga.
I lenei fonotaga na faamalamalama mai ai foi e le Tama Faalelagi, i le lalolagi o le a tatou agasala uma lava ma o le a tatou oti uma foi. E moomia e le Tama Faalelagi se tasi e avea ma Faaola, e puapuagatia mo a tatou agasala, ma maliu mo i tatou ina ia mafai ona tatou toetutu.
Na manao Lusifelo ia suia le fuafuaga a le Tama Faalelagi. Sa fai mai Lusifelo o le a na ia laveaiina tagata uma e ala i lona aveeseina o lo latou saolotoga e filifili ai, ma o le a le mafai ai ona tatou faia ni mea sese pe amiotonu. Sa manao foi Lusifelo i le mamalu uma (Mose 4.1).
Talu ai e alofa o ia ia te i tatou (Ioane 15:13), sa ofo mai Iesu e avea ma o tatou Faaola. Na manao o ia e mulimuli i le fuafuaga a le Tama Faalelagi ma avatu le mamalu i le Tama Faalelagi (Mose 4:2).
Na filifilia e le Tama Faalelagi Iesu e fai ma o tatou Faaola. Sa ita Lusifelo ma faasagatau mai i le Tama Faalelagi (Faaaliga 12:7–9; Mose 4:3–4).
Sa tatau ona filifili fanau agaga a le Tama Faalelagi pe mulimuli ia Iesu po o Lusifelo.
O le tasi vaetolu o fanau agaga a le Tama Faalelagi na filifili e mulimuli ia Lusifelo, ma sa tuliesea i latou uma mai le lagi. Na avea Lusifelo ma Satani, ma o agaga na mulimuli ia te ia na avea ma agaga leaga, o i latou ia ua taumafai ina ia tatou faia mea sese. O nei agaga na mulimuli ia Satani latou te le’i mauaina ni tino faaletino.
O agaga uma lava na filifilia le fuafuaga a le Tama Faalelagi ma mulimuli ia Iesu i le muai olaga, ua fananau mai i le lalolagi pe o le a fananau mai foi ma o latou tino faaletino o aano ma le toto.
O tamaiti uma lava i totonu o lenei potuaoga, na latou filifili e mulimuli i le fuafuaga a le Tama Faalelagi ma ua fananau mai i lenei lalolagi ma ni tino faitino.

Talanoaga ma Fesili e Faatatau I Ai

Suesue fesili ma mau o loo taua i lalo a o e saunia lau lesona. Faaaoga fesili e te lagona o le a sili ona fesoasoani ai i tamaiti ia malamalama i mau ma faaaoga ai mataupu faavae i o latou olaga. O le faitauina faatasi ma tamaiti o mau i le vasega o le a fesoasoani latou te mauaina ai malamalamaaga i tusitusiga paia.

Talanoaga ma Fesili e Faatatau I Ai

Mata o le a sou lagona i le nonofo ai i le lagi ma le Tama Faalelagi?
E faapefea sou lagona ina ua e iloaina o le Tama Faalelagi o le Tama o lou agaga?
O le a le uiga o le faaupuga o Iesu o le uso matua o o tatou agaga?
Na manao faapefea Lusifelo e suia le fuafuaga a le Tama Faalelagi?
O le a sou lagona ina ua e iloa o Iesu na ofo mai e puapuagatia ma maliu mo oe?
E te iloa faapefea na e filifili e mulimuli ia Iesu i le muai olaga? Aisea e te fiafia ai ina ua e faia lena filifiliga?
O le a se mea ua ta’u atu e lenei mea moni, na e filifili e mulimuli ia Iesu i le muai olaga, e uiga ia te oe lava?
O lenei la ua tatou fananau mai i le olaga faitino, aisea e taua ai lo tatou saga filifili pea e mulimuli ia Iesu?

Faaali le Tusi Paia i tamaiti, ma faamatala o le Feagaiga Fou i le Tusi Paia o loo ta’u mai ai e uiga i mea sa faia e Iesu ma ana Aposetolo. Uunai tamaiti e aumai a latou Tusi Paia i le vasega i Aso Sa taitasi.

Vaai ni tamaiti e usuina le ”Sa Ou Nofo i le Lagi” (Tusipese a Tamaiti, i–), po o le usu foi pe faitau faatasi upu ma le vasega.

Gaoioiga e Faamauoa Ai

E mafai ona e faaaogaina se tasi pe sili atu foi o nei gaoioiga i soo se taimi o le lesona pe faaaoga foi o se toe iloiloga, otootoga, po o se lu’i.

Fai e pei o se toe faamanatu, ia tusi upu o loo i lalo i luga o le laupapa:

Tasi vaetolu

Ulumatua

Uso matua

Tama o o tatou agaga

Fonotaga i le Lagi

Lusifelo

Vaevae le vasega i ni vaega toalaiti. Fai i vaega taitasi latou te talanoaina se mataupu se tasi pe sili atu foi ma sauni e faamatala i le vasega ni mea latou te manatua. A maea ni nai minute ona aumaia lea o lipoti e vaega taitasi i le vasega.
Ia susue Tusi Paia a tamaiti i le lisi o tusi i le Feagaiga Fou. Toe faamanatu le lesona 1 i le faia lea o nisi o nei fesili: E tutusa faapefea tusi a Mataio, Mareko, Luka, ma Ioane? E eseese faapefea? O le a le mea e faatatau i ai le tusi o Galuega? Aisea ua ta’ua ai le tele o isi tusi o tusi (epistles)? Fesoasoani ia masani atili tamaiti ma tusi o le Feagaiga Fou i le tusia lea o mau i luga o le laupapa ma fai iai latou te sueina i a latou Tusi Paia.
Fesoasoani i tamaiti e tauloto le Ioane 15:13.
Fesoasoani i tamaiti e tauloto tusi o le Feagaiga Fou (tagai ”O Tusi o le Feagaiga Fou,”More Songs for Children p. 28).

Faaiuga

Molimau

Ia e molimau atu o oe ma tamaiti o lau vasega o fanau agaga a le Tama Faalelagi ma e alofa tele Iesu ia i tatou, o le ala lena na ia ofo mai ai i le muai olaga ina ia avea ma o tatou Faaola. Sa tatou matua alolofa lava foi i lo tatou Tama Faalelagi, ma o lea na tatou filifili ai e mulimuli i lana fuafuaga. Ia faamamafa atu le taua o le mulimuli pea o tamaiti i le fuafuaga a le Tama Faalelagi i le lalolagi. Molimau o le mulimuli ia Iesu ma usiusitai i ana poloaiga ona pau ia o auala e fiafia moni ai.

Tusi Fautuaina e Faitau i le Fale

Ia fautuaina e suesue e tamaiti le Mose 4:1–4 i le fale e toe faamanatu ai lenei lesona.

Tofi se tamaitiiti e faia le tatalo faaiu.