Lesona 26

Faataoto i Taleni

Faamoemoega

Ina ia fesoasoani i tamaiti ia latou naunau e faaaoga a latou taleni ina ia aoga i isi ma i latou lava.

Sauniuniga

Suesue ma le agaga tatalo le Mataio 25:14–30 ma le Mataupu Faavae ma Feagaiga 60:2–3, 82:3. Ona suesue lea o le lesona ma iloilo pe faapefea ona e manao e aoao atu i tamaiti le tala faatusi paia (Tagai i le “Saunia o Au Lesona,” itulau 0 [vi,] ma le “Aoao Atu Mai Tusitusiga Paia,”itulau 0 [vii].)
Filifili ia fesili e talanoaina ma gaoioiga e faamauoa mai ai lea o le a aafia ai tamaiti ma o le a sili ona fesoasoani ia i latou ia mauaina le faamoemoega o le lesona.
Mea e manaomia:
1. Se Tusi Paia poo se Feagaiga Fou mo tamaiti taitasi
2. Fasi pepa o loo tusia ai ni taleni i luga, e pei o le “Ua ia te oe le taleni e avea o se tagata ta vaiolini lelei,” Ua ia te oe le taleni e te faauo atu ai,” “Ua ia te oe le taleni e avea ai oe o se tagata lauga lelei,” “Ua ia te oe le taleni e avea ai oe o se tagata taalo soka lelei,” “Ua ia te oe le taleni e avea ai oe o se tagata faatupu filemu,” “Ua ia te oe le taleni e avea ai oe o se taitai lelei,” “Ua ia te oe le taleni e avea ai oe o se faifeautalai lelei,” “Ua ia te oe le taleni e avea ai oe o se tagata e te faafiafia i isi,” ma isi lava mea. A o le’i omai tamaiti i totonu o le potu, ia gaugau fasi pepa ma faapipii solo i totonu o le potu ina ia mafai e tamaiti ona sue. Aua nei faailoaina se taleni e patino i se tamaititi.

Faalautelega Fautuaina o le Lesona

Tofi se tamaititi e faia le tatalo amata

Gaoioiga e Faatosina Mai Ai

Tau atu i tamaiti o loo iai ni savali faapitoa mo i latou o loo nanaina i totonu o le potu. Fai atu i se tamaititi e sue se savali ma faitau leotele. Ona fai atu lea i le tamaititi lena e faamatala mai poo le a se mea e mafai ona ia faia e atinaeina ai lena taleni. Tuu atu le avanoa i tamaiti uma, ma uunaiina le toatele o le vasega e mafaufau i ni auala e faaleleia ai taleni taitasi. Ia faamatala atu o lenei lesona o le a aoaoina ai i latou i le taua o le atinaeina o taleni.

Tala Faatusi Paia

Iloilo le uiga o se faataoto mai le lesona 25. Aoao atu i tamaiti le faataoto i taleni o loo i le Mataio 25:14–30. (Mo ala fautuaina e aoao atu ai le tala faatusi paia, tagai i le “Aoao Atu Mai Tusitusiga Paia, i. vii.) I le faataoto, o loo faatatau taleni i tupe. Mo i tatou, o taleni o mea e mafai ona tatou atinaeina ina ia faamanuiaina ma fesoasoani ai i isi.

Talanoaga ma Fesili e Faatatau I Ai

Suesue fesili ma mau o loo taua i lalo a o e saunia lau lesona. Faaaoga fesili e te lagona o le a sili ona fesoasoani ai i tamaiti ia malamalama i mau ma faaaoga ai mataupu faavae i o latou olaga. O le faitauina faatasi ma tamaiti o mau i le vasega o le a fesoasoani latou te mauaina ai malamalamaaga i tusitusiga paia.

Talanoaga ma Fesili e Faatatau I Ai

Aisea na tuuina atu ai e le matai aofaiga eseese o taleni i auauna taitasi? (Mataio 25:15.) O faapefea ona ese au taleni mai taleni a lau uo? O taleni a tagata o lou aiga? Aisea e eseese ai meaalofa e tuuina mai e le Tama Faalelagi ia i tatou uma taitoatasi? (MFF 46:12.) E faapefea ona tatou faailoa atu lo tatou agaga faafetai i le Tama Faalelagi mo meaalofa patino ua ia tuuina mai ia i tatou? (MFF 46:11.)
O lea le mea na faia e auauna o e na tuuina atu iai taleni e lima ma le lua? (Mataio 25:16–17.) O le a sou manatu na faapefea ona la faaluaina le tele o a laua tupe? E mafai faapefea ona avea le galue ma se faamanuiaga ia i tatou?
O le a le mea na faia e le auauna na tuuina atu iai le taleni e tasi? (Mataio 25:18.) O le a sou manatu aisea na ia faia ai lea mea? (Mataio 25:24–25.) O le a sou manatu aisea e le atinaeina ai e isi tagata a latou taleni? O le a se mea e tupu i taleni a tagata pe afai latou te le faia iai se mea?
Ina ua toe foi mai le matai ma fai atu i auauna e lipoti atu ia te ia, o le a le mea na ia tau atu i le auauna na tuu atu iai taleni e lima? (Mataio 25:21.) O le a le mea na ia tau atu i le auauna na tuu atu iai taleni e lua? (Mataio 25:23.) E faapefea ona faamanuiaina i tatou i lo tatou galulue malosi e atinaeina ia taleni? O faapefea ona faamanuiaina oe e ala i taleni poo mea foi e mafaia e se isi?
Aisea na tutusa ai taui na tuuina atu e le Matai i le auauna na tuu iai taleni e lima ma le auauna na tuu iai taleni e lua? (Mataio 25:21,23.)
O le a le saunoaga a le Matai i le auauna na tuu atu iai le taleni e tasi? (Mataio 25:26–27.) Aisea na ita ai le Matai i le auauna lea? O le a le faasalaga na tuu atu iai i lona nanaina o le taleni? (Mataio 25:28, 30.) Aisea e taua ai lo tatou faaaogaina o mea tatou te mafaia ma a tatou taleni nai lo le tele o taleni tatou te maua ae poo a foi na taleni?
O le a sou manatu aisea na tuu atu ai e le matai le taleni e tasi i le auauna sa iai le sefulu? Pe na talafeagai ea lea mea? Aisea? Ia faamatala atu o le tele lava o lo tatou faaaogaina o a tatou taleni, o le tele foi lena o taleni tatou te atinaeina. Afai e leai se mea tatou te faia i a tatou taleni, o le a aveesea. (Tagai i le Mataio 25:29; MFF 60:2–3.) Fesoasoani i tamaiti ina ia malamalama o tagata na e foliga mai e laitiiti taleni o loo iai o le a latou mauaina faamanuiaga uma pe afai latou te faaaogaina a latou taleni i le atoatoa.
O le a se mea e te manatu na taumafai Iesu e aoao mai e ala lea i le faamatalaina o le faataoto i taleni? Fesoasoani i tamaiti ina ia malamalama ua tuuina mai e le Alii ia i tatou ia taleni, o mea e mafai ona fai, ma avanoa (e pei o le auai i lana ekalesia). Na te faamoemoeina i tatou ina ia faaaogaina nei mea uma ina ia avea ai i tatou ma tagata lelei ma auauna atu i isi. E finagalo foi o ia ina ia tatou faaali atu lo tatou agaga faafetai e ala lea i le atinaeina o a tatou taleni.
O a nisi mea ua faamoemoeina e le Alii mai ia i tatou talu ai ona ua avea i tatou ma tagata o lana ekalesia? (MFF 82:3.)
E faapefea ona fetufaai e tagata a latou taleni i totonu o le Ekalesia? E faapefea ona fesoasoani le taliaina o tiutetauave ma tofiga i le Ekalesia e faateleina ai a tatou taleni? (Tagai i le gaoioiga e faamauoa mai ai lona 5.)
O afea ae o ai foi tatou te tuuina atu iai se lipoti e tusa ai ma mea na tatou faia i meaalofa ma taleni na tuuina mai ia i tatou? O le a se mea e te manao e lipoti atu? O le a sou lagona pe afai e saunoa atu le Alii ia te oe, “Le auauna lelei e ma le faamaoni” (Mataio 25:21)?

Gaoioiga e Faamauoa Ai

E mafai ona e faaaogaina se gaoioiga se tasi poo le sili atu foi o nei gaoioiga i soo se taimi o le lesona poo le avea o se toe iloiloga, aotelega, poo se lu’i.

Fai i tamaiti e tau mai ni taleni e mafai ona latou mafaufau iai; ia lisiina taleni i luga o le laupapa ao faalauina mai. Ia uunaiina tamaiti ina ia aofia ai ni uiga lelei e pei o se tagata faalogo lelei, alofa i isi, fiafia, ma isi mea faapena.
Tuu atu i tamaiti uma ni fasipepa ma ni penitala ma fai atu iai e fai se lisi a le tagata ia o a latou taleni. Fai atu iai e aua nei vaai isi tagata o le vasega i lana lisi. Ona fai atu lea i tagata o le vasega e tau mai se taleni mo tamaiti uma o le vasega. Ao faalauina mai taleni a tamaiti taitoatasi, ia fautua atu i tamaiti e faaopoopo soo se taleni e le o iai i lana lisi e tauina mai e isi tamaiti. Ona tuu atu lea o fesili nei:
- Afai e tauina mai e tagata o le vasega se mea e uiga ia te oe e le o iai i lau pepa, e mafai faapefea ona e atinaeina lena taleni?
- Afai e le tauina mai e tagata o le vasega se mea na e tusia i lalo, e mafai faapefea ona e atinaeina lena taleni?
Ia e luiina tamaiti taitoatasi ina ia filifili se tasi o ana taleni ma fuafua pe faapefea ona faalauteleina lona atinaeina poo lona faaogaina i le vaiaso a sau.
Faamatala le tala lenei mai ia Peresitene Heber J. Grant:

“Ina ua ou auai atu i se kalapu peisipolo, o tamaiti matou te tupulaga ma matutua teisi a’e e taaalo i le toaiva muamua [o tagata taaalo sili na ona lelei]; o i latou e laiti ifo ia te au e taaalo i le toaiva lona lua, ma isi e laiti ifo e taaalo i le toaiva lona tolu, ma o latou na matou te taaalo faatasi. O se tasi o mafuaaga o lea mea, talu ai ona e le mafai ona ou togiina le polo mai le isi tulaga i le isi tulaga. O le isi mafuaaga ona ou te le malosi e tamoe pe lelei foi la’u ta. A ou tago i le polo, e masani lava ona tauvalaau mai tamaiti: ‘Togi mai iinei lou vasi!’

“O au uo matou te tupulaga sa ula ia te au ma sa ou folafola o le a ou taalo peisipolo i le toaiva lea o le a manumalo i le siamupini i le Setete a Utah.

“… Sa ou faasaoina se tālā na ou teuina i le peisipolo. Na ou faaaluina le tele o itula i le togiina o le polo agai i le fale o le faatoaga a Epikopo Edwin D. Woolley… E masani ona tiga lo’u lima ma e tau le mafai ai ona ou moe i le po. Ae sa ou faaauau pea ona faataitai ma mulimuli ane sa faamanuiaina a’u i lo’u lavea ai i le toaiva lona lua a le matou kalapu. Mulimuli ane sa ou auai atu i se kalapu lelei, ma oo ai lava ina ou taalo i le toaiva lea na manumalo i le siamupini o le setete” (Mataupu o le Talalelei, i. 342–43).
O le upusii lenei mai ia Peresitene Heber J. Grant o se tasi lenei o faaupuga e fiafia tele o ia iai. Ia talanoaina faatasi ma tamaiti le uiga o lenei upusii, ma uunai i latou e tauloto.

“O mea tatou te mumusu e fai o le a avea ma mea faigofie ia te i tatou ona fai; e le o le natura o le mea o le a suia, peitai o lo tatou malosi e faia ai o le a faateleina” (Mataupu o le Talalelei, i. 201.)
Fai atu i tamaiti e mafaufau i nisi o tiute o loo tuuina atu i tagata i totonu o le Ekalesia. Tuu atu iai fasipepa ma penitala ma fai atu iai e tusi i lalo se tiute poo se tofiga (e mafai e tamaiti uma ona tusi i lalo ni tofiga e sili atu ma le tasi). Fai atu iai e tuu a latou fasipepa i totonu o se fagu poo se atigi pusa. Ona fai atu lea i tamaiti e auaua’i i le seiina i fafo o se fasipepa mai le pusa ma ta’u mai poo a taleni e mafai ona latou faia e ala i le faataunuuina o lea tofiga poo lea tiute. Ia lisiina taleni o loo tauina mai i luga o le laupapa ma vaai pe fia ni taleni eseese e mafai e tamaiti ona tauina mai.
Usu pe faitau upu o le “I’m Thankful to Be Me” (Tusipese a Tamaiti, i.— ).

Faaiuga

Molimau

Ia tuuina atu lau molimau i le fiafia e oo mai pe a tatou faaaogaina ia taleni ua tuuina mai e le Atua ina ia faamanuiaina ai i tatou. Ia fetufaai ma tamaiti lou matuai manao ina ia e lagonaina le olioli i le toe foi atu i le Tama Faalelagi o se tasi sa faaaogaina lelei au taleni.

Tusi Fautuaina e Faitau i le Fale

Ia fautuaina e suesue e tamaiti le Mataio 25:14–30 i le fale e fai ma toe faamanatu o lenei lesona.

Tofi se tamaititi e faia le tatalo faaiu.

Faaaliga: O se gaoioiga e faamauoa mai ai mo le lesona 27 e moomia ai le fesili atu i se tasi o le au peresitene o le Aualofa poo se tasi o le au epikopo e alu atu ma talanoa i tamaiti pe faapefea ona tuuina atu le auaunaga fesoasoani a le Aualofa. Afai e te manao e faaaogaina lenei gaoioiga, e tatau ona fesili mamao atu i le tagata ma faamatala atu iai le mea o loo manao ai ia te ia e talanoa iai.