lesona 19

O le Mamoe Na Se, o le Tupe na Leiloa, ma le Uii Faamaumau Oa

Faamoemoega

Ina ia fesoasoani i tamaiti ia maua le naunautaiga e faamalosia ai uso ua vaivai i gaoioiga a le Ekalesia a Iesu Keriso o le Au Paia o Aso e Gata Ai.

Sauniuniga

1. Suesue ma le agaga tatalo le Luka 15, Mataio 18:12–14, ma le Mataupu Faavae ma Feagaiga 18:10–11. Ona suesue lea o le lesona ma iloilo pe faapefea ona e manao e aoao atu le tala faatusi paia. (Tagai “Saunia o Au Lesona,” i. 0 [vi,] ma le “Aoao Atu Mai Tusitusiga Paia,” 0 [i. vii] ).

2. Filifili ia fesili e talanoaina ma gaoioiga e faamauoa mai ai lea o le a aafia ai tamaiti ma o le a sili ona fesoasoani ia i latou ia mauaina le faamoemoega o le lesona.

3. Mea e manaomia:

   1. Se Tusi Paia po o se Feagaiga Fou mo tamaiti taitasi.

   2. Ata 7–19, O le Leoleo Mamoe Lelei, ma le 7-20, O le Uii Faamaumau Oa (62155).

Faalautelega Fautuaina o le Lesona

Tofi se tamaitiiti e faia le tatalo amata.

Gaoioiga e Faatosina Mai Ai

Faamatala i tamaiti se taimi na leiloa ai sau meatotino taugata ona toe maua lea. Faamatala atu ina ia iloa e tamaiti le tau o lea mea, o ou lagona ina ua leiloa, o mea na e faia e sailia ai, ma lagona na oo ia te oe ina ua toe maua. Afai e talafeagai ai, e mafai ona e aumaia lea mea ina ia faaali atu i le vasega. Fai i tamaiti e faamatala mai ni mea na tutupu i o latou olaga ina ua leiloa se mea totino taua ma toe maua.

Tala Faatusi Paia

Faaaoga ata i taimi e tatau ai, aoao atu le faataoto i le mamoe na se, o le tupe na leiloa, ma le uii faamaumau oa. (Mo ala fautuaina e aoao atu ai le tala faatusi paia, tagai “Aoao Atu Mai Tusitusiga Paia,” i. 0 ( vii.) Faamatala atu i tamaiti o nei faataoto, e pei lava o le faataoto i le lulu saito ma le saito ma le titania, o lo o aoao atu ai le taua o aoaoga faavae o le talalelei.

Talanoaga ma Fesili e Faatatau I Ai

Suesue fesili ma mau o lo o taua i lalo a o e saunia lau lesona. Faaaoga fesili e te lagona o le a sili ona fesoasoani ai i tamaiti ia malamalama i mau ma faaaoga ai mataupu faavae i o latou olaga. O le faitauina faatasi ma tamaiti o mau i le vasega o le a fesoasoani latou te mauaina ai malamalamaaga i tusitusiga paia.

Talanoaga ma Fesili e Faatatau I Ai

1. O le Mamoe Na Se Ma Le Tupe Na Leiloa

   • Aisea na manatu mamafa ai le leoleo mamoe i le mamoe e tasi mai mamoe e selau po o le fafine ma le tupe e tasi mai tupe e sefulu? (Luka 15:4,8.) Faamatala atu sa matuai matitiva lava tagata, ma o le tupe e tasi po o le mamoe e tasi e matuai taua lava ia i latou. I le itu lava lea e tasi, o fanau uma a le Tama Faalelagi e matuai taua tele ia te ia. Aisea e te manatu ai e matuai taua lava i tatou taitoatasi i le Tama Faalelagi?

   • E te manatu aisea na leiloa ai le mamoe? E te manatu e faapefea ona leiloa le tupe? E sē faapefea i tatou po o se tagata foi tatou te masani ai? Fesoasoani i tamaiti ina ia malamalama o le leiloloa po o le sē, e mafai foi ona faatatau i tagata latou te lē o tausia tulafono ma o lo o faia foi ni tulaga e le mafai ai ona latou agavaa e toe foi atu i le Tama Faalelagi.

   • O le a le mea na fai e le leoleo mamoe i le mamoe na se ina ua toe maua? (Luka 15:5.) Sa faapea ona iloa i ana gaoioiga lona alofa i le mamoe? O ai o lo o suitulaga ai le leoleo mamoe? O ai o lo o suitulaga ai le mamoe?

   • O le a le mea na fai e le fafine ina ia maua ai le tupe na leiloa? (Luka 15:8.) O le a le mea na faia e Iesu Keriso e fesoasoani ai ia i latou ua sē ma lē tausia tulafono? (MFF 18:10–11.) E faapefea ona tatou fesoasoani atu ia i latou ua leiloloa pe ua sē?

   • O le a le mea na faia e le leoleo mamoe ma le fafine ina ua toe maua le mamoe ma le tupe? (Luka 15:6, 9.) O le a sou lagona pe afai e te fesoasoani atu i se tagata ina ia salamo ma toe foi mai ia Iesu Keriso?

   • Aisea e fiafia ai agelu i le lagi pe a salamo se tasi? (Luka 15:7, 10.)

2. O le Uii Faamaumau Oa

   • O le a le uiga o le faamaumau oa? (O le lē usiusitai ma le soona faaaoga ma le lē tatau.)

   • O le a le mea na faia e le uii faamaumau oa i lona tofi o le oa? (Luka 15:12–13.) O le a sou manatu i le uiga o le “soona ulavale”? E te manatu aisea e filifili ai isi tagata e ola faapea? E te manatu o a ni lagona sa oo i le tama ao toesea lona atalii? O a ni ou lagona pe afai e faapea se tasi o lou aiga? (Ia e nofouta i tamaiti o lo o i ai ni tagata o lo latou aiga e le o tausia tulafono.)

   • O a mea na faia e le uii faamaumau oa e maua ai ana meaai ina ua leai sana tupe? (Luka 15:14–16.)

   • O le a le uiga o le “ona atamai ai lea o ia”? (Luka 15:17.) E te manatu na faapefea ona fesoasoani mafatiaga ma faanoanoaga na oo i lenei atalii e salamo ai?

   • E te manatu aisea na filifili ai lenei alii e toe foi i lona tama? (Luka 15:17–19.) O le a le ituaiga matai e i ai lona tama? (Luka 15:17.)

   • O a ni lagona o le tama ina ua toe foi mai lona atalii? (Luka 15:20.) O le a le mea sa ia faia mo lona atalii? (Luka 15:22–24.)

   • O a ni lagona na oo i le uso matua ina ua ia iloa ua toe foi atu lona uso laititi? (Luka 15:28–30.) Aisea e taua ai le alofa pea i tagata o le aiga e le o tausia tulafono?

   • O le a le mea na folafola atu e le tama i le uso matua? (Luka 15:31.) O le a le faataitaiga na faia e le tama e faaalia mo tagata ua agasala ma ua salamo? (Luka 15:32.) O a ni ou lagona mo se tagata ua e vaaia ua salamo ma fulitua atu i le leaga? O a ni uiga tatou te faaalia mo tagata e le o tausia tulafono ae ua matua lagona le faanoanoa moni?

Gaoioiga e Faamauoa Ai

E mafai ona e faaaogaina se tasi pe sili atu foi o nei gaoioiga i soo se taimi o le lesona pe faaaoga foi o se toe iloiloga, otootoga, po o se lu’i.

1. Tuu atu i tamaiti e mafaufau i auala e mafai ona fesoasoani atu ai i tamaiti e le toaaga. (O tali e mafai ona aofia ai le faauo atu, avea ma se faataitaiga lelei, valaauliaina o i latou i gaoioiga a le Ekalesia, faia faatasi o gaoioiga, ma isi mea.)

2. Faamatala atu le tala lenei:

   O Iosua Tenisi e sefulu tausaga le matua, na o atu ma lona tama ma isi e suesue se maina tele lava. Sa matuai faaeteete lava o ia i le maina ma ua avea ma mea e eseese ai ma le isi au alii ma leiloa ai i le pogisa e aunoa ma se vai po o se meaai. Ina ua iloa e isi ua sē o ia, sa latou sailia vave loa lava. I se taimi mulimuli ane, sa o mai le toa selau o tagata e saili Iosua. O le afe o isi tagata sa anapopogi ma tatalo ina ia maua o ia i se tulaga saogalemu. Sa sailia o ia e tagata mo aso e lima, ae le i maua lava. Sa logotala i ai se tagata poto masani i mea tau maina, ma ia ofoina mai se fesoasoani. Sa ia iloa lelei le maina ma sa ia mauaina Iosua i se nofoaga e leiloa e le tele o isi. Ina ua ia mauaina Iosua, sa le mafai ona ia faamatala le fiafia sa ia mauaina. O tagata uma sa i le maina ma le afe o isi o tagata sa fetagisi ma le fiafia, ina ua latou mauaina Iosua o lo o saogalemu lelei (mai le “Faia o Uo: Iosua Tenisi—O le Oloa o le Faatuatua,” Friend, Nov. 1990, pp. 20–22).

   Talanoaina le eseesega o le sē faaleagaga ma le sē faaletino. Faamatala atu e tatau ona tatou galulue malosi e faasaoina i latou o lo o leiloloa pe sē faaleagaga e pei foi ona faia ia i latou e leiloloa pe sē faaletino.

3. Taaalo i le Saili ma Maua. Fai atu i tamaiti e mafaufau i se nofoaga e mafai ona ia se ai ona tusia lea i luga o se fasipepa pe musumusu atu foi i le faiaoga. Tuu atu i isi tamaiti e fesili atu i fesili e tali i le “ioe” ma le “leai” e faailoa ai le nofoaga o lo o i ai le tamaitiiti (O i se nofoaga tumutumu? O i totonu o atumauga? Pe o i lalo o se isi mea?). Fesoasoani i tamaiti ina ia malamalama e faigata ona maua se tasi ua sē, aemaise lava se tasi ua sē faaleagaga.

4. Fesoasoani i tamaiti e tauloto le Mataupu Faavae ma Feagaiga 18:10.

Faaiuga

Molimau

Faamatala i tamaiti lou talitonuga e alofa le Tama Faalelagi i ana fanau ma e taua i tatou ia te ia. Faamamafa atu o lo o finagalo le Tama Faalelagi ma Iesu Keriso ina ia tatou fesoasoani atu ia i latou ua sē ina ia toe foi mai ia i laua.

Mau Fautuaina e Faitau i le Fale

Fautua atu i tamaiti e suesue le Luka 15:11–32 i le fale e fai ma toe faamanatu o lenei lesona.

Tofi se tamaitiiti e faia le tatalo faaiu.