Ua Faamama e Iesu Keriso le Malumalu

Faamoemoega

Ina ia fesoasoani i tamaiti ia latou lagonaina le alofa tele ma le faaaloalo mo le Tama Faalelagi ma Iesu Keriso ma nofoaga paia.

Sauniuniga

Suesue ma le agaga tatalo le Ioane 2:13–16, Mataio 21:12–14, Luka 19:45–48, ma le Esoto 20:7. Ona suesue lea o le lesona ma iloilo pe faapefea ona e manao e aoao atu le tala faatusi paia (tagai “Saunia o Au Lesona,” i.0 [vi], ma le ”Aoao Atu Mai Tusitusiga Paia,” i. 0 [vii] ).
Tusi faitau faaopoopo: Mareko 11:15–17.
Filifili ia fesili e talanoaina ma gaoioiga e faamauoa mai ai lea o le a aafia ai tamaiti ma o le a sili ona fesoasoani ia i latou ia mauaina le faamoemoega o le lesona.
Mea e manaomia:
1. Se Tusi Paia po o se Feagaiga Fou mo tamaiti taitasi.
2. Fasipepa o upu nei:
  
  E mafai ona tatou faaalia lo tatou alolofa ma le faaaloalo mo le Tama Faalelagi ma Iesu i le:
  
  Faaaloalo i le Peraimeri ma le sauniga faamanatuga.
  
  Gagana tatou te faaaogaina pe a tatou tatalo.
  
  Faiga o o tatou lavalava.
  
  O a tatou amioga.
  
  O mea tatou te tautala ai.
3. Ata 7–9, Iesu O Loo Faamama le Malumalu (Taga Ata o le Talalelei 224; 62163).

Faalautelega Fautuaina o le Lesona

Tofi se tamaitiiti e faia le tatalo amata.

Gaoioiga e Faatosina Mai Ai

Tusi se laina faalava i luga o le laupapa. Tusi le upu FAAALOALO i luga a’e o le laina, ae tusi le upu LE FAAALOALO i lalo ifo o le laina. Fai i tamaiti e faafoliga faapea o loo sau se uo i lo latou fale. Fai i ai o le a e tusia se “laina faaaloalo” i luga o le laupapa. Faamalau i ai mea e faia e le uo (tagai i lalo ifo), ae filifili le vasega pe o faaalia e le uo le faaaloalo po o le lē faaaloalo mo oe i le tou aiga. Tusi se laina e faaauau pea lona fesopoai i le laina faalava i luga o le laupapa, e alu agai i luga mo mea e faaalia ai le faaaloalo ae alu agai i lalo mo mea e faaalia ai le lē faaaloalo. Faaaoga tulaga e pei o mea o loo ta’ua i lalo:

O le uo:

Gaoioiga e Faatosina Mai Ai

Nofonofo filemu lava i fafo seiloga ua valaaulia i totonu.
Savali atu i totonu ma vae palapala.
Faafetai atu ia te oe mo le valaaulia e sau.
Faataio ma ee leotele i le tou fale.
Faafeiloai atu i ou matua ma le faaaloalo.
Faafitafita atu e aumai se meaai.
Taulimaina ma le faaeteete au mea.
E le fia tautala i ou matua pe a talanoa atu.
Valaaulia oe e te tafao atu i lo latou fale.

E tatau ona foliga faapea lau “laina faaaloalo.”

Ata

respect line

Fai i tamaiti e tali ifo lava e le tagata ia i fesili nei:

Gaoioiga e Faatosina Mai Ai

A e asiasi i le fale o lau uo, o a foliga o lau “laina faaaloalo?”
A e sau i le Peraimeri, o a foliga o lau “laina faaaloalo?”
A e nofo i lou fale, o a foliga o lau “laina faaaloalo?”

Tala Faatusi Paia

Aoao tala e uiga ia Iesu o loo faamama le malumalu i Ierusalema. O le tala o le faamamaina muamua o loo i le Ioane 2:13–16. O le tala lona lua, pe toeitiiti atoa le tolu tausaga mulimuli ane ma ni nai aso a o lumanai le faasatauroina o le Faaola, o loo i le Mataio 21:12–14 ma le Luka 19:45–48. (Mo auala fautuaina e aoao atu ai tala faatusi paia, tagai i le “Aoao Atu Mai Tusitusiga Paia,” i. vii.) A o e aoaoina atu nei tala, fai i tamaiti e fesili ifo lava le tagata ia pe o a lagona o Iesu e uiga i le Tama Faalelagi ma le malumalu. Fesoasoani i tamaiti ia malamalama o lenei malumalu, o se nofoaga paia, e pei lava o o tatou malumalu ma falelotu o aso nei, ma e finagalo Iesu ina ia tatou faaaloalo i nei nofoaga paia.

Talanoaga ma Fesili e Faatatau I Ai

Suesue fesili ma mau o loo taua i lalo a o e saunia lau lesona. Faaaoga fesili e te lagona o le a sili ona fesoasoani ai i tamaiti ia malamalama i mau ma faaaoga ai mataupu faavae i o latou olaga. O le faitauina faatasi ma tamaiti o mau i le vasega o le a fesoasoani latou te mauaina ai malamalamaaga i tusitusiga paia.

Talanoaga ma Fesili e Faatatau I Ai

O a mea na maua atu e Iesu tagata o fai i le malumalu? (Ioane 2:14.)
Aisea na tutuli ese ai e Iesu tagata fefaatauai ma e na faatau tupe mai le malumalu? O le a le tala na fai atu e Iesu ia i latou na? (Ioane 2:16; Mataio 21:13; Luka 19:45–46.)
O le a le mea na faia e Iesu i le malumalu ina ua uma ona ia tutuliina i latou i fafo? (Mataio 21:14; Luka 19:47.)
Mata o le a le mea e taua ai lou faaaloalo i nofoaga paia e pei o aiga, malumalu, ma fale o le ekalesia? O ai lea tatou te faaalia i ai lo tatou faaaloalo?

Talanoaina le taua o le faaaloalo i nofoaga ua uma ona faapaiaina mo le Alii. Fesoasoani i tamaiti ia malamalama o le faaaloalo o le matua faamamaluina ma le alofa.

Talanoaga ma Fesili e Faatatau I Ai

O ai lea na faaali i ai le alofa ma le faaaloalo o Iesu ina ua ia tutulieseina tagata faatau tupe? (Ioane 2:16.) Aisea na ia faia ai lenei mea?
E mafai faapefea ona faaalia lo tatou alofa ma le faaaloalo mo le Tama Faalelagi ma Iesu i le lotu? i le fale? i le aoga? i taaloga?

Faapipii auauai fasipepa o upu. Talanoaina ma tamaiti auala e faaalia ai le alofa ma le faaaloalo mo le Tama Faalelagi ma Iesu. Ia faaaofia ai ma manatu o loo i lalo:

Talanoaga ma Fesili e Faatatau I Ai

A tatou faaaloalo i le taimi o le faamanatuga, ua tatou faaalia lo tatou alolofa ma le faaaloalo mo Iesu ma feagaiga ua tatou faia ma le Tama Faalelagi.
Pe a tatou faalogologo i tautalaga i le sauniga faamanatuga ma tatou faaaloalo i le Peraimeri, e tele atu mea tatou te aoaoina e uiga i le Tama Faalelagi ma Iesu ma mea o loo finagalo tatou te faia.
A tatou tatalo faalelei, ua tatou faaalia le faaaloalo mo le Tama Faalelagi.
A lelei le faiga o o tatou lavalava, ua tatou faaalia lo tatou faaaloalo i o tatou tino o ni foafoaga paia a le Tama Faalelagi.
A tatou faia amioga e finagalo ai le Tama Faalelagi ma Iesu, ua tatou faaalia tatou te talitonu ia te i laua ma e taua lo tatou faia o mea ua poloaiina ai i tatou.
A tatou faaaogaina le suafa o le Alii ma le faaaloalo ma lē faaaoga seseina, ua tatou faaalia i isi lo tatou faaaloalo ma le alolofa mo ia.

Gaoioiga e Faamauoa Ai

E mafai ona e faaaogaina se tasi pe sili atu foi o nei gaoioiga i soo se taimi o le lesona pe faaaoga foi o se toe iloiloga, otootoga, po o se lu’i.

Ia tauloto e tamaiti le Esoto 20:7. Faamatala ma talanoaina le mea na tupu, lea na faamatalaina e Peresitene Spencer W. Kimball, ma fesoasoani i tamaiti ia latou faia se tautinoga e tausia lenei poloaiga taua.

“I se tasi aso i le falemai, sa tosoina atu ai au e se tasi tagata i totonu o le potu tipitipi, ma sa see lona vae, ma ua ita ai o ia ma lafoina ai ni upu mamafa, ma o ia lava upu sa ta’ua ai le suafa o le Faaola. E ui lava ina lagona lo’u mafatia, ae sa ou tei ma ou faapea atu: ‘Faamolemole! Faamolemole! O le suafa lena o lo’u Alii ua e upuvale i ai.’ Sa matua filemu o ia; sa musumusu mai o ia i se leo faapenei, ‘Faamolemole faamagalo mai.’ Ua galo ia te ia i lena taimi, ua uma ona tuuina mai e le Alii se poloaiga malosi i lana fanau uma, ‘Aua e te tau fua le suafa o Ieova lou Atua; aua e le faasaoina e Ieova o le tau fua i lona suafa’ (Esoto 20:7)” (“Saunoaga a Peresitene Kimball e Faasaga i le Upuvale.” Liahona, Setema 1981, i. 1)
Ao mai ni ata o ni malumalu ma ni falelotu eseese. Tusi igoa o malumalu ma falelotu i ni fasipepa eseese, ona fai lea i tamaiti e faafetaui igoa ma ata. Toe fai i ai e faafetaui igoa ma ata a o e faamatalaina pe fesoasoani faapefea nei fale i le Alii e faalautele lana galuega i le fogaeleele.
Faamatala lagona na e maua ina ua e auai atu i le malumalu, pe valaaulia se tasi i la outou uarota po o le paranesi e faamatala ona lagona e uiga i le malumalu. Fesoasoani ia iloa e tamaiti le paia tele o le malumalu ma o i latou e ulu atu i ai, e mafai ona latou faalogoina le latalata atu i le Alii iina. Talanoaina mea e mafai e tamaiti ona fai i o latou olaga ina ia agavaa ai e ulu atu i le malumalu.
Tufatufa ia tofu tamaiti ma le fasipepa ma le penitala. Fai i ai e tusi i lalo ala patino e mafai ona latou faaalia ai le alofa, faamamalu, ma le faaaloalo mo le Tama Faalelagi ma Iesu Keriso i le vaiaso a sau. Faatonu e tuu a latou lisi i se mea e mafai ona latou vaavaai soo i ai.
Tusi se isi “laina faaaloalo” i luga o le laupapa a o tuuina atu e tamaiti faataitaiga o gaoioiga po o amioga e faaalia ai le faaaloalo po o le lē faaaloalo i fale o le ekalesia.

Lu’i

Toe vaai i le “laina faaaloalo” ma fai i tamaiti e tatau ona iai ni a latou “laina faaaloalo” mo a latou fegalegaleaiga ma le Tama Faalelagi ma Iesu Keriso. Ia lu’i tamaiti ina ia faatumauina le laina i luga e ala i le faaalia o lo latou alolofa ma le faaaloalo mo le Tama Faalelagi ma Iesu i mea uma latou te faia.

Faaiuga

Molimau

Faamatala atu ou lagona faaaloalo e uiga i le Tama Faalelagi ma Iesu Keriso ma lou manao e faaalia le alofa, faamamalu, ma le faaaloalo mo i la’ua e ala i le ituaiga olaga e te ola ai.

Tusi Fautuaina e Faitau i le Fale

Ia fautuaina e suesue e tamaiti le Mataio 21:12–14 i le fale e fai ma toe faamanatu o lenei lesona.

Tofi se tamaitiiti e faia le tatalo faaiu.