Lesona 44

O Paulo le Faifeautalai

Faamoemoega

Ia uunaiina tamaiti taitoatasi ia saunia i le taimi nei e avea ma se faifeautalai e talai atu le talalelei i isi.

Sauniuniga

1. Suesue ma le agaga tatalo le Galuega 22:17–30; 23:10–24, 31–33; ma le 26:1–2, 22–29. Ona suesue lea o le lesona ma iloilo pe faapefea ona e manao e aoao atu le tala faatusi paia. (Tagai “Saunia o Au Lesona,” itulau 0 [vi,] ma le “Aoao Atu Mai Tusitusiga Paia,” itulau 0 [vii].)

2. Tusi Faitau Faaopoopo: Galuega 19–26 (mo le faamatalaga atoa.)

3. Filifili ia fesili e talanoaina ma gaoioiga e faamauoa mai ai lea o le a aafia ai tamaiti ma o le a sili ona fesoasoani ia i latou ia mauaina le faamoemoega o le lesona.

4. Mea e Manaomia:

   1. Se Tusi Paia po o se Feagaiga Fou mo tamaiti taitasi.

   2. O le siata o loo faamatala i le gaoioiga e faatosina mai ai (po o lou tusiina foi i luga o le laupapa.

Faalautelega Fautuaina o le Lesona

Tofi se tamaitiiti e faia le tatalo amata

Gaoioiga e Faatosina Mai Ai

Ia fesili atu i tamaiti po o le a se mea latou te manatua e uiga ia Paulo mai Lesona ua mavae. (Ia faamanatu ia i latou sa suia lona igoa mai ia Saulo.) Ia faamanatu atu foi i tamaiti sa valaauina Paulo e le Alii e avea ma se faifeautalai atoa ma se molimau faapitoa e uiga ia Iesu Keriso (tagai Galuega 13:2; 20:24). Sa faaaluina e ia le vaega na totoe o lona olaga e auauna atu ai o se faifeautalai.

Afai o ia te oe se Taiala i Tusitusiga Paia, ia sue ane e tamaiti le faafanua 18–22 ma ia faasolo o latou tamatamailima i mea na femalagaai ai Paulo a o avea ma se faifeautalai. (Fesoasoani i tamaiti i le faaleoga o igoa o nofoaga.) Ia faamatala atu ina ua liua Paulo, sa na o se vaega o tagata Iutaia i Ierusalema ma nofoaga taulalata ane sa faalogo ia Iesu Keriso. O malaga e fa faafaifeautalai a Paulo na oo atu ai o ia i tagata Iutaia e faapea foi i tagata o nuu ese (o i latou ia sa le avea o ni tagata Iutaia) i le tele o atunuu. Sa leiloa e nei tagata o nuu ese se mea e uiga i le Tama Faalelagi ma Iesu Keriso. Sa tapuai i latou i atua ese ma ifo i tupua. Soo se mea sa alu atu i ai Paulo sa ia talaiina le talalelei a Iesu Keriso.

Ia tusia se ata e pei o lea o lo o i lalo i luga o le laupapa po o se pepa lautele:

stairs

Gaoioiga e Faatosina Mai Ai

• Pe sa faapefea ona saunia Paulo e avea ma faifeautalai?

Ia tusi tali a tamaiti i laasaga e amata mai ia Paulo seia oo i le Faifeautalai. Ia mautinoa ua aofia ai manatu e pei o le salamo, talitonu ia Iesu Keriso, sa papatisoina, maua le meaalofa o le Agaga Paia, aoao i le talalelei, ma ola i le talalelei.

Tala Faatusi Paia

Ia aoao atu i tamaiti le tala e uiga i le mea na oo ia Paulo ina ua uma lana malaga faafaifeautalai lona tolu. (Mo ala fautuaina e aoao atu ai tala faatusi paia, tagai “Aoao Atu Mai Tusitusiga Paia,” itulau vii.) Ia faamatala atu o le asiasiga mulimuli lenei a Paulo i Ierusalema, ma ao i ai o ia iina sa mananao tagata Iutaia o e sa le talitonu ia Iesu e fasiotia o ia. Talu ai ona o ia o se tagata nuu Roma, o le mea lea na liliu atu ai o ia i taitai Roma i Ierusalema ma Kaisaria mo se puipuiga. Sa latou puipuia o ia e ala i le avea o ia ma se pagota o Roma ma sa mulimuli ane ona latou auina atu lea o ia i Roma mo lona faamasinoga. (O le tala e uiga i le malaga a Paulo i Roma o le a aoaoina i le lesona e 45.) Ia faamatala atu e ala i mea faigata uma sa oo ia te ia, sa faaaoga e Paulo avanoa uma e molimau atu ai e uiga ia Iesu Keriso.

Talanoaga ma Fesili e Faatatau i Ai

Suesue fesili ma mau o lo o taua i lalo a o e saunia lau lesona. Faaaoga fesili e te lagona o le a sili ona fesoasoani ai i tamaiti ia malamalama i mau ma faaaoga ai mataupu faavae i o latou olaga. O le faitauina faatasi ma tamaiti o mau i le vasega o le a fesoasoani latou te mauaina ai malamalamaaga i tusitusiga paia.

Talanoaga ma Fesili e Faatatau i Ai

• Aisea na ita ai tagata Iutaia ia Paulo? (Galuega 22:17–21.) Fesoasoani atu i tamaiti ina ia malamalama sa molimau atu Paulo e uiga i le faaaliga mai ia Iesu Keriso i tagata o e sa le i talitonu ia Iesu. Aisea na le afaina ai Paulo? (Galuega 22:24–29.)

• Sa faataga e le alii e pule i au Paulo ina ia toe alu atu i luma o tagata Iutaia ina ia faamatala atu ai ia lava, ma sa toe taumafai foi tagata Iutaia e toe fasiotia o ia ona o lana molimau. (Galuega 23:10.) Pe na faapefea ona faaalia e Paulo le lototele ma le faatuatua i lea taimi o sauaga? O le a se lagona e ono oo ia te oe pe ana faapea o lo o e i ai i le tulaga o Paulo?

• Sa faapefea ona faamafanafana e le Alii Paulo? (Galuega 23:11.) O le a sou manatu e uiga i le lagona na oo ia Paulo ina ua ia iloa o le a le fasiotia o ia? Pe faapefea ona faamafanafana le Alii ma faamanuia i faifeautalai o aso nei?

• Pe sa faapefea ona fuafua tagata Iutaia e fasioti Paulo? (Galuega 23:14–15.) O ai na faasaoina Paulo mai lea fuafuaga? (Galuega 23:16.) Pe sa faapefea ona fesoasoani le alii e pule i au ia Paulo ina ia sola ese mai tagata Iutaia? (Galuega 23:22–24.) Aisea ua e manatu ai sa puipuia e le Alii Paulo?

Ia faamatala atu o Filiki, le kovana Roma, na ia tuuina Paulo i le falepuipui i Kaisaraia mo le lua tausaga seia oo ina avea Feso ma kovana fou. Sa talosaga Paulo ina ia faia lona faamasinoga i Roma, peitai a o le i malaga atu i Roma sa ia tauina atu ia Feso ma le Tupu o Akeripa le tala e uiga i lona liua ma sa ia molimau atu e uiga ia Iesu Keriso.

Talanoaga ma Fesili e Faatatau i Ai

• O le a se lagona sa ia Paulo i lona talanoa atu i le Tupu o Akeripa? Aisea? (Galuega 26:1–3.) O le a le mea na ia aoao atu i le Tupu ma Feso? (Galuega 26:22–23.)

• O le a se uiga na faaalia e Feso e tusa ma le molimau a Paulo? (Galuega 26:24.) O le a se mea na faia e le Tupu o Akeripa? (Galuega 26:28.) O a pogai na i ai i le Tupu o Akeripa ina ua le talia atoatoa le molimau a Paulo ma avea o se Kerisiano? O a nisi o mea e puipuia ai tagata mai le talia o le talalelei i aso nei?

• O le a le mea na tuuina atu ai ia Paulo le lototele e talai i le Tupu ma le kovana? Ia toe faamanatu atu i tamaiti na valaauina Paulo e avea ma molimau faapitoa ia Iesu Keriso ma sa faaaoga e ia avanoa uma e molimau atu ai e uiga ia te ia. O le a le taimi e mafai ona fetufaai atu ai i isi lau molimau e uiga ia Iesu? Pe mafai faapefea ona e saunia i le taimi nei e avea ma se faifeautalai?

Ia talanoaina upusii o lo o i lalo mai ia Peresitene Ezra Taft Benson:

“Tama o le Peraimeri, ia fuafua ma tulimatai atu e faia se misiona mo le alii. O outou teineiti, ia saunia e avea ma faifeautalai pe afai e valaauina outou” (In Conference Report, Apr. 1989, p. 104; or Liahona, Iulai 1989 i. 84.)

“Ioe … ia saunia nei [i le taimi a o iva, sefulu po o le sefulutasi tausaga le matutua]. Ia saunia e outou outou lava i le faaletino, mafaufau, va fealoai, ma le faaleagaga. Ia usitai e le aunoa i e ua pule. Amata se teugatupe faasao mo lau misiona pe afai e te le i faia lea mea. Ia totogi lau sefuluai, ma ia saili se molimau e uiga i le talalelei e ala i le suesue ma le tatalo” (In Conference Report, Apr. 1985, p. 49; or Liahona, Iulai 1985, i. 34.)

Talanoaga ma Fesili e Faatatau i Ai

• O a laasaga ua uma ona e faia e saunia ai oe e talai atu le talalelei? O a laasaga e mafai ona e faia i le lumanai?

Ia tusi se isi ata i luga o le laupapa po o se pepa lautele e tai pei o lea na e faaaogaina i le gaoioiga e faatosina mai ai, ma ia tusia le upu Oe i le mea o lo o tusia ai le igoa o Paulo. Ia tusi tali a tamaiti i luga o laasaga e amata mai ia te Oe seia oo i le Faifeautalai. Ia mautinoa ua aofia ai manatu e pei o le talitonu ia Iesu, ia papatisoina, ia maua le mea foai fua o le Agaga Paia, maua le perisitua (tama), aoao le talalelei, suesue i tusitusiga paia, tatalo, alu i le lotu, ma ia ola i le talalelei i le aiga, i le aoga, po o soo se mea lava e te i ai.

Talanoaga ma Fesili e Faatatau i Ai

• O a taleni po o tomai e mafai ona e faatupuina atili i le taimi nei o le a fesoasoani ia te oe e avea ai ma se faifeautalai sili atu ona lelei mo le Alii?

• Aisea ua taua faapitoa ai le suesue i tusitusiga paia i le sauniuni atu e talai le talalelei?

Ia tau atu faataitaiga e uiga i le auala e saunia ai na fesoasoani ia te oe po o se isi tagata ua e iloa e talai atu ai le talalelei. Ia uunaiina tamaiti ina ia faamatala atu tulaga na oo i ai na maua ai e i latou po o o latou aiga ni avanoa e aoao ai i isi e uiga i le talalelei. Afai e i ai ni tagata o lau vasega o e na liliu mai, atonu e te manao e faamatala mai e i latou ia le auala na fesoasoani ai faifeautalai po o isi ia i latou e aoao le talalelei ma maua se molimau.

Gaoioiga e Faamauoa Ai

E mafai ona e faaaogaina se tasi po o le sili atu foi o nei gaoioiga i soo se taimi o le lesona pe faaaoga foi o se toe iloiloga, otootoga, po o se lu’i.

1. Ia tufa atu i tamaiti taitoatasi se fasipepa ma se penitala ma ia tusi e i latou ata o ni fetu. Ia tusi e i latou o latou igoa i le pito i lalo ma le upu Faifeautalai i le pito i luga. Ia tusi e i latou laasaga ua latou faia ma o le a latou faia e saunia ai e avea ma ni faifeautalai.

2. Ia saunia se kopi mo tamaiti taitoatasi o le folafolaga a le Alii i faifeautalai e pei ona maua i le Mataupu Faavae ma Feagaiga 84:88. Ia talanoaina lenei folafolaga faatasi ma tamaiti ma uunaiina i latou e faapipii lea folafolaga i o latou fale.

3. Usu pe faitau faatasi upu o le pese “Talosia Ia Valaauina Au e Fai Se Misiona”, Tusipese a Tamaiti, itulau, 0), “Tofia e Auauna”, (Tusipese a Tamaiti, itulau, 0), po o le “Matou te Aumaia le Upu Moni i le Lalolagi,” (Tusipese a Tamaiti, itulau, 0).

Faaiuga

Molimau

Ia tuuina atu lau molimau e finagalo le Tama Faalelagi ma Iesu ina ia saunia tamaiti i le taimi nei e talai atu le talalelei. Ia faaali atu ou lagona e faapea o ala sili ona lelei e mafai ona latou faia ai lenei mea o le ola lea i le talalelei a Iesu Keriso i aso taitasi.

Tusi Fautuaina e Faitau i le Fale

Ia fautuaina e suesue e tamaiti le Galuega 23:10–24, 31–33 i le fale e fai ma toe faamanatu o lenei lesona.

Tofi se tamaitiiti e faia le tatalo faaiu.