Tusi Lesona ma le Taimi o Fetufaaiga a le Peraimeri
Lesona 20: O Le Faataoto i le Samaria Agalelei

Lesona 20

O Le Faataoto i le Samaria Agalelei

Faamoemoega

Fesoasoani i tamaiti ina ia latou maua le naunautai e faaali atu ai lo latou alolofa i tagata uma.

Sauniuniga

  1. Suesue ma le agaga tatalo le Luka 10:25–37 ma le Mataio 22:34–40. Ona suesue lea o le lesona ma iloilo pe faapefea ona e manao e aoao atu le tala faatusi paia. (Tagai “Saunia o Au Lesona,” i. 0 [vi,] ma le “Aoao Atu Mai Tusitusiga Paia,” i.0 [vii] ).

  2. Tusi Faitau Faaopoopo: Ioane 14:15, 21; 1 Ioane 4:20–21; ma le “Faitaulaga” ma le “Sa Levi” i le Taiala mo Tusitusiga Paia.

  3. Filifili ia fesili e talanoaina ma gaoioiga e faamauoa mai ai lea o le a aafia ai tamaiti o le a sili ona fesoasoani ia i latou ia mauaina le faamoemoega o le lesona.

  4. Mea e manaomia:

    1. Se Tusi Paia po o se Feagaiga Fou mo tamaiti taitasi.

    2. Ata 7–21, O le Samaria Agalelei (Taga Ata o le Talalelei 218; 62156), ma le 7-22, Faafanua o le Nofoaga Paia.

Faalautelega Fautuaina o le Lesona

Tofi se tamaitiiti e faia le tatalo amata.

Gaoioiga e Faatosina Mai Ai

Valaau i se tamaitiiti ma fesili atu, “(Ta’u le igoa), o ai lou tuaoi?” Fesili atu i isi tamaiti i le fesili lava lea e tasi. Faamatala atu e masani ona tatou mafaufau i o tatou tuaoi i e o lo o nonofo i o tatou autafa. O lenei lesona o le a fesoasoani ia i tatou ina ia tatou malamalama i mea na aoao mai e Iesu e uiga i o tatou tuaoi ma ala tatou te faaalia ia i latou.

Tuu atu i se tamaitiiti e faitau le Mataio 22:34–40. Talanoaina le taua o le i ai o le alofa mo isi.

Tala Faatusi Paia

Faaali atu le ata O le Samaria Agalelei ma le Faafanua O le Nuu Paia. Aoao atu le faataoto i le Samaria Agalelei o lo o i le Luka 10:25–37. (Mo ala fautuaina e aoao atu ai le tala faatusi paia, tagai i le “Aoao Atu Mai Tusitusiga Paia,” i. 0 (vii.) Faasino i tamaiti Samaria ma Iutaia i luga o le faafanua, ma faamatala atu le tulaga i le va o tagata Iutaia ma tagata Samaria. Sa manatu tagata Iutaia e sili atu i latou nai lo Samaria. Latou te le fiafia tele i tagata Samaria, ma a malaga tagata Iutaia mai Ierusalema i Kalilaia, latou te uia le auala umi e ui atu i le Vanu o Ioritana nai lo le ui atu i Samaria. Atonu e te manao e faatino e tamaiti lenei tala faatusi paia.

Talanoaga ma Fesili e Faatatau I Ai

Suesue fesili ma mau o lo o taua i lalo a o e saunia lau lesona. Faaaoga fesili e te lagona o le a sili ona fesoasoani ai i tamaiti ia malamalama i mau ma faaaoga ai mataupu faavae i o latou olaga. O le faitauina faatasi ma tamaiti o mau i le vasega o le a fesoasoani latou te mauaina ai malamalamaaga i tusitusiga paia.

Talanoaga ma Fesili e Faatatau I Ai

  • O le a le mea na fetalai mai Iesu e tatau ona tatou faia ina ia tatou maua ai le ola e faavavau? (Luka 10:27–28.) Aisea e te manatu ai e matua taua tele nei tulafono? (Mataio 22:37–39.)

  • E mafai faapefea ona faailoa atu lo tatou alolofa i le Tama Faalelagi ma Iesu? (Ioane 13:34–35; 14:15, 21.)

  • O ai lou tuaoi? E te manatu o lo o faatatau e Iesu lea vaega na o tagata o lo o nofo latalata ia te oe?

  • O a fesili na tali e Iesu ao ia faamatala atu le faataoto i le Samaria Agalelei? (Luka 10:25, 29.)

  • E te manatu aisea na le fesoasoani ai le Sa Levī ma le Faitaulaga i le Iutaia sa mafatia? (Luka 10:31–32.)

  • O le a le mea na fai e le Samaria i le tagata Iutaia sa manua? (Luka 10:33–35.)

  • Aisea na taua ai le fesoasoani a le Samaria i le tagata Iutaia? O le a se uiga o se tuaoi lelei sa i le Samaria? E faapefea ona fesoasoani lenei tala ia i tatou ina ia tatou malamalama po o ai o tatou tuaoi? E faapefea ona avea i tatou ma tuaoi sili atu ona lelei?

  • O ai e te manatu sa sili ona alofa i le Alii–o le faitaulaga, Sa Levī po o le Samaria? Aisea?

  • E faapefea ona tatou mulimuli i aoaoga a Iesu ma faaali atu lo tatou alolofa i isi? O a ni uiga tatou te faaali atu i nisi o lo o manaomia la tatou fesoasoani? se tasi e ese mai ia i tatou? o se tasi sa le agalelei mai ia i tatou?

Fai atu i tamaiti e faaali mai ni mea na tutupu ia i latou ina ua latou auauna atu i nisi sa moomia la latou fesoasoani po o lo latou mauaina po o le mauaina foi e o latou aiga ao fesoasoani mai isi. Faaeteete ina ia aua nei faaalia mai e tamaiti ni tala e ono faamãina ai nisi o le uarota.

Talanoaga ma Fesili e Faatatau I Ai

  • Pe a e faaalia lou alofa i isi e ala i lou fesoasoani ma auauna atu ia i latou, o a ni ou lagona? Pe ete lagona ai lou latalata atili i le Tama Faalelagi ma Iesu? O le a le faamanuiaga sili tatou te maua pe a tatou alolofa moni i le Tama Faalelagi ma o tatou tuaoi? (Luka 10:25–28.)

Gaoioiga e Faamauoa Ai

E mafai ona e faaaogaina se tasi pe sili atu foi o nei gaoioiga i soo se taimi o le lesona pe faaaoga foi o se toe iloiloga, otootoga, po o se lu’i.

  1. Ia tusia i lalo gaoioiga nei i ni fasipepa. Tusi i lalo le vaega A ma le E i le fasipepa e tasi, ma ia tuuina atu i tamaiti taitasi. Tuu atu i tamaiti ina ia faataitai faapea o se tamaitiiti fou ua nofo i lo outou tuaoi. O le vaega A o le pepa e faamatala mai ai se mea e mafai ona latou faia e avea ai o se tuaoi ma faaali atu lo latou alofa i lenei tamaitiiti fou. O le vaega E e faaali mai ai le auala e faaali atu ai le alofa i le Tama Faalelagi. Fai atu i le tamaitiiti 1 e faitau mai lana gaoioiga, ona sosoo ai lea ma le 2, ma faapena ona faaauau.

      1. Asiasi i lona aiga.

      2. Auai atu i le Peraimeri ma isi sauniga a le Ekalesia.

      1. Valaaulia o ia i lou fale.

      2. Ia avea lou aiga o se nofoaga e maua ai le Agaga o le Tama Faalelagi.

      1. Aoao se mea e uiga ia te ia.

      2. Faitau Tusitusiga Paia.

      1. Talanoa ma ia.

      2. Tatalo.

      1. Faia se mea lelei mo le tamaitiiti.

      2. Tausi Poloaiga.

      1. Faia se mea lelei mo lona aiga.

      2. Auauna atu i isi.

      1. Valaaulia le tamaitiiti e auai mai i a outou gaoioiga.

      2. Tatalo ina ia faatasi le Agaga o le Tama Faalelagi ma oe.

  2. Faitau Tulafono e Sefulu (Esoto 20:8–17). Faatusatusa ma tulafono e lua na tuuina mai e Iesu i le Mataio 22. Tusi le Tama Faalelagi i le isi itu o le laupapa ma le Alofa I Isi i le isi itu. Fesili atu i tamaiti po o le fea itu e tatau ona i ai Tulafono taitasi e Sefulu. Faitau le Ioane 14:15, 21 ma fesoasoani atu i tamaiti ina ia malamalama o le tausia o soo se tulafono e fesoasoani e faaali atu ai lo tatou alolofa i le Tama Faalelagi.

  3. Tuu atu i tamaiti e tauloto le Mataio 22:37–39.

  4. Usu pe faitau upu o le “Ua Ou Faia Ea Se Lelei? (Viiga, nu. 136) po o le “Alofa I So o Se Isi”, (Tusipese a Tamaiti, i–)

Faaiuga

Molimau

Faamatala atu lou alofa i le Tama Faalelagi ma Iesu ma lou loto faafetai i le talalelei. Faamalosiau atu i tamaiti ina ia mulimuli i faataitaiga a Iesu o le alofa i isi.

Mau Fautuaina e Faitau i le Fale

Fautua atu i tamaiti e suesue le Luka 10:25–37 i le fale e fai ma toe faamanatu o lenei lesona.

Tofi se tamaitiiti e faia le tatalo faaiu.