Lesona 36

O Le Aso o le Penetekoso

Faamoemoega

Ina ia fesoasoani i tamaiti taitoatasi ia latou aoao e uiga i le meaalofa o le Agaga Paia ma malamalama i le ala latou te iloaina ai musumusuga a le Agaga Paia.

Sauniuniga

1. Suesue ma le agaga tatalo le Galuega 2:1–24, 32–33, 36–47 ma le Ioane 14:25–27. Ona suesue lea o le lesona ma iloilo pe faapefea ona e manao e aoao atu i tamaiti le tala faatusi paia (Tagai i le “Saunia o Au Lesona,” itulau 0 [vi,] ma le “Aoao Atu Mai Tusitusiga Paia,”itulau 0 [vii].)

2. Tusi faitau faaopoopo: Mataupu o le Talalelei, mataupu 7 ma le 21.

3. Filifili fesili e talanoaina ma gaoioiga e faamauoa mai ai na o le a sili ona aafia ai tamaiti ma sili ona fesoasoani ia i latou e maua ai le faamoemoega o le lesona.

4. Mea e manaomia:

   1. Se Tusi Paia poo se Feagaiga Fou mo tamaiti taitasi.

   2. Penisina ma se laupapa.

   3. Ata 7-39, Aso o le Penetekoso.

Faalautelega Fautuaina o le Lesona

Tofi se tamaititi e faia le tatalo amata.

Gaoioiga e Faatosina Mai Ai

Aoao atu i tamaiti e faapea, ao iai Iesu faatasi ma lana Au Aposetolo, sa ia aoaoina atu ia te i latou le tele o mea. Na ia silafia latou te le mafuta pea ma i latou, o lea na ia folafola ai o le a ia auina mai se meaalofa faapitoa e fesoasoani ia i latou.

Faitau faamatalaga taufaaataata nei. Fai atu i tamaiti e tutu i luga pe afai latou te iloa poo le a lenei meaalofa ma musumusu atu le tali i lou taliga. Afai e sao ona latou tauina atu o le Agaga Paia, ona tutu pea lea.

Gaoioiga e Faatosina Mai Ai

• Ou te aoaoina atu le upu moni.

• O au o se taiala.

• Ou te tuuina atu le faamafanafanaga.

• Ou te molimau ia Iesu Keriso.

• E masani lava ona ou tautala atu i lou mafaufau poo lou loto.

• O au o se tasi o le Aigaatua.

• O au o se agaga ae leai so’u tino faaletino.

Tusi le upu Agaga Paia i luga o le laupapa. Faitau faatasi ma tamaiti le Ioane 14:25–27. Iloilo le lisi o faamatalaga taufaaataata ina ia fesoasoani ai i tamaiti ia malamalama poo le a le mea e faia e le Agaga Paia ia i tatou.

Tusi le upu Penetekoso i luga o le laupapa. Ia faamatala atu o le Penetekoso e sau mai se upu Eleni o lona uiga o le limasefulu. O le Penetekoso o se aso faamanatu Iutaia lea e faia i le lona limasefulu o aso talu ona mavae le Paseka. Na tuuina atu e Iesu le faamanatuga i lana Au Aposetolo i le Talisuaga Mulimuli, lea na tupu i le taimi o le Paseka. O le lona limasefulu o aso talu ona mavae le Talisuaga Mulimuli na maua ai e ona soo le meaalofa o le Agaga Paia. Tusi le Meaalofa o le Agaga Paia i luga o le laupapa.

Tala Faatusi Paia

Faamatala atu i tamaiti le tala i le aso o le Penetekoso (Galuega 2:1–24, 32–33, 36–47). (Mo ala fautuaina e aoao atu ai le tala faatusi paia, tagai i le “Aoao Atu Mai Tusitusiga Paia, i. vii.) Faaali le ata o le Aso Penetekoso i se taimi e talafeagai ai.

Talanoaga ma Fesili e Faatatau I Ai

Suesue fesili ma mau o loo taua i lalo a o e saunia lau lesona. Faaaoga fesili e te lagona o le a sili ona fesoasoani ai i tamaiti ia malamalama i mau ma faaaoga ai mataupu faavae i o latou olaga. O le faitauina faatasi ma tamaiti o mau i le vasega o le a fesoasoani latou te mauaina ai malamalamaaga i tusitusiga paia.

Talanoaga ma Fesili e Faatatau I Ai

• Na faapefea ona oo atu le Agaga Paia i le Au Aposetolo i le aso o le Penetekoso? (Galuega 2:1–4.)

• O le a le mea na mafai ona tuuina atu ai le malosiaga i le au soo e tautatala ai i gagana ina ia malamalama ai isi tagata e tautatala i isi gagana? (Galuega 2:4.) O faapefea ona fesoasoani lenei meaalofa faaleagaga a le Agaga Paia i taumafaiga a faifeautalai a le Ekalesia i aso nei? (E ala lea i le fesoasoani i le toatele o faifeautalai e aoaoina gagana ese. O le meaalofa o gagana e mafai foi ona fesoasoani i tagata sailiili e malamalama ai i le savali o le talalelei e tusa lava pe le atoatoa le tautala a se faifeautalai i se gagana.)

• O le a le mafuaaga na tuia ai loto o tagata ina ua maea ona tuuina atu le molimau a Peteru e uiga i le faasatauroga ma le toetu o Keriso? (Galuega 2:33, 36–37. O le Agaga Paia.) O le a le uiga o le loto ua tuia? (O le iai o se lagona mautinoa o le faanoanoa.) E mafai faapefea e le Agaga Paia ona fesoasoani ia i tatou ina ia tatou maua le faanoanoa i mea sese tatou te faia?

• E faapefea ona fesoasoani mai le Agaga Paia ina ia tatou iloa le mea e fai? Fesoasoani i tamaiti ina ia malamalama e faapea, e faalogoina e tagata le Agaga Paia o loo fesoasoani i o latou olaga i le tele o auala eseese, e pei o le lagonaina o le filemu poo le faagaeetia i se mea ua sao, o le maua o se malamalama mama i tusitusiga paia poo isi mataupu, mauaina o se tali i se faafitauli i totonu o tusitusiga paia, faalogoina o se lauga poo se lesona i le lotu e fesoasoani ai ia te oe, ma isi. Afai e te lagonaina e talafeagai, atonu e te manao e fetufaai atu se mea na e lagonaina ai le Agaga Paia i lou olaga.

• O le a le mea na tau atu e Peteru i tagata e moomia ona latou faia ina ia latou maua ai le meaalofa o le Agaga Paia? (Galuega 2:38.) O le a se mea e moomia ona tatou faia ina ia tatou maua ai le meaalofa o le Agaga Paia?

• E toafia nisi o outou ua tuuina atu iai le meaalofa o le Agaga Paia? Fesoasoani atu i tamaiti ina ia malamalama, e mafai foi ona e maua musumusuga a le Agaga Paia ao lei papatisoina i latou; ae peitai, tatou te mauaina le meaalofa o le Agaga Paia pe a faamauina i tatou o tagata o le Ekalesia a Iesu Keriso o le Au Paia o Aso e Gata Ai pe a uma ona papatisoina i tatou. Afai tatou te amiotonu, o le meaalofa o le Agaga Paia o le a agavaa ai i tatou e avea le Agaga Paia ma a tatou soa tumau (tagai i le MFF 121:45–46).

• Ina ua mavae ona papatisoina le 3,000 o agaga, o a nisi o mea na latou faia ina ia faaauau ai pea ona taitaiina i latou e le Agaga Paia? (Galuega 2:42–47.) (E mafai ona e tuu atu i tamaiti e sue a latou tali mai tusitusiga paia ma lisi i luga o le laupapa.)

• O le a le mea e moomia ona tatou faia ina ia iai le Agaga Paia faatasi ma i tatou? (Salamo, ia papatisoina, maua le meaalofa o le Agaga Paia, ola amiotonu, tatalo mo le taitaiga a le Agaga Paia, ia filemu ma faalogo, ma mulimuli i musumusuga e oo mai.)

Ia fetufaai faatasi ma tamaiti le upusii lenei:

“Tatalo atu i le Tama Faalelagi ina ia faamanuia mai ia te oe i Lona Agaga i taimi uma…. O le Agaga Paia o se … meaalofa mai le Tama Faalelagi…. Na te musumusu atu ia te oe i se leo lemu itiiti e fai mea tonu. A e faia mea lelei, e te faalogoina se faalogona lelei, ma o le Agaga Paia lena ua tautala mai ia oe. O le Agaga Paia o se soa lelei lava. E faatasi pea o ia ma oe i taimi uma e fesoasoani ia te oe” (Ezra Taft Benson, Liahona Aperila 1989, i. 102-103).

Ia valaaulia tamaiti e fetufaai mai ni mea na latou oo iai poo se tasi foi o o latou aiga na mauaina musumusuga a le Agaga Paia. Ia uunaiina tamaiti e faalogo atu i musumusuga a le Agaga Paia ma taumafai e mulimuli i nei musumusuga. (Tagai i le gaoioiga e faamauoa mai ai lona 6.)

Gaoioiga e Faamauoa Ai

E mafai ona e faaaogaina se tasi poo le sili atu foi o nei gaoioiga i soo se taimi o le lesona poo le avea o se toe iloiloga, aotelega, poo se lu’i.

1. Faamatala atu le tala lenei e uiga ia Peresitene Harold B. Lee, le Peresitene lona sefulutasi o le Ekalesia:

   “Masalo o le valu o o’u tausaga, poo le itiiti ifo foi, na ave ai au e lo’u tama i se faatoaga e mamao ese atu. Ao galue o ia, sa ou pisi lava e fai mea e faia e se tamaititi. Sa matuai vevela ma pefu le aso ma sa ou taalo seia oo lava ina ou vaivai. I le isi itu o le pa sa iai se fale malepe ma e foliga mai ou te fiafia lava iai. Na ou mafaufau o lenei fale malepe o se matuai fale lava o se tupu ma ou te manao ou te sailia, o lea na ou agai atu ai i le pa ma amata ona ou a’e i le isi itu o iai le fale. Ona oo mai ai lea o se leo ia te au ma tau mai se mea e tulaga ese ai. ‘Harold, aua e te alu i o.’ Sa ou tilotilo solo ma ou vaai poo ai lea e ta’uina mai lo’u igoa. Sa mamao ese le mea o loo iai lo’u tama. Sa le mafai ona ia iloa mai le mea lea ou te faia. Sa leai se tasi na mafai ona ou iloaina. Ona ou iloa ai lea, o se tasi sa le mafai ona ou iloaina o loo lapatai mai au e le tatau ona ou alu i o. O le a se mea o iai i o i le fale, e le tatau ona ou iloa, ae na ou aoaoina i taimi o lo’u laititi e iai nisi e le o mafai ona tatou iloa atu e mafai ona talanoa mai ia i tatou” (in Conference Report, Mexico Area Conference 1972, pp. 48–49).

2. Tusi faamatalaga nei i luga o ni fasi pepa eseese. (Mo faamatalaga faaopoopo e uiga i le Agaga Paia, ia tagai i le Taiala o Tusitusiga Paia.) E mafai ona tuu atu i tamaiti e se’i ese mai se pepa mai le fagu poo le atigi pusa. Fai atu iai e sue le faamatalaga o loo lisiina mai i le pepa ma faamatala mai poo le a le mea o tau mai i lena fuaiupu e uiga i le Agaga Paia.

   Ioane 14:26 (O le Agaga Paia e taua o le Faamafanafana; na te aoao mea uma ma fesoasoani ia manatua mea uma.)

   Ioane 15:26 (O le Agaga Paia o le Agaga o le upu moni; na te molimau mai ia Keriso.)

   Ioane 16:13 (O le Agaga Paia o le a ia taitaiina i tatou i upu moni uma ma o le a faaali mai ia i tatou mea i le lumanai.)

   Galuega 4:31 (O le Agaga Paia e fesoasoani ina ia tatou tautatala ma le malosi i le afioga a le Atua.)

   Galuega 5:32 (E tuuina atu e le Atua le Agaga Paia ia i latou o e usiusitai ia te ia.)

   Kalatia 5:22 (O le alofa, olioli, filemu, onosai, agamalu, agalelei, ma le faatuatua e sau mai le Agaga.)

3. Faitau le upusii lenei. Atonu e te manao e fai ni kopi mo tamaiti uma.

   “A maea le papatisoga, ona faamauina lea o se tagata e avea o se tagata o le Ekalesia a Iesu Keriso o le Au Paia o Aso e Gata Ai, ma i lena sauniga puupuu na te mauaina ai le meaalofa o le Agaga Paia. A maea lena, i le olaga atoa, o alii, tamaitai, e oo lava i fanau laiti, e ia te i latou le aia e maua ai taitaiga musuia e taitaiina ai o latou olaga—o faaaliga na a le tagata lava ia!” (Boyd K. Packer, “Personal Revelation—Available to All,” Friend, June 1990, inside front cover).

4. Fai ni kopi e tufa atu o le faamatalaga lenei mo tamaiti uma:

   Afai ou te ola amiotonu, e mafai e le meaalofa o le Agaga Paia ona fesoasoani ia te au e ala lea i le aoaoina o au, taitaiina o au, faamafanafana ia te au, puipui ia te au, lapatai ia te au i tulaga pagatia, ma molimau ia te au i upu moni.

5. Fai atu i tamaiti e tau mai ni igoa se tele mo le Agaga Paia latou te mafaia ona tau mai. Ia tau atu iai igoa nei pe afai e le tauina mai e tamaiti: o le Agaga Paia, o le Agaga o le Atua, o le Agaga o le Alii, Faamafanafana, ma le Agaga. (Tagai i le “Agaga Paia” i le Taiala o Tusitusiga Paia.)

6. Usu pe faitau upu “O le Agaga Paia” (Tusipese a Tamaiti, i. 105) poo le “Leo Malu ma le Itiiti” (Tusipese a Tamaiti, i. 106).

   Atonu e te manao e lisi i luga o le laupapa manatu o loo i le “Leo Malu, ma le Itiiti.” Ia faamamafa atu, i le avea ai o ni tagata ua papatisoina i le Ekalesia a Iesu Keriso o le Au Paia o Aso e Gata Ai, e mafai uma lava e i tatou ona maua lea fesoasoani i o tatou olaga. Fesoasoani i tamaiti ina ia latou malamalama, ao latou ola amiotonu ai ma faalogo atu i musumusuga a le Agaga Paia, e mafai ona latou maua le taitaiga, lapataiga, ma le faamafanafanaga.

Faaiuga

Molimau

Ia tuuina atu lau molimau e alofa Iesu ia i tatou uma taitoatasi, ma o lea ua ia saunia ai le ala ina ia maua e i tatou uma le meaalofa o le Agaga Paia ina ia avea ma fesoasoani, faiaoga, se faamafanafana, ma se taiala.

Tusi Fautuaina e Faitau i le Fale

Ia fautuaina e suesue e tamaiti le Galuega 2:1–8, 36–41 i le fale e fai ma toe faamanatu o lenei lesona.

Tofi se tamaititi e faia le tatalo faaiu.