Lesona 21

Ua Faamalolo e Iesu Lepela e Toasefulu

Faamoemoega

Ina ia uunaia tamaiti e faafetai i le Tama Faalelagi mo faamanuiaga e tele ua latou maua.

Sauniuniga

1. Suesue ma le agaga tatalo le Luka 17:12–19 ma le Mataupu Faavae ma Feagaiga 59:7. Ona suesue lea o le lesona ma iloilo pe faapefea ona e manao e aoao atu le tala faatusi paia. (Tagai “Saunia O Au Lesona,” i. 0 [vi,] ma le “Aoao Atu Mai Tusitusiga Paia,” i. 0 [vii] ).

2. Filifili ia fesili e talanoaina ma gaoioiga e faamauoa mai ai lea o le a aafia ai tamaiti ma o le a sili ona fesoasoani ia i latou ia mauaina le faamoemoega o le lesona.

3. Ia tusia se tusi faafetai puupuu mo tamaiti taitoatasi, e faaaoga i le taimi o le lesona, e faaali atu ai lou loto faafetai i ni mea sa faia e tamaiti po o ni uiga lelei sa latou faaalia.

4. Ia tusia i luga o pepa a tamaiti upu nei Ia Manatua e Faafetai Atu i le Tama Faalelagi.

5. Mea e manaomia:

   1. Se Tusi Paia po o se Feagaiga Fou mo tamaiti taitasi.

   2. Mataupu Faavae ma Feagaiga se tasi po o le sili atu foi.

   3. Ata 7–23, O Lepela e Toasefulu (Taga o Ata o le Talalelei 221; 62150).

Faalautelega Fautuaina o le Lesona

Tofi se tamaitiiti e faia le tatalo amata.

Gaoioiga e Faatosina Mai Ai

Ia tuuina atu tusi faafetai sa e tusia i tamaiti taitasi. A maea ona latou faitauina, ona talanoaina lea ma i latou o tatou lagona pe a faafetai mai se isi ia i tatou. Atonu e te manao e faaali atu ia i latou se mea na tupu ia te oe ina ua faafetai mai se tagata ia te oe, ma faamatala i ai ou lagona. Fai i tamaiti e faailoa mai ni mea na tutupu ia i latou.

Tala Faatusi Paia

Ao faaali atu le ata o Lepela e Toasefulu, aoao atu le tala i le faamaloloina e Iesu o lepela o loo maua i le Luka 17:12–19. (Mo ala fautuaina e aoao atu ai le tala faatusi paia, tagai “Aoao Atu Mai Tusitusiga Paia,” i. vii.) Faamanatu atu i tamaiti o le lepela, o se mai lea e sosolo i le pau. Sa manatu tagata i na aso o se faamai e pipisi tele. I le vaitaimi o Iesu, sa faasa ona nonofo lepela i aai, ma e le mafai foi ona soso i tafatafa o tagata.

Talanoaga ma Fesili e Faatatau I Ai

Suesue fesili ma mau o lo o taua i lalo a o e saunia lau lesona. Faaaoga fesili e te lagona o le a sili ona fesoasoani ai i tamaiti ia malamalama i mau ma faaaoga ai mataupu faavae i o latou olaga. O le faitauina faatasi ma tamaiti o mau i le vasega o le a fesoasoani latou te mauaina ai malamalamaaga i tusitusiga paia.

Talanoaga ma Fesili e Faatatau I Ai

• O a mea a lepela na fai ina ua latou vaai ia Iesu? (Luka 17:13.) E te manatu latou te iloa po o ai Iesu ma pe latou te talitonu foi ia te ia?

• O le a le mea na ta’u atu e Iesu i lepela latou te faia ina ia malolo ai? (Luka 17:14.)

• E toafia lepela na toe foi mai e faafetai ia Iesu? (Luka 17:15–16.) O le a le fetalaiga a Iesu e uiga i lepela? (Luka 17:17–19.)

• O le a sou manatu aisea na le toe foi ai lepela e toaiva e faafetai ia Iesu?

• O le a sou lagona pe a fesoasoani i ni tagata e toasefulu ae na o le toatasi na toe foi mai e faafetai atu ia te oe?

• O a mea e tatau ona tatou faafetai atu ai i le Tama Faalelagi? Faitau pe tofi se tamaitiiti e faitau le Mataupu Faavae ma Feagaiga 59:7. Aisea e taua ai ona tatou faafetai i le Tama Faalelagi mo faamanuiaga faapitoa ua tatou mauaina?

• E faapefea ona faaali atu lo tatou loto faafetai i le Tama Faalelagi?

Tuu atu i tamaiti taitasi pepa sa e saunia. Fai i tamaiti e faamatala mai ni mea e mafai ona latou faafetai atu ai i le Tama Faalelagi. Atonu e te manao e otooto mai a latou tali i luga o le laupapa.

Gaoioiga e Faamauoa Ai

E mafai ona e faaaogaina se tasi pe sili atu foi o nei gaoioiga i soo se taimi o le lesona pe faaaoga foi o se toe iloiloga, otootoga, po o se lu’i.

1. Fesoasoani i tamaiti e tauloto le Mataupu Faavae ma Feagaiga 59:7. Tuu atu ia i latou e tusia lenei mau i tua o a latou pepa o le “Manatua e Faafetai Atu i le Tama Faalelagi”, ma faamalosiau atu ia i latou ina ia tuu lenei pepa i se mea e mafai ona latou vaai i ai i aso uma.

2. Tusi le Loto faafetai i luga o le laupapa. Tuu atu i tamaiti e ta’u mai ni mea latou te faafetai i ai e amata i mataitusi taitasi o lenei upu. Fesoasoani ina ia latou malamalama tatou te faalagolago i le Alii i mea uma lava tatou te maua.

3. Ia tusi i luga o le laupapa se ata ia foliga tutusa ma le ata o loo i lalo.

   Loto faafetai

   Tau atu

   • Matua

   • Uo

   • Meaai

   • Lavalava

   Faaali atu

   • Tausi Poloaiga

   • Auauna atu i Isi

   • Tatalo

   Tuu atu i tamaiti e tau mai ni mea patino latou te “faafetai” atu ai i le Tama Faalelagi. Ia lisiina i lalo o le Tau atu. Faamatala atu le taua o le tau atu ma le faaali atu o le loto faafetai.

4. Faaali atu ni ata o ni vaaiga matagofie ma manufeai. Talanoaina le Foafoaga ma fesoasoani atu i tamaiti ina ia malamalama i le mafuaaga e tatau ai ona tatou faafetaia le Tama Faalelagi ma Iesu Keriso, mo le laueleele ma mea uma sa la foafoaina mo i tatou.

5. Tuu atu i tamati taitasi se fasipepa ma se penitala ma faatonuina i latou e tusi se tusi faafetai mo soo se tasi, e pei o matua, o se uo, o se tuaoi, o se faiaoga, o le epikopo, ma isi. Uunai tamaiti ina ia ave a latou tusi pe fai foi iai e aveane e te tauaaoina atu pe a manaomia.

6. Faitau le Mosaea 2:19–24 ma talanoaina le faamatalaga a le Tupu o Peniamina. Fesoasoani atu i tamaiti ina ia malamalama, e le mafai ona tatou totogiina mea uma ua faia e le Tama Faalelagi mo i tatou; ma ua alagatatau ai ona tuuina atu le agaga faafetai uma e mafai ona tatou tuuina atu ia te ia.

Faaiuga

Molimau

Faamatala atu ou lagona faafetai i le Tama Faalelagi ma Iesu. Ia faaali atu foi lau faafetai i tamaiti mo se avanoa ua avea ai oe ma o latou faiaoga ma fesoasoani atu ai ia i latou e aoao i le talalelei a Iesu Keriso.

Tusi Fautuaina e Faitau i le Fale

Fautua atu i tamaiti e suesue le Luka 17:12–19 i le fale e fai ma toe faamanatu o lenei lesona.

Tofi se tamaitiiti e faia le tatalo faaiu.