Ua Faatuina e Iesu Keriso Lasalo mai le Oti

Faamoemoega

Ina ia fesoasoani i tamaiti taitoatasi ina ia latou malamalama, talu ai ona o Iesu Keriso o ia o le Alo o le Atua, e iai lona mana i le oti.

Sauniuniga

Suesue ma le agaga tatalo le Ioane 11:1–46. Ona suesue lea o le lesona ma iloilo pe faapefea ona e manao e aoao atu i tamaiti le tala faatusi paia (Tagai i le “Saunia o Au Lesona,” itulau 0 [vi,] ma le “Aoao Atu Mai Tusitusiga Paia,”itulau 0 [vii].)
Iloilo le Luka 7:11–17; 8:41–42, 49–56.
Filifili fesili e talanoaina ma gaoioiga e faamauoa mai ai na o le a sili ona aafia ai tamaiti ma sili ona fesoasoani ia i latou e maua ai le faamoemoega o le lesona.
Mea e manaomia:
1. Se Tusi Paia poo se Feagaiga Fou mo tamaiti uma
2. Se laulaau poo se lala laau faatoa gagau mai ma se laulaau mago (poo ni ata foi o nei mea uma)
3. Ata 7-27, O Iesu ua toe Faatu Lasalo mai le Oti (Taga Ata o le Talalelei 222; 621480, ma le 7-18, O Iesu O Loo Faamanuiaina le Afafine o Iairo (Taga Ata o le Talalelei 215; 62231).

Faalautelega Fautuaina o le Lesona

Tofi se tamaititi e faia le tatalo amata.

Gaoioiga e Faatosina Mai Ai

Faaali atu i tamaiti le lau laau poo le lala laau fou lea faatoa gagau mai ma le lau laau poo le lala laau mago. Fai atu i tamaiti e talanoaina le eseesega o mea ia e lua.

Gaoioiga e Faatosina Mai Ai

E iai se mea e mafai ona tatou faia ina ia avea ai le lala laau mago ia pei o le lala laau mata?
O lea la ua tipi ese le lala laau mata mai le laau, o le a se mea o le a tupu ai?
O ai e iai lona mana e toe aumaia ai le ola i se mea ua mate?

Ia faamatala atu o Iesu e iai lona mana e pule ai i le oti. Na ia toe faaolaina nisi o tagata na feoti.

Tala Faatusi Paia

Ia talanoaina puupuu ia tala i le toe faaolaina e Iesu o le tama a le fafine ua oti lana tane i Naina (Luka 7:11–17) ma le afafine o Iairo (Luka 8:41–42, 49–56). Ona aoao atu lea i tamaiti le tala i le toe faatuina mai o Lasalo e Iesu mai le oti o loo maua i le Ioane 11:1–46. Faaali atu ata i taimi e talafeagai ai. (Mo ala fautuaina e aoao atu ai le tala faatusi paia, tagai i le “Aoao Atu Mai Tusitusiga Paia, i. vii.) Ia faamatala atu, ina ua faatuina e Iesu tagata mai le oti, sa ia faia ni vavega e molimau atu ai o ia o le Alo o le Atua ma e iai lona mana e pule ai i le oti. Ia faamatala atu i tamaiti e faapea, talu ai ona o tu ma aganuu faaItuaia e tatau ai i tuaoi o uo ona faanoanoa faatasi ma le aiga mo nai aso pe a mavae le oti, sa toatele tagata sa faatasi ma Mareta ma Maria ina ua mavae le oti o Lasalo ma latou molimauina lenei vavega ofoofogia na faia e Iesu.

Talanoaga ma Fesili e Faatatau I Ai

Suesue fesili ma mau o loo taua i lalo a o e saunia lau lesona. Faaaoga fesili e te lagona o le a sili ona fesoasoani ai i tamaiti ia malamalama i mau ma faaaoga ai mataupu faavae i o latou olaga. O le faitauina faatasi ma tamaiti o mau i le vasega o le a fesoasoani latou te mauaina ai malamalamaaga i tusitusiga paia.

Talanoaga ma Fesili e Faatatau I Ai

Ina ua maua e Iesu le tala o loo ma’i Lasalo, o le a le umi na faatali ai Iesu a o lei malaga mo Petania? (Ioane 11:6.) O le a le umi na taoto ai le tino o Lasalo i le tuugamau ae faatoa taunuu atu Iesu? (Ioane 11:17.) Tou te manatu, aisea na umi tele ai ona faatalitali Iesu faatoa alu ai? (Ina ia iloa e tagata uma e aunoa ma se tau fesili, na oti lava Lasalo, ma o le toefaatuina o ia, o le a avea ma se molimau malosi atu e uiga i le mana paia o Iesu ma lana misiona [Ioane 11:4, 15].)
O le a le tala na fai atu e Mareta ma Maria ia Iesu ina ua taunuu atu o ia? (Ioane 11:21–22, 32.) O le a le mea na mafaufau iai Mareta ina ua fai atu Iesu ia te ia o le a toetu mai Lasalo? (Ioane 11:23–24.) O le a le molimau a Mareta e ui lava ina ua vaai ua toetu mai lona tuagane mai le tuugamau? (Ioane 11:27.)
Aisea na tatalo atu ai Iesu i le Tama Faalelagi a’o le’i toe faatuina mai e ia Lasalo? (Ioane 11:41–42.) O le a le mea na finagalo Iesu ia malamalama iai tagata? (Ina ia malamalama na auina mai o ia e le Tama Faalelagi.)
O le a le tala a Iesu na fai ia Lasalo? (Ioane 11:43.) O le a le mea na tupu? O a mea sa ufiufi ai le tino o Lasalo? (Ioane 11:44.)
O le a sou manatu o le a se lagona na oo ia Mareta, o Maria, ma isi tagata sa iai a’o latou molimauina lenei vavega? O le a sou lagona e te oo iai pe ana fai e te iai iina? O le a le mea na faia e tagata ina ua maea ona latou vaai i le vavega? (Ioane 11:45–46.) E faapefea ona aafia lou talitonuga ia Iesu e ala i lou vaai ia Lasalo ua sau i fafo mai le tuugamau?
Aisea na mafai ai e Iesu ona toe faaola Lasalo mai le oti? O le a se lagona e oo ia te oe ina ua e iloa o loo ia Iesu le mana e toe faaola mai ai se tasi mai le oti? E faapefea ona fesoasoani lenei vavega ia i tatou ina ia tatou iloa ai o Iesu o le Alo o le Atua? (Ioane 11:4.)
O le a se isi mea na faia mulimuli e Iesu e faamaonia ai lava lona pule i le oti? (Na toetu o ia. Fesoasoani i tamaiti ina ia malamalama ina ua toetu mai Lasalo mai le oti, sa ola pea o ia i le ola faaletino ma e toe oti foi. A toetutu mai tagata, o le a le toe oti i latou. O le a latou ola e faavavau.)
O le a uiga o le saunoaga a Iesu ina ua ia faapea mai o ia o le “toetu ma le ola”? (Ioane 11:25.) O le a le uiga o lea mea ia i tatou?

Ia faamatala atu e le gata sa ia Iesu le mana e toefaatu mai ai se tasi i le tino lenei, e pei ona ia faia ia Lasalo, ae o loo ia te ia foi le mana sili atu o le toefaatuina lea o tagata uma mai le oti i le tino ola pea. O tagata uma lava e fananau mai i le lalolagi o le a toetutu. O lana togiola foi, o loo iai ia Iesu le mana e tuu atu ai le ola e faavavau ia i latou e usiusitai ma mulimuli ia te ia. O ia o le mafuaaga o le toetutu ma le ola e faavavau mo i tatou uma taitoatasi.

Lu’itau

Ia e luiina tamaiti ina ia faamatala atu le tala i le toefaatuina mai o Lasalo mai le oti i se isi tagata i le vaiaso o lumanai nei.

Gaoioiga e Faamauoa Mai Ai

E mafai ona e faaaogaina se tasi poo le sili atu foi o nei gaoioiga i soo se taimi o le lesona poo le avea o se toe iloiloga, aotelega, poo se lu’i.

Fai atu i tamaiti e faafoliga e pei o Maria, Mareta, Lasalo, ma tagata Iutaia sa iai i le taimi na toe faatuina ai e Iesu ia Lasalo mai le oti. Fai atu i se isi tamaitiiti e faatalatalanoa tagata ma sue poo le a le mea na tupu, o le mea na latou molimauina, o so latou lagona ina ua toe savali mai i fafo Lasalo mai le tuugamau, ma so latou lagona e uiga ia Iesu.
Ia saunia ni fasipepa e faatatau i ni mea na tutupu, e pei o le mea lenei, ina ua molimauina e se tasi o Iesu Keriso o le Alo o le Atua. Ia saunia nisi fasipepa o loo iai mau e faatatau i na mea na tutupu.

Mea na tupu: Ua fanau mai Iesu.

Mau: Na faapea mai se agelu, “Aua o le aso nei ua fanau ai i le aai o Tavita lo outou Faaola, o le Alii ia o Keriso” (Luka 2:11).

Mea na tupu: Sa papatisoina Iesu.

Mau: Sa iai se leo mai le lagi ua faapea mai, “O lou Atalii Pele lena”; o le Agaga o le Atua ua afio ifo i luga ua pei o se lupe (Mareko 1:9–11).

Mea na tupu: Sa savali Iesu i luga o le vai.

Mau: Sa i luga o le vaa le au soo o Iesu, “E moni o oe lava o le Alo o le Atua” (Mataio 14:25–27, 32–33).

Mea na tupu: Sa faamaloloina e Iesu se tagata na fanau mai o tauaso.

Mau: “Ona faapea mai lea o ia, le Alii e, ua ou talitonu o oe o le Alo o le Atua. Ona ifo ai lea o ia ia te ia” (Ioane 9:32, 35–38).

Mea na tupu: Sa molimau Peteru ia Iesu.

Mau: Ina ua fesili atu Iesu i ona soo poo le a so latou manatu o ai ia, ae sa tali mai Peteru faapea, “O oe o le Keriso, le Alo o le Atua soifua” (Mataio 16:13–16).

Mea na tupu: Ua mauaina e Iosefa Samita lana uluai faaaliga.

Mau: Na fetalai mai le Tama Faalelagi faapea, “O Lo’u Atalii Pele lena. Faalogo ia te Ia!” (Talafaasolopito o Iosefa Samita 2:17).

Tuu pepa ia faafao i luga o le fola poo le laulau i le faasologa. Fai atu i se tamaititi e sau ma fuli se fasipepa ma taumafai e faafetaui le mea na tupu ma le mau e fetaui iai. Afai e le fetaui pepa e lua, ona toe faafao uma lea o fasipepa ma fai atu i se isi tamaititi e sau. Afai e fetaui uma loa ia pepa ao lei soo tamaiti, ona toe fai lea o le taaloga.
Fesoasoani i tamaiti e tauloto le Ioane 11:25.

Faaiuga

Molimau

Ia tuuina atu lau molimau o Iesu Keriso o le Alo o le Atua ma e iai lona mana e pule ai i le oti. Ia faailoa atu lou alofa mo le Faaola ma lou agaga faafetai mo lana togiola lea ua mafai ai e i tatou ona tatou toetutu ma maua le ola e faavavau.

Tusi Fautuaina e Faitau i le Fale

Ia fautuaina e suesue e tamaiti le Ioane 11:39–46 i le fale e fai ma toe faamanatu o lenei lesona.

Tofi se tamaititi e faia le tatalo faaiu.