Tusi Lesona ma le Taimi o Fetufaaiga a le Peraimeri
Lesona 33: O Le Toetu Mai o Iesu Keriso

Lesona 33

O Le Toetu Mai o Iesu Keriso

Faamoemoega

Ina ia fesoasoani i tamaiti taitoatasi ia malamalama o Iesu Keriso na toetu mai le oti ma o le a tatou toetutu uma ai foi.

Sauniuniga

  1. Suesue ma le agaga tatalo le Mataio 27:52–53; 28:1–15; Luka 24; Ioane 20; Galuega 1:3, 9–11; ma le 1 Korinito 15:5–6, 22. Ona suesue lea o le lesona ma iloilo pe faapefea ona e manao e aoao atu i tamaiti le tala faatusi paia (Tagai i le “Saunia o Au Lesona,” itulau 0 [vi,] ma le “Aoao Atu Mai Tusitusiga Paia,”itulau 0 [vii].)

  2. Tusi faitau faaopoopo: Mareko 16.

  3. Filifili fesili e talanoaina ma gaoioiga e faamauoa mai ai na o le a sili ona aafia ai tamaiti ma sili ona fesoasoani ia i latou e maua ai le faamoemoega o le lesona.

  4. Mea e manaomia:

    1. Se Tusi Paia poo se Feagaiga Fou mo tamaiti taitasi.

    2. Fasi pepa o loo tusia ai se upu poo se fuaitau lenei: ie lino, mea manogi, togalaau, fitafita, maa.

    3. Ata 7-35, Tuugamau o Iesu (62111); 7-36, Maria ma le Alii Toetu (Taga Ata o le Talalelei 233; 62186); ma le 7-37, O Le Iesu Keriso Toetu (Taga Ata o le Talalelei 239; 62187).

Faalautelega Fautuaina o le Lesona

Tofi se tamaititi e faia le tatalo amata

Gaoioiga e Faatosina Mai Ai

Tuu fasi pepa o loo lisiina atu i vaega o “Sauniuniga” i totonu o se fagu poo se atigipusa, ma fai atu i tamaiti e auauai i le filifilia o se fasi pepa. Fai atu iai e faamatala mai le mea o loo lisiina atu, ona fesili atu lea ia i latou pe o le a se faia o lea upu poo lena faitau i le falelauasiga o Iesu. Ia faaaoga ia lava ni upu ma fuaitau ina ia tofu uma tamaiti.

Fai atu i tamaiti e mafaufau o le taeao po lava lenei o le Aso Sa ina ua mavae le faasatauroina o Iesu. Fai atu iai e mafaufau o latou o soo, o loo latou fetagisi i le maliu o Iesu. Sa latou faamoemoe o le a faasaoina i latou e Iesu mai le pulega a Roma ma faavaeina lona malo i le lalolagi i le mana ma le mamalu. Ae o lea ua maliu nei. Tau atu i tamaiti o le a outou talanoaina nei le mea na tupu i le taeao o lena Aso Sa i Ierusalema.

Tala Faatusi Paia

I le faaaogaina o ata i taimi e talafeagai ai, ia faamatala atu i tamaiti ia tala i le toetu o Iesu o loo maua i le Mataio 27:52–53, 28:1–15, Luka 24, ma le Ioane 20. (Mo ala fautuaina e aoao atu ai le tala faatusi paia, tagai i le “Aoao Atu Mai Tusitusiga Paia, i. vii.) Ia faamatala atu i tamaiti, e ui lava ina ta’u atu e Iesu i ona soo i le tele o taimi o le a toe ola mai o ia pe a mavae lona oti, ae lei malamalama lelei lava ona soo i le uiga. E le’i iai lava se tasi muamua na toetu, ma sa latou le malamalama foi pe faapefea ona toe ola mai Iesu. E oo lava ina ua faalogoina e le au soo mai agelu o Iesu ua toetu mai le oti ma vaai i le Alii toetu, ae sa faigata lava ia te i latou ona latou iloaina le mea na tupu.

Talanoaga ma Fesili e Faatatau I Ai

Suesue fesili ma mau o loo taua i lalo a o e saunia lau lesona. Faaaoga fesili e te lagona o le a sili ona fesoasoani ai i tamaiti ia malamalama i mau ma faaaoga ai mataupu faavae i o latou olaga. O le faitauina faatasi ma tamaiti o mau i le vasega o le a fesoasoani latou te mauaina ai malamalamaaga i tusitusiga paia.

Talanoaga ma Fesili e Faatatau I Ai

  • Aisea na o atu ai Maria le Makatala ma isi fafine i le tuugamau i le taeao o le Aso Sa? (Mareko 16:1.) O ai na vaai iai fafine ina ua latou o atu i le tuugamau? (Luka 24:4.) O le a le tala a agelu i fafine? (Luka 24:5–6.) O le a le uiga o le toetu? ( O se tino agaga ua faatasia ma lona tino o aano ma ivi, e le mafai ona toe tuueseeseina.)

  • O le a le mea na faia e fafine ina ua latou vaai i le tuugamau ua avanoa? (Luka 24:8–12.) Aisea na le talitonu ai le au soo i le faamatalaga a fafine i le mea na tauina atu e agelu? (Luka 24:11; Ioane 20:9.) Faamata o le a sou mafaufau pe ana fai o oe o se tasi o le au soo ma ua e faalogo i lenei tala?

  • O a mea na maua e Peteru ma isi soo ina ua latou o atu i totonu o le tuugamau? (Ioane 20:3–7. Ia faamatala atu “o le isi soo” atonu o Ioane.) Aisea na latou talitonu ai ua toetu Iesu Keriso? (Ioane 20:8.)

  • Aisea na faanoanoa ai pea Maria e ui lava ua uma ona tau atu iai e agelu o Iesu ua toetu? (Ioane 20:11–13.) O le a le mea na tupu na fesoasoani ai ia Maria ua toetu Iesu? (Ioane 20:14–16.) Aisea na fai atu ai Iesu ia te ia e aua nei pa’i atu ia te ia? (Ioane 20:17.)

  • O ai le isi tagata na toetu i le aso na toetu ai Iesu? (Mataio 27:52–53.) O ai o le tou aiga o le a toetu. O ai isi o le a toetutu? (1 Korinito 15:22.)

  • O le a le tala na faatupu e le au faitaulaga sili e faamatala ai le tuugamau ua avanoa? (Mataio 28:11–15.) Aisea na malilie ai fitafita e faamatalaina lenei tala, e ui lava sa latou vaai i agelu? (Mataio 28:12, 15.)

  • O ai na savavali ma le au soo i le ala i Emau i le aso na toetu ai Iesu? (Luka 24:13–16.) O le a le mea na talatalanoa iai nei alii e toatolu ao latou iai i le ala? (Luka 24:17–27.) O le a se lagona na oo i nei soo ina ua latou talanoa ma Iesu? (Luka 24:32.) O le a le mea na mafua ai ona mu o laua loto? (O le Agaga Paia.) E faapefea ona maua e oe ma lou aiga musumusuga a le Agaga?

  • O le a le mea na faia e Iesu i le afiafi o le aso na toetu ai? (Luka 24:36–48.) Aisea na tapuni ai e le au soo le faitotoa ina ua faaali atu Iesu ia i latou? (Ioane 20:19.) O a uiga na faaalia e le au soo ina ua latou vaai ia Iesu? (Luka 24:37.) O le a le mea na faia e Iesu e faamaonia atu ai i lona au soo o ia lea ua toetu? O le a se mea na aoaoina e le au soo e uiga i se tino toetu? (Luka 24:39–43.)

  • Aisea na le talitonu ai Toma ua toetu Iesu? (Ioane 20:24–25.) O le a le umi ae faatoa vaai Toma ia Iesu? (Ioane 20:26.) O le a le mea na tau atu e Iesu ia Toma ina ua ia faaali atu ia te ia? (Ioane 20:29.) O le a se mea e faamalosia ai lau molimau o Iesu Keriso na toetu?

  • O ai isi tagata na faaali atu iai Iesu ina ua mavae lona toetu? (Mataio 28:9; 1 Korinito 15:6.) E mafai ona e faaaogaina le gaoioiga e faamauoa mai ai 1 e iloilo ai vaega uma lava na faaali atu iai Iesu ina ua mavae lona toetu.)

  • O le a le umi na nonofo ai Iesu ma ona soo ina ua mavae lona toetu? (Galuega 1:3.)

  • Na faapefea ona aveina ae Iesu i le lagi? (Galuega 1:9–11.) O ai na sau e faamatala mai i tagata le mea na tupu? O le a se mea o loo faamatalaina mai e lenei tala e uiga i le afio faalua mai o Iesu?

Gaoioiga e Faamauoa Ai

E mafai ona e faaaogaina se tasi poo le sili atu foi o nei gaoioiga i soo se taimi o le lesona poo le avea o se toe iloiloga, aotelega, poo se lu’i.

  1. Tuu atu i tamaiti uma se faamatalaga taufaaataata ma fai atu iai e faitau mai i le vasega. Tuu atu i tagata o le vasega e mate mai le tali i faamatalaga taitasi. Afai latou te leiloa le tali, fai atu i le tamaititi o loo tuuina mai le fesili e tuu mai se faamatalaga ina ia mafai ai e tamaiti ona sue le tali i totonu o tusitusiga paia.

    O au le tagata muamua lava na faaali iai Iesu ina ua mavae lona toetu. O ai au? (Maria le Makatala. Ioane 20:1, 16.)

    Na faaali mai Iesu ia i matou uma, ma sa matou fetagofi atu i ona vae. O ai i matou? (Isi fafine. Mataio 28:5, 9.)

    O au le Aposetolo muamua lava na ulu atu i le tuugamau avanoa. O ai au? (Peteru. Ioane 20:6.)

    O au o se Aposetolo lea na ma tamomoe atu ma Peteru i le tuugamau avanoa. Ina ua ou vaai iai, sa ou talitonu ai ua toetu Iesu. O ai au? (Ioane. Ioane 20:8.)

    Sa matou savavali ma lau uo ma Iesu i le auala agai i Emau, ae peitai ou te leiloaina o ia. O ai au? (Kaleopa. Luka 24:18.)

    Na faaali atu Iesu ia i matou ao matou fono ai i se tamai potu e tapunipuni uma faitotoa. O ai i matou? (Au soo. Ioane 20:19.)

    Matou te lei faatasi ma isi Aposetolo ina ua faaali muamua iai Iesu ia i latou. Ou te lei talitonu ua toetu Iesu mai le oti seiloga e vaai iai o’u mata e lua ma ou pa’i atu i mea sa tutui ai fao i ona lima ma ona vae. O ai au? (Toma. Ioane 20:24.)

    Sa matou iai ina ua fuliese e agelu le maa mai le faitotoa. Na taumafai le au faitaulaga sili e totogi i matou ina ia matou pepelo i le mea na matou vaaia. O ai i matou? (Fitafita Roma. Mataio 28:12.)

  2. Tusi upu e faamatala mai ai lagona o le au soo atonu na oo ia i latou i le aso na maliu ai Iesu—e pei o le lotomomomo, tigaalofa, faanoanoa, ma le atuatuvale—i se koluma i luga o le laupapa. Tuu atu i tamaiti e tau mai le faafeagai o nei upu—e pei o le fiafia, olioli, faamoemoe, ma le faatuatua—ma tusi i se isi koluma i luga o le laupapa. Ia faamatala atu o lagona nei atonu na oo i le au soo ina ua latou iloaina ua toetu Iesu. Ia talanoaina poo le a le uiga o le faamoemoega o le toetutu ia i tatou uma taitoatasi.

  3. Faatasi ai ma le faamaoniga a le au peresitene o le Peraimeri, ia filifili ma le agaga tatalo ma valaaulia se tagata o le Ekalesia sa iai se tasi e pele ia te ia ua maliu ma fetufaai mai i tamaiti poo le a le uiga o le Toetutu ia te ia.

  4. Usu pe faitau upu o le “Pe Na Toe Soifua Moni Mai ea Iesu?” (Tusipese a Tamaiti, i. 0), “Na Ia Auina Mai Lona Alo” (Tusipese a Tamaiti, i. 0), poo le “Ua Ou Iloa Lo’u Faaola” (Viiga, nu. 73).

Faaiuga

Molimau

Ia faailoa atu ou lagona e uiga i le toetu o le Faaola ma lona taua ia te oe. Ia molimau atu o puapuaga o Iesu i le togalaau, o lona maliu, ma lona toetu o mea sili na ona taua ua tutupu i le lalolagi.

Tusi Fautuaina e Faitau i le Fale

Ia fautuaina e suesue e tamaiti le Luka 24 i le fale e fai ma toe faamanatu o lenei lesona.

Tofi se tamaititi e faia le tatalo faaiu.