O Setefano, Lē Na Maliu Fasia

Faamoemoega

Ia fesoasoani i tamaiti taitoatasi ina ia maua se malamalamaaga atili e uiga i le Aiga Atua.

Sauniuniga

Suesue ma le agaga tatalo le Galuega 6, 7:54–60, ma le Mataupu Faavae ma Feagaiga 130:22-23. Ona suesue lea o le lesona ma iloilo pe faapefea ona e manao e aoao atu i tamaiti le tala faatusi paia. (Tagai “Saunia O Au Lesona,” i. 0 [vi,] ma le “Aoao Atu mai Tusitusiga Paia,” i. 0 [vii].)
Tusi Faitau Faaopoopo: Galuega 7:1–53 ma le Talafaasolopito o Iosefa Samita 2:17.
Filifili ia fesili e talanoaina ma gaoioiga e faamauoa mai ai lea o le a aafia ai tamaiti ma o le a sili ona fesoasoani ia i latou ia mauaina le faamoemoega o le lesona.
Mea e manaomia:
1. Se Tusi Paia po o se Feagaiga Fou mo tamaiti taitasi.
2. Se kopi o le Mataupu Faavae ma Feagaiga.
3. Ata 7-40, O le Uluai Faaaliga (Taga Ata o le Talalelei 403; 62470).

Faalautelega Fautuaina o le Lesona

Tofi se tamaitiiti e faia le tatalo amata.

Gaoioiga e Faatosina Mai Ai

Tusi le upu maliu fasia i luga o le laupapa. Fai atu i se tamaitiiti e sau i luma o le vasega.

Gaoioiga e Faatosina Mai Ai

(Igoa o le tamaitiiti), pe e te naunau ea e avea oe ma se tagata e maliu fasia?
Pe iloa ea e se tasi o outou le mea e ta’u o le tagata e maliu fasia?

Ia faamatala atu e faapea o se tagata e maliu fasia o se tagata lea o le a matua malosi lona talitonuga i se mea ma o le mea lea e tuuina atu ai e ia lona ola e fai ma molimau.

O lenei lesona e faatatau lea i se tagata o lē na i ai se molimau malosi e uiga i le Tama Faalelagi, Iesu Keriso, ma le Agaga Paia ma sa maliu fasia ona o lena molimau.

Tala Faatusi Paia

Aoao atu i tamaiti le tala e uiga i le olaga o Setefano e pei ona maua i le Galuega 6 ma le Galuega 7. (Mo ala fautuaina e aoao atu ai tala faatusi paia, tagai i le “Aoao Atu Mai Tusitusiga Paia,” i. vii)

Talanoaga ma Fesili e Faatatau I Ai

Suesue fesili ma mau o loo taua i lalo ao e saunia lau lesona. Faaaoga fesili e te lagona o le a sili ona fesoasoani ai i tamaiti ia malamalama i mau ma faaaoga ai mataupu faavae i o latou olaga. O le faitauina faatasi ma tamaiti o mau i le vasega o le a fesoasoani latou te mauaina ai malamalamaaga i tusitusiga paia.

Talanoaga ma Fesili e Faatatau I Ai

Aisea na valaauina ai e Aposetolo ni tagata se toafitu e fesoasoani ia te i latou? (Galuega 6:1–4.) Pe sa faapefea ona valaauina nei alii e toafitu? (Galuega 6:3, 5–6.) Aisea na “faaee ai o latou lima” i luga o ulu o nei tagata? (Sa tuuina atu e Aposetolo ia i latou le pule o le perisitua lea na maua e i latou mai ia Iesu Keriso, e faia ai nisi o tiute faapitoa; o i latou uma e maua le perisitua e faauuina e ala i le faaee atu o lima).
O a uiga lelei sa maua e Setefano na fesoasoani ia te ia ina ia fesoasoani atu ai i Aposetolo ma auauna atu i tagata? (Galuega 6:5,8.) Pe sa faapefea ona faamanuia e ia olaga o tagata?
Aisea na aumaia ai e taitai Iutaia Setefano i luma o se aufono? (Galuega 6:9–12.) O le a le mea na tuaiina sese e taitai o le sunako e faapea ua faia e Setefano? (Galuega 6:13–14. Ia faamatala atu o le uiga o le faaupuga “fai upu leaga” o le tautala lea i se auala ula ma le lē faaaloalo e uiga i le Atua po o mea paia.) Aisea na latou manatu ai ua tautala Setefano i upu leaga?
O le a le mea na tupu i fofoga o Setefano a o talanoa atu o ia i tagata o le fono? (Galuega 6:15.)

Ia faamatala puupuu atu mea na ta’u atu e Setefano i le aufono (Tagai Galuega 7:1–53). Ia fesoasoani atu i tamaiti ina ia malamalama sa faamatala e Setefano ma molimau atu e uiga i faamanuiaga a le Atua i tagata o Isaraelu. Sa ia faapea atu foi ua le usiusitai tagata i le Atua, ua latou sauaina ma fasiotia Perofeta, ma teena ma fasiotia le Mesia.

Talanoaga ma Fesili e Faatatau I Ai

O ai na iloa atu e Setefano ina ua tepa ae o ia i le lagi? (Galuega 7:55.) O ai sa i ai faatasi ma Setefano a o molimau atu o ia e uiga i le Tama Faalelagi ma Iesu? (O le Agaga Paia).
Pe na vaaia ea e tagata o e sa siomia Setefano le faaaliga na ia vaai i ai? O le a le mea na latou fai? (Galuega 7:57–59.) O a upu na tautala atu ai Setefano a o latou fetogia o ia i maa? (Galuega 7:59–60.) O le a sou manatu i le pogai na mafai ai e Setefano ona faamagalo tagata o e na fasiotia o ia?

Faaali le ata O Le Uluai Faaaliga.

Talanoaga ma Fesili e Faatatau I Ai

O ai se isi tagata faapea na vaai i se faaaliga o le Tama Faalelagi ma Iesu Keriso? (Talafaasolopito o Iosefa Samita 1:17.)
O le a se mea e mafai ona tatou aoao mai e uiga i le Tama Faalelagi, Iesu Keriso, ma le Agaga Paia mai faaaliga na oo ia Setefano ma Iosefa Samita? (E mafai ona e faaaoga gaoioiga e faatosina mai ai 4 ma le 5 e fesoasoani i tamaiti e aoao ai e uiga i tagata o le Aiga Atua.)
Pe faapefea ona tatou iloa o lo o soifua le Tama Faalelagi ma Iesu Keriso? O le a le mea e tatau ona tatou fai ina ia agavaa ai i tatou mo le mafuta mai o le Agaga Paia? Fesoasoani atu i tamaiti ina ia malamalama e faapea afai tatou te usiusitai i poloaiga, e mafai ona tatou maua se molimau e uiga i le Tama Faalelagi ma Iesu Keriso e ala i le Agaga Paia.

Gaoioiga e Faamauoa Ai

E mafai ona e faaaogaina se tasi pe sili atu foi o nei gaoioiga i soo se taimi o le lesona pe faaaoga foi o se toe iloiloga, otootoga, po o se lu’i.

Faitau le Ioane 17:20–21 ma ia talanoaina le auala e “tasi” ai le Tama Faalelagi, Iesu Keriso, ma le Agaga Paia i le faamoemoe. E mafai ona e faatatauina lau faamatalaga e uiga i le faataitaiga o se tama, tina, ma le fanau e galulue faatasi mo se faamoemoega e tasi.

Atonu foi e te faamatala atu le tiute o tagata taitoatasi o le Aiga Atua i a tatou tatalo: Tatou te tatalo i le Tama Faalelagi i le suafa o Iesu Keriso, ae oo mai tali e ala i le Agaga Paia.
Ia faamatala atu e i ai tagata lototetele, ma le faatuatua e ese mai ia Setefano o e foi na avea ma tagata e maliu fasia ona o la latou molimau ma le faatuatua e uiga i le Tama Faalelagi ma Iesu Keriso. Ia molimau ma le faatuatua e uiga i le Tama Faalelagi ma Iesu Keriso. Ia faaaoga faataitaiga e pei o ia o lo o i lalo mai tusitusiga paia:

Sa sauaina Iosefa Samita ina ua faamatala atu e ia i isi e uiga i le faaaliga na ia maua, ma sa maliu fasia Iosefa ma lona uso o Ailama i se taimi mulimuli ane.

Sa sauaina le toatele o soo anamua ma Aposetolo o le ekalesia ma o nisi sa maliu fasia. Sa maliu fasia Iakopo (Galuega 12:2) ma sa faapea foi Paulo, ma ua talia e tusa ai ma upu tuu e faapea sa maliu fasia foi Peteru, Mareko, ma Mataio, (tagai “Mareko,” “Mataio,” “Paulo,” ma “Peteru” i le Taiala mo Mau.

Ia ta’u mai e tamaiti ia te oe le mea ua mafai ona latou aoao mai faataitaiga a nei tagata faatuatua.
Ia toe faamanatu le mataupu faavae lona lima o le faatuatua. Ia talanoa e uiga i le auala ua valaauina ai tagata e taitai o le ekalesia i aso nei i tofiga o le ekalesia, e pei foi ona sa valaauina Setefano e fesoasoani i Aposetolo anamua. Ia faamatala atu e faapea afai e maua e se tagata se valaauga, e faamanuiaina o ia i le faaee atu o lima ma tuuina atu le pule e fai ai tiute tauave faapitoa. Fesoasoani atu i tamaiti ina ia malamalama afai e auauna atu alii ma tamaitai talavou i au Peresitene o korama o le perisitua po o vasega a Tamaitai Talavou, o le a valaauina i latou ma faamanuia i lea lava ala e tasi.
Faitau ma talanoaina le Mataupu Faavae ma Feagaiga 130:22–23. Fesoasoani atu i tamaiti ina ia malamalama o le Tama Faalelagi ma Iesu Keriso o lo o i ai ni o la tino faamamaluina o aano ma ivi. O o tatou tino faaletino o lo o i ai i le faatusa o le Tama Faalelagi ma Iesu. O le Agaga Paia o se peresona o agaga, e le o i ai se tino o aano ma ivi.
Ia faaali atu fasipepa o upu pe tusia upu i luga o le laupapa:
- O le Aiga Atua
- Tama Faalelagi:
- Iesu Keriso:
- O le Agaga Paia:
Ia tusia faamatalaga o loo i lalo o loo faamatalaina ai tagata o le Aiga Atua i ni fasipepa eseese. Tagai e tatau ona e saunia ni fasipepa se lua e tusia ai upu “E i ai se tino faamamaluina o aano ma ivi.”
- Tama Faalelagi:
  - O le Tama o o tatou agaga
  - O le Tama o le tino faaletino o Iesu
  - E i ai se tino faamamaluina o aano ma ivi
  - Tatou te tatalo atu ia te ia
- Iesu Keriso:
  - O lo tatou Faaola ma le Togiola
  - O lo o i ai se tino faamamaluina o aano ma ivi
  - Na ia foafoaina le lalolagi
  - Sa i ai sona tina faaletino
- O le Agaga Paia:
  - O se peresona o Agaga
  - E molimau e uiga i le Tama Faalelagi ma Iesu
  - E faaalia le moni o mea uma (Moronae 10:5)
  - E mafai ona avea ma a tatou uo tumau
Toe faamanatu le tiute o tagata taitoatasi o le Aiga Atua e ala i le tuuina atu i tamaiti o se avanoa e filifili ai se fasipepa e tasi o fasipepa ua uma ona e saunia. Ia faitau leotele e tamaiti taitoatasi le faamatalaga o lo o tusia ai, filifili po o le fea tagata o le Aiga Atua e faatatau i ai, ma ia tuu lea faamatalaga i lalo o le ulutala e tatau ai.
Usu pe faitau upu o le pese, po o le (Talosaga Muamua a Iosefa Samita, Viiga, nu. 14).

Faaiuga

Molimau

Ia tuuina atu lau molimau ua e iloa le Aiga Atua, ma ia ta’u atu i tamaiti le taua tele ia te oe o le maua o le malamalamaaga. Ia faamatala atu i tamaiti lou alofa i le Tama Faalelagi, Iesu Keriso, ma le Agaga Paia.

Tusi Fautuaina e Faitau i le Fale

Ia fautuaina e suesue e tamaiti le Galuega 7:54–60 ma le Mataupu Faavae ma Feagaiga 130:22–23 i le fale e fai ma toe faamanatu o lenei lesona.

Tofi se tamaitiiti e faia le tatalo faaiu.