Tusi Lesona ma le Taimi o Fetufaaiga a le Peraimeri
Lesona 37: Peteru le Aposetolo

Lesona 37

Peteru le Aposetolo

Faamoemoega

Ina ia fesoasoani i tamaiti ia malamalama e mafai foi e i latou, e pei o Peteru, ona faatupuina se molimau sili atu ona malosi e uiga ia Iesu Keriso.

Sauniuniga

  1. Suesue ma le agaga tatalo le Mataio 4:18–19; 14:22–33; 16:13–17; 17:1–9; Luka 22:31–34, 54–62: Galuega 3:1–9; 4:6–20; 5:12–42; ma le Alema 32:21. Ona suesue lea i le lesona ma iloilo pe faapefea ona e manao e aoao tamaiti i le talafaatusi paia. (Tagai “Saunia Au Lesona,” i.0 [ vi,] ma le “Aoao Atu Mai Tusitusiga Paia,” i. 0 [vii].)

  2. Filifili ia fesili e talanoaina ma gaoioiga e faamauoa mai ai lea o le a aafia ai tamaiti ma o le a sili ona fesoasoani ia i latou ia mauaina le faamoemoega o le lesona.

  3. Mea e manaomia: Se Tusi Paia po o se Feagaiga Fou mo tamaiti taitasi.

Faalautelega Fautuaina o le Lesona

Tofi se tamaitiiti e faia le tatalo amata.

Gaoioiga e Faatosina Mai Ai

Ia fai atu i tamaiti e faalogologo lelei a o e faamatala atu ia i latou tala o lo o i lalo.

Tala 1: Ina ua faamatala atu e Iesu e faapea e le o toe mamao ae fasiotia o ia, sa faapea mai se tasi alii, “ua ou sauni ta te o faatasi ma oe i le falepuipui atoa ma le oti” (Luka 22:33). O le alii lava lea na mulimuli atu i le motu o tagata i le taimi na pu’eina ai faatagata o taua Iesu ma aveina atu e faamasinoina. Sa alu ane se tasi tamaitai ma faapea mai sa faatasi lenei tagata ma Iesu, ae sa faafiti lenei alii, ua faapea atu, “ou te le iloa o ia.” E le i umi sina taimi ae alu ane se tagata ma faapea mai, “O oe foi le tasi o i latou.” Sa toe faafiti foi lenei alii na te le iloa Iesu. Sa alu ane se tasi tagata lona tolu ma tusi mai lona lima ia te ia e faapea o se tasi lea o soo o Iesu, ae sa toe faapea atu lenei alii, “Ou te leiloa le mea o lo o e fai mai ai.” (Tagai Luka 22:54–62.)

Tala 2: I se tasi aso sa taofia se tasi o alii ma ana uo e se tagata na fanau mai o pipili. Sa faapea atu lea alii i le tagata pipili, “I le suafa o Iesu Keriso o le Nasareta, ina tu ai ia i luga, ma savali” (tagai Galuega 3:6). Sa tago lenei alii i le lima o le tagata pipili ma alu atu i le malumalu “o lo o savali mai ma oso ma vivii atu i le Atua” (tagai Galuega 3:8). Ina ua faalogo le Au Faitaulaga sili e uiga i lenei mea, sa fesili i latou po o le pule a ai na faamaloloina ai le tagata pipili. Sa faapea atu le alii o le na ia faamaloloina le tagata pipili o le mana o Iesu Keriso, e ui lava ina sa iloa e lea alii e tuuina ai o ia i le falepuipui pe faaumatia ai ona o lona fai atu faapea. Sa poloaiina e le Au Faitaulaga Sili le tagata ina ia aua nei toe aoao atu le suafa o Iesu Keriso. Peitai sa tali atu o ia e sili ona taua le usitai i le Atua nai lo le usitai i faitaulaga sili pepelo o Iutaia ma o le a faaauau pea ona aoao atu o ia i le suafa o Keriso. (Tagai Galuega 3:1–9; 4:6–20.)

Ia faamatala atu o le alii o lo o taua i nei tala uma e lua o Peteru lea. I le taimi na faafiti ai Peteru e uiga i lona iloa o Iesu i le taimi ao le i faasatauroina o ia sa aoao pea o ia i lea taimi ma tuputupu ae lona malamalama. Sa pue faatagataotauaina Iesu, ma sa fefe Peteru. I le taimi na faamalolo ai e Peteru le tagata pipili, sa maua e ia le Agaga Paia ma sa ia te ia se molimau e sili atu ona malosi e uiga ia Iesu Keriso. Sa avea lea ma mea na maua ai e ia le malosi e fai ai le mea sa’o e tusa lava po o le a le mea e ono tupu ia te ia.

Gaoioiga e Faatosina Mai Ai

  • O le a le mea e tau o se molimau? (O le malamalama lea e maua e le tagata e uiga ia Iesu Keriso faapea ma le moni o lana Ekalesia.) Ia faamatala atu e faapea e mafai ona fesoasoani lenei lesona i le faamalosia o molimau a tamaiti e uiga ia Iesu Keriso.

Tala Faatusi Paia ma Fesili e Faatatau I Ai

Ia aoao atu i tamaiti tala e uiga ia Peteru ma ia talanoaina mea taitasi. Suesue i fesili o lo o i lalo ma mau a o e faitauina lau lesona. Faaaoga fesili ua e lagona o le a sili ona fesoasoani i tamaiti e malamalama ai i tusitusiga paia ma faatino mataupu i o latou olaga. O le faitauina o mau faatasi ma tamaiti i le vasega o le a fesoasoani ia i latou e maua ai se malamalamaaga i ia mau.

Tala Faatusi Paia ma Fesili e Faatatau I Ai

  1. Sa mulimuli Peteru ia Iesu (Mataio 4:18–19)

    • O le a sou manatu i le pogai na mulimuli ai Peteru ia Iesu Keriso ina ua mavae ona ta’u atu e Iesu po o ai o ia? O le a le mea sa tatau ia Peteru ona tuu ese ina ia mulimuli atu ia Iesu? O le a le mea e tatau ona tatou tuu ese ina ia mulimuli ai ia Iesu? Pe sa faapefea ona faamanuiaina oe ona o le mulimuli i le Faaola?

  2. Sa savavali Iesu ma Peteru i luga o le vai (Mataio 14:22–33).

    • O le a sou manatu i le pogai na mafai ai e Iesu ona savali i luga o le vai? (Mataio 14:25.) Aisea na mafai ai e Peteru ona savali atu e faafetaiai Iesu? (Mataio 14:28–29).

    • O le a le mea na tupu ia Peteru ina ua uma ni nai ana laa? (Mataio 14:30–31.) O le a sou manatu e uiga i le pogai na vaivai ai le faatuatua o Peteru? Pe na faapefea ona fesoasoani atu Iesu ia Peteru ina ua vaivai lona faatuatua? (Mataio 14:31.) Aisea e vaivai ai lo tatou faatuatua i nisi taimi? Pe faapefea ona fesoasoani mai Iesu Keriso i le faamalosia o lo tatou faatuatua? (E ala i le Agaga Paia, o tatou matua, taitai o le Ekalesia, uo mamae, Tusitusiga Paia, ma isi mea.)

    Fesoasoani atu i tamaiti ina ia malamalama o taimi uma tatou te faia ai se mea ua poloaiina ai i tatou e le Tama Faalelagi ma Iesu Keriso e fai, o lona uiga o lo o tatou faaalia lo tatou faatuatua. Ma o taimi taitasi tatou te faaalia ai le faatuatua, o le a malosi atili lo tatou faatuatua. E tatau e pei foi o Peteru, ona tatou faaaogaina lo tatou faatuatua e mulimuli ai i aoaoga a Iesu, ona fesoasoani lea o lo tatou faatuatua i le faamalosia o a tatou molimau.

  3. Sa molimau atu Peteru o Iesu Keriso o le Alo o le Atua (Mataio 16:13–17).

    • O ai na fai mai Peteru o Iesu Keriso? (Mataio 16:16.) Pe sa faapefea ona iloa e Peteru lenei mea? (Mataio 16:17. E ala i le Agaga.) Pe mafai faapefea e i tatou, e pei foi o Peteru, ona faaalia a tatou molimau e uiga ia Iesu Keriso?

  4. Sa faatasi Peteru ma Iesu Keriso i luga o le Mauga o Liua (Mataio 17:1–9; tagai “Talanoaga o le Aotelega ma Fesili e Faatatau i Ai” i le lesona 15, i. 00 (51).

    • O le a le mea na tupu ia Iesu Keriso i le Mauga o Liua? (Mataio 17:2.) O ai na faaali ia Iesu ma Peteru, Iakopo, ma Ioane? (Mataio 17:3.) O le siufofoga o ai na faalogo i ai le au soo? (Mataio 17:5.) O le a sou manatu i le pogai na faamalosia ai le molimau a Peteru e uiga ia Iesu Keriso ona o lenei mea?

  5. Sa faamalolo e Peteru ma Ioane se tagata pipili ma sa tuuina atu i laua i le falepuipui (Galuega 3:1–9; 4:6–20; 5:12–42).

    Ia alu ane se tamaitiiti e toe faamatala mai le tala e uiga i le faamaloloina e Peteru ma Ioane o le tagata pipili. Ia faamatala atu le isi vaega o le tala mai le Galuega 5:12–42.

    • Sa faapefea ona sosola ese Peteru ma Ioane mai le falepuipui? (Galuega 5:19.) O le a le mea na ta’u atu e le agelu ia i laua e fai? (Galuega 5:20.) O le a sou manatu e uiga i le toe fo’i atu e talai ina ua uma ona tuu i le falepuipui mo le faia o lea mea? O le a sou manatu e uiga i le auala na maua ai e Peteru ma Ioane le malosi e faia ai le mea sao?

    Fesoasoani atu i tamaiti ina ia malamalama atonu e le tuuina lava i tatou i le falepuipui ona o le talai atu e uiga ia Iesu Keriso, ae o le a faamasinoina i tatou i isi auala. Pe na faapefea ona faaosoosoina oe i lou olaga ona o lau molimau e uiga ia Iesu Keriso? (tagai i Gaoioiga e Faamauoa Ai 4.)

    • Sa faapefea ona tuputupu ae le molimau a Peteru e uiga ia Iesu Keriso? Aisea e tatau ai ona tatou maua se molimau lelei e uiga ia Iesu Keriso? Pe faapefea ona tatou maua lenei molimau? Pe mafai faapefea ona tatou fesoasoani atu ia tatou molimau ina ia tuputupu atili? (faitau tusitusiga paia, faitau atili e uiga ia te ia, tausia poloaiga, tatalo, faalogo i le Agaga Paia, auai i le lotu, ma isi mea.)

Gaoioiga e Faamauoa Ai

E mafai ona e faaaoga se tasi pe sili atu foi o nei gaoioiga i soo se taimi o le lesona pe faaaoga foi o se toe iloiloga, otootoga, po o se lu’i.

  1. Fesoasoani i tamaiti ia malamalama o se molimau e aofia ai le iloa o mea nei:

    • O lo o soifua le Tama Faalelagi ma o le Tama o o tatou agaga.

    • O Iesu Keriso o le Alo o le Tama Faalelagi ma o lo tatou Faaola.

    • O Iosefa Samita o le Perofeta lea na toefuataiina mai i ai e le Alii le talalelei i aso e gata ai.

    • O le Tusi a Mamona o le afioga lea a le Atua ma o lo o i ai le atoaga o le talalelei.

    • O le ekalesia a Iesu Keriso o le Au Paia o Aso e Gata Ai ua pau lea o le ekalesia moni.

    • O lo o taitaiina i tatou e Perofeta ma Aposetolo i aso nei.

    Ia talanoaina ala e mafai ona tatou maua ai se molimau e uiga i nei mea.

  2. Ia faamatala atu ma fesoasoani i tamaiti i le taulotoina o le Mataupu Faavae lona iva o le Faatuatua.

  3. Ia fai atu i tamaiti e mafaufau e uiga i mea na oo ia Peteru ma le Faaola na faatupu atili ai lana molimau e uiga ia Iesu Keriso. (Fafagaina o le 5,000, faamaloloina o e mamai, faatuina o le afafine o Iairo mai le oti, ma isi mea.) Pe mafai faapefea ona tatou iloa mo i tatou lava o Iesu Keriso o le Alo o le Atua? (E ala i le suesue i tusitusiga paia, tatalo, usiusitai i poloaiga, ma isi mea.)

  4. Ia ta’u mai e tamaiti nisi ala atonu e taumafai ai isi tagata ina ia faafitia e i latou le Ekalesia pe faia se mea sese. Ona talanoa lea e uiga i le auala e mafai ona lava ai lo latou malosi e tetee atu i ia faaosoosoga. Faaaoga faataitaiga o lo o i lalo, pe afai e tatau ai:

    • Ua taumafai se tasi e taofi i latou mai le auai i sauniga o le ekalesia.

    • Ua taumafai se tasi ina ia solia e i latou le Upu o le Poto.

    • Ua taumafai se tasi ina ia latou talapepelo.

    • Ua taumafai se tasi e faaosooso i latou e faaaoga a latou tupe o le sefuluai.

    Ia faamamafa atu e tatau ona tatou maua se molimau a le tagata lava ia e uiga ia Iesu Keriso ina ia malolosi ai e pei o Peteru.

  5. Ia faamatala atu le tala o lo o i lalo e uiga i se mea na tupu ia Peresitene Iosefa F. Samita, le peresitene lona ono o le Ekalesia, a o avea o ia ma se alii talavou ua foi atu i lona aiga mai lana misiona:

    “I se tasi aso a o le i mamao ona malaga ese atu Iosefa F. Samita ma ana soa ma tolauapi i se tasi mea, sa tietie mai i ni solofanua se vaega o alii e onana, ma ua ta’uleagaina ma palalauvale ma tau faamata’u latou te fasiotia soo se tagata Mamona e oo atu i le mea o lo o latou ui ai. Sa oo atu i lalo se savaliga a nisi o soa a Iosefa i tafatafa o le vaitafe ma ua le iloa atu ae faalogo atu loa i latou ua omai nei alii. Sa faatali i latou i lea mea seia sopoia atu e lea vaega o tagata le vaitafe. Sa fai sina mamao ese o Iosefa F. Samita mai le tolauapiga, ma sa fai mai e ia ni fafie mo le afi ae o atu loa ma nei tagata i solofanua. Ina ua iloa atu e Iosefa F. Samita i latou, sa fai mai o ia o le mafaufauga muamua lava na oo mai ia te ia o le alu atu lea ma saili se mea e lafi ai. Ona oo mai lea o le mafaufauga ia te ia, “Aisea o le a ou momoe ese ai mai nei tagata? Faatasi ma lena mafaufauga sa iai ia te ia, sa ia savali atu loa ma le totoa i le tolauapiga ma ona lima e tumu i fafie. Sa faaata mai e se tasi tagata lana fana i le faifeau talavou ma valaau atu i se leotele ua taalili i le ita, ‘O oe o se “Mamona”?’

    “Sa le i faatuai Iosefa F. Samita mo se taimi. Sa tilotilo sa’o atu o ia i lea tagata i ona mata ma tali atu, ‘Ioe, alii e; o a’u o se Mamona a’ia’i.”

    “Sa tali atu o ia e aunoa ma se faailoga o le fefe ma sa matua faatei’a ai lea tagata. Sa tago atu lea tagata ma u’u mai le lima o Iosefa F. Samita ma faapea atu: “Alii e, o oe o le tagata aupito sili ona tauagafau ua ou feiloai i ai! Talofa, alii talavou e, ua ou fiafia e vaai atu i se tagata e tumau i ona talitonuga.” (Joseph Fielding Smith, The Life of Joseph F. Smith, pp. 188–89).

  6. Fesoasoani i tamaiti e tauloto le Galuega 5:29.

  7. Usu pe faitau upu o le pese “Molimau” (Viiga, numera 74), fuaiupu 1 ma le 2.

Faaiuga

Molimau

Ia tuuina atu lau molimau e uiga ia Iesu Keriso, ma ia molimau atu e faapea a o tatou aoao atili e uiga ia Iesu ma faalogo i le molimau a le Agaga Paia, o le a faaauau pea ona faateleina a tatou molimau e uiga ia Iesu i o tatou olaga atoa. Ia faamatala atu e faapea atonu e i ai pea lava masalosaloga ma fesili i o tatou mafaufau, peitai a o faaauau ona tatou suesue i tusitusiga paia, tatalo, ma usiusitai i poloaiga, o le a sili atu ona malolosi a tatou molimau.

Tusi Fautuaina e Faitau i le Fale

Ia fautuaina e suesue e tamaiti le Mataio 16:13–17 ma le Galuega 5:29–32 i le fale e avea ma se toe faamanatu o lenei lesona.

Tofi se tamaitiiti e faia le tatalo faaiu.