Faataoto i Taupou e Toasefulu

Faamoemoega

Ina ia uunaiina tamaiti taitoatasi ina ia saunia faaleagaga mo le afio faalua mai o Iesu Keriso.

Sauniuniga

Suesue ma le agaga tatalo le Mataio 25:1–13 ma le Mataupu Faavae ma Feagaiga 45:56–57, 63:53–54. Ona suesue lea o le lesona ma iloilo pe faapefea ona e manao e aoao atu i tamaiti le tala faatusi paia (Tagai i le “Saunia o Au Lesona,” itulau 0 [vi,] ma le “Aoao Atu Mai Tusitusiga Paia,”itulau 0 [vii]).
Filifili ia fesili e talanoaina ma gaoioiga e faamauoa mai ai lea o le a aafia ai tamaiti ma o le a sili ona fesoasoani ia i latou ia mauaina le faamoemoega o le lesona.
Mea e manaomia:
1. Se Tusi Paia poo se Feagaiga Fou mo tamaiti taitasi
2. O upu nei ua tusia i fasipepa
  - Taupou e toasefulu = Tagata o le Ekalesia
  - Suauu = Sauniuniga faaleagaga
  - Faatoafaiava = Iesu Keriso
  - Faaipoipoga = Afio faalua mai o Iesu
3. Ata 7-25, O le Afio Faalua Mai (Taga Ata o le Talalelei 238; 62562)

Faalautelega Fautuaina o le Lesona

Tofi se tamaititi e faia le tatalo amata.

Gaoioiga e Faatosina Mai Ai

Fai atu i tamaiti e faafoliga o loo alu se faigamalaga a le vasega.

Gaoioiga e Faatosina Mai Ai

O le a le mea e moomia ona tatou faia ina ia saunia ai mo le faigamalaga?
O a mea e tatau ona tatou aveina?

Ia e faapea atu, “O le a alu sa matou malaga ma o le a matou aveina ia ,” ta’u se mea se tasi. Fai atu i se tamaititi na te faia le fuaiupu lava lena e tasi, ia aofia ai le mea na e ta’uina atu, ma faaopoopo iai ma se isi mea. Ia faaauau i totonu o le potu atoa, ma tuu atu i tamaiti uma e ta’uina mai mea na ta’uina muamua ma faaopoopo iai se mea se tasi. Tuu atu i tamaiti taitoatasi se avanoa se tasi poo le lua, e fuafua i le toatele o lau vasega. Ia fesoasoani atu iai i le faalauina o mea taitasi pe afai e manaomia.

Ia faamatala atu iai o sauniuniga o se mea taua i le tele o mea i o tatou olaga.

Gaoioiga e Faatosina Mai Ai

O a nisi o mea atonu e mafai ona tatou sauniuni iai e ese mai se faigamalaga?

Ia talanoaina puupuu ia sauniuniga tatou te faia mo le aoga, mo se meaai, mo se afiafi faaleaiga, ma isi mau mea. Ta’u atu i tamaiti o lenei lesona o le a latou aoaoina ai pe faapefea ona latou saunia faaleagaga mo se mea ofoofogia o le a tupu i le lumanai.

Tala Faatusi Paia

Aoao atu i tamaiti le faataoto i taupou e toasefulu (Mataio 25:1–13). (Mo ala fautuaina e aoao atu ai le tala faatusi paia, tagai i le “Aoao Atu Mai Tusitusiga Paia, i. vii.) Ta’u atu i tamaiti e masani lava ona aoao atu Iesu i faataoto, i le faaaogaina lea o mea e masani ai ma tulaga e aoaoina ai se upu moni faaleagaga o loo natia. Na ia faaaogaina faataoto ina ia malamalama ai i le upu moni na o i latou lava o loo naunau e suesue le faataoto (tagai i le Mataio 13:10–17). Fesoasoani i tamaiti ina ia malamalama o lenei faataoto e faatatau i le afio faalua mai o Iesu Keriso, o le taimi lena e toe afio mai ai le Faaola i le lalolagi e nofo tupu i le Meleniuma, i se faaipoipoga.

Ia faamatala atu, o le faataoto i taupou e toasefulu, o loo faatatau lea i aganuu o faaipoipoga a Iutaia anamua. E faafeao mai e le faatoafaiava ma ana uo le faatoanofotane mai lona fale i le fale o le faatoafaiava. Ae o loo faatalitali mai i le auala ia uo a le faatoanofotane latou te malaga faatasi. A latou taunuu atu i le fale o le faatoafaiava, ona latou o atu uma lava lea i totonu mo le faaipoipoga. O nei faaipoipoga e masani lava ona faia i afiafi, o lea la, o i latou o loo faatalitali mo le faatoanofotane ma le faatoafaiava latou te tauaveina ni lamepa.

Talanoaga ma Fesili e Faatatau I Ai

Suesue fesili ma mau o loo taua i lalo a o e saunia lau lesona. Faaaoga fesili e te lagona o le a sili ona fesoasoani ai i tamaiti ia malamalama i mau ma faaaoga ai mataupu faavae i o latou olaga. O le faitauina faatasi ma tamaiti o mau i le vasega o le a fesoasoani latou te mauaina ai malamalamaaga i tusitusiga paia.

Talanoaga ma Fesili e Faatatau I Ai

O ai o loo faatusa iai nei taupou e toasefulu? (Mataio 25:1.) O ai o loo faatusa iai le faatoafaiava? (Iesu Keriso.)
E faapefea ona tatou iloa o taupou uma lava e toasefulu sa talitonu ia Iesu Keriso? (Mataio 25:6–7. Sa latou o atu ma faafetaiai i le faatoafaiava ma faatalitali mo ia.) E mafai faapefea ona tatou faaali atu tatou te talitonu ia Iesu?
Aisea na faatusa ai isi taupou e toalima e valea? (Mataio 25:3.) Aisea na faatusa ai le isi toalima e popoto? (Mataio 25:4.)
O le a le mea na tupu ina ua sau le faatoafaiava? (Mataio 25:6–8.) Aisea tou te manatu ai o taupou valea e toalima e le’i saunia i latou? O le a se tou manatu e mafai faapefea ona tatou saunia pe a toe afio mai Iesu?
O le a se tou manatu aisea na le fetufaai atu ai e taupou popoto e toalima a latou suauu? (Mataio 25:9.) Aisea na le mafai ai ona avatu se vaega o a latou suauu i isi? Ia faamatala atu o foliga o le lamepa a Iutaia, o augutu i fafo e faaofuofu i totonu, e toetoe ai lava a le mafai e se tasi ona sasaa atu sana suauu mai le isi lamepa i le isi (tagai i le ata o loo i le faaiuga o le lesona). I le faataoto, o le suauu o loo i totonu o lamepa a taupou popoto e faatusa lea i lo latou ola amiotonu ma le usiusitai. Tatou te faatumuina e i tatou a tatou lava lamepa, lea e faatusa i o tatou lava olaga, i lo tatou usiusitai ma le amiotonu. O faamanuiaga a le Tama Faalelagi ia i tatou mo o tatou uiga amiotonu e le mafai ona tuuina atu i e le usiusitai.
O le a le mea na tupu i le toalima e le’i saunia? (Mataio 25:10–12.) O le a le mea na tupu i le toalima na saunia? Aisea e taua ai ia i tatou ona saunia nei mo le Afio Faalua Mai? E faapefea ona tatou faatutumuina a tatou lamepa i le suauu?

Faitau le upusii lenei mai ia Elder Bruce R. McConkie: “I le avea ai ma tagata taitoatasi, tatou te saunia e fetaiai ma le Atua e ala lea i le tausiaina o ana poloaiga ma ola ai i ana tulafono…. O le talalelei i lona atoatoaga, na toefuataiina mai i nei aso e gata ai, ua iai iinei ina ia saunia ai se tagata mo le afio faalua mai o le Atalii o le Tagata” (The Millenial Messiah, p. 572).

Fai atu i tamaiti e faitau le Mataio 24:36 ma le 25:13. Ia faamatala atu iai e pei lava ona leiloa e taupou e toasefulu le taimi tonu o le a sau ai le faatoafaiava, e faapena foi ona tatou leiloa tonu foi le taimi o le a toe afio mai ai Iesu.

Talanoaga ma Fesili e Faatatau I Ai

O le a faapefea le toe afio mai o Iesu Keriso? (MFF 45:56–57; 63:53–54.) O a faamanuiaga o loo teuina mo i latou e saunia faaleagaga? (MFF 38:30.)

E mafai ona e faaaogaina le gaoioiga e faamauoa mai ai lona 2 e avea o se iloiloga ma se faatatauga i lenei lesona.

Gaoioiga e Faamauoa Ai

E mafai ona e faaaogaina se tasi poo le sili atu foi o nei gaoioiga i soo se taimi o le lesona poo le faaaoga foi o se toe iloiloga, aotelega, poo se lu’i.

Ia talanoaina faapuupuu le faamatalaga lenei ina ia faamasani ai tamaiti i le afio faalua mai o Iesu Keriso.
- Ina ua tuua e Iesu lona Au Aposetolo i Ierusalema, na tau atu e agelu ia te i latou o le a toe afio mai o ia faalua. (Galuega 1:9–11).
- E na o le Tama Faalelagi na te silafia le taimi o le Afio Faalua Mai. (Mataio 24:36.)
- O le a afio mai Iesu i le mana ma le mamalu ma nofotupu i le lalolagi mo le afe tausaga. (MFF 29:11.)
- E moomia lo tatou saunia lelei mo le afio faalua mai o Keriso. (MFF 33:17–18.)
- O tagata amiotonu o e ua saunia mo le afio faalua mai o Iesu o le a faatasi ma ia i lena aso tele ma o le a mau faatasi i le afioaga o le Tama Faalelagi ma Iesu e faavavau. (MFF 76:62–63.)
Tufa atu i tamaiti uma se kopi o le lamepa o loo i le faaiuga o le lesona, poo le tusi o se lamepa i luga o le laupapa. Fai atu i tamaiti e tusi ni mea i luga o a latou lamepa, poo le ta’u atu foi o ni mea e mafai ona e tusia i luga o le laupapa o le a faatumuina ai a latou lamepa faaleagaga i le suauu (o nisi manatu e mafai ona aofia ai le tuuina atu o se molimau, aoaoina o le talalelei, auauna atu i isi, totogiina o le sefuluai, ola agavaa mo le faatasi atu o le Agaga Paia, tatalo, faataunuuina o tofiga o le Ekalesia, ma isi.) Fesoasoani ia i latou ia latou iloaina o mea nei e tatau ia i latou taitoatasi ona iai poo lo latou faia ina ia mafai ai ona iai le suauu i totonu o a latou lamepa, e pei ona faia e taupou popoto e toalima.

Faatusatusa mea na tusia e tamaiti i luga o a latou lamepa ma manatu nei o Peresitene Spencer W. Kimball: “I o tatou olaga, o le suauu o le saunia e faatupuina lea i mataua taitasi o le ola amiotonu. O le auai i sauniga faamanatuga e faaopoopo ai le suauu i a tatou lamepa, o sina mataua i tausaga uma. O le anapogi, tatalo faaleaiga, aoaoga i aiga, puleaina o manaoga o le tino, talaiina o le talalelei, suesueina o tusitusiga paia—o gaoioiga uma taitasi o le naunautai ma le usiusitai o se mataua lea e faaopoopo atu i lo tatou fale teuoloa. O uiga agalelei, totogiina o taulaga ma sefuluai, o manatu ma uiga mama, o le faaipoipo i le feagaiga mo le faavavau—o nei foi uiga, e taua foi lo latou sao i le suauu lea e mafai ai ona tatou faatumuina ai i le valuapo a tatou lamepa ua toetoe a mamate” (Faith Precedes Miracles, p. 256).

Ia talanoaina ni auala e faaopoopo ai le suauu i a tatou lamepa lea e le’i taua muamua e tamaiti, ma tuu atu i tamaiti e faaopoopo nisi vaega i a latou lisi pe afai e mananao ai. Fesoasoani ina ia latou malamalama, o nei mea e le mafai ona tuueseina seiloga e afio mai le Faaola.
Faitau le upusii lenei mai ia Peresitene Spencer W. Kimball: “Sa iai taupou e sefulu i le malo, ma sa ia te i latou le aia tatau uma mo le mauaina o faamanuiaga—sei vagana ai le toalima sa le faamaoni, ma sa lei saunia ina ua oo mai le aso tele. Sa lei saunia i latou i le le ola ai i poloaiga uma. Sa matua oo le tiga i o latou loto, ina ua tapunia i fafo mai le faaipoipoga— e pei foi ona oo i tagata o loo ola i ona po nei [tagata o le Ekalesia i aso nei e le o saunia]” (O le Vavega o le Faamagalo Atu, i. 12)
Usu pe faitau upu o le “O Afea e Toe Afio Mai Ai” (Tusipese a Tamaiti, i. –). A maea ona usuina le pese, ona fai atu lea i tamaiti e mafaufau poo le a se tulaga o le a iai pe a fai atu Iesu ia i latou, “Ua e auauna ma le faamaoni ia te au. Sau ta mafuta faatasi ma oe.”

Faaiuga

Molimau

Ia tuuina atu lau molimau i le taua o le saunia mo le toe afio mai faalua o Iesu Keriso e ala lea i le ola amiotonu. Ia fetufaai ma tamaiti le taua ia te oe o le agavaa ina ia mafai ona e auai i lena aso tele.

Tusi Fautuaina e Faitau i le Fale

Ia fautuaina e suesue e tamaiti le Mataio 25:1–13 i le fale e fai ma toe faamanatu o lenei lesona.

Tofi se tamaititi e faia le tatalo faaiu.

Ata

oil lamp