Ua Valaauina e Iesu Ana Aposetolo

Faamoemoega

Ina ia fesoasoani i tamaiti taitoatasi ia faateleina le alofa ma le faaaloalo mo Aposetolo ua valaauina e Iesu e fai ma ana molimau faapitoa.

Sauniuniga

Suesue ma le agaga tatalo le Mataio 4:18–22, Luka 5:1–11, 6:12–16, Mataio 16:13–19, Mareko 3:13–19, 16:15, Galuega 10:39–43, 3 Nifae 12:1–2, ma le Mataupu Faavae ma Feagaiga 107:23. Ona suesue lea o le lesona ma iloilo pe faapefea ona e manao e aoao atu le tala faatusi paia (tagai “Saunia o Au Lesona,” i. 0 [vi], ma le ”Aoao Atu Mai Tusitusiga Paia,” i. 0 [vii] ).
Tusi faitau faaopoopo: Mataio 10:2–4, Mareko 1:16–20, ma le Ioane 1:35–51.
Filifili ia fesili e talanoaina ma gaoioiga e faamauoa mai ai lea o le a aafia ai tamaiti ma o le a sili ona fesoasoani ia i latou ia mauaina le faamoemoega o le lesona.
Mea e manaomia:
1. Se Tusi Paia po o se Feagaiga Fou mo tamaiti taitasi.
2. Ni tusi Mataupu Faavae ma Feagaiga.
3. Siata o le Mataupu Lona Ono o le Faatuatua (65006).
4. Ata 7–10, Iesu ma le Au Fai Faiva (Taga Ata o le Talalelei 209; 62496), ma le 7-11, O Iesu Keriso o loo Faauu le Au Aposetolo, (Taga Ata o le Talalelei 211; 62557), ma ata o Aposetolo o loo i ai nei (64329–64378. Afai e le o maua ata i le faletusi o la outou uarota/paranesi, ona vaai lea o se mekasini lata mai nei o se konafesi a le Ekalesia).

Faalautelega Fautuaina o le Lesona

Tofi se tamaitiiti e faia le tatalo amata.

Gaoioiga e Faatosina Mai Ai

Tusi mau nei i luga o le laupapa:

Gaoioiga e Faatosina Mai Ai

Ia sue e tamaiti mau e saili ai se upu taua i mau taitasi. Atonu e te manao e galulue faatasi tamaiti i ni vaega taitoalua pe toatolu foi. Afai latou te moomia se fesoasoani, ona ta’u lea i ai o le upu e amata i le mataitusi A (Aposetolo).

Ia faitau e se tamaitiiti le Mataupu Faavae ma Feagaiga e 107:23 i le vasega ina ia iloa ai pe aisea e taua ai se Aposetolo o se auauna a le Alii.

Tala Faatusi Paia

Ia faaali ata i le taimi talafeagai, a o aoao atu tala e uiga ia Iesu ma le valaauina o ona soo (Mataio 4:18–22; Luka 5:1–11) ma ana Aposetolo e Toasefululua mulimuli ane ai (Mareko 3:13–19; Luka 6:12–16. (Mo auala fautuaina e aoao atu ai tala faatusi paia, tagai i le “Aoao Atu Mai Tusitusiga Paia,” i. vii.)

A o e aoaoina atu nei tala, ia mautinoa e malamalama tamaiti o Iesu e toatele i latou na mulimuli ai, e ta’ua o ona soo. Ina ua ia valaauina muamua Peteru, Aneterea, Iakopo ma Ioane mai o latou vaa fagota, na ia valaauina i latou e fai ma ona soo. Mai lea vaega tele o soo, sa ia filifilia mai ai tagata e toasefululua e avea ma ona Aposetolo (tagai Luka 6:13). Sa ia faauuina i latou i le ala lava e tasi o loo faauuina ai Aposetolo i aso nei, e ala i le faaee atu o lima, ma tuuina atu i ai le pule lava e tasi e pei ona umia e Aposetolo i aso nei (tagai Mareko 3:13–15).

Talanoaga ma Fesili e Faatatau I Ai

Suesue fesili ma mau o loo taua i lalo a o e saunia lau lesona. Faaaoga fesili e te lagona o le a sili ona fesoasoani ai i tamaiti ia malamalama i mau ma faaaoga ai mataupu faavae i o latou olaga. O le faitauina faatasi ma tamaiti o mau i le vasega o le a fesoasoani latou te mauaina ai malamalamaaga i tusitusiga paia.

Talanoaga ma Fesili e Faatatau I Ai

O a galuega sa faia e Peteru, Aneterea, Iakopo, ma Ioane e ola ai? (Mataio 4:18–2.) O le a le uiga o le avea ma “faifaiva i tagata”? (Mataio 4:19.) O faapefea ona avea Aposetolo i aso nei ma “faifaiva i tagata”? (MFF 18:27–29.)
Na faapefea ona tali atu Peteru, Aneterea, Iakopo, ma Ioane ina ua fetalai atu Iesu e mulimuli atu ia te ia? (Mataio 4:19–22.) Faamalamalama o le tuua loa lea, o lona uiga, e le’i toe faatali. Na faaalia faapefea i la latou tali sa latou talitonu o Iesu o le Keriso? (Ia maitau o le Faaliliuga a Iosefa Samita o le Mataio 4:18 o loo ta’ua ai na ta’uina atu muamua e Iesu ia i latou o ia, a o le’i fai atu e mulimuli atu ia te ia.) Aisea e taua ai lo tatou iloa o Iesu Keriso o le Alo o le Atua?
O le a le mea na ta’u atu e Iesu ia Peteru e fai i lana upega? (Luka 5:4.) Ia faamatala o Simona, Simona Peteru, ma Peteru o le tagata lava e tasi.) Aisea na fesiligia ai e Peteru le faia o le mea na faatonu atu e Iesu na te faia? (Luka 5:5.) O le a le mea na tupu? (Luka 5:6–7.) Na fesoasoani faapefea lenei mea na tupu i le au soo e faateleina ai lo latou faatuatua ia Iesu? (Luka 5:8–10.) O le a le mea na faia e Peteru, Iakopo, ma Ioane e faamaonia ai sa latou faatuatua ia Iesu? (Luka 5:11.) E mafai faapefea ona tatou faaalia ua tatou mulimuli ia Iesu Keriso?
O le a le umi na tatalo ai Iesu a o le’i valaauina ona Aposetolo? (Luka 6:12.) Mata aisea na tatalo ai Iesu a o le’i faia lenei faaiuga taua? O ai na te valaauina Aposetolo i aso nei? (E faatonu e le Tama Faalelagi le Au Peresitene Sili e ala i musumusuga.)
O loo ta’ua e tusitusiga paia le au soo ma Aposetolo. O le a le eseesega o se soo ma se Aposetolo? (Luka 6:13.)

Faamatala o se soo o se tagata lea e mulimuli ia Iesu Keriso. O se Aposetolo o se tasi lea o tagata filifilia e faauuina e fai ma molimau faapitoa a Iesu Keriso i le lalolagi atoa. E molimau atu o Iesu o le Alo o le Atua ma sa toetu mai o ia. Na te faamautinoaina ua folafola atu le talalelei i soo se tulimanu o le lalolagi. (Tagai Mareko 16:15 ma le MFF 107:23.)

Talanoaga ma Fesili e Faatatau I Ai

O oe o se soo po o se Aposetolo?
O le a le uiga o le avea ma se molimau a Iesu Keriso? (Galuega 4:33, 10:39–43; MFF 107:23.) Na faapefea ona molimauina e Peteru o Iesu o le Keriso? (Mataio 16:13–17.) O le a se mea na folafola atu e Iesu ia Peteru ona o le molimau a Peteru? (Mataio 16:18–19.) Fesoasoani ia malamalama tamaiti o “ki o le malo o le lagi” o le pule lea ua iai i Aposetolo e faia ai le galuega a le Tama Faalelagi ma Iesu i le fogaeleele. O le tala i le mauaina e Peteru, Iakopo, ma Ioane o nei ki na folafolaina mai i le Mauga o Liua o le a talanoaina i le Lesona e 15.
E faapefea ona molimauina e Aposetolo o Keriso i aso nei?

Faamatala le tala lea e uiga ia Elder David B. Haight, o se Aposetolo a le Alii:

“O le po o lo’u ma’i, sa ou iloa ai e i ai se mea faigata matautia ua tupu ia te au…..Sa ou aioi ae i lo’u Tama oi le Lagi ia faasaoina lo’u ola mo sina taimi umi atu ou te fai ai Lana galuega, pe afai o Lona finagalo lea.

“A o ou tatalo pea, sa amata ona ou matapogia. O le ‘eē mai o le sailini a le taavale a le falemai o le mea mulimuli lava lena sa ou manatuaina ae ou te le’i matapogia i le tele o aso na sosoo ai.

“Sa oo ina ou le toe lagonaina le tiga ma le pisapisao o tagata. Ae ua ou i ai nei i se mea filemu ma le toamalie; sa matua lologo le fua….

“Sa ou le lagonaina ni leo ae sa ou iloa ua ou i ai i luma o se afioaga paia: I itula ma aso uma na sosoo ai, sa uunaia ai pea lava pea i lo’u mafaufau le misiona e faavavau ma le tulaga faaeaina o le Atalii o le Tagata. Ou te molimau atu o Ia o Iesu le Keriso, o le Alo o le Atua, o le Faaola o tagata uma, o le Togiola o tagata uma, o Lē na te foai mai le alofa mutimutivale e le gata, ma le faamagaloina, o le Sulu ma le Ola o le lalolagi. Sa ou iloa muamua le moni o lena mea—ou te le’i masalosalo lava pe taumateina. Ae ua ou mautinoa lelei nei, e ala i uunaiga a le Agaga i lo’u loto ma lo’u agaga, ia upu moni paia i se auala tulaga ese.

“Sa faaali mai ia te au se vaaiga atoa o Lana galuega i la le tino: Lona papatisoga, Ana aoaoga, Lona faamaloloina o e mamai ma pipili, le faamasinoina le tonu o ia, Lona faasatauroga ma Lona afio a’e i le lagi. Ona sosoo ai lea ma ni vaaiga auiliili maofa o lana galuega i le lalolagi, na faamaonia ai molimau vaaia a tala o tusitusiga paia. Sa aoaoina au, ma sa tatalaina vaaiga o lo’u malamalama e le Agaga Paia o le Atua ina ia mafai ona ou vaai i le tele o mea” (in Conference Report, Oct. 1989, p. 73; po o le Liahona, Ianuari 1990, itulau 30).

Talanoaga ma Fesili e Faatatau I Ai

O ai Aposetolo i le lalolagi i aso nei?

Ta’u atu suafa o i latou i le Au Peresitene Sili ma le Korama a Aposetolo e Toasefululua. Ta’u atu se mea e te iloa e uiga i Aposetolo o loo i ai nei, pe tulimatai atu i se tasi na asiasi atu talu ai nei pe o le a asiasi atu i se taimi lata mai.

Talanoaga ma Fesili e Faatatau I Ai

E faamanuiaina faapefea o tatou olaga pe a tatou faalogo i fautuaga a Aposetolo? (3 Nifae 12:1–2.)

Mataupu o le Faatuatua

Fesoasoani i tamaiti e tauloto le mataupu lona ono o le faatuatua.

Gaoioiga e Faamauoa Ai

E mafai ona e faaaogaina se tasi pe sili atu foi o nei gaoioiga i soo se taimi o le lesona pe faaaoga foi o se toe iloiloga, otootoga, po o se lu’i.

Aveane i le vasega ni ata taitoatasi o le Au Peresitene Sili ma Aposetolo e Toasefululua. Tusi o latou igoa i ni pepa eseese ona fetagofi lea o tamaiti e faafetaui igoa ma ata ona faatulaga loa lea i le faasologa e amata mai i le tagata sinia. Afai e le o maua ni ata taitoatasi, ia faatulaga e tamaiti igoa e amata mai i le tagata sinia. Ia tofu le tamaitiiti ma le avanoa.
Ia lisi ma talanoaina igoa o Aposetolo e Toasefululua na valaauina e Iesu. (Luka 6:12–16.)
Faaaoga lipoti talu ai po o lomiga o le konafesi i mekasini a le Ekalesia, ona sue mai ai lea e tamaiti lauga a Aposetolo. Faatonu e sue mai mea i nei lauga o loo folafola atu ai e Aposetolo a latou molimau faapitoa e uiga ia Iesu Keriso (e masani ona maua i faaiuga o a latou lauga).

Faaiuga

Molimau

Faamatala i tamaiti lou agaga faafetai mo Aposetolo, ma ta’u atu i ai le faamanuiaina o lou olaga ina ua e mulimuli i ana fautuaga. Tuuina atu lau molimau na valaauina e Iesu Aposetolo, e ala mai i le perofeta soifua, e molimau i Lona suafa ma folafola atu le talalelei i le lalolagi atoa.

Tusi Fautuaina e Faitau i le Fale

Ia fautuaina e suesue e tamaiti le Mataio 4:18–22 i le fale e fai ma toe faamanatu o lenei lesona.

Tofi se tamaitiiti e faia le tatalo faaiu.